Jɔ̌bu 42 - MAWUXÓWÉMA

Jɔ̌bu yí gbe ɖɔ émí kún kpé nǔɖé wú ó

¹ Jɔ̌bu ɖɔ nú Mawu Mavɔmavɔ ɖɔ:

² un mɔ ɖɔ a kpé nǔ bǐ wǔ; un tunwun ɖɔ a nɔ bló nǔ e jló we ɔ́ bǐ.

³ A ko ɖɔ: “Mɛ nǎhún wɛ a nyǐ bó ná xo tito ce lɛ́ɛ kpɔ́n kpó xlonɔxó e ɖɔ wɛ a ɖe lɛ́ɛ kpó?” Nǔgbó wɛ a ɖɔ, un kɛ nu dó nǔjíwǔ e hú gǎn mì lɛ́ɛ wú, un ɖɔ xó dó nǔ e wú un ma mɔ nukúnnú jɛ ǎ lɛ́ɛ wú.

⁴ A ko ɖɔ nú mì ɖɔ émí ná ɖɔ xó, ɖɔ nyɛ ní ɖótó émí. A ɖɔ émí ná kan nǔ byɔ́ mì, bɔ nyɛ ná kplɔ́n nǔ émí.

⁵ Káká jɛ fí ɔ́, è ɖɔ xó towe bɔ un se; amɔ̌, din ɔ́, un mɔ we ɖó nukún wú.

⁶ Énɛ́ ɔ́ wú wɛ un jó xó e ɖɔ wɛ un ɖe ɔ́ dó, un jínjɔ́n kɔ́gúdu kpó afín kpó mɛ dó ɖé xlɛ́ ɖɔ un wa nǔ nyi do.

MAVƆMAVƆ BLÓ BƆ NǓ LƐ́ VƆ́ WÁ NYƆ́ NÚ JƆ̌BU

⁷ Ée Mawu Mavɔmavɔ ɖɔ xó énɛ́ lɛ́ɛ nú Jɔ̌bu fó ɔ́, é ɖɔ nú Elifázi Temaninu ɔ́ ɖɔ: “Un sin xomɛ dó we ɖésú, bó sin dó xɔ́ntɔn towe we lɛ́ɛ, ɖó mi ɖɔ xó ce dó jlɔ̌jlɔ́ jí lě e mɛsɛntɔ́ ce Jɔ̌bu ɖɔ gbɔn é ǎ.

⁸ Din ɔ́, mi ná zé nyibúsú tɛ́nwe, agbo tɛ́nwe bó ná yi mɔ mɛsɛntɔ́ ce Jɔ̌bu, lobo ná sá vɔ̌ e è nɔ dó zo ɔ́, ɖó nǔ e mi wa nyi do ɔ́ wú; mɛsɛntɔ́ ce Jɔ̌bu ná xo ɖɛ dó ta mitɔn mɛ. Mi ɖɔ xó ce dó jlɔ̌jlɔ́ jí lě e mɛsɛntɔ́ ce Jɔ̌bu ɖɔ gbɔn é ǎ, amɔ̌, un ná nyɔ́ xomɛ dó éyɛ́ wú, bó ná se ɖɛ tɔn, bó sɔ́ ná wa nǔ e mi wa nyi do ɔ́ sín nǔ xá mi ǎ.”

⁹ Ée Mawu Mavɔmavɔ ɖɔ mɔ̌ ɔ́, Elifázi Temaninu ɔ́ kpó Biludádi Cuwáxinu ɔ́ kpó kpódó Sofáa Naamánu ɔ́ kpó yi bló nǔ e Mawu Mavɔmavɔ ɖɔ nú yě ɔ́. Énɛ́ ɔ́, Mawu Mavɔmavɔ yí ɖɛ e Jɔ̌bu xo ɔ́ kpó xomɛnyínyɔ́ kpó.

¹⁰ Ée Jɔ̌bu xo ɖɛ nú xɔ́ntɔn tɔn lɛ́ɛ fó ɔ́, Mawu Mavɔmavɔ lɛ́ vɔ́ ninɔmɛ tɔn bǐ bló ɖó. Nǔ e Jɔ̌bu ko ɖó ɖ'ayǐ lɛ́ɛ bǐ ɔ́, Mawu Mavɔmavɔ lɛ́ ná ɛ mɔ̌hunkɔtɔn donu we.

¹¹ Jɔ̌bu sín nɔví súnnu lɛ́ɛ kpó nyɔ̌nu lɛ́ɛ kpó, kpódó xɔ́ntɔn tɔn xóxó lɛ́ɛ kpó bǐ wá ɖɔ nǔ dó e, bó ɖu nǔ xá ɛ ɖo xwé tɔn gbe. Yě sa vo xá ɛ; yě wa dó nǔwamɛ gbe e, ɖó nǔgbomɛ e Mawu Mavɔmavɔ sɛ́ dó e lɛ́ɛ wú. Yě mɛ ɖokpó ɖokpó ná ɛ gankwɛ́ ɖokpó ɖokpó, sikálɔkɛ́ ɖokpó ɖokpó.

¹² Đagbe e Mawu Mavɔmavɔ wa nú Jɔ̌bu xwe e wá wá lɛ́ɛ mɛ lɛ́ɛ hú ée é wa n'i ɖ'ayǐ lɛ́ɛ: é ɖó lɛ̌ngbɔ́ děgba atɔn afɔwó (14.000), lǎkúnmí děgba ɖě afɔwó (6.000), nyibú we ɖo bǔ we ɖo bǔ donu afatɔ́n (1.000) kpódó tócí asi afatɔ́n (1.000) kpó.

¹³ Jɔ̌bu lɛ́ ji vǐ súnnu tɛ́nwe, nyɔ̌nu atɔn.

¹⁴ É sun nyǐ vǐ tɔn nyɔ̌nu nukɔntɔn ɔ́ ɖɔ Yemimáxi, bó sun wegɔ́ ɔ́ ɖɔ Kesiyáxi, bó sun atɔngɔ́ ɔ́ ɖɔ Kelɛ́nu-Hapúki .

¹⁵ Đo to ɔ́ bǐ mɛ ɔ́, nyɔ̌nu ɖěbǔ nyɔ́ ɖɛkpɛ sɔ Jɔ̌bu sín vǐ nyɔ̌nu lɛ́ɛ ǎ. Tɔ́ yětɔn má gǔ ɖ'ayǐ nú yě lɔmɔ̌ nɔví yětɔn súnnu lɛ́ɛ ɖɔhun.

¹⁶ Ée nǔ énɛ́ lɛ́ɛ bǐ jɛ wa yi ɔ́, Jɔ̌bu lɛ́ nɔ gbɛ xɔ xwe kantɔn ko (140); é mɔ vǐ, bó mɔ vǐvú vivu káká yi jijimɛ ɛnɛgɔ́ ɔ́ jí.

¹⁷ Jɔ̌bu ko kpo bǐ cóbó kú; é dɔ́ ji ɖésú.