Jɔ̌bu 40 - MAWUXÓWÉMA

Mawu ná xó Jɔ̌bu

¹ Mawu Mavɔmavɔ húzú kpan nukɔn Jɔ̌bu lo, bó kan byɔ́ ɛ ɖɔ:

² “Hwi mɛ e ɖo nǔ dɔn xá nyɛ Nǔbǐwúkpétɔ́ ɔ́ wɛ ɔ́, a sixú mɔ xó ɖé ɖɔ dó xó ce wú a? Hwi mɛ e ɖo xó ce gbɛ́ wɛ ɔ́, na sin nú nǔ e un kan byɔ́ we lɛ́ɛ lo.”

³ Ée Mawu Mavɔmavɔ ɖɔ mɔ̌ ɔ́, Jɔ̌bu yí gbe n'i ɖɔ:

⁴ “Un nyí nǔtí ǎ. Xó tɛ́ un sixú mɔ ɖɔ dó xó towe wú? Un ko bɔ nu ce dó aɖǔ.

⁵ Un ko ɖɔ xó, un sɔ́ ɖó nu ɖé bó ná kɛ ǎ; un ko ɖɔ xó azɔn mɔ̌kpán, xó ɖé sɔ́ kpo ɖo nu ce ǎ.”

Jɔ̌bu, a nǎ sɔ́ hwiɖée ɖó nyɛ Mawu tɛnmɛ wɛ a?

⁶ Mawu Mavɔmavɔ nɔ jɔhɔn syɛ́nsyɛ́n ɖé tɛ́ntin, bó ɖɔ nú Jɔ̌bu ɖɔ:

⁷ Dǒ gǒ dó lanvɛ mɛ súnnu akowunká ɖɔhun; un ná kan nǔ byɔ́ we, bɔ a nǎ kplɔ́n nǔ mì.

⁸ Hwɛ e un ɖɔ ɔ́, a jlǒ ná ɖɔ xó d'é wú jɛ́n wɛ a? A jlǒ ná gblé hwɛ dó ta nú mì, dó ba hwɛjijɔ wɛ a?

⁹ A ɖǒ hlɔ̌nhlɔ́n sɔ mì a? Gbe towe nɔ dó gbe jǐ ɖɔhun, gbe ce ɖɔhun a?

¹⁰ É nyí mɔ̌ hǔn, sɔ́ agbadídó kpódó susu kpó dó ɖó acɔ́, sɔ́ nǔ sa acɔ́ kpó nǔjíwǔ kpó dó.

¹¹ Kɔn xomɛsin towe dó gbɛtɔ́ lɛ́ɛ jí tɔsisa ɖɔhun. Kpɔ́n goyítɔ́ lɛ́ɛ bǐ, bó kɔ́n wi yětɔn.

¹² Kpɔ́n goyítɔ́ lɛ́ɛ bǐ, bó dó winnyá yě. Nyǐnyɛ́ mɛdídá lɛ́ɛ ɖo tɛndo ɖokpó ɔ́ mɛ.

¹³ Bɛ̌ yě bǐ dó kɔ́ glɔ́, sú yě bǐ dó yɔdo mɛ.

¹⁴ A bló mɔ̌ ɔ́, un ná zé alɔ nú we, ɖó hlɔ̌nhlɔ́n nɛ́ e a zǎn, bó ɖu ɖ'é jí ɔ́ wú.

Tɔkanlin ɖaxó ɔ́

¹⁵ Kpɔ́n tɔkanlin ɖaxó ɔ́ , nyɛ wɛ ná ɛ gbɛ, lě e un ná gbɛ hwi lɔmɔ̌ gbɔn é. Gběhan wɛ é nɔ́ ɖu nyibú ɖɔhun.

¹⁶ Kpɔ́n! Hlɔ̌nhlɔ́n tɔn ɔ́, alin tɔn mɛ wɛ é ɖe; gǎn e é nɔ́ dó ɔ́, adɔkan tɔn lɛ́ɛ mɛ wɛ é ɖe.

¹⁷ É nɔ́ dlɛ́n sí tɔn, bɔ é nɔ́ syɛ́n sɛ́dlutín ɖɔhun; kan e ɖo asá tɔn wú lɛ́ɛ ɖě xásá dó ɖě mɛ.

¹⁸ Xú tɔn lɛ́ɛ cí ganvɔkpo mlímlí ɖɔhun, adajaxú tɔn lɛ́ɛ cí gankpo ɖɔhun.

¹⁹ É wɛ nyí azɔ̌ ɖaxó ɖo azɔ̌ ce lɛ́ɛ bǐ mɛ; nyɛ wɛ bló e, nyi wɛ nyí mɛ ɖokpó e sixú gbɛ nǔ n'i é.

²⁰ É nɔ́ mɔ nǔɖuɖu tɔn ɖo fí e sókan ɖe lɛ́ɛ, fí e gběkanlin lɛ́ɛ bǐ nɔ́ ɖú gbojlaka ɖe é.

²¹ Lo ɔ́, é nɔ́ yi mlɔ́ atín sá, é nɔ́ sɔ́ éɖée hwlá cí fánkan e ɖo gba mɛ lɛ́ɛ mɛ.

²² Atín lɛ́ɛ nɔ dó yɛtɛn n'i, pepliyéetín e ɖo tɔ tó lɛ́ɛ nɔ́ lɛ́ lɛ̌ dó e.

²³ Tɔ na bo gba wu ɔ́, ado nɔ hu i ǎ. Judɛ́ɛn tɔ ɔ́ ná bó xo wá gba kɔn nyi nu tɔn mɛ ɔ́, é nɔ́ xosu ǎ, xɛsi nɔ ɖi i ǎ.

²⁴ Ényí nukún tɔn ɖo te jɛ́n wɛ ɔ́, mɛ̌ wɛ ná sixú wlí i, bó tɔ́n awɔntín tɔn?

Kanlin ɖaxó Levyatáan ɔ́

²⁵ A nǎ sixú zé nǔɖuɖu dó mlɛ nu, dó wlí kanlin ɖaxó Levyatáan ná a? A nǎ sixú zé mlɛ dó wlí ɖɛ̌ tɔn ná a?

²⁶ A nǎ sixú tɔ́n awɔntín tɔn bó sɔ́ fántín gbɔn mɛ a? A nǎ sixú zé klɔcée dó tɔ́n aglan tɔn ná a?

²⁷ A vɛdó ɖɔ é ná sa vo nú we wɛ sín a? A vɛdó ɖɔ é ná dó gbe fífá nú we wɛ sín a?

²⁸ É ná jɛ akɔ xá we bó ná nyí kannumɔ towe káká sɔ́yi wɛ a?

²⁹ A nǎ sɔ́ ɛ dó da ayihún ná xɛví ɖɔhun wɛ a? Abǐ a nǎ dó kan ɛ, bó ná zé dó da ayihún xá ɖyɔ̌vǐ mɛsɛntɔ́ towe lɛ́ɛ wɛ a?

³⁰ Đɔnyitɔ́ lɛ́ɛ ná dó gbɛ̌, bó hu sa wɛ a? Axisinɔ lɛ́ɛ na ja má wɛ a?

³¹ A nǎ sixú sɔ́ nǔ i káká bɔ é ná tɔ́n a? Hwǎn e è nɔ dó wlí hweví ɔ́, a nǎ sixú nɔ zě sɔ́ ta tɔn káká bɔ é ná xo zlɛ́ a?

³² Đǒ alɔ wǔ tɔn: a flín lě e é nɔ fun ahwan gbɔn ɔ́, a sɔ́ ná ɖo yiyi wɛ bó ná tɛ́nkpɔ́n gbeɖé ǎ.