Jɔ̌bu 37 - MAWUXÓWÉMA

¹ Nǔ énɛ́ e ɖo jijɛ wɛ ɔ́ zɔ́n bɔ hǔn ce nɔ xo, é nɔ́ xo káká bó nɔ́ ɖibla wɛ́n.

² Mi ɖótó! Mi ɖótó Mawu sín gbe! É cí jǐ wɛ ɖo gbe dó wɛ ɖɔhun!

³ Mawu sɛ́ jǐkɛwun dó bɔ é kɛ wun gbɔn jǐnukúnsin ɔ́ bǐ, é kɛ wun sín fí e ayǐkúngban bɛ́ sín ɔ́ káká yi fí e é kponu ɖó é.

⁴ Énɛ́ ɔ́ gúdo ɔ́, Mawu sín gbe nɔ ɖo nǔ ɖɔ wɛ, bɔ è nɔ se. Mawu nɔ dó gbe kpó susu ɖaxó kpó. Đo tɛn tɔn mɛ tlóló ɔ́, Mawu nɔ lɛ́ sɛ́ jǐkɛwun dó, bɔ è nɔ se Mawu sín gbe.

⁵ Mawu ɖe gbe bɔ jǐ dó gbe, bɔ é kpácá mɛ! Mawu nɔ bló nǔ ɖaxó ɖaxó lɛ́ɛ, bɔ agbɔ̌n nɔ kpé mǐ.

⁶ Mawu ɖe gbe nú kɛ́njí ɖɔ é ní ja kɔn nyi ayǐkúngban jí, é ɖɔ nú jǐ ɖɔ é ní ja, é ɖɔ nú jǐgbó ɖɔ é ní ja.

⁷ Mɔ̌ wɛ Mawu ɖó nǔ e wa wɛ gbɛtɔ́ ɖe lɛ́ɛ bǐ te gbɔn, bónú mɛ bǐ na tunwun nǔ e é wa é.

⁸ Gběkanlin lɛ́ɛ nɔ yi mlɔ́ nǔglɔ́, ɖo adɔ̌tɛn yětɔn.

⁹ Jɔhɔn ɖaxó nɔ́ nyi sín tofɔligbé, bɔ jɔhɔn fífá nɔ́ nyi sín totaligbé.

¹⁰ Mawu nɔ zé funfún tɔn dó bló laglási ná, é nɔ́ bló bɔ sin nɔ syɛ́n gánwúngánwún gan ɖɔhun.

¹¹ Mawu nɔ zé jɔhɔn fífá dó akpɔ́kpɔ́ lɛ́ɛ lɔmɔ̌ mɛ, bó nɔ́ má yě gbɔn fí tɛnmɛ tɛnmɛ, bɔ jǐ nɔ kɛ wun gbɔn akpɔ́kpɔ́ lɛ́ɛ mɛ.

¹² Mawu wɛ nɔ dán akpɔ́kpɔ́ lɛ́ɛ yi aɖisí amyɔ, bɔ yě nɔ́ bló nǔ e é zɔ́n yě lɛ́ɛ bǐ ɖo wɛ̌kɛ́ ɔ́ mɛ lě e é lin gbɔn é.

¹³ Énɛ́ ɔ́, Mawu nɔ́ wa jlǒ tɔn ɖo ayǐkúngban ɔ́ jí: é sixú nyí tó wɛ é jló ná dɔn nú mɛ, é ká sixú nyí ɖagbe wɛ é jló ná wa nú mɛ.

¹⁴ Jɔ̌bu, nǔ énɛ́ lɛ́ɛ ní byɔ́ tó mɛ nú we. Kú hǔn, bó kpɔ́n nǔ ɖagbe ɖagbe e Mawu wa lɛ́ɛ.

¹⁵ Hwenu e Mawu nɔ sɛ́ nǔ énɛ́ lɛ́ɛ dó ɔ́, a tunwun a? A tunwun lě e Mawu nɔ bló bɔ jǐ nɔ kɛ wun ɖo akpɔ́kpɔ́ lɛ́ɛ mɛ gbɔn ɔ́ a?

¹⁶ A lɛ̌ tunwun lě e akpɔ́kpɔ́ lɛ́ɛ nɔ́ nɔ te gbɔn ɖo jɔhɔn mɛ é a? Nǔjíwǔ énɛ́ ɔ́, nǔnywɛ́ kpíkpé jɛ́n è sixú ɖó cóbó tunwun.

¹⁷ Hwenu e jɔhɔn tofɔligbé tɔn ɔ́ ɖo nyinyi dó ayǐkúngban ɔ́ jí wɛ ɔ́, nǔ e a dǒ lɛ́ɛ nɔ́ kó ná yǒzo we dín.

¹⁸ Hwenu e Mawu ɖo jǐnukúnsin é syɛ́n, bó cí ganwékpɛ́n ɖɔhun ɔ́ vlɔ́n wɛ ɔ́, a sixú dó alɔ ɛ a?

¹⁹ A sixú ɖɔ nǔ e mǐ na ɖɔ nú Mawu ɔ́ nú mǐ a? Mǐ sixú ɖɔ xójɔxó ɖě n'i ǎ, ɖó ayi mǐtɔn tɔ́n nukún.

²⁰ Un ja xó ɖɔ gbé ɔ́, è nǎ ɖɔ n'i hwɛ̌ wɛ a? È nǎ yi ɖɔ n'i, bɔ é ná tunwun wɛ a?

²¹ Din tlóló din ɔ́, è ba wěziza kpo, akpɔ́kpɔ́ bú i. Ée jɔhɔn ɖokpó ká nyi kpowun ɔ́, akpɔ́kpɔ́ kɔ́n sín jǐ tɔn.

²² Wěziza siká ɖɔhun ɖé tɔ́n sín totaligbé, hǐnhɔ́n ɖaxó ɖé ɖi lɛ́ lɛ̌ dó Mawu.

²³ É wɛ nyí Nǔbǐwúkpétɔ́, mǐ sixú yi gɔ̌n tɔn ǎ. É nyí nǔ ɖaxó gbɔn hlɔ̌nhlɔ́n tɔn gbla mɛ, é nyí nǔ ɖaxó gbɔn hwɛjijɔ tɔn gbla mɛ. É nɔ́ nyínyɛ́ mɛ e ɖo gbejí bɔ nǔ bǐ vɔ̌ ɖ'é wú ɔ́ ǎ.

²⁴ Énɛ́ ɔ́ wú wɛ gbɛtɔ́ lɛ́ɛ ɖó ná nɔ ɖó sísí n'i. Amɔ̌, é nɔ kpɔ́n yě mɛ e nɔ mɔ yěɖée dó mɔ nǔnywɛ́tɔ́ lɛ́ɛ ɖěbǔ sín jɔ jí ǎ.