Jɔ̌bu 35 - MAWUXÓWÉMA

Elihu ɖɔ xó jɔ xó ɖé kún ɖo Jɔ̌bu nu ó

¹ Elihu lɛ́ ɖɔ:

² A nɔ ɖɔ: “Mawu ɖésú tunwun ɖɔ un nyí hwɛjijɔnɔ!” Xó towe sɔgbe wɛ a vɛdó a?

³ A nɔ lɛ́ ɖɔ: “Un gɔn hwɛ hu ɔ́, ani ka na nyɔ́ nú mì ɖ'é mɛ?” “Étɛ́ Mawu na sɔ́ ɖ'é mɛ?” Xó towe sɔgbe wɛ a vɛdó a?

⁴ Din ɔ́, un ná ná xósin we, un ná yí gbe nú hwi kpó xɔ́ntɔn towe lɛ́ɛ kpó.

⁵ Kpɔ́n jǐnukúnsin ganjí, kpɔ́n akpɔ́kpɔ́ lɛ́ɛ tlítlí: yě yi jǐ hú we.

⁶ Ényí a wa nǔ nyanya ɔ́, Mawu wú wa nǔ dó wɛ a ɖe a? Ée a nɔ fɔ́n bó nɔ́ ɖo hwɛ hu dó hwɛ jí wɛ ɔ́, ani wɛ énɛ́ ɔ́ ɖɔ ɖo wǔ tɔn? É ɖɔ nǔ tí ɖo wǔ tɔn ǎ.

⁷ Ényí a nɔ wa ɖagbe ɔ́, nǔ tɛ́ ná ɛ wɛ a ɖe? Nǔ tɛ́ yí ɖo así towe wɛ é ɖe?

⁸ Alǎnnú e a nɔ wa lɛ́ɛ ɔ́, gbɛtɔ́ towe ɖɔhun lɛ́ɛ wú jɛ́n alǎnnú towe sixú wa nǔ dó. Nǔ jlɔ́jlɔ́ e a nɔ wa lɛ́ɛ ɔ́, gbɛtɔ́ jɛ́n sixú ɖu gbɛ tɔn.

⁹ È ɖo mɛ lɛ́ɛ táfú wɛ dín; yě ɖo azɔn wɛn wɛ. Yě ɖo xó sú wɛ ɖɔ è nǐ wǎ yí émí ɖo acɛgannaganna-kpanúmɛtɔ́ lɛ́ɛ sí.

¹⁰ Lo ɔ́, mɛ ɖěbǔ nɔ kan byɔ́ ɖɔ fítɛ́ Mawu e bló émí ɔ́ ká ɖe a jí ǎ; Mawu e nɔ́ zé awǎjijɛ sín han dó ayi mɛ nú mɛ ɖo zǎn xóxó mɛ ɔ́,

¹¹ Mawu e nɔ́ kplɔ́n mǐ hú kanlin e ɖo ayǐkúngban jí lɛ́ɛ ɔ́, Mawu e nɔ́ ná nǔnywɛ́ mǐ hú xɛ e nɔ zɔn gbɔn jǐxwé lɛ́ɛ ɔ́, mɛ ɖěbǔ nɔ kan byɔ́ ɖɔ fítɛ́ é ká ɖe a jí ǎ.

¹² Mɛ lɛ́ɛ nɔ ɖo xó sú wɛ gbɔn fí bǐ ɖɔ è nǐ wǎ hwlɛ́n émí ɖo gbɛtɔ́ dídá e goyíyí túnflá lɛ́ɛ sí, Mawu ká nɔ kɛ nu d'é mɛ nú yě ǎ.

¹³ Mawu nɔ́ ɖótó xó gbló e sú wɛ yě ɖe ɔ́ nǔgbó ǎ, Nǔbǐwúkpétɔ́ ɔ́ nɔ́ wlí tó wú ǎ.

¹⁴ Nɛ̌ Mawu ká ná ɖótó we gbɔn Jɔ̌bu, hwi mɛ e nɔ ɖɔ émí kún mɔ Mawu ó; émí ɖɔ nǔ e ɖo émí gbo wɛ ɔ́ n'i, é kún ká ɖo nu kɛ wɛ ó.

¹⁵ A nɔ ɖɔ Mawu kún ko ɖo xomɛsin tɔn dó wa nǔ xá mɛ wɛ ó, é kún nɔ ké ya nú sɛ́n tɔn e gba wɛ è nɔ ɖe lɛ́ɛ ó.

¹⁶ Xó e ɖɔ wɛ Jɔ̌bu ɖe lɛ́ɛ bǐ wɛ ɖo jɔhɔn mɛ yi wɛ; é tunwun xó e ɖo nu tɔn mɛ tɔ́n sín wɛ lɛ́ɛ bǐ ǎ.