Jɔ̌bu 31 - MAWUXÓWÉMA

Jɔ̌bu sú ta nú xó tɔn fó: Winnyá ná hu mì ɖo Mawu nukɔn ǎ

¹ Un nu alɛ xá nukún ce ɖɔ un kún ná kpɔ́n ɖyɔ̌vǐ ɖé bó ná lin ná ɖó xó xá ɛ ó.

² Un bló mɔ̌ ɔ́, étɛ́ wɛ un ná ɖó nukún ɖo sɛ́xwé, ɖo Mawu Nǔbǐwúkpétɔ́ ɔ́ e ɖo jǐ aga dɔ̌n ɔ́ sí?

³ Nǔgbó ɔ́, mɛdídá lɛ́ɛ ɔ́, adǎn wɛ nɔ gbo yě, nǔnyanyawatɔ́ lɛ́ɛ ɔ́, nǔ wɛ nɔ́ xá yě.

⁴ Lo ɔ́, Mawu ɔ́, éyɛ́ tunwun nǔ e wa wɛ un ɖe lɛ́ɛ bǐ; afɔ e ɖe wɛ un ɖe lɛ́ɛ bǐ wɛ é nɔ́ xa.

⁵ Un nɔ ɖó adingban wɛ a? Ayi ɖó nukɔn nú mɛ wɛ nɔ myá nukún nú mì a?

⁶ Mawu ní sɔ́ mì ɖó gan ɖagbe jí, bó da; énɛ́ ɔ́, é ná mɔ ɖɔ xomɛvɔ́ wɛ un ɖe.

⁷ Ényí un zɛ sín ali ɖagbe ɔ́ jí hǔn, ényí ayi ce ɖo nǔ e mɔ wɛ nukún ce ɖe lɛ́ɛ wú hǔn, ényí ɖɔ un ɖó alɔ ɖo nǔblíblí ɖé mɛ hǔn,

⁸ mɛ ɖěvo ní ɖu nǔ e un dó ɔ́ sín le, abǐ è nǐ hɔn nǔ e un dó lɛ́ɛ bǐ.

⁹ Ényí un mɔ nyɔ̌nu mɛsi ɖé bɔ é jló mì, bɔ un yi tɔ wu n'i ɖo xwé tɔn nukɔn hǔn,

¹⁰ asi ce ní jɛ mɛ ɖěvo kan nu; è nǐ sɔ́ ɛ dó wa nǔ e jló mɛ ɔ́ ná!

¹¹ Đó nǔ wa gbɔn mɔ̌ ɔ́, hɛ̌n wɛ; nǔ nyanya wɛ bɔ hwɛɖɔtɔ́ lɛ́ɛ nɔ́ dɔn tó tɔn nú mɛ.

¹² Hwɛ e un hu ɔ́ ná nyí myɔ ɖé bó ná fyɔ́ mì bǐ, bó ná hɛn nǔ e un ɖó lɛ́ɛ bǐ gblé.

¹³ Nú mɛsɛntɔ́ ce súnnu abǐ mɛsɛntɔ́ ce nyɔ̌nu kpó nyi kpó ɖó tagba, bɔ un gba acɛ tɔn ɔ́,

¹⁴ hwenu e Mawu ná wá sí te dó nyɛ ɖésúnɔ jǐ ɔ́, nǔ tɛ́ un ka ná wa? Nú Mawu wá jɛ do ba nú mì jí ɔ́, xó tɛ́ un ná ɖɔ?

¹⁵ Mawu ɖokpó ɔ́ wɛ bló mǐ bǐ; é wɛ bló nyɛ kpó yě kpán dó nɔ mǐtɔn mǐtɔn xo mɛ.

¹⁶ Un tɛ nǔ lelenɔ kpɔ́n gbeɖé a? Un flú asúkúsi e ɖo nǔ ɖó nukún wɛ ɖo gɔ̌n ce ɔ́ kpɔ́n gbeɖé a?

¹⁷ Un ɖu nǔ tɛ tɔ́cyɔvǐ kpɔ́n a?

¹⁸ É nyɔ́ wa ɔ́, tɔ́cyɔvǐ ɔ́, sín vǔ ɖokpóó wɛ un nɔ tɔ́ do mɛ n'i, bɔ é nɔ akpá ce bó su; kpɛ wɛ un ɖe, bó jɛ nukún kpé dó asúkúsi wú jí.

¹⁹ Un mɔ lelenɔ ɖo mɛ̌ bó tɛ avɔ ɛ wɛ a? Un mɔ yatɔ́nɔ bó gɔn awu ná ɛ wɛ a?

²⁰ É nyɔ́ wa ɔ́, avɔ e è sɔ́ lɛ̌ngbɔ́ ce lɛ́ɛ sín fún dó lɔn ná ɔ́ wɛ un nɔ ná yě, bɔ yě nɔ́ dó kú nú mì.

²¹ Ényí un gblɔ́n adǎn nú tɔ́cyɔvǐ ɖo hwɛ nukɔn, bó ká tunwun ɖɔ hwɛɖɔtɔ́ lɛ́ɛ bǐ ná nɔ jǐ ce hǔn,

²² abǎ ce ní fɛ́n sín abɔ̌ ce nu; awa ce ní wɛ́n dó awagóli.

²³ Đó un ɖi xɛsi nú tódɔnnúmɛ Mawu tɔn ɖésú; un kpé nǔɖé wú ɖo hlɔ̌nhlɔ́n tɔn nukɔn ǎ.

²⁴ Siká wú wɛ un gán jɛ a? Gan xɔ akwɛ́ wɛ nɔ́ ná ayi j'ayǐ mì a?

²⁵ Un j'awǎ ɖó dɔkun ɖaxó e un jɛ ɔ́ wú ǎ; un j'awǎ ɖó nǔ wɔ̌buwɔ́bú e un wa nǔ bó ɖó lɛ́ɛ wú ǎ.

²⁶ Nú un mɔ hwe hun ganjí, bó mɔ sunhwlé ɖi bó ɖo yiyi wɛ ɖo jǐxwé ɔ́,

²⁷ un nɔ lú dó te wɛ a? Un nɔ zé nǔ e nɛ́ lɛ́ɛ ɖó nǔmɛsɛn tɛnmɛ bó nɔ́ kpa awǒbóbó ná wɛ a?

²⁸ Ényí un wa nǔ gbɔn mɔ̌ ɔ́, hwɛ wɛ é nyí, bɔ hwɛɖɔtɔ́ lɛ́ɛ ná dɔn tó tɔn nú mì, ɖó Mawu e ɖó jǐxwé ɔ́ wɛ un gbɛ́ gbɔn mɔ̌.

²⁹ Ényí awě xo kɛntɔ́ ce ɔ́, é nɔ́ víví nú mì wɛ a? Nǔɖé xá ɛ ɔ́, un nɔ lɔ́n yi jǐ wɛ a?

³⁰ Nyɛ ɔ́, un lɔn bo dó nu kɛntɔ́ ce ɖɔ Mawu ní hu i ǎ; un lɔn gbeɖé bó dó nu i bó dó hu hwɛ ǎ.

³¹ Mɛ̌ wɛ un ma ka ná lan, bɔ é ɖu gɔ́ xo ǎ? Mɛ e un nɔ yí dó xwé gbe lɛ́ɛ bǐ ná ɖe kúnnu tɔn nú mì.

³² Jǒnɔ nɔ dɔ́ kɔ́xo gbeɖé ɖo xwé ce gbe ǎ; hɔn ce ɖo nuvo hwebǐnu nú aligbɔntɔ́ bǐ.

³³ Ényí un hu hwɛ ɔ́, un nɔ zé hwlá gbɛtɔ́ bǐ ɖɔhun wɛ a ? Nǔ e un wa nyi do lɛ́ɛ nɔ́ nɔ nyi ɖokpónɔ xo mɛ wɛ a?

³⁴ Togun mɛ jijɛ dó xɛsi nú mì ǎ. Un na kpɔ́n dó wǎn e mɛ ce lɛ́ɛ ná gbɛ́ nú mì ɔ́ wú, bó gbɛ́ nu kɛ, bó cí xɔ mɛ wɛ a?

³⁵ Áo! Mɛ̌ wɛ ná ba mɛ e ná ɖótó mì ɔ́ xá mì? Xó gǔdo gúdo tɔn ɔ́ nɛ́ un ɖɔ nɛ́: Nǔbǐwúkpétɔ́ ɔ́ ní kɛ nu d'é wú nú mì! Nǔ e kɛntɔ́ wlán dó wǔ ce dó dó hwɛ mì ɔ́,

³⁶ un ná tɛ afɔ ayǐ bó gó, bó zé ɖó abɔ̌ta; un ná zé ɖó ta axɔ́súgbákún ɖɔhun.

³⁷ Un ná ɖó afɔ e un ɖe lɛ́ɛ bǐ sín gbe nú Mawu; un ná yi gɔ̌n tɔn kpó jiɖiɖe kpó.

³⁸ Nú ayǐkúngban ce lɛ́ɛ dó hwɛ mì, nú un dó avǐ nú hwɛn e ɖo ayǐkúngban ce lɛ́ɛ jí lɛ́ɛ,

³⁹ nú un ɖu nǔ e nyɔ́ ɖo ayǐkúngban lɛ́ɛ jí lɛ́ɛ, ma sú axɔ́, bó táfú mɛ e nɔ kpé nukún dó gle lɛ́ɛ wú lɛ́ɛ hǔn,

⁴⁰ wunkan ní wú ɖo ayǐkúngban ɔ́ jí, ayǐkúngban ɔ́ ní má sɔ́ ná ɔ́ji kpó blěe kpó gbeɖé ó. Jɔ̌bu ɖɔ xó ɖo te ɖo fí.