Jɔ̌bu 30 - MAWUXÓWÉMA

Jɔ̌bu kpo ɖo ta sú nú xó tɔn wɛ: Amɔ̌, din ɔ́...

¹ Amɔ̌, din ɔ́, un húzú nǔkiko nú yɔkpɔ́yɔkpɔ́ lɛ́ɛ; ɖ'ayǐ ɖo fí ɔ́, tɔ́ yětɔn lɛ́ɛ sixú nɔ cukú ce lɛ́ɛ tɛ́ntin, bó cɔ́ kanlin ce lɛ́ɛ vɔ́vɔ́ ǎ.

² Mɛ énɛ́ lɛ́ɛ e hlɔ̌nhlɔ́n yětɔn ko ɖo vivɔ wɛ ɔ́, étɛ́ un sixú ɖó nukún ɖo yě sí hwenɛ́nu?

³ Ya kpó xovɛ́ kpó zɔ́n bɔ yě vɔ́ da; yě ɖo nǔɖuɖu ba wɛ ɖo axéko jí, fí e nǔ bǐ gblé ɖe bɔ mɛɖé má ɖe ǎ é.

⁴ Yě nɔ́ ba gběhan e ɖó jɛ lanmɛ lɛ́ɛ ɖo nǔkan mɛ, bó nɔ́ ɖu; jenɛ́ɛtín sín ɖɔ wɛ nyí nǔɖuɖu yětɔn.

⁵ È nɔ nya yě sín gbɛtɔ́ lɛ́ɛ tɛ́ntin; è nɔ sú xó dó ta nú yě ajotɔ́ ɖɔhun.

⁶ Énɛ́ ɔ́ wú ɔ́, yě nɔ́ nɔ tɔdomɛ tɔdomɛ, nu mɛ nu mɛ, abǐ sónu mɛ sónu mɛ.

⁷ Yě nɔ́ ɖo xó sú wɛ tócí ɖɔhun ɖo zunkan tɛ́ntin; yě nɔ́ kplé cí wunkan glɔ́.

⁸ Yě cí gbɛtɔ́ taɖunɔ, gbɛtɔ́ alǎnnúwatɔ́ ɖɔhun, bɔ è nya yě sín to ɔ́ mɛ.

⁹ Amɔ̌, din ɔ́, nyɛ ji han dó wɛ mɛ nɛ́ lɛ́ɛ ɖe, nyɛ wú ɖɔ xó dó wɛ jɛ́n yě nɔ́ ɖe.

¹⁰ Un húzú nǔ gbɛ́hɛn nú yě; yě dǒ gúdo mì; yě nɔ́ tún atán dó nukún mɛ nú mì.

¹¹ Mawu yí hlɔ̌nhlɔ́n ce bó kɔ́n wi ce; énɛ́ ɔ́, yě nɔ́ zé mì dó wa nǔ e jló yě ɔ́ ná.

¹² Yě dó ahwan gbě bó sí te dó jǐ ce, lobo dó hwɛ mì; yě ɖo biba ná zín mì dɛ́ wɛ; yě tɔ́n ahwan mì lobo ná gblé gbɛ dó nú mì.

¹³ Yě sú ali bǐ dó mì, yě ɖo nǔ bǐ wa wɛ bónú má dɔn; yě ba alɔgɔ́ mɛɖé tɔn ǎ.

¹⁴ É cí ɖɔ ali wɛ yě ɖe dó ahohó e lɛ́ lɛ̌ dó xwé ce ɔ́ mɛ, bó gbɔn kɔ́glo lɛ́ɛ tɛ́ntin, bó wá zɔn jǐ ce hawun ɖɔhun.

¹⁵ Xɛsi ɖaxó ɖé jɛ jǐ ce. Wi e ɖo ta ce ɔ́ kɔ́n jɔhɔn wɛ zé ɖɔhun. Nyɔ̌ná e un ɖó ɔ́ gbadó akpɔ́kpɔ́ ɖɔhun.

¹⁶ Amɔ̌, din e un byɔ́ ya mɛ, bɔ tíntɔ́n gló ɔ́, é sɔ́ kpo nǔɖé nú mì zɛ vosisa wú ǎ.

¹⁷ Zǎn mɛ ɔ́, un nɔ mɔ wǔvɛ́ káká yi xú mɛ; wǔvɛ́ e mɔ wɛ un nɔ ɖe ɔ́ nɔ́ ná agbɔ̌n mì ɖěbǔ ǎ.

¹⁸ Mawu wlí awu ce hɛn kpó hlɔ̌nhlɔ́n kpó, é ɖo kɔ ce fyɔ́n wɛ, awukɔ e fyɔ́n mɛ é ɖɔhun.

¹⁹ É sɔ́ mì nyi dó babá mɛ, bɔ un cí kɔ́gúdu ɖɔhun; un cí afín ɖɔhun.

²⁰ Mawu ce, un sú xó ylɔ́ we, bɔ a yǐ gbe nú mì ǎ; un ɖo te ɖo nukɔn towe, bɔ a kpɔ́n jɛ ce jí ǎ.

²¹ A jɛ adǎnú wa xá mì jí; a zě hlɔ̌nhlɔ́n towe bǐ dó ɖo nǔ wa xá mì wɛ.

²² A zé mì dó jǐ aga ɖéé kpó jɔhɔn kpó, bɔ un ɖo lǐnlɔ́n wɛ ɖo jɔhɔn mɛ, jɔhɔn ɖaxó ɖé nɔ́ xo mì dó ɖisí amyɔ.

²³ Un ka tunwun ganjí ɖɔ kútomɛ kplá mì yi wɛ a ɖe, fí e nyí ɖǒkpé nú gbɛtɔ́ e ɖo gbɛ lɛ́ɛ bǐ é.

²⁴ Lo ɔ́, mɛ e ɖo dindɔn wɛ ɔ́ nɔ dlɛ́n alɔ ǎ cé? Mɛ e awě ɖo xixo wɛ ɔ́ nɔ́ sú xó ylɔ́ alɔgɔ́númɛtɔ́ ǎ cé?

²⁵ Un y'avǐ nú mɛ e gbɛdán ɖo gbigbo wɛ lɛ́ɛ ǎ cé? Byɔ̌wá gbɛ̌dónɔ lɛ́ɛ tɔn ɔ́ nɔ́ blá wǔ nú mì hwebǐnu ǎ cé?

²⁶ Nyɔ̌ná ɖó nukún wɛ un ɖe, nyladó ká wá; wěziza ɖó nukún wɛ un ɖe, zǐnflú ká wá cyɔ́n mì.

²⁷ Sín hwenu e un jɛ ya énɛ́ ji jí magbokɔ ɔ́, un sɔ́ vo ɖo nyiɖée mɛ ɖěbǔ ɖěbǔ ǎ.

²⁸ Un byɔ́ aluwɛ mɛ, hwe ce hun ǎ; un sí te ɖo togun mɛ agbawungba lobo sú xó ɖɔ è nǐ wá gɔ́ alɔ nú mì.

²⁹ Un ɖo avǐ ya wɛ avǔn gbě tɔn ɖɔhun, un wá mɔ nyɛɖée ɖo gbětótló mɛ gowungo ɖɔhun.

³⁰ Anyǔ e ɖo wǔ ce ɔ́ xú bǐ bó nɔ́ flé, wǔtu ce nɔ́ hun myɔ káká yi mɔ xú.

³¹ Nǔwamɛ sín nǔ jɛ́n un nɔ xo kpó kanhún kpó; kpete ce ɔ́, gbɛvíhan jɛ́n un nɔ ji d'é mɛ.