Jɔ̌bu 29 - MAWUXÓWÉMA

Jɔ̌bu sú ta nú xó tɔn: Nǔ kó nyɔ́ wá yi mɛ nya!

¹ Jɔ̌bu ɖo nukɔn yi wɛ ɖo xó tɔn mɛ; é ɖɔ:

² Áo! É jló mì ɖésú ɖɔ má lɛ́ nɔ lě e un ko nɔ gbɔn ɖo sun e wá yi lɛ́ɛ mɛ é; Mawu ɖo jǐ ce kpɔ́n wɛ hwenɛ́nu.

³ Hwenɛ́nu ɔ́, zogbɛ́n tɔn nɔ́ hɔ́n dó jǐ ce, wěziza tɔn ɖo ali xlɛ́ mì wɛ ɖo zǐnflú mɛ.

⁴ Hwenu e nyɛ kpó Mawu kpán nyí xɔ́ntɔn, bɔ é nɔ́ cɔ́ xwé ce ɔ́, nǔ wɛ nyɔ́ nú mì hwenɛ́nu.

⁵ Éyɛ́ Nǔbǐwúkpétɔ́ ɔ́ kpo ɖo kpɔ́ xá mì hwenɛ́nu vǐ ce súnnu lɛ́ɛ lɛ́ lɛ̌ dó mì.

⁶ Hwenɛ́nu ɔ́, un jɛ dɔkun káká bɔ é nɔ sa tɔ ɖɔhun; ami nɔ sa tɔ sín amito ce mɛ.

⁷ Nú un xwe tokplétɛn ɖo toxo ɔ́ sín hɔntogbó jí lobo ná jínjɔ́n ayǐ ɔ́,

⁸ mɛ wínnyáwínnyá lɛ́ɛ mɔ mì jǎwe ɔ́, yě nɔ́ jó agɔ dó gǔdo; degénɔ lɛ́ɛ nɔ sí te, bó nɔ́ nɔ te.

⁹ Tomɛxó lɛ́ɛ nɔ́ ɖó xó e ɖɔ wɛ yě ɖe lɛ́ɛ te, bó nɔ sɔ́ alɔ ɖó nu.

¹⁰ Gǎn lɛ́ɛ sín gbe nɔ ɖo do yi wɛ káká bó nɔ́ xwɛ bǐ.

¹¹ Mɛ e ɖo tó ɖó mì wɛ lɛ́ɛ bǐ nɔ kpa mì; mɛ e mɔ mì lɛ́ɛ bǐ nɔ ɖe kúnnu ɖagbe nú mì.

¹² Đó hwenɛ́nu ɔ́, un nɔ hwlɛ́n wamamɔnɔ e ɖo xó sú wɛ ɖɔ è nǐ wǎ gɔ̌ alɔ nú émí lɛ́ɛ gán; un nɔ hwlɛ́n tɔ́cyɔvǐ e má ɖó mɛɖé ǎ lɛ́ɛ gán.

¹³ Mɛ e ɖo nǎ kú wɛ lɛ́ɛ nɔ́ xo ɖɛ dó jǐ ce; un nɔ hun alɔ bó nɔ́ ná nǔ asúkúsi lɛ́ɛ bɔ xomɛ nɔ hun yě.

¹⁴ Hwɛjijɔ nyí awu bɔ un nɔ dó, nǔjlɔ́jlɔ́wiwa nyí awu ɖaxó kpó tablá kpó nú mì.

¹⁵ Nukún wɛ un nyí nú nukúntíntɔ́nnɔ, afɔ wɛ un nyí nú afɔkponɔ.

¹⁶ Hwenɛ́nu ɔ́, un húzú tɔ́ nú yatɔ́nɔ lɛ́ɛ, un nɔ kpé nukún dó jǒnɔ wú.

¹⁷ Lo ɔ́, un nɔ fɛ́n aglan nú adǎkaxotɔ́ lɛ́ɛ, un nɔ yí mɛ e ná vún ɖu wɛ yě ɖe lɛ́ɛ sín nu yětɔn.

¹⁸ Hwenɛ́nu ɔ́, un nɔ ɖɔ dó ayi mɛ ɖɔ: “Un na ɖó alɔ kɔ bó kú jɛ xɔ ce mɛ. Gbɛzán ce ná sukpɔ́ nyɛ̌kɛ́n e ɖo xutó e ɖɔhun .

¹⁹ Gbɛ ce cí atín e sín ɖɔ ɖo tɔ mɛ ɔ́ ɖɔhun; ahǔn nɔ ja dó ama tɔn lɛ́ɛ jí.

²⁰ Susu e un ɖó ɖ'ayǐ ɔ́ ná lɛ́ ɖo jijɛ jí wɛ hwebǐnu, hlɔ̌nhlɔ́n e un nɔ dó wa nǔ na ɔ́ ná syɛ́n gǎ e è tlɔ́ ɔ́ ɖɔhun.”

²¹ Hwenɛ́nu ɔ́, è nɔ ɖótó mì; è nɔ xɔ́ tó mì; un ɖo nǔnywɛ́ ná mɛ wɛ ɔ́, è nɔ wlí tó xó ce wú.

²² Nú un ɖɔ xó fó ɔ́, mɛ ɖěbǔ nɔ mɔ nǔɖé d'é wú ǎ; xó e un ɖɔ ɔ́ nɔ́ wa ɖagbe nú yě, jǐ ja dó gle jí ɖɔhun.

²³ Mɛ lɛ́ɛ nɔ́ nɔ te kpɔ́n mì, lě e è nɔ nɔ te kpɔ́n jǐ é ɖɔhun; un ɖo xó ɖɔ wɛ ɔ́, yě nɔ́ yí xó ce lě e è nɔ hun nu bó nɔ́ yí atán nukɔntɔn e xwetají ɖe ɔ́ dó nu mɛ ɔ́ ɖɔhun.

²⁴ Yě nɔ́ ba ɖɔ má vlɔ́n nukún mɛ dó émí, un ka ko nǔ dó yě ɔ́, yě nɔ́ ɖi ǎ.

²⁵ Un nɔ nɔ yě nu, bó nɔ́ xlɛ́ ali yě; lě e axɔ́sú nɔ ɖo ahwangɔnu tɔn tɛ́ntin ɔ́ ɖɔhun wɛ un cí nú yě; mɛ e nɔ dó gbɔ nú mɛ e ɖo aluwɛ mɛ lɛ́ɛ é ɖɔhun wɛ un cí nú yě.