Jɔ̌bu 27 - MAWUXÓWÉMA

Jɔ̌bu ɖɔ hwɛhutɔ́ kún sixú ylɔ́ Mawu ó

¹ Jɔ̌bu ɖo nukɔn yi wɛ ɖo xó tɔn mɛ; é ɖɔ:

² Un xwlé Mawu nú mi; Mawu e má ba hwɛjijɔ nú mì ǎ ɔ́ wɛ un xwlé nú mi. Un xwlé Nǔbǐwúkpétɔ́ ɔ́ nú mi; Nǔbǐwúkpétɔ́ e zɔ́n bɔ un ɖo wǔvɛ́ mɔ wɛ sɔ lě wɛ ɔ́ un xwlé nú mi.

³ Un xwlé Mawu ɖɔ ényí gbɛ kpɛɖé kpo ɖo wǔ ce jɛ́n wɛ ɔ́, ényí funfún e Mawu na mì ɔ́ kpo ɖo dǐndín wɛ jɛ́n wɛ ɔ́,

⁴ xó e má sɔgbe ǎ ɔ́ ɖěbǔ ná tɔ́n sín nu ce mɛ gbeɖé ǎ; un ná ɖó adingban gbeɖé ǎ.

⁵ Nú un ɖɔ hwɛ mitɔn jɔ hǔn, heelú mì; un ná ɖo ɖiɖɔ wɛ káká yi kú ɖɔ xomɛvɔ́nɔ wɛ un nyí.

⁶ Un ɖɔ bó tɛ afɔ jí ɖɔ lě e un nɔ zán gbɛ gbɔn ɔ́ sɔgbe, un ɖo kɔ na lɛ́ sín xó e ɖɔ wɛ un ɖe ɔ́ gúdo wɛ ǎ. Ayi ce xo hun xá mì ɖo gbɛ e zán wɛ un ɖe lɛ́ɛ ɖěbǔ mɛ ǎ.

⁷ È ní wa nǔ xá kɛntɔ́ ce, lě e è nɔ wa nǔ xá mɛdídá gbɔn é; è nǐ wa nǔ xá mɛ e húzú kpan nukɔn mì ɔ́, lě e è nɔ wa nǔ xá mɛ nyanya gbɔn é.

⁸ Mɛ e ma nɔ sí Mawu ǎ ɔ́, hwenu e Mawu na sɛ́n kan nú gbɛ tɔn ɔ́, hwenu e é ná yí lǐndɔ̌n tɔn sín así tɔn ɔ́, nǔ tɛ́ é ká ná lɛ́ ɖó nukún?

⁹ Adǎn wa jɛ gbigbo e jí ɔ́, Mawu nɔ se xósúsú tɔn a?

¹⁰ Mɛ nyanya ɔ́ sixú mɔ gbɛ víví ɖo Nǔbǐwúkpétɔ́ ɔ́ mɛ a? É nɔ́ sixú sú xó ylɔ́ Mawu hwebǐnu a?

¹¹ Nyɛ ɔ́, un ná xlɛ́ mi lě e Mawu nɔ jlɛ́ nǔ gbɔn ɔ́, un ná zé tito Nǔbǐwúkpétɔ́ ɔ́ tɔn lɛ́ɛ hwlá dó mi ǎ.

¹² Mi ɖésúnɔ ɔ́, mi ma mɔ ɖó mɔ̌ a? Bɔ étɛ́wú wɛ mi ka ɖo xó gbló ɖɔ wɛ mɔ̌?

Nǔnyɔ́númɛ wǎyiwáyi

¹³ Kanta e Mawu zě ɖ'ayǐ nú mɛdídá lɛ́ɛ ɖíe, nǔ e Nǔbǐwúkpétɔ́ ɔ́ zé ɖó te nú mɛ nyanya lɛ́ɛ ɖíe:

¹⁴ Vǐ yětɔn lɛ́ɛ ɔ́, hwenu e yě ná sukpɔ́ ɔ́, ahwan na hu yě. Vǐ lɛ́ɛ ná ba nǔɖuɖu kpo.

¹⁵ Yě mɛ e ná gan ɖ'é mɛ lɛ́ɛ ɔ́, jɛmɛjí wɛ ná vívá kún yětɔn; asúkúsi yětɔn lɛ́ɛ ká ná ví yě ǎ.

¹⁶ Mɛdídá lɛ́ɛ ná bó kplé kpatágan kɔ́gúdu ɖɔhun ɔ́, yě ná bó bɛ́ avɔ kplé kɔ́ nyinya ɖɔhun ɔ́,

¹⁷ yě ní ɖo kplékplé wɛ bó! Gbɛtɔ́ hwɛjijɔnɔ ɔ́ wɛ ná nɔ fɔ yě dó, gbɛtɔ́ ayijlɔ́jlɔ́nɔ wɛ ná ɖu kpatágan ɔ́ sín gǔ.

¹⁸ Xɔ e mɛdídá lɛ́ɛ gbá ɔ́ syɛ́n ǎ; é cí azava e sá glecɔ́tɔ́ nɔ́ nɔ ɔ́ ɖɔhun.

¹⁹ Mɛdídá nɔ́ mlɔ́ ayǐ kpó dɔkun kpó; azɔn gǔdo gúdo tɔn e é ká ná nyí dɔkunnɔ ɔ́ nɛ́. É wá fɔ́n ɔ́, é sɔ́ nɔ́ mɔ nǔɖé ǎ.

²⁰ Xɛsi ɖaxó ɖé nɔ jɛ jǐ tɔn, tɔ ɖi sin wá gba mɛ ɖɔhun; axásáxásá jɔhɔn nɔ wá zé e yi zǎn xóxó mɛ.

²¹ Jɔhɔn zǎnzǎnhwe jí tɔn nɔ zé e bó nɔ́ dɔn ɛ yi zɔ bǐ; jɔhɔn ɔ́ nɔ xo e sɔ́ vawun sín nɔtɛn tɔn.

²² Mawu kú nǔbláwǔ nú mɛdídá lɛ́ɛ ǎ. É ɖo gǎ da dó yě wɛ káká, bɔ yě gbɔ bó hɔn.

²³ È mɔ adǎn ɖo mɛdídá gbo wɛ mɔ̌, lobo ɖɔ acɔnkwín. È mɔ tɛn e mɛ yě ɖe ɔ́, lobo ɖú ahwannɔwe.