Jɔ̌bu 26 - MAWUXÓWÉMA

Jɔ̌bu yí xó bó ɖɔ alɔ e dó émí wɛ Biludadi ɖe ɔ́, nǔ yǎyá kpowun wɛ

¹ Ée Jɔ̌bu sín xɔ́ntɔn Biludadi ɖɔ xó ɔ́, Jɔ̌bu yí xó, bó ɖɔ:

² A ka nyɔ́ alɔ dó mɛ e ma ɖó gǎn ǎ é ɖésú mɛ! A nyɔ́ sɔ hɛn mɛ e ma ɖó gǎnjɛwú ǎ é tawun!

³ A nɔ kplɔ́n nǔ ɖagbe mɛ e ma bí ǎ é mɛ! A nɔ ɖe lě e a ɖǒ nǔnywɛ́ gbɔn ɔ́ xlɛ́ mɛ lóóo!

⁴ Mɛ̌ ɖɔ xó énɛ́ lɛ́ɛ ná wɛ a ka ɖe? Mɛ̌ ká nɔ zé xó énɛ́ lɛ́ɛ dó ayi mɛ nú we?

Mawu kpa acɛ gbɔn fí bǐ

⁵ Mɛkúkú lɛ́ɛ nɔ́ sísɔ́ ɖo xu glɔ́, mɛkúkú lɛ́ɛ nɔ́ sísɔ́ ɖo nǔ e ɖo xu mɛ lɛ́ɛ bǐ glɔ́.

⁶ Đó kútomɛ ɔ́ ɖo wěxo ɖo Mawu nukɔn, avɔ ɖěbǔ cyɔ́n ɛ ǎ.

⁷ Mawu vlɔ́n jǐxwé sín taligbé nyi gblǒlǒ mɛ, é hɛn ayǐkúngban ɔ́ ɖó te; é ká sɔ́ ɖó nǔ ɖ'é jí ǎ.

⁸ É nɔ́ hɛn sin ɖó te ɖo akpɔ́kpɔ́ lɛ́ɛ mɛ, akpɔ́kpɔ́ lɛ́ɛ ká nɔ́ wɔ ɖó sin ɔ́ sín kpinkpɛn wú ǎ.

⁹ É nɔ́ cyɔ́n nǔ dó axɔ́súzinkpo tɔn, é nɔ́ dɔn akpɔ́kpɔ́ cyɔ́n axɔ́súzinkpo tɔn.

¹⁰ É zɛ xwi tobotobo ɖokpó ɖó tɔ lɛ́ɛ nukún mɛ, bɔ é nyí dogbó ɖo wěziza kpó zǐnflú kpó tɛ́ntin.

¹¹ Mawu wa adǎn lě ɔ́, jǐnukúnsin sín dotín lɛ́ɛ nɔ́ dán wǔ, bɔ jǐnukúnsin nɔ́ sísɔ́.

¹² Mawu nɔ́ zé hlɔ̌nhlɔ́n tɔn dó ɖu ɖo xu jí; é nɔ́ zé nǔnywɛ́ tɔn dó gba nǔdábaɖa Hlaxávu ná.

¹³ Funfún tɔn za jǐnukúnsin, bɔ é mɛ́; é zé alɔ dó tɔ́n adɔ Levyatáan dan gɔ́ndɔ́n gɔ́ndɔ́n ɔ́.

¹⁴ Nǔwiwa Mawu tɔn kpɛɖé nɛ́ é ɖe xlɛ́ nɛ́, zǐngídi tɔn kpɛví ɖé wɛ mǐ se. Nú hlɔ̌nhlɔ́n tɔn ká wá dó gbe jǐ ɖɔhun ɔ́, mɛ̌ ká ná sixú se nǔ jɛ mɛ?