Jɔ̌bu 23 - MAWUXÓWÉMA

Jɔ̌bu ɖɔ Mawu ɖɔ émí ní má kɛ nu ó

¹ Ée Jɔ̌bu sín xɔ́ntɔn Elifázi ɖɔ xó ɔ́, Jɔ̌bu yí xó, bó ɖɔ:

² Un bló nǔ bǐ bó ná gɔn azɔn wɛn cóbɔ é gló; lo ɔ́, vo e sa wɛ un kpo ɖe égbé din ɔ́ fɔ́n bó ɖo jijɛ jí wɛ.

³ Áo có! Ényí un tunwun fí e un ná mɔ Mawu ɖe ɔ́ wɛ ɔ́, é ná nyɔ́; ényí un sixú hun káká yi nɔtɛn tɔn wɛ ɔ́, é ná nyɔ́.

⁴ Un ná ɖe xlɛ́ ɛ ɖɔ hwɛ ce jɔ; un ná ɖɔ xó e ɖo xo ce mɛ ɔ́ bǐ dó ɖe xlɛ́ ɛ ɖɔ hwɛ ce jɔ.

⁵ Un ná kpɔ́n lě e é ná yí gbe nú mì gbɔn é; un ná se xó e é ná ɖɔ nú mì é.

⁶ É ná zán hlɔ̌nhlɔ́n tɔn bǐ dó wa nǔ xá mì wɛ a? Éeǒ, éyɛ́ ná kú hǔn bó ɖótó mì vɔ́vɔ́.

⁷ Énɛ́ ɔ́, é ná tunwun ɖɔ mɛ e ɖo nǔ dɔn xá émí wɛ ɔ́, gbɛtɔ́ gbejínɔtɔ́ wɛ; bɔ éyɛ́ mɛ e nyí hwɛɖɔtɔ́ ce ɔ́, ná gbo hwɛ nú mì azɔn ɖokpó, bɔ xó ná fó.

⁸ Lo ɔ́, un yi zǎnzǎn hwe jí ɔ́, un nɔ mɔ ɛ ǎ, un yi gbada hwe jí ɔ́, un nɔ mɔ ɛ ǎ.

⁹ Nǔɖé wa wɛ é ká ɖe ɖo totaligbé a? Un ma ka mɔ ɛ ɖo dɔ̌n nɛ́! Tofɔligbé wɛ é ká sɔ́ éɖée hwlá dó a? Un ma ka lɛ́ mɔ ɛ ɖo dɔ̌n nɛ́!

¹⁰ Nǔ ɖo mɔ̌ có, é tunwun ali e jí un ɖe ɔ́ ganjí; é dó mì kpɔ́n ɔ́, un ná tɔ́n wǔ ɖiɖi aji ɖɔhun, un ná tɔ́n siká e è zě gbɔn myɔ nu, bo ɖe nǔ kwíji lɛ́ɛ sín mɛ é ɖɔhun.

¹¹ Un nɔ tɛ afɔ afɔdo tɔn lɛ́ɛ mɛ; fí e é gbɔn ɔ́ wɛ un nɔ gbɔn; un zɛ ali ǎ.

¹² Nǔ e é zɔ́n lɛ́ɛ ɔ́, un gbɛ́ ɖě ǎ. Nǔ e é ɖɔ ɔ́ bǐ ɖo ayi ce mɛ; un wɔn ɖě ǎ.

¹³ Amɔ̌, éyɛ́ ɔ́, é húzú kpɔ́n ǎ; mɛ̌ wɛ sixú sú ali dó e? Nǔ e jló e ɔ́ wɛ é nɔ́ wa.

¹⁴ Nǔ e é lin dó wǔ ce ɔ́ wɛ é ná wa; é lɛ́ to nǔ gěgé ɖěvo ɖ'ayǐ nú mì.

¹⁵ Nǔ e wú gɔ̌n tɔn yiyi nɔ dó xɛsi nú mì ɔ́ nɛ́; nú un ɖo nukún dó nǔ e é hɛn ɔ́, é ná wá ɔ́ mɛ kpɔ́n wɛ ɔ́, un nɔ ɖi xɛsi n'i.

¹⁶ Mawu gbɔ́jɔ́ kanmɛ nú mì, Nǔbǐwúkpétɔ́ ɔ́ dó xɛsi nú mì titewungbe.

¹⁷ Zǎn kú, có un xwɛ ǎ, Mawu dɔn mì dó ablu mɛ, có un nɔ abwɛ̌ ǎ .