Jɔ̌bu 22 - MAWUXÓWÉMA

¹ Elifázi Temaninu ɔ́ yí xó bó ɖɔ:

² Gbɛtɔ́ sixú jɛ alɔ nú Mawu a? Gbeɖé kpɔ́n! Gbɛtɔ́ e ɖó nǔnywɛ́ ɔ́, é ɖésúnɔ jɛ́n é sixú jɛ alɔ ná.

³ Ényí a nyǐ nǔjlɔ́jlɔ́watɔ́ ɔ́, a nǐ wɛ ná tɔ́n ɖ'é mɛ nú Nǔbǐwúkpétɔ́ ɔ́? Nú è ma nɔ mɔ nǔjɛdo ɖěbǔ ɖɔ dó wǔ we ǎ ɔ́, le tɛ́ wɛ ɖ'é mɛ n'i?

⁴ A vɛdó ɖɔ sísí e émí ɖó n'i ɔ́ wú wɛ é ɖo tó dɔn nú émí wɛ, bó ɖo hwɛ ɖɔ xá émí wɛ sín a?

⁵ Éeǒ, nǔ tobutóbú e a nɔ wa nyi do lɛ́ɛ, agɔ e a nɔ fɔ́n bó nɔ ɖo jijɛ wɛ lɛ́ɛ sín tó dɔn nú we wɛ é ɖe.

⁶ A nɔ yí nǔɖé lɛ́ɛ ɖó gbanu ɖo nɔví towe lɛ́ɛ sí nǔɖé ma sín nǔɖé nu; a nɔ yí awu e ɖo kɔ yětɔn ɔ́ bó nɔ jó yě nyi wěxo.

⁷ A nɔ tɛ sin mɛ e sinnugblá ɖo sinsin wɛ é, a nɔ tɛ nǔɖuɖu mɛ e xovɛ́ ɖo sinsin wɛ é.

⁸ A jǒ gǎnhúnǔtɔ́ lɛ́ɛ dó bɔ yě yǐ to ɔ́, goyítɔ́ lɛ́ɛ klá jɛ to ɔ́ nú.

⁹ A nɔ nya asúkúsi lɛ́ɛ asígbá alɔgbá. Nǔ kpɛ e kpo nú tɔ́cyɔvǐ lɛ́ɛ ɔ́, a nɔ lɛ́ yí sín yě sí.

¹⁰ Énɛ́ ɔ́ wú wɛ è ɖǒ mɔ lɛ́ lɛ̌ dó we, bɔ xɛsi ɖaxó ɖé jɛ jǐ towe ajijimɛ.

¹¹ Zǐnflú gɔngɔn ɖé vun blá we, bɔ a sɔ́ mɔ nukúnnú ǎ. Tɔ ɖi sin wá gba we.

¹² È tunwun ganjí ɖɔ Mawu ɖo jǐ aga. Kpɔ́n lě e sunví lɛ́ɛ yi jǐ sɔ́ é! Yě yi jǐ ɖésú.

¹³ Bɔ hwɛ ɔ́, a nɔ ɖɔ: “Ani wɛ Mawu ká tunwun? É sixú nɔ akpɔ́kpɔ́ lɛ́ɛ gúdo dɔ̌n bó ɖɔ hwɛ xá mǐ a?

¹⁴ Akpɔ́kpɔ́ bú i, é sixú mɔ nǔ ɖěbǔ ǎ. Jǐxwé dɔ̌n jɛ́n é sixú lɛ́ lɛ̌ gbɔn.”

¹⁵ Étɛ́! A jlǒ nǎ gosín ali xóxó e nǔnyanyawatɔ́ lɛ́ɛ nɔ gbɔn ɔ́ jí ǎ wɛ a?

¹⁶ Kú wá xo yě sɔ́ yi ajijimɛ, lě e ayǐsun nɔ́ wá mu dǒ zin dɛ́ ajijimɛ ɔ́ ɖɔhun.

¹⁷ Yě nɔ́ ɖɔ xó dó Mawu wú ɖɔ é ní gbɔ nú émí; Nǔbǐwúkpétɔ́ wɛ é nyí nǔgbó, amɔ̌, étɛ́ wɛ é sixú wa nú émí a jí.

¹⁸ Nǔ ɖo mɔ̌ có, Mawu blǒ bɔ hɛ̌nnu yětɔn lɛ́ɛ jɛ dɔkun. Un ná xwedó nǔkplɔ́nmɛ mɛdídá lɛ́ɛ tɔn gbeɖé ǎ.

¹⁹ Nǔjlɔ́jlɔ́watɔ́ lɛ́ɛ ná mɔ lě e nǔ gblé dó mɛdídá lɛ́ɛ gbɔn ɔ́, bó ná j'awǎ, xomɛvɔ́nɔ lɛ́ɛ ná ko yě, bó ná nɔ ɖɔ:

²⁰ “Kɛntɔ́ mǐtɔn lɛ́ɛ sín kún nɛ́ è sú dó nɛ́. Nǔ e yě ɖǒ lɛ́ɛ nɛ́ myɔ fyɔ́ bǐ nɛ́.”

²¹ Hǔn bo dó hwɛ gbɔ xá Mawu bó ná mɔ vivo, a blǒ mɔ̌ ɔ́, a nǎ ɖu gbɛ.

²² Đǒtó nǔ e kplɔ́n we wɛ é ɖésúnɔ ɖe ɔ́; hɛn xó tɔn lɛ́ɛ dó ayi mɛ.

²³ Ényí a lɛ̌ kɔ wá Nǔbǐwúkpétɔ́ ɔ́ gɔ́n ɔ́, é ná lɛ́ sɔ́ we ɖó lě e a ɖe gbɔn ɖ'ayǐ é; ɖe nǔ nyanya bǐ sín xwé towe gbe.

²⁴ Nyi siká towe dó kɔ́gúdu mɛ; jǒ siká akú towe dó nyi awǐnnya e ɖo tɔsisa mɛ lɛ́ɛ tɛ́ntin.

²⁵ Nǔbǐwúkpétɔ́ ɔ́ ná nyí siká towe, é ná nyí kpatágan towe.

²⁶ Énɛ́ ɔ́, a nǎ mɔ awǎjijɛ ɖo Nǔbǐwúkpétɔ́ ɔ́ mɛ; nukúnɖíɖó towe bǐ ná nɔ Mawu wú.

²⁷ A nǎ sa vo n'i, bɔ é ná se ɖɛ towe, a nǎ ɖe akpá e a dǒ lɛ́ɛ.

²⁸ A zě nǔɖé bó ná wa ɔ́, a nǎ mɔ nu tɔn. Ali ná hun nú we.

²⁹ Gbɛtɔ́ ná ba ná dó winnyá we; lo ɔ́, a nǎ ɖɔ dó ayi mɛ ɖɔ: “Un ná kpan akɔ́n,” ɖó Mawu nɔ́ gɔ́ alɔ nú mɛ e nɔ sɔ́ éɖée hwe é.

³⁰ É ná hwlɛ́n mɛ e hu hwɛ ɔ́ lɔ gán. Gbɛ ɖagbe e zán wɛ a ɖe ɔ́ ná zɔ́n bɔ mɛ énɛ́ ɔ́ ná mɔ hwlɛngán.