Jɔ̌bu 21 - MAWUXÓWÉMA

Jɔ̌bu ɖɔ nǔ nɔ nyɔ̌ nú mɛdídá nǔgbó

¹ Ée Jɔ̌bu sín xɔ́ntɔn Sofáa ɖɔ xó ɔ́, Jɔ̌bu yí xó, bó ɖɔ:

² Mi ɖótó xó e ɖɔ gbé un ja ɔ́ céɖécéɖé; un sɔ́ ɖo gbɔ dó nú mɛ mitɔn ɖě ba wɛ hú mɔ̌ ǎ.

³ Mi kɛnklɛ́n ná xó mì. Sofáa, nú un ko ɖɔ b'ayǐ ɔ́, a sixú wá ɖɔ slǎmɛ xó ce wú.

⁴ Gbɛtɔ́ wɛ un dó hwɛ din a? Éeǒ! Énɛ́ ɔ́ wú wɛ un má sixú kú hǔn ǎ.

⁵ Mi kpɔ́n nǔ e ɖo wiwa mì wɛ ɔ́, nú mi tunwun wɛ ɔ́, agbɔ̌n wɛ ná kpé mi; alɔ jɛ́n mi ná sɔ́ ɖó nu, mi ná sixú kɛ nu ǎ.

⁶ Nyɛ ɖésúnɔ ɔ́, nú un ɖo nǔ e ɖo jijɛ dó jǐ ce wɛ ɔ́ kpɔ́n wɛ ɔ́, ado nɔ hu mì, bɔ un nɔ sísɔ́.

⁷ Étɛ́wú mɛdídá lɛ́ɛ ká kpo ɖo gbɛ? Aniwú xwe ɖo xwe jí jɛ nú yě wɛ, bɔ acɛ yětɔn lɛ́ ɖo jijɛ jí wɛ?

⁸ Vǐ yětɔn lɛ́ɛ ɖo kpɔ́ xá yě bó ɖo dǒ lí wɛ ɖo nukún yětɔn mɛ; vǐvú yětɔn lɛ́ɛ ɖo gbɛ ɖu wɛ ɖo akpá yětɔn.

⁹ Yě vo ɖo xwé yětɔn lɛ́ɛ gbe; xɛsi ɖěbǔ ɖe ǎ. Mawu sín bǎ nɔ jɛ yě wǔ ǎ.

¹⁰ Nyibúsú yětɔn lɛ́ɛ nɔ́ ɖo ava dó nú nyibú asi yětɔn lɛ́ɛ wɛ, bɔ yě nɔ́ ɖo xo mɔ wɛ hwɛhwɛ; nyibú yětɔn lɛ́ɛ nɔ́ lun vǐ ǎ.

¹¹ Yě nɔ́ jó vǐ yětɔn dó bɔ yě nɔ́ ɖo jǐ lɔ́n yi wɛ gbɔ̌ ɖɔhun; vǐvú yětɔn lɛ́ɛ nɔ́ ɖo ayihún da wɛ.

¹² È nɔ xo hǔn kpó kanhún kpó dó han yětɔn mɛ; è ɖo kpete kún wɛ, bɔ yě ɖo sise wɛ ɔ́, é nɔ́ víví nú yě.

¹³ Yě nɔ́ ɖu gbɛ yětɔn ganjí, bó nɔ́ yi yɔ ɖo fífá mɛ.

¹⁴ Mɛdídá lɛ́ɛ ká kó ɖɔ nú Mawu ɖɔ: “Nǎ agbɔ̌n mǐ, mǐ ba ná tunwun nǔ e jló we ɔ́ ǎ.

¹⁵ Hwi mɛ e è nɔ ylɔ́ ɖɔ Nǔbǐwúkpétɔ́ ɔ́, étɛ́ wɛ a nyí bɔ mǐ nǎ sɛn we? Mǐ sa vo nú we ɔ́, étɛ́ ká ná nyɔ́ nú mǐ ɖ'é mɛ?”

¹⁶ Nǔ ɖo mɔ̌ có nyɔ̌ná yětɔn ɖo alɔ yě ɖésúnɔ tɔn mɛ ǎ; énɛ́ wú ɔ́, un ná xwedó nǔkplɔ́nmɛ mɛdídá lɛ́ɛ tɔn gbeɖé ǎ.

¹⁷ Mǐ ká mɔ bɔ gbɛ yětɔn cí viwun zogbɛ́n ɖɔhun kpɔ́n gbeɖé a? Nǔ xá yě bɔ mǐ mɔ kpɔ́n gbeɖé a? Mawu sin xomɛ dó yě bɔ mǐ mɔ kpɔ́n a?

¹⁸ Jɔhɔn zé yě nǔywɛ́ ɖɔhun, bɔ mǐ mɔ kpɔ́n a? Axásáxásá jɔhɔn dó alɔ yě mɛ, afúntúntún ɖɔhun bɔ mǐ mɔ kpɔ́n a?

¹⁹ Mi nɔ ɖɔ tó dɔn nú mɛ Mawu tɔn ɖo ayǐ nú vǐ yětɔn lɛ́ɛ; Yě ɖésúnɔ wɛ Mawu ló kó dɔn tó ná bónú yě ná tunwun nǔ e ɖ'é mɛ é.

²⁰ Yě ɖésúnɔ wɛ nǔ ɖó ná xá; yě ɖésúnɔ ní dó xomɛsin Nǔbǐwúkpétɔ́ ɔ́ tɔn ɖɛ̌.

²¹ Đó nú yě wá kú ɔ́, nǔɖé sɔ́ nɔ́ kan yě ɖo nǔ e ɖo te kpɔ́n vǐ yětɔn lɛ́ɛ ɔ́ mɛ ǎ.

²² Nǔ e Mawu na wa ɔ́, è nǎ lɛ́ kplɔ́n ɛ wɛ a? Éyɛ́ mɛ e nɔ ɖɔ hwɛ xá nǔɖíɖó e ɖo sɛ́xwé lɛ́ɛ ɔ́, è na lɛ́ kplɔ́n ɛ nǔ énɛ́ lɛ́ɛ wɛ a?

²³ Yě mɛ ɖé lɛ́ɛ tíin bɔ nyɔ̌ná mɛ wɛ yě nɔ́ lɛ́ kú jɛ; nǔlinkpɔ́n ɖé nɔ́ ɖo ayi mɛ nú yě ǎ; ayi yětɔn nɔ́ j'ayǐ ganjí.

²⁴ Nǔɖuɖu nɔ́ kpé yě; hunsin yětɔn nɔ́ ɖo gbɛ.

²⁵ Mɛ ɖé lɛ́ɛ ká tíin bɔ gbɛ yětɔn nɔ́ blá wǔ; yě nɔ́ mɔ gbɛ sín víví ɖěbǔ cóbó nɔ́ kú ǎ.

²⁶ Yě mɛ gbɛ̌ta we énɛ́ lɛ́ɛ bǐ wɛ ka nɔ wa yi kɔ́ glɔ́, bɔ agbaza yětɔn nɔ́ ji wě.

²⁷ Un tunwun nǔ e lin wɛ mi ɖe lɛ́ɛ; tamɛ e lin dó wǔ ce wɛ mi ɖe lɛ́ɛ ɔ́, un tunwun bǐ.

²⁸ Mi ná kanbyɔ́ mì ɖɔ: “Gǎnhúmɛtɔ́ lɛ́ɛ sín xwé ɔ́, mɛdídá lɛ́ɛ sín nɔtɛn ɔ́, nɛ̌ xó yětɔn wá fó gbɔn? È sɔ́ mɔ donu yětɔn ǎ.”

²⁹ Mi kan xó byɔ́ alitanu lɛ́ɛ ǎ cé? Nǔ e yě ɖɔ nú mi ɔ́ mi ɖi ǎ wɛ a?

³⁰ Nyladó zán gbé ɔ́, nǔɖé nɔ wa mɛdídá ǎ, xomɛsin Mawu tɔn nɔ́ jó e dó wǔ ɖíɖí aji ɖɔhun.

³¹ Mɛ̌ ká nɔ́ glá kpan nukɔn mɛdídá, bó nɔ́ ɖɔ nǔ e é wa nyi do lɛ́ɛ n'i? Nǔ e é wa nyi do ɔ́, mɛ̌ wɛ sixú dɔn tó tɔn n'i?

³² Nú éyɛ́ kú ɔ́, è nɔ sɔ́ yi ɖi, bó nɔ́ cɔ́ yɔdo tɔn.

³³ Mɛ bǐ nɔ jɛ cyɔ tɔn gúdo; ahwan wɔ̌buwɔ́bú nɔ́ nɔ nukɔn nú cyɔ tɔn; yɔdo e mɛ è sɔ́ ɛ mlɔ́ ɔ́ lɔ nɔ nyɔ́ xomɛ dó wǔ tɔn.

³⁴ Gbɔ tɛ́ dó nú mì wɛ mi ka ɖe din? Xó ɖɔ dó jɔhɔn mɛ wɛ mi ɖe! Xó e ɖɔ wɛ mi ɖe lɛ́ɛ bǐ wɛ nyí adingban.