Jɔ̌bu 20 - MAWUXÓWÉMA

Sofáa yí xó bó ɖɔ adǎn e nɔ gbo mɛdídá lɛ́ɛ é

¹ Sofáa Naamánu ɔ́ yí xó bó ɖɔ:

² Ayi ce ɖo cɔcɔ dó nú mì wɛ ɖɔ má kɛ nu, nu ce ɖo hihihíhí wɛ dín.

³ Hwɛ e dó mɛ wɛ a ɖe nɛ́ ɔ́ ɖo akpɔ ɖó nú mì wɛ; amɔ̌, un tunwun nu e un ná kɛ é.

⁴ A tunwun din ǎ mɛ: sín do ɔ́, sín hwenu e Mawu sɔ́ gbɛtɔ́ ɖó ayǐkúngban jí ɔ́,

⁵ mɛdídá nɔ j'awǎ nú hwenu gěgé ǎ, nǔnyanyawatɔ́ nɔ́ nɔ xomɛ hunhun mɛ yi gbada ǎ.

⁶ Mɛdídá ná bó nyí mɛ bo ɖi ga káká yi sɔ́ jǐnukúnsin, bɔ ta tɔn ɖo akpɔ́kpɔ́ lɛ́ɛ sín hǎ jí ɔ́,

⁷ é ná hwíhwɛ́ bǐ nǔkan mɛ e é ɖésúnɔ yi é ɖɔhun, bɔ mɛ e ko tunwun i ɖ'ayǐ lɛ́ɛ ná ɖɔ: “Fítɛ́ wɛ é ká gbɔn?”

⁸ É ná bú dlɔ̌ ɖɔhun, bɔ è sɔ́ ná mɔ ɛ ǎ; é ná bú dó mɛ nǔmimɔ zǎn mɛ tɔn ɖɔhun.

⁹ Nukún e mɔ ɛ kpɔ́n ɔ́ sɔ́ ná mɔ ɛ gbeɖé ǎ; tɛn e mɛ é nɔ́ ɖ'ayǐ ɔ́, mɛɖé sɔ́ ná mɔ ɛ ɖo tɛn énɛ́ ɔ́ mɛ kpɔ́n gbeɖé ǎ.

¹⁰ É ná zé nǔ e é xo ɖu dó jɛ dɔkun ɔ́ jó kpó alɔ é ɖésúnɔ tɔn kpó; vǐ tɔn lɛ́ɛ ɖó ná sú afú e é tá wamamɔnɔ lɛ́ɛ ɔ́ sín axɔ́.

¹¹ É mɔ ɖɔ hlɔ̌nhlɔ́n ɖo émí wú, bɔ émí kpo ɖo dɔ̌nkpɛ mɛ, lo ɔ́, é kpó nǔ nɛ́ lɛ́ɛ bǐ kpó ná yi yɔ.

¹² Nǔ nyanya wiwa nɔ́ víví nu nú mɛdídá nǔ víví ɖɔhun; é nɔ́ zé hwlá dó ɖɛ̌ glɔ́.

¹³ É nɔ́ ɖo vǐví tɔn se wɛ bó nɔ́ tún ǎ; é nɔ́ hɛn dó ɖɛxwɛ mɛ.

¹⁴ Lo ɔ́, é nɔ́ hɛn xo tɔn mɛ gblé, é nɔ́ húzú aɖǐvɛ́ ɖo adɔgo tɔn mɛ.

¹⁵ É bɛ́ dɔkun kplé mɛ e wlá nǔ ɖu ɔ́ ɖɔhun; amɔ̌, din ɔ́, é ná jó bǐ lě e è nɔ wlá nǔ ɖu bó nɔ́ vi ɔ́ ɖɔhun; Mawu ná ɖe bǐ sín adɔgo tɔn mɛ.

¹⁶ Dan sín aɖǐvɛ́ wɛ é gbíngbɔ́n; é nɔ́ hu mɛ jakpata ɖu mɛ ɖɔhun.

¹⁷ Wǐin kpó anɔ̌sin kpó sɔ́ ná sa tɔ nú mɛdídá kpɔ́n gbeɖé ǎ.

¹⁸ Nǔ e é jɛ tagba bo mɔ lɛ́ɛ ɔ́, é ná jó bǐ; é ná ɖu ǎ; le e é ɖu ɖo ajɔ jí lɛ́ɛ ɔ́, é ná tún bǐ; é ná ɖu gbɛ tɔn ǎ.

¹⁹ Đó é táfú mɛ ma ɖó mɛɖé lɛ́ɛ, bó jó yě dó; é ɖésúnɔ sá xwé ǎ, xwé yětɔn wɛ é yí.

²⁰ Adɔ tɔn ɔ́ kɔ wɛ é ɖe; nukún tɔn nɔ xwlé axi káká bɔ nǔɖé nɔ dín wǔ tɔn ǎ.

²¹ Nǔ ɖěbǔ nɔ gɔ́ xo n'i ǎ; énɛ́ wú wɛ nǔɖé má nɔ́ nyɔ́ nukún tɔn mɛ yi gbada ǎ.

²² Nǔ ná nyɔ́ nú mɛdídá ganjí mɔ̌ có adǎn ná gbó e; nǔ alɔkpa alɔkpa bǐ ná xá ɛ.

²³ Hwenu e é ná ɖo nǔ wlá ɖu wɛ magbokɔ ɔ́, Mawu ná kɔn xomɛsin tɔn kɔn nyi jǐ tɔn, bɔ é ná syɛ́n ɖésú; xomɛsin ná ja dó jǐ tɔn, xomɛsin ɔ́ wɛ ná nyí nǔɖuɖu tɔn.

²⁴ É ná gló ahwanfunnú e è zě gan dó bló ɔ́, gǎ e è zě ganvɔ dó bló ɔ́ ká ná wá xo e zlɛ́.

²⁵ É ná ɖe gǎ e ná xo nɛgbé tɔn zlɛ́ ɔ́ síin, é ná lun alǐnnyánú e ná byɔ́ alǐn tɔn mɛ ɔ́ tɔ́n, xɛsi ɖaxó ɖé ká ná jɛ jǐ tɔn tlóló.

²⁶ Ablu gɔngɔn ná cyɔ́n mɛdídá sín dɔkun lɛ́ɛ; zo e gbɛtɔ́ má bɔ ǎ e wɛ ná fyɔ́ mɛdídá, zo ná fyɔ́ mɛ e kpo ɖo gbɛ ɖo xwé tɔn gbe lɛ́ɛ.

²⁷ Jǐnukúnsin ná ɖe nǔ e é dó sin lɛ́ɛ nyi wěxo; ayǐkúngban ná sí te dó jǐ tɔn, bó ná ɖe e gba!

²⁸ Gbe e gbe Mawu ná ɖe xomɛsin tɔn xlɛ́ ɔ́, dɔkun e ɖo xwé tɔn gbe lɛ́ɛ ná sa yi tɔ ɖɔhun.

²⁹ Nǔ e Mawu sɔ́ ɖ'ayǐ nú mɛdídá ɔ́ nɛ́; nǔ e nyí étɔn bɔ Mawu sɔ́ ɖ'ayǐ n'i ɔ́ nɛ́.