Jɔ̌bu 19 - MAWUXÓWÉMA

Jɔ̌bu ná xósin: Mɛ e ɖo hun jɛ dó jǐ ce wɛ ɔ́ ná wá kɛ nu ɖo vivɔ nu

¹ Ée Jɔ̌bu sín xɔ́ntɔn Biludádi ɖɔ xó ɔ́, Jɔ̌bu yí xó, bó ɖɔ:

² Xó e wlí ɖɔ wɛ mi ɖe, bó dó ɖo ayixa gbadó nú mì wɛ, bó dó ɖo tagba dó nú mì wɛ mɔ̌ ɔ́, fítɛ́ ná yí fó dó wɛ é ɖe?

³ Azɔn mɔ̌kpán nɛ́ mi ko zun mì nɛ́. Ya énɛ́ e dó nú mì wɛ mi ɖe ɔ́ hu winnyá nú mi ǎ cé?

⁴ É ná bó nyí nǔ wɛ un wa nyi do ɔ́, nyɛ ɖokpónɔ géé wɛ é kan; é kan mi ǎ.

⁵ È nǎ ɖɔ ɔ́, mi nɔ mɔ ɖɔ gbɛ émítɔn nyɔ́ hú gbɛ ce, bɔ mi nɔ ɖɔ nǔ e un wa nyi do ɔ́ wɛ zɔ́n bɔ un ɖo winnyá élɔ́ ɖu wɛ.

⁶ Amɔ̌, mi ní tunwun ɖɔ Mawu wɛ wa nǔ énɛ́ ɔ́ xá mì; é wɛ wlí mì dó ɖɔ tɔn mɛ.

⁷ É ɖo dǎka xo wǔ ce wɛ nú un sú xó ɔ́, un nɔ mɔ mɛɖé ǎ; nú un sú xó ylɔ́ alɔdómɛtɔ́ ɔ́, un nɔ mɔ mɛɖé bɔ é nɔ́ wá gbo hwɛ nú mǐ ǎ.

⁸ Mawu sú ali dó mì, bɔ dǐndín gló mì. É jó mì dó nyi ablu mɛ.

⁹ É sɔ́ mì kɔn nyi ayǐ, é kɔ́n wi sín ta nú mì.

¹⁰ É kíjá mì bǐ xɔ ɖɔhun, bɔ afɔ ce ɖokpó kó ɖo yɔdo mɛ; nǔ e ɖó nukún wɛ un ɖe ɔ́, é hɔn síin atín ɖɔhun.

¹¹ É sin xomɛ dó mì ɖésú, é sɔ́ mì dó ɖó kɛntɔ́.

¹² Ahwangɔnu tɔn lɛ́ɛ dó ahwan gbě bó jɛ ali; yě ba ali káká wá gɔ̌n ce; yě ɖǒ gɔnu yětɔn lɛ́ɛ lɛ́ lɛ̌ dó nɔtɛn ce bó ná tɔ́n ahwan mì.

¹³ É sɛ nɔví ce lɛ́ɛ dó zɔ nú mì, un húzú jǒnɔ nú xɔ́ntɔn ce lɛ́ɛ.

¹⁴ Mɛ ce lɛ́ɛ jó mì dó; mɛ e kpó nyɛ kpó vɛ́ lɛ́ɛ bǐ wɔn mì.

¹⁵ Un húzú mɛ ɖěvo nú jǒnɔ e ɖo xwé ce gbé lɛ́ɛ, bó húzú jǒnɔ nú mɛsɛntɔ́ ce nyɔ̌nu lɛ́ɛ; un húzú mɛ wá mɛ de nú yě.

¹⁶ Un ylɔ́ mɛsɛntɔ́ ce bɔ é tin dó mì; un na bo sa vo n'i ɔ́, é nɔ́ kɛ nu ǎ.

¹⁷ Wǎn ce sɔ́ nyɔ́ se nú asi ce ǎ. Nɔví ce lɛ́ɛ mɔ mì ɔ́, wǔ nɔ́ xíyɔ́ yě.

¹⁸ Yɔkpɔ́vú lɛ́ɛ lɔ gbɛ́ wǎn nú mì; un sí te ɔ́, yě nɔ́ jɛ kiko mì jí.

¹⁹ Un vɛ́ mɔ nú mɛ e un nɔ ɖɔ xomɛ ná lɛ́ɛ bǐ; mɛ e un yí wǎn ná lɛ́ɛ fɔ́n gǔ dó jǐ ce.

²⁰ Un xú gǒ bǐ, un kpo ta kɛ́ɖɛ́. Kú hwɛ́n wǎn dó mì.

²¹ Xɔ́ntɔn ce lɛ́ɛ mi! Mi kú nǔbláwǔ nú mì; nǔ ce ní blá wǔ nú mi, ɖó alɔ Mawu tɔn jɛ wǔ e.

²² Étɛ́wú mi lɔ ka jɛ gǒ mɛ nú mì Mawu ɖɔhun mɔ̌? Fí e mi dó ya nú mì yi jɛ ɔ́ kó jɛnu nú mi ǎ cé?

²³ Áo! Nú è sixú wlán xó élɔ́ e ɖɔ wɛ un ɖe ɔ́, é ná nyɔ́. È sixú dó yě wěma mɛ ɔ́, é ná nyɔ́.

²⁴ Nú è sixú zé gan nu xwíɖíxwíɖí dó kun xó e un ɖɔ lɛ́ɛ dó awǐnnya mɛ, bó sá sunmí dó, bɔ é ná nɔ só jí káká sɔ́yi ɔ́, é ná nyɔ́.

²⁵ Amɔ̌, nyɛ ɔ́, un tunwun ɖɔ mɛ e ɖo hun jɛ dó jǐ ce wɛ ɔ́ ɖo gbɛ; é wɛ ná kɛ nu gǔdo gúdo tɔn ɖo ayǐkúngban jí.

²⁶ Agbaza ce na bo gblé bǐ ɔ́, nyi ɖésúnɔ lě ɔ́, un ná mɔ Mawu .

²⁷ Nyɛ ɖésú ná mɔ ɛ kpó nukún ce kpó. É sɔ́ ná nyí jǒnɔ nú mì ǎ; un ɖó nukún i káká bɔ nukún ce bó.

²⁸ Mi nɔ kanbyɔ́ miɖée ɖɔ: “Nɛ̌ mǐ ká ná wa gbɔn bó jɛ gǒ mɛ n'i? Étɛ́wú mǐ ná ɖó dó dó ɖɔ hwɛ xá ɛ?”

²⁹ Mi ma lɔn nú hwǐ wá jɛ mi wú ó, ɖó adǎn e jí mi ɖe ɔ́, hu wɛ è ɖǒ ná hu mi. Énɛ́ ɔ́, mi ná tunwun ɖɔ Mawu nɔ ɖɔ hwɛ xá mɛ nǔgbó.