Jɔ̌bu 18 - MAWUXÓWÉMA

Biludádi ɖɔ è ɖǒ mɔ nú mɛdídá

¹ Biludádi Cuwáxinu ɔ́ yí xó bó ɖɔ:

² Xó e wlí ɖɔ wɛ mi ɖe nɛ́ lɛ́ɛ ɔ́, hwetɛ́nu wɛ mi ka ná ɖó te dó? Mi lin tamɛ ganjí, énɛ́ ɔ́, mǐ ná tunwun lě e mǐ ná ɖɔ xó gbɔn é.

³ Aniwú wɛ mǐ ná jó Jɔ̌bu dó, bɔ é ná mɔ mǐ dó mɔ gbɔ̌? Xlo ɔ́ jɛ́n mǐ jɔ sɔ mɔ̌ a?

⁴ Hwɛ Jɔ̌bu ɔ́, a ɖo xomɛsin wɛ, bó ɖo tagba dó nú hwiɖée wɛ kpowun. A vɛdó ɖɔ ayǐkúngban ɔ́ ná jɛ vɔ̌ ɖó xomɛsin towe wú wɛ sín a? A vɛdó ɖɔ Mawu ná sɛ tɛn nú só lɛ́ɛ, bó dó ná hwɛjijɔ we wɛ sín a?

⁵ Mɛdídá sín hwe wɛ ná cí! Myɔ e ɖo adogwle tɔn mɛ ɔ́ sɔ́ ná ji ǎ.

⁶ Wěziza e ɖo xwé tɔn gbe ɔ́ ná dó zǐnflú. Zogbɛ́n e nyí wěziza tɔn ɔ́ ná wá cí.

⁷ Đ'ayǐ ɔ́, é ɖo yiyi wɛ ɔ́, afɔ tɔn nɔ kpé ayǐ; amɔ̌, din ɔ́, afɔ tɔn hwe dó ayǐ. Tito é ɖésúnɔ tɔn lɛ́ɛ ná wá zin i dɛ́.

⁸ Afɔ e ɖe wɛ é ɖé ɔ́ kplá ɛ xwe mɔ mɛ, é xwe do mɛ jɛ gbé.

⁹ É sɔ́ mɔ dó afɔgbɛnnu, bɔ mɔ ɔ́ hɛn ɛ syɛ́nsyɛ́n.

¹⁰ Mɔ e è ɖǒ n'i ɔ́, è dǒ kɔ́ jí. Mɔ e ɖo nǎ wlí wɛ ɔ́ ɖo te kpɔ́n ɛ ɖo ali tɔn xo.

¹¹ Xɛsi ɖaxó ɖé lɛ́ lɛ̌ dó e, bó nɔ́ ɖo cɔcɔ dó n'i wɛ.

¹² Xovɛ́ sin i káká bɔ gǎn vɔ ɖo wǔ tɔn; ya blá ɖa n'i.

¹³ Ya ná ɖu nǔ e ɖo agbaza tɔn wú ɔ́ bǐ vɔ, abaɖaxwéjɛsú ná ɖu wǔjɔnú tɔn lɛ́ɛ.

¹⁴ È nǎ ɖe e sín xwé tɔn gbe, fí e é vo ɖe ɔ́, bó ná dɔn ɛ gǎnnugǎnnu yi kútomɛ xɔ́sú ɔ́ sá mɛ.

¹⁵ Xwé tɔn ná jɛ vɔ̌ bɔ mɛ ɖěvo ná nɔ gbe; è nǎ kɔn hwemí kɔn nyi ayǐkúngban tɔn jí .

¹⁶ É cí atín e kú ɔ́ ɖɔhun; ɖɔ tɔn lɛ́ɛ ɖo fyɔ́fyɔ́ wɛ ɖo do; bɔ ama tɔn lɛ́ɛ ɖo mlǔmlú wɛ ɖo jǐ.

¹⁷ Mɛ ɖé sɔ́ nɔ́ flín i ɖo ayǐkúngban ɔ́ jí ǎ; mɛɖé sɔ́ nɔ́ ylɔ́ nyǐkɔ tɔn ɖo fí ɖěbǔ ǎ.

¹⁸ È nǎ kpíkpé e sín wěziza nu yi jɛ zǐnflú mɛ; è na nya ɛ sín gbɛ ɔ́ mɛ.

¹⁹ Vǐ e ná wá gba kún tɔn é ɖěbǔ ɖe ǎ; mɛ ɖěbǔ ná kpo ɖo gbɛ ɖo xwedó tɔn mɛ ǎ.

²⁰ Lě e gbɛ tɔn na vɔ gbɔn ɔ́ ná kpácá mɛ e ɖo gbɛ ɔ́ mɛ lɛ́ɛ bǐ; ahwi ná xo mɛ bǐ, sín zǎnzǎnhwe jí káká yi gbadahwe jí.

²¹ Lě e hwɛhutɔ́ sín xwédo nɔ wá cí ɔ́ nɛ́; mɛ e ma tunwun Mawu ǎ ɔ́, lě e nɔtɛn tɔn nɔ cí ɔ́ nɛ́.