Jɔ̌bu 17 - MAWUXÓWÉMA

Jɔ̌bu ɖɔ émí kún sɔ́ ɖo nukún ɖó nǔɖé wɛ ó

¹ Gbɔjɛ ce ɖo xwixwɛ wɛ, gbɛzán ce ɖo vivɔ wɛ; yɔdo ko ɖo te kpɔ́n mì.

² Slǎmɛ ɖɔ mɛ wú tɔ́ lɛ́ɛ wɛ lɛ́ lɛ̌ dó mì; ya e dó nú mì wɛ yě ɖe lɛ́ɛ nɔ́ ná adɔ̌vɛ́ mì.

³ Mawu ce, a ɖo mɛ e ná nɔ te nú mì ɔ́ ba wɛ; hwi ɖésú ní nɔ te nú mì, ɖó mɛ ɖé sɔ́ ɖe bó ná ɖɔ xó dó nu ce zɛ hwɛ wú ǎ.

⁴ Đó a yǐ nukúnnú-mɔjɛnǔmɛ e xɔ́ntɔn ce lɛ́ɛ ɖó ɔ́ sín yě sí, ma ná tɛn yě bónú yě ɖu ɖo jǐ ce ó.

⁵ Yě cí mɛ e da xɔ́ntɔn tɔn lɛ́ɛ bó ná nǔɖuɖu, bó ɖó vǐ é ɖésúnɔ tɔn lɛ́ɛ xovɛ́ é ɖɔhun.

⁶ Un húzú han, bó ɖo nu nú mɛ bǐ; un wá húzú mɛ e è nɔ tún atán dó nukún mɛ ná é.

⁷ Un ɖo vǐvɛ́ se wɛ káká bɔ nukún ce nɔ́ xo avivi; nyi ɖésúnɔ bǐ fo yɛ.

⁸ Ayijlɔ́jlɔ́nɔ lɛ́ɛ sixú xo nǔ ɖo wǔ ǎ, ɖó nǔ e ɖo xíxá mì wɛ ɔ́ wútu; xomɛvɔ́nɔ lɛ́ɛ fɔ́n gǔ dó mɛdídá lɛ́ɛ jí.

⁹ Amɔ̌, nǔjlɔ́jlɔ́watɔ́ ɔ́, gbɛ na bo ɖo ɖě ɔ́, é nɔ́ ɖo gǎn dó wɛ; mɛ e ma ɖó alɔ ɖo nǔ blíblí mɛ ǎ é nɔ́ ɖo kan ván wɛ.

¹⁰ Xɔ́ntɔn ce lɛ́ɛ mi, mi bǐ ní lɛ́ kɔ wá, mi lɛ́ jɛ xó ɖɔ nú mi jí; un ká ɖo nǔnywɛ́tɔ́ titewungbe kwín ɖokpó ná mɔ wɛ ɖo mi mɛ ǎ.

¹¹ Azǎn ce vɔ, tito ce lɛ́ɛ bǐ gblé, nǔ e jló mì lɛ́ɛ bǐ ci fo.

¹² Mi nɔ ɖɔ zǎn ná jó tɛn nú kéze, lé wěziza kó sɛkpɔ́; ablu ɖíe ká kpo ɖo te e.

¹³ Nyɛ ɔ́, étɛ́ un ka sixú lɛ́ nɔ te kpɔ́n din? Kútomɛ wɛ ná nyí nɔtɛn ce, ablu mɛ wɛ zan ce ɖe ɖo kútomɛ.

¹⁴ Un nɔ sú xó sɛ́ dó yɔdo ɔ́ ɖɔ: “Hwi wɛ nyí tɔ́ ce.” Un nɔ ɖɔ sɛ́ dó wěvú lɛ́ɛ ɖɔ: “Mi wɛ nyí nɔ ce; nɔví ce nyɔ̌nu lɛ́ɛ ɔ́, mi wɛ.”

¹⁵ Fítɛ́ nukúnɖíɖó ká kpo ɖe nú mì? Mɛ̌ ká sixú mɔ nǔ e ɖó nukún wɛ un ɖe ɔ́?

¹⁶ Nukúnɖíɖó ce kpódó nyɛ kpó ná yi kútomɛ , mǐ mɛ we lɛ́ɛ bǐ ná yi gbɔjɛ́ ɖo kɔ́ glɔ́.