Jɔ̌bu 16 - MAWUXÓWÉMA

Jɔ̌bu ɖɔ émí ɖó kúnnuɖetɔ́ ɖokpó ɖo sɛ́xwé

¹ Ée Jɔ̌bu sín xɔ́ntɔn Elifázi ɖɔ xó ɔ́, Jɔ̌bu yí xó, bó ɖɔ:

² Un ko se xó mɔ̌hunkɔtɔn lɛ́ɛ azɔn gěgé. Gbɔdónúmɛtɔ́ e nɔ dó akpɔ nú mɛ ɔ́ wɛ mi bǐ nyí.

³ Xó gbló e wlí ɖɔ wɛ a ɖe ɔ́, hwetɛ́nu wɛ é ná fó dó? Ani ka ɖo gbigbo we wɛ bɔ a ɖo gbe kán nú mɛ wɛ mɔ̌?

⁴ Ényí mi ɖo tɛn ce mɛ, bɔ nyɛ ɖo tɛn mitɔn mɛ ɔ́, nyi lɔmɔ̌ ná ɖɔ xó mi ɖɔhun; xó e un ná ɖɔ dó mi wú ɔ́ ná syɛ́n ɖésú; nǔ mitɔn ná blá wǔ nú mì, bɔ un ná húnhún ta.

⁵ Un ná kó ɖɔ xó dó dó wǔsyɛ́n lanmɛ nú mi, un ná ɖo xó ɖɔ nú mi wɛ káká, bɔ wǔvɛ́ e mɔ wɛ mi ɖe ɔ́ ná ɖe kpo.

⁶ Lo ɔ́, un ɖo xó ɖɔ wɛ ɔ́, wǔvɛ́ e mɔ wɛ un ɖe ɔ́ nɔ́ ɖe kpo ǎ; un na bo xwɛ ɔ́, wǔvɛ́ ɔ́ nɔ́ xwɛ ǎ.

⁷ Din ɔ́, Mawu yí hlɔ̌nhlɔ́n ce; é vívá kún nú mɛ e lɛ́ dó mì lɛ́ɛ bǐ.

⁸ Lě e é sɔ́ mì ɖó é wɛ ɖo hwɛ dó mì wɛ: anyǔ ce bǐ wló bɔ un kpo xú kɛ́ɖɛ́, ɖi nǔ ɖɔ nǔ e ɖo gbigbo mì wɛ ɔ́, nyi ɖésú wɛ zɔ́n ɖɔhun.

⁹ Mawu sin xomɛ dó mì, bɔ un húzú kanlin e é ná wlí ɖu é. É jɛ gǒ mɛ nú mì, é tɛ aɖǔma dó jǐ ce; é mɛ e nyí kɛntɔ́ ce ɔ́, nukún tɔn bǐ ɖo wǔ ce.

¹⁰ Mɛ lɛ́ɛ nɔ́ ɖo adǎn gblɔ́n nú mì wɛ; yě nɔ́ zun mì, yě nɔ́ xo tómɛ nú mì. Yě bǐ nɔ́ nyi ahwan wá kplé dó mì.

¹¹ Mawu jó mì nú nǔɖégótegó lɛ́ɛ, é jó mì nú mɛdídá lɛ́ɛ.

¹² Ayǐ ce wɛ un ɖe xwíí, bɔ é wá dán mì, é hɛn kɔ ce bó zin mì d'ayǐ. É zé mì ɖó te bó da gǎ dó;

¹³ gǎ tɔn lɛ́ɛ gosín ɖisí amyɔ wá gɔ̌n ce; é da gǎ dó alin mɛ nú mì, ma kú nǔbláwǔ nú mì; é gba vǐvɛ́ ce kɔn nyi kɔ́ mɛ.

¹⁴ É nɔ́ zun dó jǐ ce ahwanfuntɔ́ ɖɔhun, é nɔ́ ɖo wǔ gblé mì wɛ.

¹⁵ Nǔwamɛvɔ mɛ jɛ́n un nɔ ɖe, un gbɔ bo jó gbe.

¹⁶ Un y'avǐ káká bɔ nukún ce bǐ myá, nukún ce sɔ́ ɖo nǔ mɔ wɛ ganjí ǎ.

¹⁷ Un ma ka xo dǎka mɛɖé wú vɔ́vɔ́ nɛ́! Đɛ mímɛ́ jɛ́n un ka nɔ xo tɛgbɛ nɛ́!

¹⁸ Ayǐkúngban e, hun ce kɔn nyi ayǐ, ma zé hwlá ó; xó e sú wɛ un ɖe ɔ́, è nǐ se gbɔn fí bǐ.

¹⁹ Bɛ́ sín din ɔ́, un ɖó kúnnuɖetɔ́ ɖokpó ɖo jǐxwé, mɛ e nɔ jɛ ahwan jǐ ce ɔ́ ɖo jǐ aga.

²⁰ Xɔ́ntɔn ce lɛ́ɛ ɖo kiko mì wɛ, Mawu sa vo ná wɛ un ka ɖe kpódó avǐ kpó.

²¹ Áo! Kúnnuɖetɔ́ ce ɔ́ ní nyí hwɛgbotɔ́, ɖo nyɛ kpó Mawu kpó tɛ́ntin, lě e è nɔ bló gbɔn ɖo ayǐkúngban jí, ɖo gbɛtɔ́ we tɛ́ntin é.

²² Đó xwe nabí e un ɖó ná bló ɖo ayǐkúngban jí ɔ́ kó ɖo vivɔ wɛ, bɔ un wlí to e mɛ è nɔ yi, bó má sɔ́ nɔ́ lɛ́ kɔ wá ǎ é sín ali.