Jɔ̌bu 14 - MAWUXÓWÉMA

Jɔ̌bu ɖɔ ninɔmɛ gbɛtɔ́ tɔn blá wǔ

¹ Gbɛtɔ́ ɔ́, nyɔ̌nu xomɛ wɛ é tɔ́n sín; jidɔ́ tɔn ɔ́, azǎn wɛ ɖ'é wú; nǔxámɛ wɛ gɔ́ gbɛzán tɔn.

² Gbɛtɔ́ ɔ́, folówa ɖɔhun wɛ é cí; é nɔ́ tɔ́n bó nɔ́ mlú. É nɔ́ nɔ te ǎ, é nɔ́ dín wá yi yɛ ɖɔhun.

³ Gbɛtɔ́ énɛ́ cɔ́ wɛ a ka ɖe; nyɛ dɔn yi hwɛgun wɛ a ɖe.

⁴ È ka sixú ɖe nǔ mímɛ́ sín nǔ kwíji kwíji mɛ a? Mɛ ɖé sixú ɖe ǎ.

⁵ Gbɛzán gbɛtɔ́ tɔn ɖó dogbó, hwi wɛ ka ɖɔ xwe nabí e é ná bló é; é sixú bló zɛ jlɛ̌ e a ɖǒ n'i ɔ́ wú ǎ.

⁶ Đe nukún sín wǔ tɔn; ná ɛ agbɔ̌n kpɛɖé, bónú é ná vo bó wa azɔ̌ tɔn yi fó.

⁷ È gbo atín ɔ́, atín hɛn ɔ́, é ná ɖó nukún ɖɔ émí ná lɛ́ tɔ́n kun, émí hɛn ɔ́, émí ná lɛ́ zɔ́n ama.

⁸ Đɔ tɔn na bo dóxó ɖo ayǐkúngban lanmɛ ɔ́, è na bo mɔ ɖɔ atínta tɔn ko kú ɔ́,

⁹ é wá mɔ sin hwe ɖé ɔ́, é nɔ́ wú, é nɔ́ lɛ́ tɔ́n ama atínvú ɖɔhun.

¹⁰ Lo ɔ́, gbɛtɔ́ ɔ́, nú éyɛ́ kú ɔ́, hlɔ̌nhlɔ́n tɔn nɔ vɔ; nú gbɔjɛ tɔn xwɛ ɔ́, xó tɔn nɔ fó.

¹¹ Lě e sin sixú wá mɛ sín agbetawoyó mɛ, bɔ sin e ɖo tɔ ɖaxó ɖaxó lɛ́ɛ mɛ ɔ́ nɔ́ mɛ gbɔn ɔ́,

¹² mɔ̌ wɛ gbɛtɔ́ ɖe; é kú ɔ́, é sɔ́ nɔ́ fɔ́n gbeɖé ǎ; nú jǐnukúnsin kpo ɖo te jɛ́n wɛ ɔ́, é sɔ́ ná fɔ́n ǎ; é ná nyí fɔ́n sín amlɔ e dɔ́ wɛ é ɖe ɔ́ mɛ gbeɖé ǎ.

¹³ Mawu ce, nú a jlǒ nǎ zé mì hwlá ɖó kútomɛ, bɔ un ná nɔ hwlǎhwlá ɖo fínɛ́ káká bɔ xo towe mɛ ná fá dó wǔ ce, bɔ a nǎ ɖɔ hwenu e a nǎ flín mì dó ɔ́ wɛ ɔ́, é ná nyɔ́!

¹⁴ Gbɛtɔ́ ká kú ɔ́, é ká sixú lɛ́ wá gbɛ a? Ényí gbɛ wɛ é sixú lɛ́ wá ɔ́, un na bo ɖo mɛɖezɔ́ wú ɔ́, un ná ɖo nukúnɖíɖó mɛ káká bɔ mɛ e ná ɖyɔ́ mì ɔ́ ná wá.

¹⁵ Énɛ́ ɔ́, hwenu e a nǎ ylɔ́ mì ɔ́, un ná sɔ nú we; a nǎ ba ná mɔ nyɛ mɛ e a ɖǒ é!

¹⁶ Din e a ɖo afɔ e ɖe wɛ un ɖe lɛ́ɛ bǐ xa wɛ ɔ́, a nǎ ɖe nukún towe sín nǔ e wa nyi do wɛ un ɖe lɛ́ɛ wú.

¹⁷ A nǎ sú nǔ dó hwɛ e un hu lɛ́ɛ, a nǎ zě nǔ tlitli bú dó hwɛ ce lɛ́ɛ.

¹⁸ Só nɔ́ j'ayǐ bó nɔ́ gba hánnyá; awǐnnya nɔ́ flɛ́ sín tɛn e mɛ é ɖé ɔ́.

¹⁹ Sin nɔ́ ɖu awǐnnya; sin nɔ kplɔ́ kɔ́ hɛn yi. Mɔ̌ wɛ a nɔ hɛn nǔ e ɖó nukún wɛ gbɛtɔ́ ɖe ɔ́ gblé dó así n'i gbɔn.

²⁰ A nɔ zé gbɛtɔ́ nyi gbě, bɔ kɔlílɛ́ sɔ́ ɖe n'i ǎ; a nɔ hɛn nukún mɛ tɔn gblé, bó nɔ́ nya ɛ dó gbě.

²¹ È na bo sɔ́ vǐ tɔn lɛ́ɛ su ɔ́, é nɔ́ tunwun ǎ; è na bo dó winnyá vǐ tɔn lɛ́ɛ ɔ́, é nɔ́ nyí nǔɖé n'i ǎ.

²² Nǔ ɖokpó e é tunwun ɔ́ wɛ nyí vǐvɛ́ e é nɔ se ɖo agbaza mɛ ɔ́ kpó aluwɛ mɛ e é nɔ́ nɔ ɖo ayi mɛ ɔ́ kpó.