Jɔ̌bu 13 - MAWUXÓWÉMA

Jɔ̌bu ɖɔ émí jló ná ɖɔ xó e ɖo xo émítɔn mɛ ɔ́ nú Mawu

¹ Un mɔ nǔ nɛ́ lɛ́ɛ bǐ ɖó nukún ce wú, un se nǔ nɛ́ lɛ́ɛ bǐ ɖó tó ce wú, bó mɔ nukúnnú jɛ bǐ mɛ.

² Nǔ e mi tunwun ɔ́, nyɛ lɔ tunwun; un ɖi ɖɔ un jɔ xlo hú mi ǎ.

³ Lo ɔ́, un jló ná ɖɔ xó nú Nǔbǐwúkpétɔ́ ɔ́; un jló ná ɖe tɔ nyɛɖée ɖo Mawu nukɔn.

⁴ Đó midɛɛ lɛ́ɛ ɔ́, nǔgbó ɔ́ wɛ mi nɔ jó dó, bó nɔ́ ɖó nǔvú; azɔngblétɔ́ e ma kpé nǔɖé wú ǎ ɔ́ ɖɔhun wɛ mi cí.

⁵ Mi ná kó gbɔ bó nɔ abwɛ̌; énɛ́ ɔ́, è nǎ mɔ ɖɔ mi nywɛ́ nǔ i.

⁶ Mi kɛnklɛ́n bó se xó e un ná ɖɔ dó hwlɛ́n nyɛɖée é, mi wlí tó xó e ná ɖɔ dó ɖe tɔ nyiɖée wɛ un ɖe ɔ́ wú.

⁷ Mi ná ɖó nǔvú dó jɛ ahwan Mawu jí wɛ a? Mi ná ɖó adingban dó ɖe kúnnu nú Mawu wɛ a?

⁸ Midɛɛ lɛ́ɛ wɛ ná ɖɔ émí ɖo Mawu jǐ a? Midɛɛ lɛ́ɛ wɛ ná jɛ ahwan jǐ tɔn a?

⁹ Nú Mawu kíjé ayi mitɔn mɛ kpɔ́n ɔ́, é ná kpa mi wɛ mi vɛdó a? Mawu ɔ́, gbɛtɔ́ wɛ é nyí bɔ mi ná flú i a?

¹⁰ Nú mi na bo tlɛ nɔ nǔglɔ́ bó ɖo ahwan jɛ jǐ tɔn wɛ ɔ́, un tunwun ɖɔ é ná gbɛ́ nú mi dó nǔjɔnǔ mɛ.

¹¹ Susu e Mawu ɖǒ ɔ́ dó xɛsi nú mi ǎ cé? Xɛsi e Mawu dó ɔ́ ɖó adohuhu nú mi ǎ cé?

¹² Nǔ xóxó e flín mì wɛ mi ɖe ɔ́, xɛxó kpowun wɛ; hwɛjijɔ e ba wɛ mi ɖe ɔ́ ɖó bɛ̌nu ɖé ǎ.

¹³ Din ɔ́, mi nɔ abwɛ̌; mi jó mì dó; un jló ná ɖɔ xó lo! Un sɔ́ gbɛ́ nǔ e ɖo nǎ jɔ wɛ é ǎ.

¹⁴ Un ɖo gbesisɔ mɛ nú nǔ bǐ; un gbɛ́ kú ǎ.

¹⁵ Nú é jló Mawu hǔn, é ní hu mì; un sɔ́ ɖo nǔɖé ɖó nukún wɛ ǎ. Amɔ̌, un ná jɛ ahwan walɔ ce jí ɖo nukɔn tɔn.

¹⁶ Nú é kpa mì ɔ́, un ná mɔ hwlɛngán; ɖó nǔnyanyawatɔ́ ɖěbǔ nɔ́ glá yi Mawu nukɔn ǎ.

¹⁷ Xó e ná ɖɔ wɛ un ɖe ɔ́, mi ɖótó ganjí; mi kɛ tó mitɔn nyi jɛ, bó ná se nǔ e ɖɔ gbé un ja é.

¹⁸ Din ɔ́, un sɔ́ nǔ bó xwe hwɛ nukɔn; un tunwun ɖɔ hwɛ nyɛtɔn kún kú ó.

¹⁹ Mɛ̌ ká ná glá bó ná ɖɔ hwɛ ce kún nyɔ́ ó? Nú hwɛ ce kú ɔ́, un ná gbɔ bó xwɛ, bó gbɔ bó kú.

²⁰ Mawu ce, nǔ we byɔ́ we wɛ jɛ́n un ɖe; énɛ́ ɔ́, un sɔ́ ná hɔn hwlá dó we ɖě ǎ:

²¹ Đǒ nǔ e wa xá mì wɛ a ɖe ɔ́ te; má sɔ́ ɖó adohuhu ɖě nú mì ó.

²² Đɔ xó nú mì, bónú má ná sin tɔn we, abǐ nyɛ ná ɖɔ xó nú we, bɔ hwɛ ná ná sin tɔn mì.

²³ Étɛ́ un wa nyi do? Hwɛ nabí un hu? Đɔ tóli e un vɛ́ nú we ɔ́ nú mì.

²⁴ Aniwú wɛ a ka ɖe alɔ sín kan ce mɛ? Étɛ́wú a ɖo nǔ jlɛ́ xá mì wɛ kɛntɔ́ towe wɛ un nyí ɖɔhun mɔ̌?

²⁵ Ama e jɔhɔn zé ɔ́ nya wɛ a ɖe a? Nǔywɛ́ xúxú ɔ́ gúdo wɛ a ɖe sɔ mɔ̌ a?

²⁶ A ɖo nǔ baɖabaɖa wlán dó wǔ ce wɛ; hwɛ e un hu sín vǔ é bǐ sín tó dɔ́n nú mì wɛ a ɖe.

²⁷ A bɛ̌ afɔ ce lɛ́ɛ dó sókpo mɛ; a ɖo nǔ e wa wɛ un ɖe lɛ́ɛ bǐ kpɔ́n wɛ tlítlí; fí e tɛ afɔ wɛ un ɖe lɛ́ɛ ɔ́, a ɖo bǐ kpɔ́n wɛ.

²⁸ Agbaza ce ɖo gblěgblé wɛ atín jɛ wɔvli ɖɔhun, avɔ e kɔ́súkɔ́sú nyí ɔ́ ɖɔhun.