Jɔ̌bu 12 - MAWUXÓWÉMA

Jɔ̌bu ɖɔ Mawu nyí acɛgannaganna-kpanúmɛtɔ́ ɖaxó

¹ Ée Jɔ̌bu sín xɔ́ntɔn Sofáa ɖɔ xó ɔ́, Jɔ̌bu yí xó, bó ɖɔ:

² Nǔgbó wɛ, è ɖo nǔnywɛ́tɔ́ ba wɛ ɔ́, è sixú zɛ mi wú ǎ. Mi kú gbeɖé hǔn, nǔnywɛ́ vɔ.

³ Amɔ̌, nyɛ lɔ nɔ lin tamɛ ganjí mi ɖɔhun; ényí un gɔn nǔ mɔ jɛ xó mitɔn mɛ wɛ ǎ; mɛ̌ wɛ má tunwun nǔ e ɖɔ wɛ mi ɖe ɔ́ ǎ?

⁴ Un húzú nǔkiko nú mi xɔ́ntɔn ce lɛ́ɛ, nyɛ mɛ e nɔ sú xó ylɔ́ Mawu, bó nɔ́ tunwun ɖɔ é ná sɔ nú mì ɔ́; nyɛ mɛ e nyí gbɛtɔ́ hwɛjijɔnɔ, nyɛ mɛ e wú è ma nɔ mɔ nǔ jɛ do ɖé ɖɔ dó ǎ é, nyɛ ɖíe wá húzú ɖɔkwe din e!

⁵ “Mɛ bǐ wɛ nɔ hu tɛ́ nú wamamɔnɔ”, lě e mɛ e nǔɖé ma gbo kpɔ́n ǎ lɛ́ɛ sín ayi nɔ mɔ nǔ gbɔn ɔ́ nɛ́; nǔ e yě nɔ́ ɖɔ dó mɛ e ɖo ayǐ jɛ wɛ lɛ́ɛ wú é nɛ́.

⁶ Asúfántɔ́ lɛ́ɛ nɔ́ vo fɛɛ ɖo xwé yětɔn lɛ́ɛ gbe; yě mɛ e nɔ ba xó Mawu lɛ́ɛ ɔ́, nǔɖé nɔ́ dó xɛsi nú yě ǎ, yě nɔ́ sɛn nǔɖé zɛ hlɔ̌nhlɔ́n yětɔn wú ǎ.

⁷ Kan nǔ byɔ́ kanlin lɛ́ɛ, kanlin ná kplɔ́n nǔ we; kan nǔ byɔ́ xɛ lɛ́ɛ, xɛ ná ɖe we ɖó ali jí.

⁸ Đɔ xó nú ayǐkúngban, ayǐkúngban ná kplɔ́n nǔ we; ɖɔ xó nú hweví e ɖo xu mɛ lɛ́ɛ, hweví ɖó xó gěgé bó ná ɖɔ nú we.

⁹ Đo kanlin énɛ́ lɛ́ɛ bǐ mɛ ɔ́, kanlin tɛ́ wɛ má tunwun ɖɔ Mawu Mavɔmavɔ wɛ ɖo nǔ bǐ bló wɛ ǎ?

¹⁰ Mawu Mavɔmavɔ sín alɔ mɛ wɛ nǔ e ɖo gbɛ ɔ́ bǐ sín funfún ɖe; alɔ tɔn mɛ wɛ gbɛtɔ́ bǐ sín gbɛ ɖe.

¹¹ Tó wɛ nɔ se xó, é ɖo ɖě ɔ́ nu wɛ ka nɔ ɖɔ.

¹² È ɖo nǔnywɛ́ ba wɛ ɔ́, degénɔ lɛ́ɛ wɛ è nɔ yi mɔ, mɛ e sín xwe sɛ yi lɛ́ɛ nɔ́ mɔ nukúnnú jɛ nǔ mɛ.

¹³ Lo ɔ́, nǔnywɛ́ kpódó hlɔ̌nhlɔ́n kpó ɔ́, Mawu gɔ́n wɛ è nɔ mɔ ɖe, Mawu gɔ́n wɛ nǔkplɔ́nmɛ kpódó nǔtunwuntunwun kpó ɖe.

¹⁴ Nǔ e Mawu hɛn gblé ɔ́, mɛɖé sixú vɔ́ bló ɖó ǎ; mɛ e é wlí dó gan ɔ́, mɛɖé nɔ́ ɖe nyi te ǎ.

¹⁵ Nú Mawu hɛn jǐ ɖó te ɔ́, akú nɔ́ ɖó; é ká ɖe alɔ sín jǐ jí ɔ́, sin nɔ hɛn ayǐkúngban ɔ́ gblé.

¹⁶ É ɖó hlɔ̌nhlɔ́n, ayi tɔn ɖo te ganjí. Mɛ e ɖo bǔbú wɛ ɔ́ kpó mɛ e ɖo mɛ dɔn bú wɛ ɔ́ kpó ɔ́, bǐ wɛ ɖo acɛ Mawu tɔn mɛ.

¹⁷ É nɔ́ jlɛ́ nǔ xá gbɛtɔ́ tonukún lɛ́ɛ bɔ yě nɔ́ zɔn afɔ vɔ́; é nɔ́ wlú tamɛ nú gǎn lɛ́ɛ.

¹⁸ É yí acɛ e axɔ́sú lɛ́ɛ ɖó ɔ́ sín yě sí, bó sɔ́ gantɔ́wu dó nú yě.

¹⁹ É nɔ́ jlɛ́ nǔ xá vɔ̌sánú-xwlémawutɔ́ lɛ́ɛ, bɔ yě lɔ nɔ zɔn afɔ vɔ́; é nɔ́ flí acɛkpikpa e wú mɛɖé má sixú glá dó ǎ é xwe.

²⁰ É nɔ́ xwe mɛ e wú è ɖeji dó lɛ́ɛ sín nu dó xɔ; é nɔ́ yí nukúnnú mɔ jɛ nǔ mɛ e degénɔ lɛ́ɛ ɖó ɔ́ sín yě sí.

²¹ É nɔ́ dó winnyá mɛjɔmɛ lɛ́ɛ; é nɔ́ yí hlɔ̌nhlɔ́n sín acɛgannaganna-kpanúmɛtɔ́ lɛ́ɛ sí.

²² É nɔ́ ɖe nǔ e ɖo hwlǎhwlá ɖo zǐnflú mɛ ɔ́ nyi wěxo, é nɔ́ zé nǔ e ɖo ablu gɔngɔn mɛ ɔ́ wá wěziza nu.

²³ É nɔ́ bló bɔ togun lɛ́ɛ nɔ́ ji gba, bɔ é nɔ́ vívá kún yětɔn; é nɔ́ bló bɔ yě nɔ́ gba kpé, bɔ é nɔ́ nya yě dó gbě.

²⁴ É nɔ́ yí nǔnywɛ́ sín gǎn e ɖo to nu lɛ́ɛ sí, bó nɔ́ jó yě dó bɔ yě nɔ́ jɛ flúflú jí gbɔn gbětótló mɛ,

²⁵ yě mɔ wěziza ǎ, bó nɔ́ ɖo avi dlá wɛ gbɔn zǐnflú mɛ, bó nɔ́ ɖo sa fún wɛ ahannumúnɔ ɖɔhun.