Jɔ̌bu 11 - MAWUXÓWÉMA

Sofáa ɖɔ nú Jɔ̌bu ɖɔ é ní lɛ́ kɔ wá Mawu gɔ́n

¹ Sofáa Naamánu ɔ́ yí xó bó ɖɔ:

² È nǎ tin dó xó tobutóbú énɛ́ lɛ́ɛ e a ɖɔ lɛ́ɛ wɛ a? Hwɛjijɔ ɖo xónyɔ́ɖɔ nu ǎ!

³ Nǔxweɖɔ towe ná zɔ́n bɔ è ná tin wɛ a vɛdó a? A nǎ ɖo slǎmɛ ɖɔ mɛ wú wɛ, bɔ è nǎ tin dó we wɛ a vɛ́ dó a?

⁴ A glá káká bó ɖɔ: “Xó e ɖɔ wɛ un ɖe ɔ́ nǔgbó wɛ. Wǔɖíɖí aji ɖɔhun wɛ un ɖe ɖo Mawu nukɔn.”

⁵ Nú Mawu ɖésú sixú ɖɔ xó nú we din ɔ́, é ká ná nyɔ́ mɛ! É sixú kɛ nu bo ɖɔ xó nú we tlɔlɔ ɔ́, é ná nyɔ́.

⁶ Hwenɛ́nu ɔ́, é ná ɖe nǔnywɛ́ tɔn e wú è ma nɔ́ mɔ nǔ jɛ ǎ ɔ́ xlɛ́ we. É ná ɖe nǔnywɛ́ tɔn e hú gǎn nukúnnú mɔ jɛ nǔ mɛ gbɛtɔ́ tɔn ɔ́ xlɛ́ we; énɛ́ ɔ́, a nǎ mɔ nǔ jɛ wú ɖɔ Mawu nɔ́ jó hwɛ e a hu lɛ́ɛ ɖě dó.

⁷ A sixú mɔ do nú nǔ e ɖo Mawu sín xomɛ ɔ́ wɛ a vɛdó a? Nǔ e ɖo Nǔbǐwúkpétɔ́ ɔ́ sín ayi gɔngɔn mɛ ɔ́ wɛ a vɛdó a?

⁸ Nǔnywɛ́ tɔn yi jǐ hú jǐnukúnsin; étɛ́ a ka sixú bló? É yi do hú kútomɛ; étɛ́ a ka sixú tunwun?

⁹ É gbló hú ayǐkúngban, é gbló hú xu.

¹⁰ Nú Mawu ɖo dǐndín wɛ, bó wlí hwɛhutɔ́ ɖé, bó dɔn ɛ xwe hwɛ nukɔn ɔ́, mɛ̌ wɛ ká ná gbɛ́ n'i?

¹¹ Đó é wɛ tunwun gbɛtɔ́ nǔvɔ́nɔ lɛ́ɛ; é nɔ́ jɛ tagba ɖěbǔ cóbó nɔ́ mɔ nǔ jɛ hwɛ e gbɛtɔ́ hu ɔ́ wú ǎ.

¹² Gbe e gbe è nǎ kpé wú bó dé tócí gbě tɔn ɔ́, gbe nɛ́ gbe ɔ́, gbɛtɔ́ e má ɖó fɔn taglo mɛ ǎ é ná húzú nǔnywɛ́tɔ́.

¹³ Amɔ̌, hwɛ ɔ́, a ɖǒ na sɔ́ ayi towe jó nú Mawu, bó fɔ alɔ dó jǐ bó xo ɖɛ.

¹⁴ Nú a ɖe alɔ sín nǔ nyanya mɛ, bó ma lɔn nú è wa nǔ agɔ ɖé ɖo xwé towe gbe ǎ ɔ́,

¹⁵ a nǎ zé ta; winnyá sɔ́ ná hu we ǎ; a nǎ lí dǒ; nǔ ɖěbǔ sɔ́ ná hu ado nú we ǎ.

¹⁶ A sɔ́ ná flín ya e ji wɛ a ɖe din lɛ́ɛ ǎ, bǐ nǎ byɔ́ hwenuxó mɛ.

¹⁷ Gbɛ towe ná za wě hwe yi hwǎn ɖɔhun, zǐnflú ná za wě zǎnzǎn hwe ɖɔhun.

¹⁸ A nǎ ɖeji ganjí, ɖó a nǎ ɖó nukún nǔ; a kpɔ́n gǔdo bó kpɔ́n nukɔn ɔ́, a nǎ nɔ́ mlɔ́ ayǐ, bó ná nɔ́ dɔ́ amlɔ ganjí.

¹⁹ Ényí a ɖo gbigbɔjɛ́ wɛ ɔ́, mɛ ɖěbǔ ná wa dó tagba nú we ǎ; é nyɔ́ wa ɔ́, yě ná nɔ́ nyi ahwan wá gɔ̌n towe, bó ná ɖíɖɔ́ wǔ nú we.

²⁰ Lo ɔ́, mɛdídá lɛ́ɛ ná ɖo mɛ e ná d'alɔ yě ɔ́ ɖó nukún wɛ káká, bɔ é ná nyí séé. Yě ná ba fí e yě ná nɔ ɔ́ kpo, nǔ ɖokpó e yě ná ɖó nukún ɔ́ nɛ́ nyí kú nɛ́.