Jelemíi 9 - MAWUXÓWÉMA

Adingban gba to ce

¹ Ényí fí e alitanu lɛ́ɛ nɔ gbɔjɛ́ ɖe ɖo gbětótló mɛ ɔ́ ɖě wɛ un sixú mɔ din ɔ́, un ná jó togun ce dó, bó hɔn yi zɔ n'i bǐ. Đó yě bǐ wɛ dó afɔ gbě; yě bǐ wɛ nyí mɛsaɖutɔ́.

² Mawu Mavɔmavɔ ɖɔ: “Yě ɖo adingban ɖó wɛ ɔ́, a nǎ ɖɔ gǎ wɛ bó ɖo nu yětɔn mɛ, bɔ yě ɖo dida wɛ. Adingban wɛ kplá hwǐ bɔ é sɛ ayǐ ɖo to ɔ́ mɛ; nǔgbó ɖó acɛ ǎ. Đó yě fɔ́n ɔ́, yě nɔ́ ɖo dǎka xo dó dǎka jí wɛ. Yě tunwun nyɛ Mawu Mavɔmavɔ ɔ́ ǎ.

³ Mɛ ɖokpó ɖokpó ní cɔ́ éɖée dó xɔ́ntɔn tɔn wú; è ma ka gán jɛ nɔví mɛ tɔn wú ó, ɖó nɔví ɖo nɔví tɔn ba ná flú wɛ, bɔ xɔ́ntɔn ɖo xɔ́ntɔn tɔn nǔ ɖɔ kpé wɛ.

⁴ Yě nɔ́ ɖo yěɖée blɛ́ wɛ, mɛɖé nɔ ɖɔ nǔgbó nú mɛɖé ǎ. Yě kplɔ́n ɖɛ̌ yětɔn ɖó adingban lɔ jí. Yě nɔ́ wa nǔ nyanya káká bó sɔ́ sixú lɛ́ kɔ wá gɔ̌n ce ǎ.

⁵ Yě xo dǎka gbɔn dě ɔ́, yě nɔ́ xo gbɔn dě; yě ɖó adingban gbɔn dě ɔ́, yě nɔ́ ɖó gbɔn dě. Yě ba ná tunwun nyɛ Mawu Mavɔmavɔ ɔ́ ǎ.” Xó e Mawu Mavɔmavɔ ɖɔ ɔ́ nɛ́.

⁶ Énɛ́ wú wɛ Mawu Mavɔmavɔ Nǔbǐwúkpétɔ́ ɔ́ ɖɔ: “Un ná zé myɔ dó slá wǔ nú yě bó ná kpɔ́n nǔ e yě nyí é. Lě e un sixú wa nǔ xá togun ce gbɔn é jɛ́n nɛ́.

⁷ Đɛ̌ yětɔn cí aɖǐgá ɖɔhun. Adingban jɛ́n yě nɔ́ ɖó. Yě nɔ́ ɖɔ xó ɖagbe nú nɔzo yětɔn, ayi yětɔn mɛ ɔ́, mɔ ɖó n'i wɛ yě ká ɖe.”

⁸ Mawu Mavɔmavɔ ɖɔ: “Un ná dɔn tó nú yě ɖó nǔ énɛ́ lɛ́ɛ nu ǎ cé? Togun mɔ̌hunkɔ ɔ́, un ná wa nǔ xá ɛ ǎ cé?”

Avǐ hwenu ɖíe, gbɛvíhan hwenu ɖíe

⁹ Un ya avǐ bó ná alě ɖó só lɛ́ɛ tamɛ. Un dó gbɛvíhan ɖó fí e kanlin lɛ́ɛ nɔ́ ɖu ama ɖe lɛ́ɛ tamɛ. Gběhan lɛ́ɛ bǐ wɛ ji zo; mɛɖé sɔ́ nɔ gbɔn fínɛ́ ǎ, kanlin ɖě sɔ́ nɔ́ sú xó ɖo fínɛ́ ǎ; xɛ kpó kanlin kpó bǐ wɛ hɔn bó yi.

¹⁰ Mawu ɖɔ: “Un ná sɔ́ Jeluzalɛ́mu dó húzú dǒglin; un ná sɔ́ dó húzú nɔtɛn nú ayǐsájɛ lɛ́ɛ. Un ná sɔ́ Judáa toxo ɖě lɛ́ɛ dó húzú gbětótló, mɛɖé ná nɔ fínɛ́ ǎ.”

¹¹ Gbɛtɔ́ e ɖó nǔnywɛ́ bó mɔ nukúnnú jɛ nǔ énɛ́ lɛ́ɛ mɛ é ɖě ká ɖe a? Ényí Mawu Mavɔmavɔ ɖɔ xó nú mɛ mɔ̌hunkɔtɔn hǔn, é ní bó ɖɔ nǔ e wú to ɔ́ gba ɔ́, nǔ e wú é ji zo bó cí gbětótló e mɛ mɛɖé má nɔ́ gbɔn ǎ é ɖɔhun é.

¹² Énɛ́ ɔ́, Mawu Mavɔmavɔ yí gbe ɖɔ: “Sɛ́n ce e un ná yě ɔ́ wɛ yě jǒ dó wú wɛ nǔ cí mɔ̌. Yě ɖótó gbe ce ǎ. Yě xwedó xó ce ǎ.

¹³ Nǔ e yě xwe ɔ́ wɛ yě nɔ́ wa; yě nɔ́ sɛn vodún Baalu lě e tɔ́gbó yětɔn lɛ́ɛ kplɔ́n yě gbɔn é.

¹⁴ Énɛ́ wú wɛ nyɛ Mawu Mavɔmavɔ Nǔbǐwúkpétɔ́ ɔ́, nyɛ Mawu Izlayɛ́li tɔn ɔ́, un ɖɔ un ná ná ama e vɛ́ dódó ɔ́ togun élɔ́, bɔ é ná ɖu. Un ná ná ɛ sin e mɛ è kɔn nǔvɛ́nu dó é, bɔ é ná nu.

¹⁵ Un ná gba yě dó akɔta e yě ma tunwun ǎ lɛ́ɛ mɛ, akɔta e tɔ́gbó yětɔn lɛ́ɛ má tunwun ǎ lɛ́ɛ mɛ. Un na sɛ́ ahwan dó yě, bó ná vívá kún yětɔn bǐ.”

¹⁶ Xó e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe: “Mi lin tamɛ kpɔ́n ganjí! Mi yi da mɛ e nɔ ya avǐ lɛ́ɛ bónú yě ní wá; nyɔ̌nu e nyɔ́ avǐ ya ganjí lɛ́ɛ ní wá.”

¹⁷ Togun ɔ́ ɖɔ: “Yě ní yá wǔ wá dó gbɛvíhan dó mǐ jí. Đasin ní ɖo nukún mǐtɔn jí gosín wɛ; ɖasin ní ɖo nukún mǐtɔn jí.”

¹⁸ Jelemíi ɖɔ: “È ɖo gbɛvíhan se wɛ sín Sinyɔ́ɔ: ‘Étɛ́ ɖíe! Gbɛ mǐtɔn vɔ lo. Mǐ ɖu winnyá; mǐ na hɔn jó to mǐtɔn dó. È gba xwé mǐtɔn bǐ.’

¹⁹ Nyɔ̌nu lɛ́ɛ e mi, mi ɖótó Mawu Mavɔmavɔ xó ɔ́; tó mitɔn ní se xó e ɖo nu tɔn mɛ tɔ́n sín wɛ ɔ́. Mi kplɔ́n gbɛvíhan nyɔ̌nuví mitɔn lɛ́ɛ, mi kplɔ́n nǔwamɛhan élɔ́ miɖée:

²⁰ ‘Kú fán dǒ mǐtɔn; kú byɔ́ xwé mǐtɔn ɖagbe ɖagbe lɛ́ɛ gbe. Kú hu yɔkpɔ́vú lɛ́ɛ kɔn nyi alixo alixo; é hu dɔ̌nkpɛvú lɛ́ɛ kɔn nyi tokplétɛn lɛ́ɛ.’ ”

²¹ Mawu ɖɔ: “Jelemíi, ɖɔ nú yě ɖɔ nyɛ Mawu Mavɔmavɔ ɖɔ: mɛ kúkú gbɔn kɔ́ mɛ, è fúnfún zunkɔ́ gbɔn gle mɛ ɖɔhun. Mɛ kúkú tɛ́ gbɔn kɔ́ mɛ è xo hankán kɔn nyi ayǐ ɖo nǔkún-yatɔ́ lɛ́ɛ gúdo ɖɔhun, mɛɖé ká ɖe bó ná bɛ́ ǎ.”

Mɛ e tunwun Mawu ɔ́ wɛ ɖó nǔnywɛ́ jɔ nǔnywɛ́ ɔ́

²² Xó e Mawu Mavɔmavɔ ɖɔ ɔ́ ɖíe: “Mɛ e ɖó nǔnywɛ́ ɔ́ má sɔ́ nǔnywɛ́ tɔn dó yí go ná ó; mɛ e dó hlɔ̌nhlɔ́n ɔ́ má sɔ́ hlɔ̌nhlɔ́n tɔn dó yí go ná ó. Mɛ e jɛ dɔkun ɔ́ má sɔ́ dɔkun tɔn dó yí go ná ó.

²³ Nú mɛɖé jló ná jlá ajɔ̌ nú éɖée ɔ́, nǔ e mɛ ɔ́ ná sɔ́ dó jlá ajɔ̌ nú éɖée ɔ́ wɛ nyí tunwun e é tunwun mì ɔ́; tunwun e é tunwun mì ɖɔ nyɛ Mawu Mavɔmavɔ wɛ nɔ wa ɖagbe, nyɛ wɛ nɔ wa nǔ jlɔ́jlɔ́, nyɛ wɛ nɔ wa nǔ ɖó sɛ́nxwi jí ɖo ayǐkúngban jí ɔ́, wɛ é ná sɔ́ dó jlá ajɔ̌ nú éɖée; ɖó mɛ mɔ̌hunkɔ lɛ́ɛ sín nǔ wɛ nɔ́ nyɔ́ nyɛ Mawu Mavɔmavɔ nukún mɛ.”

Mawu ná dɔn tó nú mɛ e jɛ adagbotɔ́ nyí kpowun lɛ́ɛ

²⁴ Mawu Mavɔmavɔ ɖɔ: “Éɖíe, azǎn ɔ́ jǎwe, bɔ un ná dɔn tó nú mɛ e gbo ada, bo ká jɛ ada gbigbo nyí kpowun lɛ́ɛ.

²⁵ Un ná dɔn tó nú Ejípunu lɛ́ɛ, nú Judáanu lɛ́ɛ, nú Edɔ́munu lɛ́ɛ. Un na dɔn tó nú Mɔwabunu lɛ́ɛ, un ná dɔn tó nú Amumɔ́ɔ ví lɛ́ɛ, bó dɔn tó nú yě mɛ e nɔ nɔ gbětótló mɛ bó nɔ́ xwlɛ́ gekplá yětɔn lɛ́ɛ, ɖó mɛ énɛ́ lɛ́ɛ ɖěbǔ gbo ada ǎ, bɔ Izlayɛ́li togun ɔ́ ká jɛ adagbotɔ́ nyí kpowun.”