Jelemíi 6 - MAWUXÓWÉMA

Awě ɖaxó ɖé ɖo te kpɔ́n Jeluzalɛ́mu

¹ Mawu ɖɔ: “Bɛnjamɛ́ɛ ví e mi, mi hɔn sín Jeluzalɛ́mu! Mi kún lanzo ɖo Tekowa, bónú mɛ bǐ ní nɔ acéjí. Mi zé ahwansyá dó jǐ ɖo Bɛti-Kɛlɛ́mu. Đó awě ɖé jǎwe, nǔ baɖabaɖa ɖé lɛ́ɛ ja sín totaligbé.

² Un hánnyá Sinyɔ́ɔ nɛ́! Toxo ɖɛkpɛ ɖɛkpɛ, toxo ɖagbe ɖagbe ɔ́, un hánnyá ɛ lo!

³ Mɛ ɖé lɛ́ɛ hun káká yi gɔ̌n tɔn; yě cí lɛ̌ngbɔ́nyitɔ́ lɛ́ɛ kpó kanlin wɔ̌buwɔ́bú kpó ɖɔhun. Yě ɖó gɔnu yětɔn lɛ́ lɛ̌ dó e, bɔ mɛ ɖokpó ɖokpó ɖo tɛn tɔn mɛ ɖo sɔ́jakánɖó tɔn nu.

⁴ Yě nɔ́ sú xó ɖɔ: ‘Mi sɔ́ ahwan nú, mi wa mǐ tɔ́n ahwan ɛ hwemɛ cíɖíɖí! Yéége! Mi kpɔ́n! Zǎn ɖo kúkú dó mǐ wɛ, hwe ko ɖo xɔ yi wɛ! Ɔɔɔ!

⁵ Amɔ̌, mi wá mǐ yi, mǐ na gbɔ bó tɔ́n ahwan ɛ zǎn mɛ; mǐ na gba xwé tɔn ɖagbe ɖagbe lɛ́ɛ.’

⁶ Xó e nyɛ Mawu Mavɔmavɔ Nǔbǐwúkpétɔ́ ɖɔ ɔ́ ɖíe: Mi gbo atín bó to ɖó Jeluzalɛ́mu toxo ɔ́ wú; mi to káká yi dǒ ɔ́ ta nu. Mɛtáfútɔ́ kɛ́ɖɛ́ wɛ gɔ́ toxo ɔ́. È mɔ xlɛ̌ tɔn.

⁷ É nɔ́ ɖe adǎkaxixo tɔn tɔ́n lě e tɔjɔtɛn nɔ ɖe sin tɔ́n gbɔn é! A se è ɖo xó sú wɛ ɖo toxo ɔ́ mɛ hǔn, tunwun ɖɔ alǎnnú wa wɛ è ɖe abǐ è ɖo nǔ hɛn gblé wɛ. Mɛ e ɖo wǔvɛ́ mɔ wɛ lɛ́ɛ kpó mɛ e gblé wǔ wɛ è ɖe lɛ́ɛ kpó nɔ́ ɖo jijɛ jí wɛ bɔ un nɔ ɖo mimɔ wɛ hwebǐnu.

⁸ Jeluzalɛ́mu, yǐ kplɔ́n ɖo nǔ e ɖo gbigbo we wɛ lɛ́ɛ mɛ, é má nyí mɔ̌ ǎ ɔ́, un táá wá sɛ yi zɔ nú we, bó ná wá sɔ́ we dó húzú gbětótló, ayǐkúngban e jí mɛɖé má ɖe ǎ é.”

Togun ɔ́ gbɛ́ ɖɔ émí kún ná ɖótó Mawu ó

⁹ Xó e Mawu Mavɔmavɔ Nǔbǐwúkpétɔ́ ɖɔ ɔ́ ɖíe: “È nǎ cyán Izlayɛ́li ví ɖokpó ɖokpó e ná kpo lɛ́ɛ bǐ, lě e è gbɛ vǐwun ɔ́, è nɔ lɛ́ wá gbɔn gbo tɔn mɛ ɔ́ ɖɔhun. Jelemíi, alɔ towe ní nɔ́ vɔ́ gbɔn vǐwuntín ɔ́ sín ala lɛ́ɛ wú, lě e vǐwunsínsɛ́ngbɛtɔ́ nɔ́ bló gbɔn ɖo vǐwunsínsɛ́ngbigbɛ hwenu é.”

¹⁰ Jelemíi ɖɔ: “Mɛ̌ un ka ná ɖó xó élɔ́ te ná? Mɛ̌ un ka na ɖɔ ná, bɔ é ná sé xá mì? Tó yětɔn ɖíe sú gbɔn, bɔ yě ma nɔ sixú se nǔ ǎ e. Mawu Mavɔmavɔ, xó towe ɔ́, ɖɔɖɔ wɛ yě nɔ́ ɖɔ d'é wú. Xó towe nɔ́ nyí nǔɖé nú yě ǎ.

¹¹ Mawu, xomɛsin towe gɔ́ ayi ce, un sixú hɛn ɖó te ǎ.” Mawu ɖɔ: “Ényí mɔ̌ hǔn, gba kɔn dó yɔkpɔ́vú lɛ́ɛ jí gbɔn alixo alixo; gba kɔn dó mɛ wínnyáwínnyá lɛ́ɛ jí, ɖo fí e yě kplé ɖe lɛ́ɛ. Đó è nǎ zě asú kpó asi kpó yi. È nǎ zě mɛ kpikpo yi; è nǎ zě mɛ e dɔ́ ji é yi.

¹² Xwé yětɔn, gle yětɔn kpó asi yětɔn kpó bǐ nǎ húzú mɛ ɖěvo tɔn. Alɔ ce ná jɛ mɛ e ɖo to élɔ́ mɛ lɛ́ɛ wú. Xó e nyɛ Mawu Mavɔmavɔ ɖɔ ɔ́ nɛ́.

¹³ Đó yě bǐ wɛ dɔkun gbo vɛ̌, bɛ́ sín yɔkpɔ́vú lɛ́ɛ jí, káká yi mɛxó lɛ́ɛ jí. Gbeyíɖɔ kpó vɔ̌sánú-xwlémawutɔ́ kpó bǐ wɛ nɔ xo awo.

¹⁴ Awě e ɖo togun ce xo wɛ ɔ́, yě sɔ́ dó ylɔ́ nǔɖé ǎ, bó nɔ́ ɖɔ: ‘Nǔ bǐ ɖo yiyi wɛ; nǔ bǐ ɖo yiyi wɛ linsinlinsin;’ nǔ ɖěbǔ ká ɖo yiyi wɛ ǎ;

¹⁵ winnyá wɛ ɖó ná hu yě, ɖó nǔ baɖabaɖa e yě dó sin lɛ́ɛ wú. Winnyá ká hu yě lɔ vɔ́vɔ́ ǎ. Énɛ́ wú wɛ yě ná j'ayǐ kpó mɛ e ɖo ayǐ jɛ wɛ lɛ́ɛ kpó. Hwenu e un ná wa nǔ xá yě ɔ́, yě ná mɔ yěɖée ɖo kɔ́ mɛ. Xó e nyɛ Mawu Mavɔmavɔ ɖɔ ɔ́ nɛ́.

¹⁶ Mi ɖótó mì: Mi nɔ te lobo kpɔ́n ali e gbɔn wɛ mi ɖe lɛ́ɛ ganjí. Mi kan ali e tɔ́gbó mitɔn lɛ́ɛ gbɔn ɔ́ byɔ́. Ali ɖě tɛ́ ká nyí ali ɖagbe ɔ́? Mi ba ali énɛ́ ɔ́ lobo wlí. Énɛ́ ɔ́, lǐndɔ̌n mitɔn ná mɔ vivo. Lo ɔ́, mi ɖɔ: ‘Mǐ ba ná gbɔn ali énɛ́ ǎ.’

¹⁷ Un ɖó tɛnmɛ nú mɛ e ná kpɔ́n ali nú mi lɛ́ɛ: Mi bo ɖo tó ɖó lanzo yětɔn wɛ. Lo ɔ́, mi ɖɔ: ‘Mǐ nǎ ɖótó ǎ.’

¹⁸ Énɛ́ ɔ́ wú ɔ́, akɔta ɖě lɛ́ɛ mi, mi ɖótó mì! Gbɛ ɔ́ bǐ ní zé nukún ɖó te, bó ná dó kpɔ́n nǔ e ɖo yě ná xá wɛ é!

¹⁹ Gbɛtɔ́ e gbɔn ayǐkúngban ɔ́ jí lɛ́ɛ bǐ ní ɖótó! Éɖíe, un ná sɛ́ awě dó togun élɔ́, yě ná ɖu linlin nyanya e yě ɖǒ ɔ́ sín le. Đó yě wlí tó xó ce lɛ́ɛ wú ǎ, yě hu tɛ́ nú sɛ́n ce.

²⁰ Zǎlínkpɔ́n e è hɛn sín Saba e ba wɛ un ɖe a? Fántín wǎnɖagbenɔ e è hɛn sín to linlin mɛ ɔ́ ba wɛ un ɖe a? Vɔ̌ e yě nɔ́ dó zo nú mì lɛ́ɛ ba wɛ un ɖe ǎ. Vɔ̌ e yě nɔ́ sá nú mì lɛ́ɛ nɔ nyɔ́ nukún ce mɛ ǎ.

²¹ Énɛ́ ɔ́ wú wɛ nyɛ Mawu Mavɔmavɔ ɔ́, un ná to afɔklɛ́nnú ɖó alixo nú yě, bɔ tɔ́ kpó vǐ kpó bǐ na jɛ ayǐ bó ná kú; mɛ bǐ ná kú: mɛ e kpó mɛ kpó ɖo kpɔ́ é ná kú, xɔ́ntɔn xɔ́ntɔn ná kú.”

Kɛntɔ́ ɔ́ jǎwe sín totaligbé

²² Mawu Mavɔmavɔ ɖɔ: “Éɖíe, togun ɖokpó gosín to e ɖo taligbé ɔ́ mɛ jǎwe. Akɔta ɖaxó ɖokpó sí te sín fí e gbɛ ɔ́ kponu ɖó é, bó jǎwe.

²³ Yě hɛn gǎ kpó hwǎn kpó. Yě jɔ lan ɖésú, yě nɔ́ se gbɔ ǎ. Yě ɖo zǐngídi jí xu ɖɔhun. Sinyɔ́ɔ toxo e, yě bǐ xá sɔ́ bó já; sɔ́ja lɛ́ɛ to yěɖée lyɛ̌ngbe lyɛ̌ngbe, bó ja ahwan tɔ́n we gbé.”

²⁴ Togun ɔ́ ɖɔ: “Ée mǐ se xó énɛ́ ɔ́, awakanmɛ kú mǐ. Akpɔ ɖó mǐ, mǐ jɛ wǔvɛ́ mɔ jí nyɔ̌nu ɖo ajidonu ɖɔhun.

²⁵ Sinyɔ́ɔnu e mi, mi ma yi gle mɛ ó, mi ma jɛ ali ó, ɖó kɛntɔ́ gan hwǐ, bó ɖo te. Xɛsi ɖo fí bǐ.”

²⁶ Mawu ɖɔ: “Togun ce, sɔ́ caki dó lobo lɛ afín. Byɔ̌ aluwɛ mɛ vǐ ɖokpónɔ kú nú mɛ ɖɔhun. Ya avǐ hoho, ɖó hwi ná fyán wɛ nǔhɛngblétɔ́ ɔ́ ɖe.”

Togun ɔ́ cí gan e mɛ è ma sixú ɖe nǔ kwíji kwíji sín ǎ é ɖɔhun

²⁷ Mawu ɖɔ: “Jelemíi, un sɔ́ we bɔ a nǎ gbéjé togun ce kpɔ́n, bó ná tunwun nǔ e wa nú wɛ é nyí é. A ɖǒ ná tunwun i; a ɖǒ ná gbéjé zǐnzán tɔn kpɔ́n. Lě e gansínsíntɔ́ nɔ́ sínsín gan bó nɔ́ mɔ do nú nǔ kwíji kwíji e ɖe mɛ ɔ́ gbɔn ɔ́, mɔ̌ wɛ a ná mɔ do nú togun ce gbɔn.”

²⁸ Jelemíi ɖɔ: “Yě bǐ wɛ nɔ fɔ́n gǔ, yě bǐ wɛ nɔ́ ɖɔ mɛ nú, yě bǐ wɛ syɛ́n ɖo azɔ̌ énɛ́ ɔ́ mɛ ganvɔ ɖɔhun; yě bǐ wɛ nɔ xo dǎka.

²⁹ Fletuntɔ́ nɔ́ lɔn bɔ myɔ tɔn nɔ cí ǎ. Nǔ ɖo nǔ ganjí ɔ́, sunmí ɖó ná sínsín ɖo zo nu. Fletuntɔ́ nɔ́ tɛ́nkpɔ́n bó nɔ ɖe nǔ kwíji kwíji sín kpatágan mɛ, bónú é ná húzú kpatágan akú. Amɔ̌, togun élɔ́ tɔn ɔ́, nǔ yǎyá wɛ è wa, nǔ kwíji kwíji tɔn lɛ́ɛ wá yi ǎ.

³⁰ Bɔ è gbɔ bo ylɔ́ togun énɛ́ ɖɔ kpatágan ma ɖo ta ɖé. Đó Mawu Mavɔmavɔ sɔ́ yě nyi gbě.”