Jelemíi 51 - MAWUXÓWÉMA

¹ Xó e Mawu Mavɔmavɔ ɖɔ ɔ́ ɖíe, é ɖɔ: “Un ná sɛ́ jɔhɔn e nɔ hɛn nǔ gblé ɔ́ dó Babilɔ́nunu lɛ́ɛ; un ná sɛ́ jɔhɔn énɛ́ dó kɛntɔ́ ce énɛ́ lɛ́ɛ.

² Un ná sɛ́ mɛ dó yě, bɔ è nǎ fúnfún yě gbɔn fí bǐ, lě e jɔhɔn nɔ d'alɔ wɔn mɛ, bó nɔ fúnfún é ɖɔhun; è nǎ gba Babilɔ́nu to ɔ́. Azǎn nyanya énɛ́ gbe ɔ́, kɛntɔ́ yětɔn lɛ́ɛ ná ján go dó yě gbɔn ɖisí amyɔ.

³ Gǎdatɔ́ lɛ́ɛ ní da gǎ dó mɛ e ɖo toxo ɔ́ mɛ lɛ́ɛ; yě ní ma zé ganwu yětɔn lɛ́ɛ ó. Yě ní hu dɔ̌nkpɛvú ahwanfuntɔ́ tɔn lɛ́ɛ. Yě ní vívá kún nú ahwangɔnu tɔn.

⁴ Mɛ e gblé wǔ lɛ́ɛ ná tɛ́ kpaɖaɖa ɖo Babilɔ́nu to ɔ́ mɛ. Mɛkúkú lɛ́ɛ ná ɖo kpɔ́ ɖo ali lɛ́ɛ jí.

⁵ Đó hwɛ e yě hu dó nyɛ Mawu Izlayɛ́li tɔn, nyɛ Mawu ɖokpó géé e tíin ɔ́ wɛ gɔ́ to yětɔn. Lo ɔ́, Mawu Mavɔmavɔ, Mawu Nǔbǐwúkpétɔ́ ɔ́ ɖo nukún kpé dó Izlayɛ́li kpó Judáa kpó wú wɛ.”

⁶ Mi hɔn sín Babilɔ́nu to ɔ́ mɛ, mɛ ɖokpó ɖokpó ní hwlɛ́n ta tɔn gán! É má nyí mɔ̌ ǎ ɔ́, mi táá wa dɔn ɖ'é mɛ! Đó hwenu e Mawu Mavɔmavɔ ná ba hlɔn ɔ́ wɛ su. É ná bló xá ɛ lě e é jɛ xá gbɔn é.

⁷ Babilɔ́nu cí sikákɔ́fu e mɛ vɛ̌ɛn ɖe ɔ́ ɖɔhun ɖo Mawu Mavɔmavɔ lɔ mɛ, bɔ gbɛ ɔ́ bǐ nu mú. Akɔta lɛ́ɛ nu vɛ̌ɛn ɖo kɔ́fu ɔ́ mɛ. Énɛ́ ɔ́ wú wɛ akɔta lɛ́ɛ bǐ cí mɛ e tamɛ ma sɔgbe ná ǎ é ɖɔhun.

⁸ Tlóló kpowun ɔ́, Babilɔ́nu j'ayǐ bó gba hánnyá. Énɛ́ ɔ́, mɛ ɖé lɛ́ɛ ɖɔ: “Mi dó gbɛvíhan dó jǐ tɔn; mi sɔ́ nǔ bó blá akpa n'i. Bóyá é sixú gán.”

⁹ Lo ɔ́, mɛ ɖěvo lɛ́ɛ ɖɔ: “Mǐ lébe nú Babilɔ́nu, azɔn tɔn ka gbɔ ǎ. Mi wá mǐ jó e dó bó ná yi to mǐtɔn mǐtɔn mɛ. Đó tó e ná dɔn n'i wɛ Mawu ɖe ɔ́ d'agba, é yi jǐxwé káká bó byɔ́ akpɔ́kpɔ́ lɛ́ɛ mɛ.

¹⁰ Mawu Mavɔmavɔ jɛ ahwan mǐ jí. Mi wá mǐ lɛ́ kɔ yi Sinyɔ́ɔ lobo ná yi ɖɔ nǔ e Mawu Mavɔmavɔ, Mawu mǐtɔn wa nú mǐ é.”

¹¹ Mawu Mavɔmavɔ fɔ́n hun dó jǐ nú Mɛdi xɔ́sú lɛ́ɛ, bó jló ná vívá kún nú Babilɔ́nu to ɔ́. Mawu Mavɔmavɔ wɛ ɖo hlɔn ba wɛ, ɖó yě ɖu su nú xwé tɔn. Mi gan gǎ mitɔn lɛ́ɛ ganjí, mi fɔ gǎglónú mitɔn lɛ́ɛ.

¹² Mi zé ahwansyá mitɔn ɖó jǐ, mi ɖe xlɛ́ ɖɔ ahwan yá mi ɖe xlɛ́ ɖɔ émí ná mu ahohó Babilɔ́nu tɔn lɛ́ɛ, mi cyán sɔ́ja dó miɖée jí, mi to sɔ́ja mɛcɔ́tɔ́ lɛ́ɛ. Mi tɔ wu gbɔn fí bǐ. Nǔ e Mawu Mavɔmavɔ ɖɔ émí ná wa xá Babilɔ́nu lɛ́ɛ ɔ́, lě e é ná bló gbɔn ɔ́ nɛ́.

¹³ Babilɔ́nu, hwi mɛ e ɖo tɔ ɖaxó tó, bó ɖo dɔkun tɛ́ntin ɔ́, fí e a wlǒ mɛ ɖu jɛ ɔ́ kpé, xó towe fó lo.

¹⁴ Mawu Mavɔmavɔ Nǔbǐwúkpétɔ́ ɔ́ xwlé éɖée bó ɖɔ: “Un na sɛ́ gbɛtɔ́ dó bɔ yě ná wá vun blá we wɛn ɖɔhun, lobo ná tɔ́n ahwan we, bó ná ɖu ɖo jǐ towe; nǔ ná víví nú yě bɔ yě ná sú xó.”

¹⁵ Mawu ɔ́, hlɔ̌nhlɔ́n tɔn wɛ é dó ɖó ayǐkúngban ɔ́. Nǔwúkpíkpé tɔn wɛ é dó ɖó gbɛ ɔ́. Nǔnywɛ́ tɔn wɛ é dó ɖó jǐnukúnsin.

¹⁶ Mawu kɛ nu ɔ́, sin nɔ sɛ kplé ɖo jǐxwé, akpɔ́kpɔ́ lɛ́ɛ nɔ sí te sín fí e jǐnukúnsin kpó ayǐkúngban kpó kplé ɖe é, jǐ nɔ kɛwun bó nɔ́ ja; jɔhɔn nɔ sí te sín fí e é ɖó tɛnmɛ n'i ɖó é.

¹⁷ Gbɛtɔ́ lɛ́ɛ mɔ mɔ̌ ɔ́, yě bǐ nɔ́ jɔ yɛyi dó te; yě sɔ́ nɔ́ tunwun nǔ e yě ná ɖɔ é ǎ. Énɛ́ ɔ́, nǔkantɔ́ e tun nǔmɛsɛn yětɔn lɛ́ɛ nú yě ɔ́, winnyá nɔ́ hu yě, ɖó bǒcyɔ énɛ́ lɛ́ɛ bǐ wɛ nyí xɛblɛ́nú; gbɛ ɖě ɖo yě mɛ ǎ.

¹⁸ Nǔ yǎyá wɛ yě nyí; yě hwɛ̌n. Hwenu e Mawu ná dɔn tó nú mɛ ɔ́, yě bǐ sín kún wɛ è nǎ vívá.

¹⁹ Amɔ̌, Mawu Jakɔ́bu ví lɛ́ɛ tɔn ɔ́, è sixú jlɛ́ ɛ dó nǔmɛsɛn yětɔn lɛ́ɛ wú ǎ, ɖó é wɛ ɖó nǔ bǐ. Nyǐkɔ tɔn nyí Mavɔmavɔ Mawu Nǔbǐwúkpétɔ́.

Babilɔ́nu xó fó

²⁰ Mawu ɖɔ: “Babilɔ́nu, zǔnkpé wɛ a nyǐ ɖo alɔ ce mɛ ɖ'ayǐ, a nyǐ ahwanlyánnú ɖo alɔ mɛ nú mì, bɔ un sɔ́ we dó gba akɔta lɛ́ɛ ná, un sɔ́ we dó gba axɔ́súɖuto lɛ́ɛ ná.

²¹ Hwi wɛ un dó gblé gbɛ dó nú sɔ́ kpó sɔ́xátɔ́ kpó. Hwi wɛ un dó hu kɛkɛ́ví kpó kɛkɛ́víkuntɔ́ kpó.

²² Hwi wɛ un dó gblé gbɛ dó nú súnnu kpó nyɔ̌nu kpó, hwi wɛ un dó gblé gbɛ dó nú degénɔ kpó yɔkpɔ́vú kpó, hwi wɛ un dó gblé gbɛ dó nú dɔ̌nkpɛvú kpó ɖyɔ̌vǐ kpó.

²³ Hwi wɛ un dó gblé gbɛ dó nú kanlin kpó kanlinnyitɔ́ kpó. Hwi wɛ un dó gblé gbɛ dó nú glesi kpó nyibúsú e é nɔ dó lɛ gle ná lɛ́ɛ kpó. Hwi wɛ un dó gblé gbɛ dó nú gǎn hɔn-yitɔ́ lɛ́ɛ kpó tokpɔngán lɛ́ɛ kpó.”

²⁴ Mawu Mavɔmavɔ ɖɔ: “Nǔ e Babilɔ́nu xɔ́sú ɔ́ kpó Babilɔ́nunu lɛ́ɛ kpó wa xá Sinyɔ́ɔ ɔ́ bǐ sín axɔ́ wɛ un na sú yě ɖo nukún mitɔn mɛ.

²⁵ Babilɔ́nu, din ɔ́, un ná wa nǔ xá we; só nǔhɛngblétɔ́, hwi mɛ e gblé nǔ gbɔn ayǐ élɔ́ bǐ jí é, alɔ ce ná jɛ wǔ we, un ná flí we sín aga; só ɖaxó, a nǎ ji kɔn afín. Xó e nyɛ Mawu Mavɔmavɔ ɖɔ ɔ́ nɛ́.

²⁶ È sɔ́ ná mɔ awǐnnya e è nɔ dó ján xɔ ná ɔ́ ɖo só towe jí ǎ; è sɔ́ ná mɔ awǐnnya e è nɔ dó dó xɔ do ná ɔ́ ɖo só towe jí ǎ. A nǎ gba hánnyá bǐ. Xó e nyɛ Mawu Mavɔmavɔ ɖɔ ɔ́ nɛ́.”

²⁷ Mawu ɖɔ: “Babilɔ́nu kɛntɔ́ lɛ́ɛ mi, mi kún lanzo ɖo akɔta lɛ́ɛ tɛ́ntin. Mi fɔ́n ahwanfuntɔ́ yětɔn lɛ́ɛ dó Babilɔ́nu jí. Mi fɔ́n axɔ́súɖuto Alaláti tɔn, Mɛni tɔn kpó Acikenázi tɔn kpó dó jǐ tɔn.

²⁸ Mi fɔ́n mɛ bǐ dó jǐ tɔn, mi dɔn Mɛdi xɔ́sú lɛ́ɛ, gǎn hɔn-yitɔ́ Mɛdi tɔn lɛ́ɛ kpó dó tokpɔngán Mɛdi tɔn lɛ́ɛ kpó dó jǐ tɔn. Fí e ɖo Mɛdi sín acɛ mɛ lɛ́ɛ bǐ ní fɔ́n gǔ dó jǐ tɔn.”

²⁹ Hwenu e nǔ e Mawu Mavɔmavɔ lin dó Babilɔ́nu wú ɔ́ ná ɖo jijɛ wɛ ɔ́, ayǐkúngban ná sísɔ́, é ná dán wǔ. Mawu Mavɔmavɔ ná sɔ́ Babilɔ́nu to ɔ́ dó húzú gbětótló, mɛɖé sɔ́ ná zɛ gbɔn fínɛ́ ǎ.

³⁰ Ahwanfuntɔ́ Babilɔ́nu tɔn lɛ́ɛ ko fɔ tú kɔn nyi ayǐ; yě yi hɔn bɛ́ cí ahohó lɛ́ɛ mɛ. Hlɔ̌nhlɔ́n yětɔn vɔ; nyɔ̌nu e ba gǎn kpo ɔ́ ɖɔhun wɛ yě cí din. È ɖo xwé lɛ́ɛ dó zo wɛ, è ɖo hɔn lɛ́ɛ fó wɛ.

³¹ Wɛnsagun lɛ́ɛ ɖo wezun nu bó nɔ́ ɖo wɛn yi dó wɛ, mɛ ɖě ɖo yiyi wɛ ɔ́, mɛ ɖě nɔ́ ɖo wiwa wɛ; yě nɔ́ yi ɖɔ nú Babilɔ́nu xɔ́sú ɔ́ ɖɔ: “È jǎn to ɔ́ gbɔn fí bǐ.

³² Gbɛtɔ́ ján ali lɛ́ɛ bǐ; è dǒ zohúnglíntɛn lɛ́ɛ bǐ zo, xɛsi jɛ ahwanfuntɔ́ lɛ́ɛ bǐ jí.”

³³ Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ ɔ́ ɖíe, é ɖɔ: “Babilɔ́nu cí ayǐkúngban e è zǐn ganjí, bó ná só jinukún ɖ'é jí ɔ́ ɖɔhun. Zaanɖé din ɔ́, yiya hwenu tɔn ná su.”

Mawu ná ba hlɔn nú togun tɔn

³⁴ Sinyɔ́ɔnu lɛ́ɛ ɖɔ: “Nabukodonɔzɔ́ɔ, Babilɔ́nu xɔ́sú ɔ́ vúnvún mǐ, é fyɔ́n mǐ bó nu, lobo jó mǐ dó agbǎn vɔ̌tɔ́ ɖɔhun. É mi mǐ dlagɔ́ɔn ɖɔhun. É mi nǔ ɖagbe e ɖo mǐ sí lɛ́ɛ, bɔ adɔgo tɔn gɔ́. Énɛ́ gúdo ɔ́, é zé mǐ nyi gbě.

³⁵ Adǎka e Babilɔ́nu xo mǐ wǔ ɔ́, é ní sú axɔ́ tɔn. Hun mǐtɔn e Babilɔ́nunu lɛ́ɛ kɔn nyi ayǐ ɔ́, è nǐ dɔn tó tɔn nú yě.” Xó e Jeluzalɛ́munu lɛ́ɛ ɖɔ ɔ́ nɛ́.

³⁶ Énɛ́ ɔ́ wú wɛ Mawu Mavɔmavɔ ɖɔ: “Jeluzalɛ́mu, un ná hwlɛ́n we gán. Un ná ba hlɔn dó ta towe mɛ. Un ná ɖɔ bɔ tɔsisa Babilɔ́nu tɔn bǐ ná xwí. Un ná ɖɔ bɔ tɔjɔtɛn tɔn ná mɛ.

³⁷ Babilɔ́nu ná húzú dǒglin, é ná húzú xwé nú ayǐsájɛ lɛ́ɛ; é ná jɛ vɔ̌ bɔ mɛ e mɔ lɛ́ɛ ɔ́, avivɔfún ná blá yě; yě ná sá heelú.

³⁸ Égbé din ɔ́, Babilɔ́nunu lɛ́ɛ ɖo gbe dó wɛ kinnikínní ɖɔhun. Yě ɖo xó sú wɛ kinnikínní ví ɖɔhun.

³⁹ Hwenu e nǔ ná jɛ yě jlǒ jí ɔ́, un ná ylɔ́ agɔ̌ ɖokpó nú yě, un ná ná ahan yě, bɔ yě ná nu mú, bó sɔ́ ná tunwun nǔ e ɖɔ wɛ yě ɖe ɔ́ ǎ. Yě ná dɔ́ amlɔ dɔ̌mányí; yě sɔ́ ná fɔ́n gbeɖé ǎ. Xó e nyɛ Mawu Mavɔmavɔ ɖɔ ɔ́ nɛ́.

⁴⁰ Un na kplá yě lɛ̌ngbɔ́ e è kplá xwe akpákpó jí ɔ́ ɖɔhun. Un ná kplá yě agbo kpó gbǎgbá kpó e è kplá xwe huhu gbe ɔ́ ɖɔhun.”

È ya gbɛvíhan dó Babilɔ́nu ta mɛ

⁴¹ Étɛ́! È yǐ Cecáki wɛ è ɖɔ a? Cecáki e susu tɔn gba kpé ayǐkúngban ɔ́ bǐ jí é, è yǐ o! Étɛ́! Babilɔ́nu húzú gbětótló ɖo akɔta lɛ́ɛ tɛ́ntin o!

⁴² Xu ɖi sin bó gba Babilɔ́nu to, tɔ bú i bǐ.

⁴³ È gba Babilɔ́nu toxo lɛ́ɛ bǐ. Ayǐkúngban ɔ́ bǐ nyí axéko, bǐ nyí gbětótló. Mɛ ɖěbǔ sɔ́ ɖo to ɔ́ mɛ ǎ, mɛɖé sɔ́ nɔ́ gbɔn fínɛ́ ǎ.

⁴⁴ Un ná dɔn tó nú Babilɔ́nu vodún Bɛ́lu ɔ́. Un ná bló bɔ é ná vi nǔ e wló ɖu wɛ é ɖe lɛ́ɛ bǐ. Akɔta lɛ́ɛ sɔ́ ná nyi ahwan wá gɔ̌n tɔn ɖě ǎ. Babilɔ́nu sín ahohó ɔ́ mu.

⁴⁵ Togun ce e mi, mi hɔn sín Babilɔ́nu. Mɛ ɖokpó ɖokpó ní hwlɛ́n ta tɔn, cóbónú xomɛsin ce ná wá.

⁴⁶ “Mi má nú ayixa mitɔn gbadó ó, mi ma ɖi xɛsi ó. Zǐngídi ná gba kpé to ɔ́ bǐ mɛ. Xó ɖě tɔ́n xwe élɔ́ mɛ ɔ́, ɖěvo ná tɔ́n xwe e ja ɔ́ mɛ; a nǎ se adǎkaxixo xó ɖo fí ɖě, bó ná se ɖo fí ɖěvo ɖɔ gǎnhúnǔtɔ́ ɖě sí te dó ɖě jí.”

⁴⁷ Mawu ɖɔ: “Ayǐ ɖokpó ka ná hɔ́n, bɔ un ná wa nǔ xá Babilɔ́nu vodún lɛ́ɛ. Babilɔ́nu ná nɔ winnyá mɛ. Mɛ e è hu lɛ́ɛ ná ɖo kpaɖaɖa ɖo to ɔ́ mɛ.

⁴⁸ Hwenɛ́nu ɔ́, è nǎ se bɔ è ɖo awǎ jɛ wɛ ɖo jǐxwé, bó ná se ɖo ayǐkúngban jí ɖó nǔ e gbo Babilɔ́nu ɔ́ wú. Mɛ e ná gba Babilɔ́nu lɛ́ɛ ná gosín totaligbé, bó ná wá tɔ́n ahwan ɛ.” Xó e Mawu Mavɔmavɔ ɖɔ ɔ́ nɛ́.

Jelemíi ɖɔ:

⁴⁹ Izlayɛ́li ví e Babilɔ́nu hu lɛ́ɛ gégé. Mɛ e é hu ɖo gbɛ ɔ́ mɛ lɛ́ɛ flá. Din ɔ́, ahwan jɛ jǐ tɔn; é ɖó ná j'ayǐ.

⁵⁰ Mi mɛ e kú xo kpo lɛ́ɛ mi, mi hɔn, mi ma nɔ te ó. Mi mɛ énɛ́ lɛ́ɛ e ɖo Babilɔ́nu dɔ̌n lɛ́ɛ mi, mi flín Mawu Mavɔmavɔ. Jeluzalɛ́mu ní nɔ ayi mitɔn mɛ hwebǐnu.

Izlayɛ́li ví lɛ́ɛ ɖɔ:

⁵¹ “Ée mǐ se hɛ̌nnú énɛ́ e ɖɔ wɛ è ɖe lɛ́ɛ ɔ́, mǐ dán ɖě wa gbɔn. Hwenu e mǐ se ɖɔ to ɖěvo mɛ nu lɛ́ɛ byɔ́ Mawu Mavɔmavɔ xwé gbe ɔ́, winnyá hu mǐ, mǐ sɔ́ sixú zé ta ǎ.”

⁵² Énɛ́ ɔ́ wú wɛ Mawu Mavɔmavɔ ɖɔ: “Éɖíe, ayǐ ɖokpó ná hɔ́n, bɔ un na jlɛ́ nǔ xá vodún Babilɔ́nu tɔn lɛ́ɛ. Mɛ yětɔn e gblé wǔ lɛ́ɛ ná ɖo azɔn wɛn wɛ gbɔn fí bǐ ɖo to ɔ́ mɛ.

⁵³ Babilɔ́nu na bo yi jǐ káká yi jǐxwé ɔ́, é ná bo hɔn yi hwlá ɖo ahohó tɔn lɛ́ɛ mɛ bó mɔ ɖɔ émí gló nǔ ɔ́, un ná sɛ́ nǔhɛngblétɔ́ lɛ́ɛ dó e. Xó e nyɛ Mawu Mavɔmavɔ ɖɔ ɔ́ nɛ́.” Jelemíi ɖɔ:

⁵⁴ “Mi ɖótó, è ɖo xósúsú se wɛ sín Babilɔ́nu. Awě wɛ ɖo Babilɔ́nunu lɛ́ɛ xo wɛ sɔ mɔ̌.

⁵⁵ Mawu Mavɔmavɔ wɛ ɖo Babilɔ́nu to ɔ́ vɔ wɛ. É ná ɖó xó e sú wɛ Babilɔ́nu kɛntɔ́ lɛ́ɛ ɖe ɖo dɔ̌n ɔ́ te. Yě ɖo zǐngídi ɖú wɛ jǐ dó gbe ɖɔhun; yě ɖo zǐngídi ɖú wɛ aslɔkɛ́ sí te ɖo xu jí ɖɔhun.

⁵⁶ Nǔhɛngblétɔ́ lɛ́ɛ wɛ ɖo Babilɔ́nu sɛkpɔ́ wɛ; yě ná wlí sɔ́ja Babilɔ́nu tɔn lɛ́ɛ; yě ná wɛ́n gǎ yětɔn lɛ́ɛ. Yě ná bló mɔ̌, ɖó Mawu Mavɔmavɔ ɔ́, Mawu wɛ é nyí; lě e mɛ ɖé wa nǔ gbɔn ɔ́ wɛ é nɔ́ ná mɛ ɔ́ gbɔn. É nɔ́ sú axɔ́ mɛ ɖokpó ɖokpó lě e é jɛ xá gbɔn é.

⁵⁷ Nyɛ Axɔ́sú e nyǐkɔ ce nɔ́ nyí Mawu Mavɔmavɔ Nǔbǐwúkpétɔ́ ɔ́ ɖɔ: Un ná ɖó ahan kɔ jí nú gǎn hɔn-yitɔ́ tɔn lɛ́ɛ, azaglɔ́gán tɔn lɛ́ɛ, tokpɔngán tɔn lɛ́ɛ, axɔ́sú tɔn lɛ́ɛ kpó ahwanfuntɔ́ syɛ́nsyɛ́n tɔn lɛ́ɛ kpó bɔ yě ná nu mú; yě ná dɔ́ amlɔ dɔ̌mányí; yě ná fɔ́n gbeɖé ǎ.”

⁵⁸ Xó e é lɛ́ ɖɔ ɔ́ ɖíe: “Ahohó gblɛlɛ Babilɔ́nu tɔn lɛ́ɛ mu. Hɔntogbó ɖaxó ɖaxó Babilɔ́nu tɔn lɛ́ɛ fyɔ́. Togun lɛ́ɛ jɛ tagba dó wǔvɔ́, myɔ fyɔ́ nǔ e Babilɔ́nu ji ya bó mɔ lɛ́ɛ bǐ.”

Selaya nyi anyǔwéma dó Efláti tɔ mɛ

⁵⁹ Hwenu e Judáa xɔ́sú Sedesíyasi ɖo xwe ɛnɛ bló wɛ ɖo zinkpo jí ɔ́, é kpódó ahwangán tɔn Nɛliya kpó zɔn kpɔ́ sín Jeluzalɛ́mu yi Babilɔ́nu. Selaya ɔ́, Nɛliya ví wɛ, bó nyí Maxiseya vívú. Cóbónú yě ná jɛ ali ɔ́, gbeyíɖɔ Mawu tɔn Jelemíi wlán wěma ɖokpó dó así nú Selaya.

⁶⁰ É wlán awě e ɖo te kpɔ́n Babilɔ́nu to ɔ́ bǐ dó anyǔwéma mlámlá ɖokpó jí; nǔ e è ɖɔ dó Babilɔ́nu wú bó wlán ɔ́ bǐ ɖo anyǔwéma ɔ́ jí.

⁶¹ Énɛ́ ɔ́, Jelemíi ɖɔ nú Selaya ɖɔ: “A jɛ Babilɔ́nu ɔ́, a nǎ zé gbe dó jǐ bó xa xó e ɖo anyǔwéma élɔ́ jí é bǐ.

⁶² A xa fó ɔ́, a nǎ ɖɔ: ‘Mawu Mavɔmavɔ, hwi wɛ ɖɔ toxo élɔ́ ná gba, bɔ gbɛtɔ́ kpó kanlin kpó bǐ na vɔ; hwi wɛ ɖɔ toxo ɔ́ ná húzú gbětótló, bó ná nɔ mɔ̌ káká sɔ́yi.’

⁶³ A xa wěma ɔ́ fó bǐ ɔ́, a nǎ sin awǐnnya dó anyǔwéma ɔ́ wú, bó ná zé nyi dó Efláti tɔ mɛ,

⁶⁴ bó ná ɖɔ: ‘Lě e Babilɔ́nu ná kú tɔ gbɔn ɔ́ nɛ́; é ná gán ɖo awě e Mawu ná sɛ́ dó e lɛ́ɛ mɛ ǎ. Akɔta lɛ́ɛ jɛ tagba dó wǔvɔ́.’ ” Jelemíi ɖɔ xó ɖó te fí.