Jelemíi 50 - MAWUXÓWÉMA

¹ Mawu Mavɔmavɔ ɖɔ xó dó Babilɔ́nu toxo wú, é ɖɔ xó dó Babilɔ́nunu lɛ́ɛ sín to wú gbɔn gbeyíɖɔ Jelemíi jí.

² Mawu ɖɔ: “Mi jlá wɛn élɔ́ akɔta lɛ́ɛ bǐ, mi ɖɔ nú mɛ bǐ se. Mi ná xlɛ̌ ɖé bónú mɛ bǐ ní tunwun. Mi ɖɔ bǐ, mi ma ɖe ɖě kpo ó. Mi ɖɔ: è yǐ Babilɔ́nu; vodún Bɛ́lu ɔ́ ɖu winnyá. Vodún Maadúki gba hánnyá. Bǒcyɔ tɔn lɛ́ɛ sín wi kɔ́n, vodún tɔn lɛ́ɛ gba.

³ Akɔta ɖokpó ná gosín totaligbé, bó ná wá fun ahwan xá Babilɔ́nu. É ná zé to ɔ́ dó húzú gbětótló, mɛ bǐ ná hɔn sín to ɔ́ mɛ. Gbɛtɔ́ kpó kanlin kpó bǐ ná hɔn; to ɔ́ bǐ ná jɛ vɔ̌.

⁴ Azǎn énɛ́ lɛ́ɛ mɛ ɔ́, Izlayɛ́linu lɛ́ɛ kpó Judáanu lɛ́ɛ kpó ná zɔn kpɔ́ sín dɔ̌n wá. Yě ná ɖo zɔnlin jí bó ná ɖo avǐ ya wɛ, bó ná ɖo nyɛ Mawu Mavɔmavɔ, Mawu yětɔn ɔ́ ba wɛ.

⁵ Yě ná kan ali e yě ná gbɔn bó lɛ́ kɔ yi Sinyɔ́ɔ byɔ́, bó ná wlí ali ɔ́ tunta dɔ̌n, ma zɛ dó ɖisí ma zɛ dó amyɔ; yě ná ɖɔ: mi wá mǐ ní zunfán Mawu Mavɔmavɔ, Mawu mǐtɔn; mi jɛ akɔ e è ma ná wɔn gbeɖé ǎ ɔ́ xá ɛ.

⁶ Togun ce ɔ́, lɛ̌ngbɔ́ e bú lɛ́ɛ ɖɔhun wɛ é cí ɖ'ayǐ. Lɛ̌ngbɔ́nyitɔ́ lɛ́ɛ dɔn yě bú. Yě jó lɛ̌ngbɔ́ lɛ́ɛ dó bɔ yě ɖo flúflú wɛ gbɔn sókan mɛ sókan mɛ. Yě gbɔn só ta só ta káká bó wɔn adɔ̌tɛn yětɔn.

⁷ Kɛntɔ́ yětɔn lɛ́ɛ xo go yě ɔ́, yě nɔ́ hu yě tɛ́, bó nɔ ɖɔ: ‘É nyí hwɛ bɔ mǐ hu ǎ, yědɛɛ lɛ́ɛ wɛ hu hwɛ dó Mawu Mavɔmavɔ, Mawu Mavɔmavɔ e gɔ́n è nɔ mɔ hwlɛngán ɖe é; é wɛ tɔ́gbó yětɔn lɛ́ɛ nɔ́ ɖó nukún.’

⁸ Mawu ɖɔ: Izlayɛ́li ví lɛ́ɛ mi, mi hɔn sín Babilɔ́nu jɛ nukɔn, mi tɔ́n sín Babilɔ́nunu lɛ́ɛ sín to mɛ. Mi tɔ́n jɛ nukɔn lě e gbɔ̌sú lɛ́ɛ nɔ́ lɔ́n bó nɔ́ jɛ nukɔn nú gbɔ̌ lɛ́ɛ é ɖɔhun.

⁹ Un ná dɔn to e ɖo totaligbé lɛ́ɛ gěgé dó Babilɔ́nu jí. To énɛ́ lɛ́ɛ bǐ ná fun ahwan xá Babilɔ́nu to ɔ́ bó ná yí. Gǎ yětɔn lɛ́ɛ nɔ xo nǔ kpo ǎ. Gǎ yětɔn lɛ́ɛ cí ahwanfuntɔ́ syɛ́nsyɛ́n e ma nɔ́ lɛ́ kɔ wá xwé asígbá alɔgbá ǎ é ɖɔhun.

¹⁰ Kɛntɔ́ ná fɔ nǔ e ɖo Babilɔ́nu lɛ́ɛ bǐ, nǔ ná kpé yě bó kpo. Xó e nyɛ Mawu Mavɔmavɔ ɖɔ ɔ́ nɛ́.

¹¹ Babilɔ́nunu lɛ́ɛ mi, ɖ'ayǐ ɔ́, mi vɔ togun ce; hwenɛ́nu ɔ́, mi j'awǎ, xomɛ hun mi. Mi tlɔ́ gbo nyibúví ɖo amagbo mɛ ɖɔhun. Mi sú xó sɔ́ ɖɔhun.

¹² Amɔ̌, din ɔ́, ayǐkúngban mitɔn ɖu winnyá; ayǐkúngban e jí mi ɖe ɔ́ sín wi kɔ́n. Akɔta mitɔn húzú gǔdonú ɖo akɔta lɛ́ɛ mɛ. Xɛ sɔ́ ɖo to ɔ́ mɛ ǎ, ayǐkúngban bǐ xú.”

¹³ Xomɛsin Mawu Mavɔmavɔ tɔn zɔ́n bɔ mɛɖé sɔ́ nɔ to ɔ́ mɛ ǎ. To ɔ́ jɛ vɔ̌ bǐ. Mɛ e ɖo dǐndín wɛ lɛ́ɛ mɔ ɔ́, avuvɔfún ná blá yě; yě ná sá heelú.

¹⁴ Gǎdatɔ́ lɛ́ɛ mi, mi sɔ́ ahwan nǔ, bó lɛ́ lɛ̌ dó Babilɔ́nu. Mi da gǎ dó e, mi ma wa ko tɔn ó, ɖó é hu hwɛ dó nyɛ Mawu Mavɔmavɔ.

¹⁵ Ahwanfuntɔ́ lɛ́ɛ mi! Mi sú xó dó Babilɔ́nu jí gbɔn ɖisí amyɔ. É wá sɔ́ éɖée jó, dǒ tɔn lɛ́ɛ mu, ahohó tɔn lɛ́ɛ hɔ́, ɖó nyɛ Mawu Mavɔmavɔ wɛ ɖo hlɔn ba wɛ. Akɔta lɛ́ɛ mi, nǔ e Babilɔ́nu wa xá mi ɔ́, mi yi ba hlɔn tɔn. Mi sú nǔ e é wa nú mɛ ɖě lɛ́ɛ ɔ́ sín axɔ́ ɛ.

¹⁶ Mi hu nǔkúndótɔ́ kpó nǔkún-yatɔ́ kpó e ɖo Babilɔ́nu lɛ́ɛ bǐ. Nǔ baɖabaɖa e ná jɛ ahwan hwenu lɛ́ɛ ní zɔ́n, bónú mɛ ɖokpó ɖokpó ní lɛ́ kɔ yi togun tɔn mɛ, mɛ ɖokpó ɖokpó ní hɔn yi to tɔn mɛ.

¹⁷ Đ'ayǐ ɔ́, Izlayɛ́li cí lɛ̌ngbɔ́ búbú e kinnikínní ɖo nyinya wɛ ɔ́ ɖɔhun. Asilíi xɔ́sú ɔ́ wɛ vúnvún i jɛ nukɔn, bɔ Babilɔ́nu xɔ́sú Nabukodonɔzɔ́ɔ wá gba xú tɔn.

¹⁸ Énɛ́ ɔ́ wú wɛ Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: “Un ná wa nǔ xá Babilɔ́nu xɔ́sú ɔ́ kpó Babilɔ́nu to ɔ́ kpó, lě e un wa xá Asilíi xɔ́sú ɔ́ gbɔn é.

¹⁹ Un ná kplá Izlayɛ́li wá nɔtɛn tɔn. É ná mɔ nǔ ɖu ɖo Kaamɛ́li só jí, bó ná mɔ ɖu ɖo Basáni só jí. Nǔ ɖěbǔ ná hwedó e ɖo Eflayímu só jí ǎ; nǔ ɖěbǔ ná hwedó e ɖo Galadi yíkúngban jí ǎ.

²⁰ Nyɛ Mawu Mavɔmavɔ ɖɔ: azǎn énɛ́ lɛ́ɛ mɛ ɔ́, è na ba nǔ e Izlayɛ́li wa nyi do ɔ́ kpo. È nǎ mɔ hwɛ e Judáa hu ɔ́ ǎ, ɖó un ná zé hwɛ kɛ mɛ e un ná jó dó nyi gbɛ lɛ́ɛ. Xó e nyɛ Mawu Mavɔmavɔ ɖɔ ɔ́ nɛ́.

²¹ Akɔta lɛ́ɛ mi, mi sí te dó Malatímu to ɔ́ jí. Mi sí te dó Pekɔ́dinu lɛ́ɛ jí. Mi jɛ yě gúdo, mi hu yě bǐ, mi vívá kún yětɔn. Mi wa nǔ e un ɖɔ lɛ́ɛ bǐ. Xó e nyɛ Mawu Mavɔmavɔ ɖɔ ɔ́ nɛ́.

²² È ɖo ahwanfuntɔ́ e ɖo ahwan fun wɛ lɛ́ɛ sín zǐngídi se wɛ ɖo to ɔ́ mɛ. Nǔ e gblé ɖo to ɔ́ mɛ ɔ́ vɛ́ jlɛ́!

²³ Étɛ́ o! Zǔnkpé e gba gbɛ ɔ́ bǐ ɔ́ wa étɛ́ o! È gba Babilɔ́nu hánnyá o! Babilɔ́nu gba ɖo akɔta lɛ́ɛ bǐ tɛ́ntin. Étɛ́ o!

²⁴ Babilɔ́nu, un ɖó mɔ nú we, bɔ a jɛ mɛ, a ɖǒ ayi tɔn ǎ. A jɛ wlɔ mɛ, ɖó nyɛ Mawu Mavɔmavɔ wɛ a fun ahwan xá.”

²⁵ Un fɔ ahwanlyánnú ce lɛ́ɛ tɔ́n. Ahwanlyánnú e un sin xomɛ ɔ́ un nɔ zán lɛ́ɛ ɔ́, un ɖe yě tɔ́n. Nǔ e nyɛ Mawu Mavɔmavɔ Nǔbǐwúkpétɔ́ bló ɖo Babilɔ́nunu lɛ́ɛ sín to mɛ é nɛ́.

²⁶ Mi tɔ́n ahwan to ɔ́ gbɔn aɖisí amyɔ. Mi gba agɔ̌ lɛ́ɛ. Nǔ e mi mɔ ɖo to ɔ́ mɛ lɛ́ɛ ɔ́, mi kplé yě ɖó kɛ́n ɖokpó, lobo dó to ɔ́ zo. Nǔ ɖěbǔ ní má kpo ɖo to ɔ́ mɛ ó.

²⁷ Mi hu ahwanfuntɔ́ syɛ́nsyɛ́n lɛ́ɛ bǐ, mi kplá yě yi fí e è nǎ hu yě ɖe é. Heelú yě, ɖó azǎn yětɔn wɛ sɔgbe. Hwenu e è nǎ wa nǔ xá yě ɔ́ sín gan wɛ xo.

²⁸ Mi ɖótó mɛ e ɖo hinhɔn wɛ lɛ́ɛ, mi ɖótó mɛ e ɖo hinhɔn sín Babilɔ́nu wɛ lɛ́ɛ; yě ɖo ɖiɖɔ nú Sinyɔ́ɔnu lɛ́ɛ wɛ ɖɔ: “Mawu Mavɔmavɔ, Mawu mǐtɔn ba hlɔn nú mi, yě ɖu su nú xwé tɔn bɔ é ba hlɔn.”

²⁹ Mi da gǎdatɔ́ lɛ́ɛ bǐ dó Babilɔ́nu wú. Mi ɖó gɔnu lɛ́ lɛ̌ dó Babilɔ́nu, mɛ ɖěbǔ ní ma gló mi ó. Mi sú nǔ e é wa lɛ́ɛ sín axɔ́ ɛ. Mi bló n'i, lě e é nɔ́ bló nú mɛ gbɔn é. Đó é nɔ́ ba hǎ Mawu Mavɔmavɔ, Mawu Izlayɛ́li tɔn.

³⁰ “Mɔ̌ wɛ dɔ̌nkpɛvú asásyɛ́n tɔn lɛ́ɛ ná kú gbɔn ɖo tokplétɛn lɛ́ɛ, ahwanfuntɔ́ tɔn lɛ́ɛ bǐ na kú gbe nɛ́ gbe.” Xó e Mawu Mavɔmavɔ ɖɔ ɔ́ nɛ́.

³¹ Aklúnɔ, Mawu Mavɔmavɔ Nǔbǐwúkpétɔ́ ɔ́ ɖɔ: “Babilɔ́nu goyítɔ́, nǔ towe wɛ vɛ́ wǔ ce, ayǐ towe ɖíe hɔ́n e, hwenu e un ná wa nǔ xá we ɔ́ ɖíe su lo e.

³² Goyítɔ́, a nǎ fún sa, bó ná jɛ ayǐ. Mɛ ɖěbǔ ná fɔ́n we sí te ǎ. Un ná dó toxo towe lɛ́ɛ zo. Fí e sɛkpɔ́ toxo towe lɛ́ɛ lɔmɔ̌ ná wlí zo.”

³³ Xó e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe: “Izlayɛ́linu lɛ́ɛ kpó Judáanu lɛ́ɛ kpó mɔ agbɔ̌n ɖěbǔ ǎ. Mɛ e wlí yě yi kannumɔgbénu lɛ́ɛ hɛn yě, bó gbɛ́ yě jó.

³⁴ Nyɛ wɛ ɖo yě hwlɛ́n gán wɛ; un syɛ́n ɖésú; nyǐkɔ ce nyí Mawu Mavɔmavɔ Nǔbǐwúkpétɔ́. Un ná jɛ ahwan yě jí, bɔ to ɔ́ ná mɔ agbɔ̌n, un ka ná dó jɔwunkɔ́ nú Babilɔ́nunu lɛ́ɛ.”

Nǔ e Mawu lin ná wa xá Babilɔ́nu é

³⁵ Mawu Mavɔmavɔ ɖɔ: “Ahwanfunfun ɖo te kpɔ́n Babilɔ́nunu lɛ́ɛ. Ahwanfunfun ɖo te kpɔ́n mɛ e ɖo Babilɔ́nu tota mɛ lɛ́ɛ; é ɖo te kpɔ́n gǎn hɔn-yitɔ́ lɛ́ɛ kpó nǔnywɛ́tɔ́ lɛ́ɛ kpó.

³⁶ É ɖo te kpɔ́n nǔkantɔ́ lɛ́ɛ, ayi yětɔn ní fɛ́ da. Ahwanfunfun ɖo te kpɔ́n ahwanfuntɔ́ syɛ́nsyɛ́n lɛ́ɛ. Ahwi ní xo yě.

³⁷ Ahwanfunfun ɖo te kpɔ́n sɔ́ tɔn lɛ́ɛ kpó kɛkɛ́ví tɔn lɛ́ɛ kpó. É ɖo te kpɔ́n togun tɛnmɛ tɛnmɛ e ɖo Babilɔ́nu lɛ́ɛ bǐ. Yě ní cí nyɔ̌nu e ba gǎn kpo ɔ́ ɖɔhun. Ahwanfuntɔ́ lɛ́ɛ ní mɔ dɔkun tɔn lɛ́ɛ; yě ní fɔ bǐ yi.

³⁸ Tɔ e ɖo to ɔ́ mɛ lɛ́ɛ bǐ ní xú, bǐ ní mɛ. Đó vodún wɛ yě nɔ́ sɛn ɖo to ɔ́ mɛ; vodún xɛblɛ́nú énɛ́ lɛ́ɛ wɛ gba ta mɛ nú yě.

³⁹ Énɛ́ ɔ́ wútu wɛ ayǐsájɛ lɛ́ɛ ná ɖó gɔnu ɖó to ɔ́ mɛ, cukú gbě tɔn lɛ́ɛ ná wa xwé nyi toxo ɔ́ mɛ. Gowungo lɛ́ɛ ná ɖó nɔtɛn yětɔn ɖó toxo ɔ́ mɛ. Babilɔ́nu ná jɛ vɔ̌, bó ná nɔ mɔ̌ káká sɔ́yi. Gbɛtɔ́ ɖěbǔ sɔ́ ná nɔ toxo ɔ́ mɛ ǎ.

⁴⁰ Lě e Sodɔ́mu kpó Gomɔ́ɔ kpó, kpódó toxo e ɖo akpá yětɔn lɛ́ɛ kpó gba bó hánnyá gbɔn ɔ́ ɖɔhun wɛ Babilɔ́nu ná cí. Mɛ ɖěbǔ sɔ́ ná nɔ toxo ɔ́ mɛ ǎ, mɛɖé sɔ́ ná zɛ ali gbɔn fínɛ́ ǎ. Xó e nyɛ Mawu Mavɔmavɔ ɖɔ ɔ́ nɛ́.

⁴¹ Éɖíe, togun ɖokpó ná gosín totaligbé bó ná wá. Akɔta ɖaxó ɖokpó wɛ; é kpó axɔ́sú syɛ́nsyɛ́n ɖé lɛ́ɛ kpó ná gosín vǒvólívwé jí bó ná wá.

⁴² Yě hɛn gǎ kpó hwǎn kpó. Yě jɔ lan ɖésú, yě nɔ́ se gbɔ ǎ. Yě ɖo zǐngídi jí xu ɖɔhun. Babilɔ́nu e, yě xá sɔ́ ja; yě to yěɖée lyɛ̌ngbe lyɛ̌ngbe bó ja ahwan tɔ́n we gbé.

⁴³ Ée Babilɔ́nu xɔ́sú ɔ́ se ɖɔ ahwan ja ɔ́, awakanmɛ kú i, akpɔ ɖó e; é jɛ wǔvɛ́ mɔ jí nyɔ̌nu ɖo ajidonu ɖɔhun.

⁴⁴ Lě e kinnikínní nɔ́ yi wu ɖo zunkan mɛ ɖo Judɛ́ɛn tɔ ɔ́ tó, nú kanlin e ɖo gběhan mɛ lɛ́ɛ, bó nɔ́ wlí ɖě bɔ ée kpo lɛ́ɛ nɔ́ gbadó ɔ́ ɖɔhun wɛ kɛntɔ́ ná fyán Babilɔ́nu kpó toxo tɔn lɛ́ɛ kpó. Un ná gba mɛ bǐ dó sín fínɛ́ ɖo nukúnxwixwe ɖokpó mɛ, bó ná zé mɛ e un sɔ́ ɔ́ ɖó to ɔ́ nu. Mɛ̌ ká ɖó acɛ nyɛ ɖɔhun? Nú un wa nǔɖé ɔ́, mɛ̌ ka sixú kan nǔ e wú un wa mɔ̌ ɔ́ byɔ́ mì? Gǎn tɛ́ sixú nɔ te nukɔn ce?”

⁴⁵ Énɛ́ ɔ́ wú ɔ́, mi bo ɖótó gbeta e Mawu Mavɔmavɔ ɖe tɔ́n dó Babilɔ́nu wú é, mi ɖótó tito e é sɔ́ ɖó te nú Babilɔ́nunu lɛ́ɛ é; è nǎ dɔn yě kanlin e ma ɖó gǎn ǎ é ɖɔhun. È nǎ gba xwé yětɔn.

⁴⁶ È nǎ yí Babilɔ́nu bɔ ayǐkúngban ná dán wǔ. Babilɔ́nu ná sú xó bɔ è nǎ se gbe tɔn ɖo akɔta lɛ́ɛ bǐ tɛ́ntin.