Jelemíi 5 - MAWUXÓWÉMA

Toxo blěbǔ ɖokpó ɔ́ bǐ ɖu kpa

¹ Mawu ɖɔ: “Mi yi gbɔn ali e ɖo Jeluzalɛ́mu toxo mɛ lɛ́ɛ bǐ jí. Mi kpɔ́n nǔ ganjí, mi ba do nú nǔ, mi ba do ná gbɔn tokplétɛn lɛ́ɛ. Nú mi mɔ mɛ e nɔ wa nǔ ɖó sɛ́nxwi jí ɔ́, mɛ e nɔ ba ná ɖɔ nǔgbó ɔ́ ɖokpó ɖo toxo ɔ́ mɛ ɔ́, un ná kpɔ́n dó mɛ énɛ́ ɔ́ wú, bó ná sɔ́ hwɛ kɛ Jeluzalɛ́mu.”

² Jelemíi ɖɔ: “Jeluzalɛ́munu lɛ́ɛ nɔ xwlé nǔ bó nɔ́ ɖɔ: ‘Mǐ xwlé Mawu Mavɔmavɔ, mɛ e ɖo gbɛ é.’ Nǔ yǎyá wɛ yě wa, adingban wɛ yě ɖó.

³ Mawu Mavɔmavɔ, nǔgbó ba wɛ a ɖe ǎ cé? A xo yě, é ká nyí nǔɖé nú yě ǎ. A hɛn nǔ gblé dó yě wǔ, yě ká yí gbe nú xó e ɖɔ nú yě wɛ a ɖe lɛ́ɛ ǎ. Ta wɛ yě lɛ́ syɛ́n d'é jí bó gbɛ́ ɖɔ émí kún ná lɛ́ kɔ wá hwi gɔ̌n ó.

⁴ Un nɔ ɖɔ: ‘Mɛ kpaa wɛ nú yě, yě nɔ́ lin tamɛ kpɔ́n cóbó nɔ́ wa nǔ ǎ; yě tunwun jlǒ Mawu Mavɔmavɔ tɔn ǎ, yě tunwun Mawu yětɔn sín sɛ́n lɛ́ɛ ǎ.

⁵ Din ɔ́, un ná yi mɛxó lɛ́ɛ gɔ́n bó ná yi ɖɔ xó nú yě. Đó yědɛɛ lɛ́ɛ tunwun Mawu Mavɔmavɔ sín jlǒ, yě tunwun Mawu yětɔn sín sɛ́n lɛ́ɛ.’ Lo ɔ́, yě lɔmɔ̌ fɔ́n gǔ dó Mawu jí, yě dǒ gúdo e bǐ.

⁶ Énɛ́ ɔ́ wú wɛ kinnikínní zungbó mɛ tɔn wlí yě ɖu. Hla já yě. Kpɔ ɖo wudo mɛ ɖo toxo yětɔn lɛ́ɛ sín hɔntogbó lɛ́ɛ jí. Mɛ e tɔ́n sín toxo lɛ́ɛ mɛ é bǐ wɛ kpɔ vúnvún, ɖó hwɛ yětɔn lɛ́ɛ sukpɔ́ dín, nǔwanyido yětɔn nɔ́ ɖo jijɛ jí wɛ.”

⁷ Mawu ɖɔ: “Jeluzalɛ́mu, étɛ́wú un ka ná sɔ́ hwɛ kɛ we? Vǐ towe lɛ́ɛ ɖíe ko jó mì dó e. Yě nɔ́ xwlé vodún, vodún ká nyí Mawu ǎ. Un na nǔ bǐ yě, yě ká lɛ́ dó afɔ gbě. Ahwan wɛ yě nɔ́ dó gbě yi agalɛtɔ́ xwé.

⁸ Yě cí sɔ́ e nyɔ́ wǔ ganjí, bɔ asi nɔ ɖo jlǒjló wɛ lɛ́ɛ ɖɔhun. Jeluzalɛ́munu lɛ́ɛ ɖokpó ɖokpó nɔ́ ɖo wezun nu, ɖo nɔzo yětɔn lɛ́ɛ sín asi gúdo, bó nɔ́ ɖo hǎ byɔ́ yě wɛ.

⁹ Un na dɔn tó nú yě ɖó nǔ énɛ́ lɛ́ɛ wú ǎ cé? Togun mɔ̌hunkɔ ɔ́, un ná wa nǔ xá ɛ ǎ cé? Xó e nyɛ Mawu Mavɔmavɔ ɖɔ ɔ́ nɛ́.

¹⁰ Mi byɔ́ vǐwungbo yětɔn lɛ́ɛ mɛ, bó sú kún yětɔn dó. Amɔ̌, mi ma sú bǐ sín kún dó ó. Mi jlá ala lɛ́ɛ síin, ɖó ala lɛ́ɛ nyí nyɛ Mawu Mavɔmavɔ tɔn ǎ;

¹¹ Nǔgbó wɛ, Izlayɛ́li togun ɔ́ kpó Judáa togun ɔ́ kpó nɔ gbejí nú nyɛ Mawu Mavɔmavɔ ǎ. Xó e nyɛ Mawu Mavɔmavɔ ɖɔ ɔ́ nɛ́.”

Nǔ e nylá ɖo Mawu jó dó mɛ lɛ́ɛ

¹² Mawu ɖɔ: “Izlayɛ́li togun ɔ́ kpó Judáa togun ɔ́ kpó nɔ hu tɛ́ nú nyɛ Mawu Mavɔmavɔ; yě nɔ́ ɖɔ nyɛ Mawu Mavɔmavɔ ɔ́ kún ɖó acɛ ɖé ó. Awě ɖě kún ɖo émí ná xo wɛ ó. Ahwan ɖě kún ká ɖo émí ná tɔ́n wɛ ó, adɔ ɖě kún ká ɖo nǎ tɔ́n émí wɛ ó.

¹³ Gbeyíɖɔ Mawu tɔn lɛ́ɛ ɔ́, nǔvɔ́nɔ kpowun wɛ nú yě. Xó ɖé ɖo nu yětɔn ǎ. Nǔ e yě ɖɔ ɔ́ ní gbo yě.”

¹⁴ Énɛ́ ɔ́ wú ɔ́, nyɛ Mawu Mavɔmavɔ, Mawu Nǔbǐwúkpétɔ́ ɔ́ ɖɔ: Jelemíi, ée yě ɖo xó ɖɔ gbɔn mɔ̌ wɛ é ɔ́, xó e un ná zé dó ayi towe mɛ ɔ́ ná cí zo ɖɔhun, bɔ togun élɔ́ ná nyí nakí e zo ɔ́ ná ji é.

¹⁵ Éɖíe, Izlayɛ́li togun e mi, un sɛ́ akɔta ɖokpó dó mi sín fímáyáfí ɖé. Akɔta ɖé wɛ bó ɖó hlɔ̌nhlɔ́n ɖésú, akɔta xóxó ɖé wɛ. Mi se gbe yětɔn ǎ, yě ɖo xó ɖɔ wɛ ɔ́ mi na mɔ nǔ jɛ mɛ ǎ.

¹⁶ Gǎ yětɔn lɛ́ɛ nɔ hu mɛ tɛ́; sɔ́ja yětɔn lɛ́ɛ bǐ wɛ syɛ́n.

¹⁷ Yě ná vívá nǔ mitɔn lɛ́ɛ bǐ: agɔ̌ mitɔn lɛ́ɛ, nǔɖuɖu mitɔn lɛ́ɛ, vǐ mitɔn súnnu lɛ́ɛ, nyɔ̌nu lɛ́ɛ, gbɔ̌ mitɔn lɛ́ɛ, nyibú mitɔn lɛ́ɛ, vǐwungbo mitɔn lɛ́ɛ, fígigbo mitɔn lɛ́ɛ yě ná vívá bǐ. Toxo mitɔn e mi mɛ ahohó lɛ́ lɛ̌ dó, bó nɔ́ dó yí go na lɛ́ɛ ɔ́, ahwan ná gba bǐ.

¹⁸ “Amɔ̌, azǎn énɛ́ lɛ́ɛ gbe ɔ́, un ná sú mi bǐ sín kún dó ǎ. Xó e nyɛ Mawu Mavɔmavɔ ɖɔ ɔ́ nɛ́.

¹⁹ Jelemíi, ényí mɛ towe lɛ́ɛ wá jɛ nǔ e wú nyɛ Mawu Mavɔmavɔ, Mawu yětɔn ɖo nǔ wa xá yě gbɔn mɔ̌ wɛ ɔ́ kan byɔ́ jí ɔ́, a nǎ yí gbe nú mɛ towe lɛ́ɛ ɖɔ yě jó nyɛ Mawu yětɔn dó bó ɖo vodún sɛn wɛ, énɛ́ wú wɛ yě ná sɛn jǒnɔ lɛ́ɛ ɖo to ɖěvo mɛ.”

Mɛ e ma sɔ́ nɔ sí Mawu ǎ lɛ́ɛ sín gbɛ

²⁰ Mawu ɖɔ: “Mi ɖɔ xó élɔ́ nú Jakɔ́bu ví lɛ́ɛ, mi jlá gbɔn Judáa yíkúngban ɔ́ bǐ jí.

²¹ Mi ɖɔ nú yě ɖɔ xlonɔ e mi! Mi ɖótó xó élɔ́! Ayivɔ vún mi. Mi ɖó nukún, mi ká nɔ mɔ nǔ ǎ; mi ɖó tó, mi ka nɔ se nǔ ǎ.

²² Mi ná ɖó sísí nú mì ǎ cé? Mi ná sísɔ́ ɖo nukɔn ce ǎ cé? Nyɛ wɛ sɔ́ kɔ́ dó ɖó dogbó nú xu. Xu sixú dó asá dogbó énɛ́ ɔ́ gbeɖé ǎ. Aslɔkɛ́ lɛ́ɛ ɖo te sí wɛ, yě ká kpé wú ǎ. Aslɔkɛ́ lɛ́ɛ nɔ́ ɖo adǎn jí, amɔ̌, yě sixú zɛ dogbó ɔ́ wú ǎ.

²³ Midɛɛ lɛ́ɛ ɔ́, togun ɖé wɛ mi nyí bó se tónú ǎ; gǔ wɛ mi fɔ́n. Mi jó agɔ, lobo ɖi dó.

²⁴ Nyɛ Mawu Mavɔmavɔ, Mawu mitɔn ɔ́, un nɔ ná jǐ mi ɖo jǐ hwenu, un nɔ ná xwejí kpó zǒjí kpó mi, un zé hwenu ɖó te nú mi bɔ mi nɔ ya jinukún ná. Un bló nǔ énɛ́ lɛ́ɛ bǐ nú mi có mi ka ɖɔ: ‘Mi wá nú mǐ ná ɖó sísí nú Mawu Mavɔmavɔ, Mawu mǐtɔn’ ǎ.

²⁵ Nǔ e mi wa nyi do lɛ́ɛ wú wɛ mi ma mɔ nǔ énɛ́ lɛ́ɛ ǎ. Hwɛ e mi hu lɛ́ɛ wɛ sú nǔ énɛ́ lɛ́ɛ sín ali dó mi.

²⁶ Nǔgbó wɛ, adǎkaxotɔ́ lɛ́ɛ ɖo togun ce mɛ. Yě nɔ́ ɖo mɛ cɔ́ wɛ, yě nɔ́ ɖó mɔ nú mɛ gběnyatɔ́ ɖɔhun. Yě nɔ́ ɖó mɔ bó nɔ wlí gbɛtɔ́.

²⁷ Nǔ e yě hízí mɛ bó yí lɛ́ɛ gɔ́ xwé yětɔn, xɛ gɔ́ aja ɖɔhun. Énɛ́ wɛ dó dɔkun nú yě, bɔ yě ɖǒ acɛ.

²⁸ Adǎkaxotɔ́ lɛ́ɛ ɖu nǔ ɖagbe ɖagbe lɛ́ɛ bó kló, wǔtu yětɔn bǐ ɖǐɖí. Yě nɔ́ ɖo adǎka xo wɛ magbokɔ. Yě nɔ́ jɛ ahwan tɔ́cyɔvǐ jí ǎ. É má nyí mɔ̌ ǎ ɔ́, hwɛ ná ko kpa mɛ énɛ́ lɛ́ɛ. Wamamɔnɔ sín hwɛ jɔ ɔ́, yě nɔ́ yí hwɛ n'i ǎ.

²⁹ Nǔ ɖo mɔ̌ ɔ́, un ná dɔn tó nú mɛ ǎ cé? Un ná ba hlɔn ɖó adǎka e togun énɛ́ ɔ́ xo lɛ́ɛ wú ǎ cé? Xó e nyɛ Mawu Mavɔmavɔ ɖɔ ɔ́ nɛ́.

³⁰ Nǔ baɖabaɖa, nǔvɛ́mɔ wɛ yě nɔ́ dó sin ɖo to ɔ́ mɛ:

³¹ Gbeyíɖɔ lɛ́ɛ nɔ ɖó adingban, vɔ̌sánú-xwlémawutɔ́ lɛ́ɛ ɔ́, ɖuɖu jɛ́n yě nɔ́ ba ɖo nǔ bǐ mɛ. Bɔ nǔ énɛ́ lɛ́ɛ ká nyɔ́ togun ce nukún mɛ. Mi ka zán gbɛ mɔ̌ káká yi fó ɔ́, nɛ̌ mi ná wa nǔ gbɔn?”