Jelemíi 46 - MAWUXÓWÉMA

¹ Mawu Mavɔmavɔ ɖɔ xó nú gbeyíɖɔ Jelemíi dó akɔta lɛ́ɛ wú.

Ejípunu lɛ́ɛ ɖu winnyá ɖo Kaakemíci

² Mawu ɖɔ xó dó Ejípu kpó ahwangɔnu Ejípu xɔ́sú Nɛko tɔn kpó wú. Kaakemíci wɛ Ejípu xɔ́sú Nɛko ɖe ɖo Efláti tɔ ɔ́ kpá, hwenu e Babilɔ́nu xɔ́sú Nabukodonɔzɔ́ɔ fun ahwan xá ɛ, bó ɖu ɖ'é jí é. Hwenɛ́nu ɔ́, Judáa xɔ́sú Yoyakímu, Joziyási ví ɔ́ ɖo xwe ɛnɛ bló wɛ ɖo zinkpo jí.

³ Ahwangán Ejípu tɔn lɛ́ɛ nɔ́ sú xó, bó nɔ́ ɖɔ: “Mi bló gǎglónú mitɔn lɛ́ɛ ɖó; mi bló gǎglónú kpɛví kpó ɖaxó kpó ɖó. Mi yi, mi yi bo fun ahwan!

⁴ Sɔ́xátɔ́ e mi, mi blá akpa nú sɔ́ lɛ́ɛ! Mi xá sɔ́ mitɔn lɛ́ɛ! Mi xwe ganza mitɔn lɛ́ɛ! Mi to miɖée bó ɖidó! Mi gan hwǎn mitɔn lɛ́ɛ! Mi dó ganwu mitɔn lɛ́ɛ!”

⁵ Mawu Mavɔmavɔ ka ɖɔ: “Étɛ́ ka ɖo jijɛ wɛ? Étɛ́ ɖíe mɔ wɛ un ka ɖe e? Xɛsi jɛ yě jí, yě dó gbló mɛ. É kpa ahwanfuntɔ́ syɛ́nsyɛ́n yětɔn lɛ́ɛ ɖěbǔ ǎ. A ma ná yi ǎ hǔn ago ma yi wɛ, mɛ ɖěbǔ sɔ́ nɔ́ lɛ́ kɔ kpɔ́n gǔdo ǎ. Xɛsi ɖo fí bǐ.

⁶ Mɛ e yá afɔ ganjí ɔ́ na bo hɔn ɔ́, nǔ yǎyá kpowun wa wɛ é ɖe. Ahwanfuntɔ́ syɛ́nsyɛ́n lɛ́ɛ na bo jló ná hɔn ɔ́, nǔ yǎyá wɛ ná nyí. Đo totaligbé dɔ̌n ɔ́, yě nɔ́ klɛ́n afɔ, yě klɛ́n afɔ kpowun ɔ́, kɔ́ mɛ jɛ́n yě nɔ́ jɛ.

⁷ Mɛ̌ ká nɔ́ wa nǔ Nilu ɖi sin ɖɔhun? Mɛ̌ ká nɔ́ wa nǔ tɔ énɛ́ e nɔ́ ɖo adǎn jí é ɖɔhun?

⁸ Ejípu to ɔ́ wɛ nɔ́ wa nǔ gbɔn mɔ̌. É nɔ́ ɖɔ un gba wu Nilu ɖi sin ɖɔhun. Un ná hun agbǎn Nilu ɖo adǎn jí ɖɔhun, bó ɖi bú ayǐkúngban ɔ́ bǐ. Un ná ɖi bú toxo lɛ́ɛ, bó ɖi bú mɛ e ɖo toxo lɛ́ɛ mɛ lɛ́ɛ.

⁹ É yá, mi sɔ́ja e xá sɔ́ lɛ́ɛ mi, mi tɔ́n ahwan yě. Sɔ́ja e ɖo kɛkɛ́ví mɛ lɛ́ɛ mi, mi zlɔ́n byɔ́ yě mɛ. Ahwanfuntɔ́ syɛ́nsyɛ́n lɛ́ɛ mi, é yá, mi ɖidó. Etiopíinu e mi, é yá. Pútinu e mi, é yá. Mi mɛ e nɔ hɛn gǎglónú lɛ́ɛ, kpó mi Lǔdinu gǎdatɔ́ lɛ́ɛ kpó, é yá, mi ɖidó!

¹⁰ Amɔ̌, Aklúnɔ, Mawu Mavɔmavɔ Nǔbǐwúkpétɔ́ ɔ́ tɔn wɛ azǎn énɛ́ ɔ́ nyí. Azǎn e gbe é ná ba hlɔn é wɛ. É ná wa nǔ xá kɛntɔ́ tɔn lɛ́ɛ. Hwǐ ɖo mɛ já wɛ, xovɛ́ sin i mɔ̌hunkɔtɔn. Nɛ̌ Aklúnɔ, Mawu Mavɔmavɔ Nǔbǐwúkpétɔ́ ɔ́ ká hu mɛ sɔ e! Nɛ̌ é ká hu mɛ sɔ ɖo totaligbé Efláti tɔ ɔ́ tó dɔ̌n e!

¹¹ Ejípu, gbɔ bo yi Galadi bo yi ba ami ɖé, bó ná sá dó akpa towe lɛ́ɛ mɛ. A na bo ka wa nǔ ɖěbǔ ɔ́, nǔ yǎyá wɛ ná nyí ɖó akpa ɔ́ ɖo nǎ kú wɛ ǎ.

¹² Akɔta lɛ́ɛ se lě e a ɖu winnyá gbɔn é, ɖó mɛ bǐ se vo e sa wɛ a ɖe ɔ́. Đó ahwanfuntɔ́ syɛ́nsyɛ́n towe lɛ́ɛ ɖě nɔ́ ya aglo ɖě, bɔ yě bǐ nɔ́ fún sa bó nɔ́ dín yi jɛ ayǐ.”

Ahwan gba Ejípu to

¹³ Hwenu e Babilɔ́nu xɔ́sú Nabukodonɔzɔ́ɔ wá ahwan fun xá Ejípu gbé ɔ́, Mawu Mavɔmavɔ ɖɔ nú gbeyíɖɔ Jelemíi ɖɔ:

¹⁴ “Đɔ nǔ e ɖo nǎ jɛ wɛ ɔ́ ɖo Ejípu. Đɔ nú mɛ e ɖo Migidɔ́lu lɛ́ɛ, ɖɔ nú mɛ e ɖo Mɛfísi lɛ́ɛ kpó mɛ e ɖo Tapanɛ́si lɛ́ɛ kpó ɖɔ: ‘Mi sɔ́ ahwannú, ahwanfunnú mitɔn lɛ́ɛ ní nɔ alɔ jí.’ Đó ahwan ko gba mɛ e lɛ́ dó mi lɛ́ɛ.

¹⁵ Nɛ̌ ká gbɔn, bɔ ahwanfuntɔ́ towe syɛ́nsyɛ́n lɛ́ɛ ɖo ayǐ jɛ wɛ mɔ̌? Yě sixú syɛ́n dɔn ǎ, ɖó nyɛ Mawu Mavɔmavɔ wɛ kpíkpé yě.

¹⁶ Sɔ́ja wɔ̌buwɔ́bú ɖé lɛ́ɛ fún sa bó jɛ ayǐ. Yě nɔ́ ɖɔ nú yěɖée ɖɔ: ‘Mi wá mǐ lɛ́ kɔ yi mɛ mǐtɔn lɛ́ɛ mɛ; mi wa mǐ yi to e mɛ è ji mǐ ɖe é; énɛ́ ɔ́, mǐ ná nɔ zɔ nú nǔ nyanya e ɖo jijɛ wɛ ɖo ahwangbénu fí é.’

¹⁷ Ejípu xɔ́sú ɔ́, nyǐkɔ e è nǎ sun i ɔ́ ɖíe: ‘Xóvɔ́sútɔ́’.

¹⁸ Nyɛ mɛ e nyǐkɔ ce nɔ́ nyí Mawu Mavɔmavɔ Nǔbǐwúkpétɔ́ ɔ́, un xwlé gbɛ nyi ɖésúnɔ tɔn nú mi ɖɔ: lě e Tabɔ́ɔ só ɔ́ hú ga só lɛ́ɛ bǐ, lě e Kaamɛ́li só ɔ́ hú ga xu ɔ́, kɛntɔ́ e ná hú ga mi ɔ́ ja; nǔɖé ná húzú ǎ.

¹⁹ Ejípunu e mi, hwenu e mi ná dó agban, bó ná yi mɛ ɖěvo tomɛ é ɖíe su e. Đó Mɛfísi to sɔ́ ná nyɔ́ kpɔ́n ǎ, è nǎ dó zo, mɛɖé sɔ́ ná ɖo fínɛ́ ǎ.

²⁰ Ejípu to ɔ́, kanlin ɖé wɛ é nyí bó nyɔ́ ɖɛkpɛ ɖésú. Asɔfin ɖé ká gosín totaligbé bó wá ɖó jɛ wǔ tɔn.

²¹ Sɔ́ja to ɖěvo mɛ nu e Ejípu da bó nɔ́ sú axɔ́ lɛ́ɛ ɔ́, yě nyɔ́ ahwan fun mɔ̌hunkɔtɔn, amɔ̌, yě lɔmɔ̌ hɔn; yě bǐ ɖó gbe kpɔ́ bó hɔn. Adǎngbomɛ zán ɔ́ gbe ɔ́, yě ɖě sixú nɔ te ǎ. Ée un húzú kpan nukɔn yě ɔ́, yě ɖě nɔ te ǎ.

²² Kɛntɔ́ dó ahwan gbě, bó zɔn Ejípu jí, a nǎ ɖɔ atíngbotɔ́ lɛ́ɛ wɛ byɔ́ zungbó mɛ kpó asyɔ́ kpó. Énɛ́ ɔ́, sɔ́ja Ejípu tɔn lɛ́ɛ línlín dan ɖɔhun bo hɔn; è se nǔwiwa yětɔn ǎ.

²³ Zungbó tɔn e dó káká bɔ è ma nɔ sixú byɔ́ mɛ ǎ ɔ́, yě byɔ́ mɛ bó gbo atín lɛ́ɛ bǐ. Đó yě dó ahwan gbě wɛn ɖɔhun, è sixú xa yě ǎ. Xó e nyɛ Mawu Mavɔmavɔ ɖɔ é nɛ́.

²⁴ Ejípu ɖu winnyá: Mawu jó e nú togun e gosín totaligbé é.”

²⁵ Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: “Un ná wa nǔ xá Amɔ́ni vodún Tɛ́bu ɔ́, un ná wa nǔ xá Ejípu to ɔ́, bó wa nǔ xá vodún tɔn lɛ́ɛ kpódó axɔ́sú tɔn lɛ́ɛ kpó. Un ná wa nǔ xá Ejípu xɔ́sú ɔ́ kpódó mɛ e nɔ gán jɛ wǔ tɔn lɛ́ɛ kpó.

²⁶ Un na jó yě nú mɛ e ɖo kú yětɔn ba wɛ lɛ́ɛ. Un ná jó yě nú Babilɔ́nu xɔ́sú Nabukodonɔzɔ́ɔ kpódó sɔ́ja tɔn lɛ́ɛ kpó. “Amɔ̌, é wá yá ɔ́, Ejípu ná lɛ́ wá cí lě e é ko ɖe ɖ'ayǐ é.” Xó e Mawu Mavɔmavɔ ɖɔ é nɛ́.

Izlayɛ́li gosín mɛ kan nu

²⁷ Mawu ɖɔ: “Mɛsɛntɔ́ ce Izlayɛ́li, hwɛ ɔ́, ma ɖi xɛsi ó. Jakɔ́bu ví, ado ma hu we ó. Đó un na hwlɛ́n we gán ɖo gbě ji fí e a ɖe ɔ́. Un na hwlɛ́n vǐ towe lɛ́ɛ gán ɖo to e mɛ yě ɖo mɛ kan nu ɖe é. Izlayɛ́li, a nǎ lɛ́ kɔ wá, bó ná vo, bɔ ayi towe ná jɛ ayǐ; mɛ ɖěbǔ sɔ́ ná dó ya nú we ǎ.

²⁸ Mɛsɛntɔ́ ce Izlayɛ́li, ma sɔ́ ɖi xɛsi ɖě ó, ɖó un ɖo kpɔ́ xá we. Togun e mɛ un gba mi dó gbɔn lɛ́ɛ ɔ́, un ná sú bǐ kún dó. Amɔ̌, hwɛ ɔ́, un ná sú kún towe dó ǎ, lo ɔ́, un dɔn tó nú we lě e é jɛ xá gbɔn é. Un sixú jó we dó xomɛvɔ́ wɛ a ɖe ɖɔhun ǎ.”