Jelemíi 45 - MAWUXÓWÉMA

¹ Hwenu e Yoyakímu Joziyási ví ɔ́ ɖo xwe ɛnɛ bló wɛ ɖo axɔ́súzinkpo Judáa tɔn jí ɔ́ wɛ Baalúki Nɛliya ví ɔ́ wlán xó e gbeyíɖɔ Jelemíi ɖɔ n'i lɛ́ɛ. Jelemíi ɖɔ nú Baalúki ɖɔ:

² “Baalúki, xó e Mawu Mavɔmavɔ, Mawu Izlayɛ́li tɔn ɖɔ dó wǔ we ɔ́ ɖíe,

³ é ɖɔ jí hwi nɔ ɖɔ: ‘Gooyi, nǔ gblé dó mì, linkpɔ́n gɔ́ ayi mɛ nú mì, bɔ Mawu Mavɔmavɔ lɛ́ ɖo ayimɛya ɖěvo dó nú mì wɛ. Un mɔ wǔvɛ́ káká bɔ agbɔ̌n kpé mì, un ɖó gbɔjɛ gbeɖé ǎ.’

⁴ Mawu Mavɔmavɔ ko ɖɔ nyi ní ɖɔ nú we ɖɔ: ‘Un ɖo xɔ e un gbá ɔ́ gba wɛ, un ɖo atín e un tun ɔ́ hɔn wɛ. Un ná ɖo mɔ̌ bló wɛ gbɔn to ɔ́ bǐ mɛ,

⁵ bɔ hwɛ ɔ́, a ka ɖo nukúnkɛn dó wɛ. Ma blɛ́ hwi ɖé e ó, ɖó awě e ná sɛ́ dó wɛ un ɖe ɔ́ ná xásá nǔ e ɖo gbɛ ɔ́ ɖěbǔ ɖó ǎ. Amɔ̌, un ná hwlɛ́n gbɛ towe gán ɖo awě énɛ́ lɛ́ɛ bǐ mɛ, ɖo fí e a nǎ gbɔn lɛ́ɛ bǐ. Xó e nyɛ Mawu Mavɔmavɔ ɖɔ ɔ́ nɛ́.’ ”