Jelemíi 39 - MAWUXÓWÉMA

¹ Hwenu e Judáa xɔ́sú Sedesíyasi ɖo xwe tɛ́nnɛ bló wɛ ɖo zinkpo jí ɔ́, sun tɔn wǒgɔ́ ɔ́ mɛ ɔ́, Babilɔ́nu xɔ́sú Nabukodonɔzɔ́ɔ kplá ahwangɔnu tɔn bǐ, bó wá xá Jeluzalɛ́mu toxo ɔ́.

² Yě xá toxo ɔ́ mɔ̌ káká jɛ hwenu e Sedesíyasi bló xwe wǒ-ɖokpó ɖo zinkpo jí é. Azǎn tɛ́nnɛgɔ́ e ɖo sun ɛnɛgɔ́ ɔ́ mɛ ɔ́ gbe ɔ́, Babilɔ́nunu lɛ́ɛ tɔ́n ali ɖokpó dó ahohó e è mɛ lɛ́ lɛ̌ dó toxo ɔ́ é mɛ.

³ Énɛ́ ɔ́, Babilɔ́nu xɔ́sú ɔ́ sín ahwangán lɛ́ɛ byɔ́ toxo ɔ́ mɛ, bó yi cí toxo ɔ́ sín hɔntogbó e è nɔ ylɔ́ ɖɔ Hɔntogbó Tɛ́ntin tɔn é jí; yě mɛ e yi cí fínɛ́ lɛ́ɛ ɖíe: Nɛ̌ɛgali-Salɛsɛ́ɛ ahwangán lɛ́ɛ sín gǎn ɔ́, Samugáa-Nɛbu, Nɛbu-Saasekímu, mɛ e wú axɔ́sú ɔ́ ɖeji dó hú mɛ bǐ ɔ́ kpó ahwangán ɖě lɛ́ɛ bǐ kpó.

⁴ Ée axɔ́sú Sedesíyasi kpó sɔ́ja tɔn lɛ́ɛ kpó mɔ yě ɔ́, yě dɔn zǎn dó wǔ, bó hɔn gbɔn axɔ́sú ɔ́ sín jikpá mɛ, bó gbɔn hɔntogbó e ɖo ahohó we lɛ́ɛ tɛ́ntin e nu, bó wlí ali e yi tɔdo Judɛ́ɛn tɔn mɛ é.

⁵ Ahwangɔnu Babilɔ́nunu lɛ́ɛ tɔn ká jɛ yě gúdo, bó yi xwedó Sedesíyasi wú, ɖo ayǐkúngban wɛnjɛ Jeliko tɔn jí; yě wlí i, bó kplá ɛ yi Babilɔ́nu xɔ́sú Nabukodonɔzɔ́ɔ gɔ́n. Hwenɛ́nu ɔ́, axɔ́sú ɔ́ ɖo Hlivla ɖo Hamáti tomɛ. Fínɛ́ wɛ Nabukodonɔzɔ́ɔ ɖó hwɛ nú Sedesíyasi ɖe.

⁶ È gbo gbe axɔ́sú Sedesíyasi ví lɛ́ɛ ɖo nukún tɔn mɛ; mɔ̌ ɖokpó ɔ́, è hu gbɛtɔ́ klogǎnklogǎn Judáa tɔn lɛ́ɛ ɖo fínɛ́.

⁷ Énɛ́ ɔ́ gúdo ɔ́, axɔ́sú Babilɔ́nu tɔn ná gbe, bɔ è tɔ́n nukún Sedesíyasi tɔn we lɛ́ɛ, lobo dó wlɔ ɛ bó kplá ɛ yi Babilɔ́nu.

⁸ Babilɔ́nunu lɛ́ɛ dó axɔ́sú ɔ́ sín xwé zo ɖo Jeluzalɛ́mu, bó dó xwé ɖě lɛ́ɛ zo; yě gba ahohó e è mɛ lɛ́ lɛ̌ dó Jeluzalɛ́mu lɛ́ɛ.

⁹ Nɛbuzaladáni, sɔ́ja e nɔ cɔ́ axɔ́sú ɔ́ lɛ́ɛ sín gǎn ɔ́ wlí mɛ e ɖo toxo ɔ́ mɛ lɛ́ɛ, kpó mɛ e wá zé yěɖée jó n'i lɛ́ɛ kpó, kpó mɛ e kpo lɛ́ɛ kpó, bó kplá yě bǐ yi Babilɔ́nu.

¹⁰ Amɔ̌, mɛ e nyí wamamɔnɔ klókló ɖo Judáa to ɔ́ mɛ, bó má ɖó nǔ ɖěbǔ ǎ lɛ́ɛ ɔ́, Nɛbuzaladáni jó mɛ énɛ́ lɛ́ɛ dó nyi to ɔ́ mɛ, bó ná yě vǐwungbo kpó gle kpó.

È jǒ Jelemíi

¹¹ Nǔ e Babilɔ́nu xɔ́sú Nabukodonɔzɔ́ɔ zɔ́n Nɛbuzaladáni ɖɔ é ní bló nú Jelemíi lɛ́ɛ ɖíe:

¹² É ɖɔ n'i ɖɔ: “Yi kplá Jelemíi, kpé nukún wǔ tɔn nú mɛɖé ma dó ya n'i ó; é byɔ́ nǔɖé we hǔn, blǒ n'i.”

¹³ Nǔgbó ɔ́, ahwangán Nɛbuzaladáni kpó Nɛbucazibáni e wú Babilɔ́nu xɔ́sú ɔ́ ɖeji dó hú mɛ bǐ é kpó, kpó Nɛ̌ɛgali-Salɛsɛ́ɛ ahwangán lɛ́ɛ sín gǎn ɔ́ kpó, kpódó ahwangán Babilɔ́nu xɔ́sú ɔ́ tɔn ɖě lɛ́ɛ bǐ kpó, ɖó gbe kpɔ́;

¹⁴ yě ɖó gbe kpɔ́ bó sɛ́ mɛ dó ɖɔ è nǐ yi kplá Jelemíi sín sɔ́ja e cɔ́ axɔ́sú Sedesíyasi ɖ'ayǐ lɛ́ɛ sín kɔ́xota; ée yě mɔ ɛ ɔ́, yě kplá ɛ yi jó nú Gedaliyási. Gedaliyási ɔ́, Axikamu ví wɛ é nyí, bó nyí Cafáni vívú, bónú é ná kplá ɛ yi xwé gbe. Énɛ́ ɔ́, Jelemíi nɔ togun tɔn mɛ.

Mawu dó wɛn sɛ́ dó Evɛ́di-Mɛlɛ́ki Etiopíinu ɔ́

¹⁵ Hwenu e Jelemíi ɖo gan sɛn wɛ, ɖo sɔ́ja e nɔ cɔ́ axɔ́sú ɔ́ lɛ́ɛ sín kɔ́xota ɔ́, Mawu Mavɔmavɔ ɖɔ xó ɖé n'i. É ɖɔ n'i ɖɔ:

¹⁶ “Yi Evɛ́di-Mɛlɛ́ki Etiopíinu ɔ́ gɔ́n, bó ɖɔ n'i ɖɔ: ‘Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ é ɖíe: un ɖɔ nú mɛ e ɖo toxo élɔ́ mɛ lɛ́ɛ ɖɔ nǔɖé ná jɛ dó yě jí, é kún ka ná nyí nǔ ɖagbe ó; nǔ nyanya wɛ é ná nyí. Énɛ́ ɔ́, nǔ e un ko ɖɔ ɖ'ayǐ ɔ́ ná jɛ din bɔ hwi ɖésú ná mɔ.

¹⁷ Amɔ̌, gbe nɛ́ gbe ɔ́, un na hwlɛ́n we gán; un ná lɔn bónú a nǎ jɛ mɛ e ɖi xɛsi ná wɛ a ɖe lɛ́ɛ lɔ mɛ ǎ. Xó e nyɛ Mawu Mavɔmavɔ ɖɔ ɔ́ nɛ́.

¹⁸ Nǔgbó wɛ, un ná hwlɛ́n we ɖo kú sí, bɔ a nǎ gán bó ná nɔ gbɛ, ɖó a ɖeji dó wǔ ce. Xó e nyɛ Mawu Mavɔmavɔ ɖɔ ɔ́ nɛ́.’ ”