Jelemíi 38 - MAWUXÓWÉMA

¹ Gǎn ɖé lɛ́ɛ tíin; yě wɛ nyí Cefátiya Matáni ví ɔ́, Gedaliyáhu Pacehúu ví ɔ́, Yukálu Cɛlɛmiya ví ɔ́, kpódó Pacehúu Malukíya ví ɔ́ kpó; yě se xó e ɖɔ nú togun ɔ́ wɛ Jelemíi nɔ ɖe é; yě ɖɔ nú togun ɔ́ ɖɔ:

² “Mawu Mavɔmavɔ ɖɔ: ‘Mɛ e ná nɔ Jeluzalɛ́mu fí ɔ́, ahwan ma hu i ǎ ɔ́, adɔ ka ná hu i; é má nyí mɔ̌ ǎ ɔ́, jɛmɛjí ná hu i. Mɛ e na tɔ́n sín toxo ɔ́ mɛ, bó ná zé éɖée yi jó nú Babilɔ́nunu lɛ́ɛ ɔ́, mɛ énɛ́ ná kú ǎ; gbɛ tɔn wɛ ná nyí nǔ e é ná hɛn sín ahwangbénu wá é.’ ”

³ Đó Mawu Mavɔmavɔ ɖɔ è nǎ jó toxo élɔ́ nú Babilɔ́nu xɔ́sú ɔ́ sín ahwangɔnu bɔ é ná yí.

⁴ Gǎn lɛ́ɛ se xó énɛ́ lɛ́ɛ, bó ɖɔ nú axɔ́sú ɔ́ ɖɔ: “Nya énɛ́ ɔ́, è nǐ hu i! Đó xó e ɖɔ wɛ é ɖe ɔ́ ɖo awakanmɛ kú dó nú ahwanfuntɔ́ e kpo ɖo toxo ɔ́ mɛ lɛ́ɛ kpó togun ɔ́ bǐ kpó wɛ. Nya énɛ́ ɖo ɖagbe togun élɔ́ tɔn ba wɛ ǎ; nǔ hɛn gblé wɛ é ɖe.”

⁵ Énɛ́ ɔ́, axɔ́sú Sedesíyasi ɖɔ: “É ɖíe; mi bo sɔ́ ɛ dó wa nǔ e jló mi é ná, ɖó nyɛ wɛ nyí axɔ́sú mitɔn nǔgbó, un ka ɖó acɛ dó mi jí ǎ.”

⁶ Ée axɔ́sú ɔ́ ɖɔ mɔ̌ ɔ́, yě yi zé Jelemíi, bó sɔ́ ɛ dó axɔ́sú ɔ́ sín vǐ Malukíya sín sitɛ́nu mɛ ɖo gankpá ɔ́ sín kɔ́xota. Kan wɛ è dó Jelemíi, bó zé e dó sitɛ́nu ɔ́ mɛ. Sin ɖěbǔ sɔ́ ɖo tɔ ɔ́ mɛ ǎ, babá kɛ́ɖɛ́ wɛ kpo ɖ'é mɛ. Bɔ Jelemíi jɛ bɔ̌ yi jí ɖo tɔ ɔ́ mɛ.

⁷ Evɛ́di-Mɛlɛ́ki agooɖojǐe Etiopíinu e nɔ wa azɔ̌ ɖo axɔ́sú ɔ́ xwé gbe ɔ́ se ɖɔ è sɔ́ Jelemíi dó sitɛ́nu mɛ. Axɔ́sú ɔ́ ka ɖo kplé jí ɖo toxo ɔ́ sín hɔntogbó e è nɔ ylɔ́ ɖɔ Bɛnjamɛ́ɛ Hɔntogbó ɔ́ jí.

⁸ Énɛ́ ɔ́, Evɛ́di-Mɛlɛ́ki tɔ́n, bó yi mɔ axɔ́sú ɔ́ ɖo dɔ̌n, bó ɖɔ n'i ɖɔ:

⁹ “Axɔ́sú Sɛ́mɛɖó, gǎn ɖé lɛ́ɛ dó nǔ baɖabaɖa ɖokpó sin: yě zě gbeyíɖɔ Jelemíi dó sitɛ́nu mɛ. É ná bó nɔ agě jí ɔ́, é ná kú adɔ, ɖó nǔɖuɖu ɖěbǔ sɔ́ ɖo toxo ɔ́ mɛ ǎ.”

¹⁰ Ée Evɛ́di-Mɛlɛ́ki ɖɔ mɔ̌ ɔ́, axɔ́sú ɔ́ ɖɔ n'i ɖɔ: “Kplá gbɛtɔ́ gban (30) dó hwiɖée jí sín fí, bó yi ɖe Jelemíi tɔ́n sín tɔ ɔ́ mɛ, bónú é má kú ó.”

¹¹ Evɛ́di-Mɛlɛ́ki kplá mɛ lɛ́ɛ nǔgbó, bó yi axɔ́sú ɔ́ xwé. É bɛ́ avɔ xóxó, avɔ vúnvún lɛ́ɛ ɖo agbanxɔ ɔ́ mɛ, bó yi sitɛ́nu ɔ́ kɔn bó dó kan avɔ lɛ́ɛ, bó zé nú Jelemíi ɖo sitɛ́nu ɔ́ mɛ,

¹² bó ɖɔ n'i ɖɔ: “Bɛ̌ avɔ xóxó énɛ́ lɛ́ɛ dó awǎdá mɛ, bó dɔn kan gbɔn jí.” Bɔ Jelemíi bló nǔ e é ɖɔ é.

¹³ Énɛ́ ɔ́, yě dɔn kan ɔ́ bó ɖe e tɔ́n sín tɔ ɔ́ mɛ. Ée yě ɖe e tɔ́n ɔ́, é nɔ sɔ́ja e nɔ cɔ́ axɔ́sú ɔ́ lɛ́ɛ sín kɔ́xota ɖo hɔnmɛ.

Axɔ́sú Sedesíyasi lɛ́ kan nǔ byɔ́ Jelemíi

¹⁴ Axɔ́sú Sedesíyasi sɛ́ mɛ dó, bɔ è yi kplá Jelemíi wá; ée Jelemíi wá ɔ́, axɔ́sú ɔ́ kplá ɛ jɛ vo, ɖo Mawu Mavɔmavɔ xwé ɔ́ sín hɔntogbó atɔngɔ́ ɔ́ jí, bó ɖɔ n'i ɖɔ: “Jelemíi, un jló ná kan nǔ ɖokpó byɔ́ we, ma hwlá nǔ ɖěbǔ dó mì ó.”

¹⁵ Ée axɔ́sú ɔ́ ɖɔ mɔ̌ ɔ́, Jelemíi ɖɔ n'i ɖɔ: “Ényí un ɖɔ xó nǔgbó nú we ɔ́, a nǎ hu mì. Un ná bó kplɔ́n nǔ we din ɔ́, a nǎ bló ǎ.”

¹⁶ Ée Jelemíi ɖɔ mɔ̌ ɔ́, axɔ́sú ɔ́ dó akpá n'i ɖo nǔglɔ́ ɖɔ: “Mawu Mavɔmavɔ e ná gbɛ mǐ ɔ́ ɖo gbɛ, un na hu we ǎ, un ka ná jó we nú mɛ e jló ná hu we lɛ́ɛ ǎ.”

¹⁷ Jelemíi ɖɔ nú Sedesíyasi ɖɔ: “Mawu Mavɔmavɔ, Mawu Nǔbǐwúkpétɔ́, Mawu Izlayɛ́li tɔn ɔ́ ɖɔ: ‘Ényí a sɔ́ hwiɖée yi jó nú Babilɔ́nu xɔ́sú ɔ́ sín gǎn lɛ́ɛ ɔ́, a nǎ gán, bɔ è sɔ́ ná dó toxo élɔ́ zo ǎ, bɔ hwi kpó mɛ towe lɛ́ɛ kpó ná gán.

¹⁸ Amɔ̌, ényí a ma sɔ́ hwiɖée yi jó nú axɔ́sú Babilɔ́nu tɔn sín gǎn lɛ́ɛ ǎ ɔ́, è nǎ jó Jeluzalɛ́mu toxo ɔ́ nú Babilɔ́nunu lɛ́ɛ, bɔ yě ná dó zo; hwi lɔ ka ná gló yě ǎ.’ ”

¹⁹ Axɔ́sú Sedesíyasi ka ɖɔ nú Jelemíi ɖɔ: “Mɛ e ɖi xɛsi ná wɛ un ɖe lɛ́ɛ wɛ nyí Judáanu e yi gɔ́ nú Babilɔ́nunu lɛ́ɛ é; è nǎ wlí mì yi jó nú yě, bɔ yě ná ko mì.”

²⁰ Énɛ́ ɔ́, Jelemíi ɖɔ: “È nǎ jó we nú yě ǎ. Tunwun ɖɔ xó e ɖɔ nú we wɛ un ɖe ɔ́, Mawu Mavɔmavɔ wɛ ɖo ɖiɖɔ nú we wɛ; bo ɖótó mì, énɛ́ ɔ́, nǔ towe bǐ ná nyɔ́, bɔ nǔɖé ná wa we ǎ.

²¹ Ényí a ka gbɛ́ ɔ́, nǔ e ná wa we, bɔ Mawu Mavɔmavɔ ɖɔ nú mì é ɖíe:

²² è nǎ kplá nyɔ̌nu e ɖo hɔn ɔ́ mɛ lɛ́ɛ bǐ yi jó nú Babilɔ́nu xɔ́sú ɔ́ sín gǎn lɛ́ɛ, bɔ yě ná ji han dó we ɖɔ: ‘Xɔ́ntɔn towe alɔmayimɛ lɛ́ɛ nɔ́ klɔ́ we ganjí. Adǎn ká wá gbo we ɔ́, yě nɔ́ jó we dó.’

²³ È nǎ wlí asi towe lɛ́ɛ kpódó vǐ towe lɛ́ɛ kpó bǐ yi jó nú Babilɔ́nunu lɛ́ɛ, hwi lɔ ɔ́, a ka ɖo yě ná gló wɛ ǎ. Axɔ́sú Babilɔ́nu tɔn sín alɔ ná jɛ wǔ we. È nǎ dó toxo élɔ́ zo.”

²⁴ Énɛ́ ɔ́ gúdo ɔ́, Sedesíyasi ɖɔ nú Jelemíi ɖɔ: “Ényí a ma jló ná kú ǎ hǔn, mɛ ɖěbǔ ní ma se xó e mǐ ɖɔ lɛ́ɛ ó.

²⁵ Gǎn lɛ́ɛ ná se ɖɔ un ɖɔ xó xá we, lobo ná wá mɔ we, bó ná ɖɔ nú we ɖɔ: ‘Xó e a ɖɔ nú axɔ́sú ɔ́ kpó xó e axɔ́sú ɔ́ ɖɔ nú we lɛ́ɛ kpó ɔ́, ɖɔ nú mǐ, ma hwlá ɖěbǔ dó mǐ ó; é má nyí mɔ̌ ǎ ɔ́, mǐ na hu we.’ Nú yě wǎ ɖɔ mɔ̌ nú we hǔn,

²⁶ ɖɔ nú yě ɖɔ: ‘Vo wɛ un sa nú axɔ́sú ɔ́ ɖɔ é ní ma nyi mì sɛ́ dó Yexonatáni xwé ó, é má nyí mɔ̌ ǎ ɔ́, un táá kú.’ ”

²⁷ Nǔgbó ɔ́, gǎn lɛ́ɛ bǐ yi Jelemíi gɔ́n, bó kan xó byɔ́ ɛ. Jelemíi ka yí gbe nú yě lě e axɔ́sú ɔ́ ɖɔ gbɔn n'i é, lobɔ yě xwɛ bó wá yi, ɖó xó ɔ́ kó gba ǎ.

²⁸ Jelemíi nɔ sɔ́ja e nɔ cɔ́ axɔ́sú ɔ́ lɛ́ɛ sín kɔ́xota fínɛ́, káká jɛ gbe e gbe Babilɔ́nunu lɛ́ɛ yí Jeluzalɛ́mu é. Nǔ e jɛ hwenu e Babilɔ́nunu lɛ́ɛ yí Jeluzalɛ́mu ɔ́ ɖíe: