Jelemíi 37 - MAWUXÓWÉMA

¹ É su gbe ɖokpó bɔ Babilɔ́nu xɔ́sú Nabukodonɔzɔ́ɔ ɖe Yoyakini, Yoyakímu ví ɔ́ sín axɔ́súzinkpo Judáa tɔn jí, bó sɔ́ Joziyási ví Sedesíyasi ɖó tɛn tɔn mɛ.

² Amɔ̌, Sedesíyasi kpó gǎn hɔn-yitɔ́ tɔn lɛ́ɛ kpódó toví tɔn lɛ́ɛ kpó ɖěbǔ nɔ́ ɖótó xó e Mawu Mavɔmavɔ nɔ́ ɖɔ gbɔn gbeyíɖɔ Jelemíi jí ɔ́ ǎ.

³ É ká ɖo mɔ̌ có, axɔ́sú Sedesíyasi sɛ́ Yexukali Cɛlɛmiya ví ɔ́, kpó vɔ̌sánú-xwlémawutɔ́ Sefaníyahu Maaseya ví ɔ́ kpó dó gbeyíɖɔ Jelemíi gɔ́n, ɖɔ yě ní yi ɖɔ n'i ɖɔ: “Sa vo nú Mawu Mavɔmavɔ, Mawu mǐtɔn dó ta mǐtɔn mɛ.”

⁴ È ko wlí Jelemíi sú hwenɛ́nu ǎ; é ɖo togun ɔ́ mɛ, bɔ fí ɖé jló e ɔ́, é nɔ́ yi bó nɔ́ wá.

⁵ Hwe énɛ́ nu ɔ́, ahwangɔnu Ejípu xɔ́sú ɔ́ tɔn gosín Ejípu bó jǎwe. Ée Babilɔ́nunu e ɖo Jeluzalɛ́mu toxo ɔ́ yí wɛ lɛ́ɛ se mɔ̌ ɔ́, yě jó agɔ dó gǔdo, bó sɛ yěɖée kplé ɖo zɔ.

⁶ Énɛ́ ɔ́, Mawu Mavɔmavɔ ɖɔ nú gbeyíɖɔ tɔn Jelemíi ɖɔ:

⁷ “Xó e nyɛ Mawu Mavɔmavɔ, Mawu Izlayɛ́li tɔn ɖɔ é ɖíe: ‘Mi yi ɖɔ nú Judáa xɔ́sú e sɛ́ mi dó gɔ̌n ce, bó ɖɔ mi ní wá kan nǔ byɔ́ mì é ɖɔ ahwangɔnu Ejípu xɔ́sú ɔ́ tɔn e wá alɔ gɔ́ nú mi gbé ɔ́ kó lɛ́ kɔ yi Ejípu, to tɔn mɛ.

⁸ Hǔn, Babilɔ́nunu lɛ́ɛ na lɛ́ kɔ wá, bó ná tɔ́n ahwan toxo élɔ́, bó ná yí, lobo ná dó toxo ɔ́ zo.

⁹ Nyɛ Mawu Mavɔmavɔ ɔ́, un ɖo ɖiɖɔ nú mi wɛ: mi ma wa yɛ nú miɖée ó, mi ma vɛdó ɖɔ Babilɔ́nunu lɛ́ɛ ko yi sín ó. Yě xweyǐgbe ǎ.

¹⁰ Mi na bo ɖu ɖo ahwangɔnu Babilɔ́nu tɔn e ɖo ahwan fun xá mi wɛ ɔ́ jí, bónú é kpo mɛ e gblé wǔ lɛ́ɛ kɛ́ɖɛ́ ɔ́, yě mɛ énɛ́ lɛ́ɛ ná sí te sín goxɔ yětɔn lɛ́ɛ mɛ, lobo ná dó toxo élɔ́ zo.’ ”

È wlǐ Jelemíi sú dó gankpá mɛ

¹¹ Hwenu e ahwangɔnu Babilɔ́nu tɔn ɔ́ jó agɔ dó gǔdo, bó sɛ yěɖée kplé ɖo zɔ, lobo ɖo te kpɔ́n ahwangɔnu Ejípu xɔ́sú ɔ́ tɔn ɔ́,

¹² Jelemíi jló ná tɔ́n sín Jeluzalɛ́mu, bó ná yi Bɛnjamɛ́ɛ yíkúngban jí, bó ná yi gletoxo tɔn mɛ, bó ná nɔ ayǐkúngban e má wɛ yě ɖe ɔ́ sín tɛn mɛ.

¹³ Ée Jelemíi jɛ toxo ɔ́ sín hɔntogbó jí ɔ́, sɔ́ja e nɔ cɔ́ toxo ɔ́ lɛ́ɛ sín gǎn, ahwangán Yiliya ɖo fínɛ́, bó mɔ ɛ, lobo wlí i, bó ɖɔ: “A jlǒ ná yi jɛ Babilɔ́nunu lɛ́ɛ jí!” Yiliya ɔ́, Cɛlɛmiya ví wɛ, bó nyí Hananiya vívú.

¹⁴ Ée Yiliya ɖɔ mɔ̌ ɔ́, Jelemíi ɖɔ: “Mɔ̌ wɛ ǎ, un jló ná yi jɛ Babilɔ́nunu lɛ́ɛ jí ǎ.” Yiliya ka yí gbe nú xó tɔn ǎ, bó wlí i, bó dɔn ɛ yi gǎn lɛ́ɛ gɔ́n.

¹⁵ Gǎn lɛ́ɛ sin xomɛ dó Jelemíi, lobo xo e, bó zé e sú dó Yexonatáni wěgbójínɔtɔ́ to ɔ́ tɔn sín xwé gbe; xwé énɛ́ ɔ́, yě sɔ́ dó húzú gankpá mɛ.

¹⁶ Yě sɔ́ Jelemíi sú dó xɔ ɖé mɛ ɖo gankpá ɔ́ mɛ; xɔ ɔ́ sín aza cí toboo. Jelemíi ɖo fínɛ́ ɔ́, é kó lín

¹⁷ cóbɔ axɔ́sú Sedesíyasi wá sɛ́ mɛ dó, bɔ è yi kplá ɛ wá n'i, bɔ é kan nǔ byɔ́ ɛ dó nǔglɔ́. É kanbyɔ́ ɛ ɖɔ: “Mawu Mavɔmavɔ ɖɔ xó ɖé nú we, bɔ a nǎ ɖɔ nú mì a?” Bɔ Jelemíi yí gbe n'i ɖɔ: “Ɛɛn, é ɖɔ nú mì ɖɔ è nǎ jó we nú Babilɔ́nu xɔ́sú ɔ́.”

¹⁸ Énɛ́ ɔ́ gúdo ɔ́, Jelemíi kanbyɔ́ axɔ́sú Sedesíyasi ɖɔ: “Hwɛ tɛ́ un ka hu dó we, bó hu dó gǎn hɔn-yitɔ́ towe lɛ́ɛ, bó hu dó mɛ e ɖo toxo élɔ́ mɛ lɛ́ɛ bɔ mi wlí mì dó gan?

¹⁹ Gbeyíɖɔ mitɔn e ka ɖɔ axɔ́sú Babilɔ́nu tɔn kún ná tɔ́n ahwan mi ó, é kún ná wa nǔɖé nú to élɔ́ ó lɛ́ɛ ɔ́, nɛ̌ yě ká ná ɖɔ gbɔn din?

²⁰ “Axɔ́sú Sɛ́mɛɖó, ɖǒtó mì. Yǐ vo e sa nú we wɛ un ɖe ɔ́! Ma lɛ́ kɔ nú mì sɛ́ dó wěgbójínɔtɔ́ Yexonatáni xwé gbe ó; un yi dɔ̌n ɔ́, un ná kú jɛ dɔ̌n.”

²¹ Énɛ́ ɔ́, axɔ́sú Sedesíyasi ná gbe ɖɔ è nǐ hɛn Jelemíi ɖó sɔ́ja e nɔ cɔ́ axɔ́sú ɔ́ lɛ́ɛ sín kɔ́xota, bó ɖɔ è nǐ nɔ́ ná ɛ wɔ̌xúxú ɖokpó ayǐhɔ́ngbe ayǐhɔ́ngbe. Wɔ̌xúxú e è ɖa ɖo fí e ali e è nɔ ylɔ́ ɖɔ wɔ̌xúxúɖatɔ́ lɛ́ɛ sín ali ɔ́ gbɔn é wɛ è nǎ nɔ́ hɛn wá n'i. Nú wɔ̌xúxú ɖo toxo ɔ́ mɛ hǔn, è ma gɔn nǐná ɛ gbeɖé ó. Lě e Jelemíi nɔ gankpá mɛ ɖo sɔ́ja énɛ́ lɛ́ɛ sín kɔ́xota gbɔn ɔ́ nɛ́.