Jelemíi 35 - MAWUXÓWÉMA

¹ Hwenu e Yoyakímu, Joziyási ví ɔ́ ɖo axɔ́sú ɖu wɛ ɖo Judáa to ɔ́ nu ɔ́ wɛ Mawu Mavɔmavɔ ɖɔ xó élɔ́ nú Jelemíi; é ɖɔ n'i ɖɔ:

² “Yi mɔ Hlekávu ví lɛ́ɛ, bó ɖɔ xó nú yě bó kplá yě wá xɔ e ɖo Mawu Mavɔmavɔ xwé lɛ́ɛ ɖokpó mɛ, bó ná vɛ̌ɛn yě nú yě nu.”

³ Énɛ́ ɔ́, un yi kplá Yaazaniya Yiimɛyahu ví, Havasiníya vívú ɔ́. Un kplá é kpódó nɔví tɔn lɛ́ɛ kpó vǐ tɔn lɛ́ɛ kpó. È nǎ ɖɔ kpowun ɔ́, Hlekávu ví lɛ́ɛ bǐ wɛ un kplá.

⁴ Un kplá yě wá Mawu Mavɔmavɔ xwé, bó kplá yě dó Hanáni ví lɛ́ɛ sín xɔ mɛ, ɖo gǎn hɔn-yitɔ́ lɛ́ɛ sín xɔ kpá, ɖo Calúmu ví Maaseyahu e nyí gǎnhɔnjí ɔ́ sín xɔ ta nu. Hanáni ɔ́, Yigidaliyahu ví wɛ, bó ká nyí mɛɖé bó ɖo gbejí nú Mawu.

⁵ Un fɔ vɛ̌ɛn tɔyizɛ́n mɔ̌kpán wá ɖó nukɔn yětɔn, bó fɔ sinnugannú nú yě, bó ɖɔ nú yě ɖɔ yě ní nu vɛ̌ɛn kpɛɖé.

⁶ Lo ɔ́, yě ɖɔ: “Mǐ nɔ nu vɛ̌ɛn ǎ, ɖó tɔ́gbó mǐtɔn Hlekávu ví Yonadávu dó sɛ́n nú mǐ ɖɔ: ‘Mi ná nu vɛ̌ɛn gbeɖé ǎ, vǐ mitɔn lɛ́ɛ lɔ ná nu gbeɖé ǎ.

⁷ Mi ná gbá xɔ ǎ, mi ná dó jinukún ǎ, mi ná tun vǐwun ǎ, mi ka ná ɖó vǐwungbo ǎ. Lo ɔ́, goxɔ mɛ wɛ mi ná nɔ nú gbɛzán mitɔn bǐ. Énɛ́ ɔ́, mi ná dɔ́ ji ɖo to élɔ́ e mɛ mi nyí jǒnɔ ɖe ɔ́ mɛ.’

⁸ Mǐ nyi sɛ́n e tɔ́gbó mǐtɔn Yonadávu Hlekávu ví ɔ́ dó nú mǐ é; mǐ nu vɛ̌ɛn kpɔ́n ǎ, asi mǐtɔn lɛ́ɛ ɖě nu vɛ̌ɛn kpɔ́n ǎ, vǐ mǐtɔn súnnu kpó nyɔ̌nu kpó ɖěbǔ nu vɛ̌ɛn kpɔ́n ǎ.

⁹ Mǐ sá xwé bó nɔ gbe ǎ, mǐ ɖǒ vǐwungbo ǎ, mǐ ká ɖó gle ǎ.

¹⁰ Goxɔ mɛ wɛ mǐ nɔ́ nɔ. Nǔ e tɔ́gbó mǐtɔn Yonadávu ɖɔ nú mǐ ɔ́, mǐ xwedó bǐ, mǐ bló bǐ.

¹¹ Ée Babilɔ́nu xɔ́sú Nabukodonɔzɔ́ɔ tɔ́n ahwan to ɔ́ é ɔ́, mǐ gbɔ bó ɖɔ mǐ ná yi cí Jeluzalɛ́mu bó ná gló ahwangɔnu Babilɔ́nu tɔn kpó Silíi tɔn kpó. Lě e mǐ wǎ cí Jeluzalɛ́mu gbɔn ɔ́ nɛ́.”

¹² Ée yě ɖɔ mɔ̌ ɔ́, Mawu Mavɔmavɔ ɖɔ nú Jelemíi ɖɔ:

¹³ “Đɔ nú Judáanu lɛ́ɛ kpó Jeluzalɛ́munu lɛ́ɛ kpó ɖɔ: Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ ɔ́ ɖíe: mi ná ɖótó mì bó ná se nǔ e kplɔ́n mi wɛ un ɖe ɔ́ ǎ cé?

¹⁴ Sɛ́n e Yonadávu Hlekávu ví ɔ́ dó nú vǐ tɔn lɛ́ɛ ɖɔ yě ní má nu vɛ̌ɛn ó ɔ́, yě nyi. Yě nu vɛ̌ɛn nǔgbó ǎ káká jɛ égbé, ɖó tɔ́ yětɔn wɛ dó sɛ́n nú yě. Nyɛ ɔ́, nyɛ ka gɔn xó ɖɔ nú mi gbeɖé ǎ, mi ka ɖótó mì gbeɖé ǎ.

¹⁵ Mɛsɛntɔ́ ce, gbeyíɖɔ ce lɛ́ɛ ɔ́, un gɔn yě sɛ́ dó mi ǎ; un sɛ́ yě dó mi, bɔ yě nɔ́ ɖɔ nú mi ɖɔ: ‘Mɛ ɖokpó ɖokpó ní jó gbɛ nyanya e zán wɛ é ɖe ɔ́ dó; mi wa nǔ lě e é jɛ xá gbɔn é. Mi ma sɔ́ jɛ kpo nú nǔmɛsɛn lɛ́ɛ ɖě ó. Énɛ́ ɔ́, mi ná nɔ to e un ná mi kpó tɔ́gbó mitɔn lɛ́ɛ kpó ɔ́ mɛ.’ Mi ka wlí tó xó e un ɖɔ ɔ́ wú ǎ, mi dó tókúse mɛ.

¹⁶ Hlekávu ví lɛ́ɛ ɔ́, yě nyi sɛ́n e tɔ́gbó yětɔn Yonadávu dó nú yě ɔ́; lo ɔ́, mi Judáanu lɛ́ɛ ɔ́, midɛɛ lɛ́ɛ dó tókúse xó ce mɛ.”

¹⁷ “Énɛ́ ɔ́ wú wɛ Mawu Mavɔmavɔ togun e mi! Jeluzalɛ́munu lɛ́ɛ e mi! Nyladó e sín xó un ɖɔ ɖ'ayǐ lɛ́ɛ ɔ́, un na sɛ́ dó mi. Đó un ɖɔ xó nú mi, bɔ mi dó tókúse mɛ; un ylɔ́ mi, bɔ mi kɛ nu d'é mɛ nú mì ǎ.”

¹⁸ Énɛ́ ɔ́ gúdo ɔ́, Jelemíi ɖɔ nú Hlekávu ví lɛ́ɛ ɖɔ: Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ nú mi ɔ́ ɖíe, é ɖɔ:

¹⁹ “Mi nyi sɛ́n e tɔ́gbó mitɔn Yonadávu dó nú mi é, mi wa nǔ e é ɖɔ nú mi lɛ́ɛ bǐ ɖó ganjí. Énɛ́ ɔ́ wú wɛ un ma ná ba mɛ e ná nɔ nukɔn ce ɔ́ kpo gbeɖé ɖo Yonadávu Hlekávu ví ɔ́ sín vǐ lɛ́ɛ mɛ ǎ. “Xó e nyɛ Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ ɔ́ nɛ́.”