Jelemíi 31 - MAWUXÓWÉMA

¹ Mawu Mavɔmavɔ ɖɔ: “Hwenɛ́nu su ɔ́, un ná nyí Mawu nú Izlayɛ́li hɛ̌nnu lɛ́ɛ bǐ, bɔ yě ná nyí togun ce.”

Izlayɛ́li ví e kpo ɖo gbɛ lɛ́ɛ lɛ́ kɔ xwe xwé

² Xó e Mawu Mavɔmavɔ ɖɔ ɔ́ ɖíe: “Mɛ e kú xo kpo ɖo togun ce mɛ lɛ́ɛ mɔ fɛ́nú ɖo gbětótló mɛ. Izlayɛ́li xwe fí e é ná vo ɖe ɔ́.”

³ É nɔ́ ɖɔ: “Mawu Mavɔmavɔ ɖe éɖée xlɛ́ mì sín zɔ.” Mawu Mavɔmavɔ yí gbe n'i ɖɔ: “Un yí wǎn nú we sín do, bó ná yí wǎn nú we káká sɔ́yi; énɛ́ wú wɛ un nɔ gbejí nú we.

⁴ Izlayɛ́li, ɖyɔ̌vǐ, un ná lɛ́ zé we sí te. A nǎ lɛ́ zé hǔnví towe bó jɛ agun mɛ bó ɖú we xá weɖútɔ́ lɛ́ɛ.

⁵ Izlayɛ́li, a nǎ lɛ́ tun vǐwuntín gbɔn Samalíi só lɛ́ɛ jí, vǐwuntuntɔ́ lɛ́ɛ ná ɖu vǐwun le lo.

⁶ Đó ayǐ ɖokpó ná wá hɔ́n, bɔ glecɔ́tɔ́ lɛ́ɛ ná sú xó ɖo Samalíi só lɛ́ɛ jí, bó ná ɖɔ: ‘Mi sí te, bó wá mǐ yi Mawu Mavɔmavɔ, Mawu mǐtɔn gɔ́n ɖo Sinyɔ́ɔ só jí.’ ”

⁷ Xó e Mawu Mavɔmavɔ ɖɔ ɔ́ ɖíe, é ɖɔ: “Mi sú xó, bó j'awǎ dó Jakɔ́bu tamɛ; mi ɖe xomɛ hunhun mitɔn xlɛ́ dó akɔta e ɖo nukɔn ɔ́ tamɛ. Mi zé gbe yi jǐ, bó ji han, bó kpa susu nú Mawu Mavɔmavɔ bó ɖɔ: ‘Mawu Mavɔmavɔ, hwlɛ̌n togun towe, hwlɛ̌n Izlayɛ́li ví e kpo lɛ́ɛ bǐ gán.’

⁸ É ɖíe un ná kplá yě sín to ɖé mɛ ɖo Taligbé wá. Un ná cyán yě gbɔn ayǐkúngban ɔ́ bǐ jí, bó kplé yě. Nukúntíntɔ́nnɔ kpó afɔkponɔ kpó ɖo yě mɛ; nyɔ̌nu xoxónɔ kpó nyɔ̌nu e vǐ tɔ́n é kpó ɖo yě mɛ. Togun ce ɔ́ bǐ wɛ ná lɛ́ kɔ wá fí.

⁹ Yě ná wá kpó avǐ kpó, kpó vosisa kpó bɔ un ná kplá yě. Un ná kplá yě gbɔn ali e jí yě ma ná klɛ́n afɔ ɖe ǎ é, bɔ yě ná yi fí e tɔsisa ɖe é; ɖó tɔ́ wɛ un nyí nú Izlayɛ́li, bɔ Eflayímu nyí nukɔngbéví ce.”

¹⁰ Akɔta akɔta lɛ́ɛ e mi! Mi ɖótó xó e Mawu Mavɔmavɔ ɖɔ é, bó jlá nú tɔtɛ́ntinto e gbɔn zɔ lɛ́ɛ bǐ, bó ɖɔ: “Mawu Mavɔmavɔ gba Izlayɛ́li ví lɛ́ɛ dó; amɔ̌, din ɔ́, é ná kplé yě, bó ná tɔ́jú yě lě e lɛ̌ngbɔ́nyitɔ́ nɔ́ kpé nukún dó lɛ̌ngbɔ́ tɔn lɛ́ɛ wú é.”

¹¹ Đó Mawu Mavɔmavɔ ná tún kan nú Jakɔ́bu togun ɔ́; é ná xɔ gbɛ n'i ɖo kɛntɔ́ e hú gǎn ɛ ɔ́ sí.

¹² Yě ná wá Sinyɔ́ɔ só ɔ́ ta kpó awǎjijɛ kpó xósúsú kpó. Yě ná dó ahwan gbě, bó yi nǔ ɖagbe ɖagbe e Mawu Mavɔmavɔ ná ná yě lɛ́ɛ kɔn; é ná ná blěe yě, bó ná vɛ̌ɛn yɔ̌yɔ́ yě, bó ná ami yě, bó ná gbɔ̌ kpódó nyibú kpó yě. Yě ná cí jikpá e è hǔ sin ná ganjí é ɖɔhun, yě sɔ́ ná nɔ adohu adohu jí ɖě ǎ.

¹³ “Énɛ́ ɔ́, xomɛ ná hun ɖyɔ̌vǐ lɛ́ɛ bɔ yě ná ɖú we; xomɛ ná hun dɔ̌nkpɛvú lɛ́ɛ kpó mɛxó lɛ́ɛ lɔmɔ̌ kpó. Un ná sɔ́ aluwɛ yětɔn dó húzú awǎjijɛ; un ná súnsún ɖasin nú yě ɖo wǔvɛ́ yětɔn lɛ́ɛ mɛ, yě ká mɔ wǔvɛ́ fó ɔ́, un ná ná awǎjijɛ ɖaxó yě.

¹⁴ Un ná ná lan ɖagbe gěgé vɔ̌sánú-xwlémawutɔ́ lɛ́ɛ; togun ce ná mɔ nǔ ɖagbe bo ɖu gɔ́ xo.” Xó e Mawu Mavɔmavɔ ɖɔ ɔ́ nɛ́.

¹⁵ Xó e Mawu Mavɔmavɔ ɖɔ ɔ́ ɖíe: “È se mɛɖé ɖo xó sú wɛ ɖo Hlama, mɛ ɔ́ ɖo avǐ ya wɛ, bó ɖo alě ná wɛ tlala; Hlacɛ́li wɛ ɖo vǐ tɔn lɛ́ɛ ví wɛ. É jló ná se gbɔ ǎ, ɖó vǐ tɔn lɛ́ɛ sɔ́ ɖo fí ǎ.”

¹⁶ Lo ɔ́, Mawu Mavɔmavɔ ɖɔ n'i ɖɔ: “Ma ya avǐ ó, súnsún nukún mɛ; un ná dó gbɔ nú we ɖó wǔvɛ́ e a mɔ lɛ́ɛ wú. Nyɛ Mawu Mavɔmavɔ wɛ ɖɔ mɔ̌. Vǐ towe lɛ́ɛ ná gosín kɛntɔ́ yětɔn lɛ́ɛ sín to mɛ bó lɛ́ kɔ wá.”

¹⁷ Mawu Mavɔmavɔ ɖɔ: “Sɔ ná nyɔ́ nú we. Vǐ towe lɛ́ɛ ná lɛ́ kɔ wá to yětɔn mɛ.

¹⁸ Togun ce Eflayímu ɖo alě ná wɛ bɔ un se céɖécéɖé; yě ɖo alě ná wɛ ɖɔ: ‘Mawu Mavɔmavɔ, a dɔn tó nú mǐ, nyibúsú e má se xwe ǎ é ɖɔhun. Lɛ̌ kɔ nú mǐ, bónú mǐ ná lɛ́ kɔ wá gɔ̌n towe nǔgbó, ɖó hwi wɛ nyí Mawu Mavɔmavɔ, Mawu mǐtɔn.

¹⁹ Mǐ nɔ zɔ nú we, amɔ̌, din ɔ́, mɔ̌ e mǐ wa ɔ́ vɛ́ nú mǐ; mǐ mɔ nǔ jɛ hwɛ mǐtɔn lɛ́ɛ wú bɔ din ɔ́, mǐ yǐ hwɛ mǐtɔn lɛ́ɛ gbe. Wi mǐtɔn kɔ́n bɔ winnyá hu mǐ. Mǐ wa nǔ nyi do ɖo wǐnnyáwínnyá mɛ mǐtɔn, bó ɖo sin tɔn sún wɛ.’ ”

²⁰ Mawu Mavɔmavɔ ɖɔ: “Eflayímu ɔ́, vǐ vívɛ́ ce wɛ, un yí wǎn n'i tawun. Un ɖo xó tɔn ɖɔ wɛ lě ɔ́, un nɔ lɛ́ ɖo flínflín i d'é jí wɛ. Un yí wǎn n'i ɖésú. Nǔ tɔn nɔ́ blá wǔ nú mì titewungbe.

²¹ Izlayɛ́li, ɖyɔ̌vǐ, ɖǒ wuntun ali e gbɔn wɛ a ɖe ɔ́, tun kpo gbɔn ali e jí a ɖe ɔ́ jí. Hɛn ayi towe ɖo ali e jí a ɖe ɔ́, kpɔ́n ali e a wlǐ é ganjí. Izlayɛ́li ɖyɔ̌vǐ, lɛ̌ kɔ wá, lɛ̌ kɔ wá toxo élɔ́ lɛ́ɛ e nyí towe lɛ́ɛ mɛ.

²² Yɔkpɔ́víyɛ, a bǔ bǐ; flú e flú wɛ a ɖe ɔ́, hwetɛ́nu a nǎ ɖó te? Nyɛ Mawu Mavɔmavɔ bló nǔ yɔ̌yɔ́ ɖokpó dó gbɛ ɔ́ mɛ: nyɔ̌nu wɛ ná nɔ́ byɔ́ hǎ súnnu.”

Mawu ná vɔ́ to ɔ́ bló ɖó, bó ná lɛ́ jɛ akɔ yɔ̌yɔ́ xá togun ɔ́

²³ Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ ɔ́ ɖíe, é ɖɔ: “Hwenu e un ná kplá mɛ e ahwan wlí yi to ɖěvo mɛ lɛ́ɛ wá xwé ɔ́, è nǎ ɖɔ gbɔn fí bǐ ɖo Judáa to ɔ́ mɛ ɖɔ: ‘Izlayɛ́li, Mawu Mavɔmavɔ ní xo ɖɛ dó jǐ we, só mímɛ́, só e jí hwɛjijɔ dó ɖɔ do nyi é.’

²⁴ “Énɛ́ ɔ́, mɛ e ɖo Judáa toxo lɛ́ɛ mɛ lɛ́ɛ kpó mɛ e ɖo gletoxo lɛ́ɛ mɛ lɛ́ɛ kpó ná nɔ kpɔ́ ɖo to ɔ́ mɛ. Glesi lɛ́ɛ kpó kanlinnyitɔ́ lɛ́ɛ kpó ná nɔ to ɔ́ mɛ, kpó kanlin yětɔn lɛ́ɛ kpó.

²⁵ Đó un ná dó wǔsyɛ́n lanmɛ nú mɛ e nǔ cikɔ ná lɛ́ɛ, bó ná ná nǔ e hu dó mɛ e ma sɔ́ ɖó gǎn ǎ lɛ́ɛ é.”

²⁶ Xó énɛ́ jí wɛ un fɔ́n dó, lobo hun nukún. Un mɔ ɖɔ amlɔ e un dɔ́ ɔ́ wa ɖagbe nú mì ɖésú.

²⁷ Mawu Mavɔmavɔ ɖɔ: “Azǎn ɖé lɛ́ɛ ná wá, bɔ un ná fúnfún gbɛtɔ́ kpó kanlin kpó gbɔn axɔ́súɖuto Izlayɛ́li tɔn lɛ́ɛ kpó Judáa tɔn lɛ́ɛ kpó mɛ, lě e è nɔ hú nǔkún kɔ́n nyi gle mɛ é.

²⁸ Káká jɛ din ɔ́, un húzú kpan nukɔn yě, bó hɔn yě atín ɖɔhun; un gbo yě atín ɖɔhun; un hɛn nǔ gblé; un dó nǔ ahannya; un wa nǔ xá yě; amɔ̌, din ɔ́, un ná bló nǔ bǐ nú yě bó ná vɔ́ yě gbá xɔ ɖɔhun; un ná vɔ́ yě tun atín ɖɔhun. Nyɛ Mawu Mavɔmavɔ wɛ ɖɔ mɔ̌.

²⁹ Azǎn énɛ́ lɛ́ɛ gbe ɔ́, mɛ ɖěbǔ sɔ́ ná dó lǒ élɔ́ ǎ: ‘Tɔ́ kpó nɔ kpó ɖu vǐwun xɛ́lú, lo ɔ́, vǐ yětɔn sín aɖǔ wɛ ká jí.’

³⁰ Ɖó hwɛ e mɛ ɖokpó ɖokpó hu ɔ́ sín kú wɛ ná hu i. Mɛ e ɖu vǐwun xɛ́lú e sín aɖǔ wɛ ná jí.”

³¹ Mawu Mavɔmavɔ ɖɔ: “Azǎn ɖé lɛ́ɛ ná wá, bɔ un ná jɛ akɔ yɔ̌yɔ́ ɖé xá Izlayɛ́li togun ɔ́ kpó Judáa togun ɔ́ kpó.

³² É ná cí akɔ e un jɛ xá tɔ́gbó yětɔn lɛ́ɛ, gbe e gbe un hɛn alɔ yětɔn, bó ɖe yě tɔ́n sín Ejípu, lobɔ yě ma nɔ gbejí ná ǎ é ɖɔhun ǎ. Nyi wɛ kpa acɛ nú tɔ́gbó yětɔn lɛ́ɛ có yě ká nɔ gbejí nú akɔ e un jɛ xá yě ɔ́ ǎ.”

³³ Mawu Mavɔmavɔ ɖɔ: “Azǎn énɛ́ lɛ́ɛ gúdo ɔ́, akɔ e un ná jɛ xá Izlayɛ́li togun ɔ́ ɖíe: Un ná wlán sɛ́n ce dó taglo yětɔn mɛ, un ná wlán dó ayi yětɔn mɛ. Un ná nyí Mawu yětɔn, bɔ yě ná nyí togun ce.

³⁴ Mɛ ɖěbǔ ná ɖo yě mɛ, bó ná ɖɔ émí ná yi mɔ nɔzo émítɔn lɛ́ɛ, nɔví émí tɔn lɛ́ɛ, bó ná kplɔ́n nǔ yě ɖɔ yě ní wá tunwun nyɛ Mawu Mavɔmavɔ ǎ, ɖó yě bǐ na ko tunwun mì, bɛ́ sín yɔkpɔ́vú jí káká yi jɛ mɛxó jí. Un ná sɔ́ nǔ e yě wa nyi do ɔ́ bǐ kɛ yě, bó sɔ́ ná flín hwɛ e yě hu dó mì lɛ́ɛ ǎ.” Xó e Mawu Mavɔmavɔ ɖɔ é nɛ́.

³⁵ Mawu Mavɔmavɔ wɛ bló hwe, bɔ é nɔ́ za wě kéze; é wɛ bló sun kpó sunví lɛ́ɛ kpó, bɔ yě nɔ́ za wě zǎn mɛ; é wɛ nɔ́ dán xu, bɔ aslɔkɛ́ lɛ́ɛ nɔ sí te; nyǐkɔ tɔn nɔ́ nyí Mawu Mavɔmavɔ Nǔbǐwúkpétɔ́.

³⁶ Xó e é ɖɔ ɔ́ ɖíe: “Gbe e gbe nǔ énɛ́ lɛ́ɛ ná hwe dó azɔ̌ e un zɔ́n yě lɛ́ɛ wú ɔ́, gbe énɛ́ gbe ɔ́, Izlayɛ́li ví lɛ́ɛ lɔmɔ̌ sɔ́ ná nyí akɔta ɖo nukɔn ce gbeɖé ǎ.”

³⁷ Mawu Mavɔmavɔ ɖɔ: “Ényí mɛ ɖé sixú jlɛ́ jǐ yiyi jǐnukúnsin tɔn, abǐ mɛ ɖé sixú mɔ nǔ jɛ ayǐkúngban sín dodó lɛ́ɛ wú ɔ́, énɛ́ ɔ́, un ná ɖe alɔ sín Izlayɛ́li ví lɛ́ɛ bǐ sín kan mɛ, ɖó nǔ nyanya e yě dó sin lɛ́ɛ wú.” Xó e Mawu Mavɔmavɔ ɖɔ é nɛ́.

³⁸ Mawu Mavɔmavɔ ɖɔ: “Azǎn ɖé lɛ́ɛ ná wá, bɔ è na vɔ̌ toxo ɔ́ bló ɖó, bó ná dó sɔ́ mì su. È nǎ vɔ̌ Jeluzalɛ́mu toxo ɔ́ bló ɖó, bɛ́ sín mɛcɔ́kpe Hananɛ́li tɔn kɔn káká wá Zwemɛhɔntogbó ɔ́ jí.

³⁹ Toxo ɔ́ sín dogbó yɔ̌yɔ́ ɔ́, è nǎ nyi kan tɔn ɖidó Galɛ́vu só ɔ́ kɔn kpan ta gbadahwe jí, bó ná lílɛ́ sín fínɛ́ ɖidó Gowa.

⁴⁰ Énɛ́ ɔ́, mɛkúkú lɛ́ɛ sín tɔdo e mɛ afín gɔ́ ɔ́, kpódó ayǐkúngban vɔ̌tɔ́ e zɔn mɔ̌ káká yi Sedlɔ́n tɔ ɔ́ kɔn, bó zɔn mɔ̌ káká yi sɔ́ lɛ́ɛ sín hɔntogbó sín zwe mɛ ɖo zǎnzǎnhwe jí ɔ́, è nǎ sɔ́ ayǐkúngban énɛ́ lɛ́ɛ bǐ ɖó vo nú mì. Mɛ ɖé sɔ́ ná yí ayǐkúngban énɛ́ lɛ́ɛ ɖě ǎ, mɛɖé ká sɔ́ ná gba nǔ ɖo ayǐkúngban énɛ́ lɛ́ɛ jí ǎ.”