Jelemíi 30 - MAWUXÓWÉMA

¹ Mawu Mavɔmavɔ ɖɔ xó nú Jelemíi.

² “Xó e nyɛ Mawu Mavɔmavɔ, Mawu Izlayɛ́li tɔn ɖɔ ɔ́ ɖíe: Wlǎn xó e un ɖɔ nú we lɛ́ɛ bǐ dó wěma mɛ.

³ Un ɖo ɖiɖɔ nú we wɛ, hwe ɔ́ nu ná wá su, bɔ un na lɛ́ kɔ nú mɛ e ahwan wlí ɖo togun ce Izlayɛ́li kpó Judáa kpó mɛ lɛ́ɛ, bɔ yě ná wá xwé. Un ná kplá yě wá to e un ná tɔ́gbó yětɔn lɛ́ɛ é mɛ, bɔ é ná nyí yětɔn.”

⁴ Xó e Mawu Mavɔmavɔ ɖɔ dó Izlayɛ́li kpó Judáa kpó wú é ɖíe:

⁵ “Mǐ ɖo xósúsú ɖé se wɛ, xɛsi xósúsú ɖé wɛ; xɛsi ɖaxó ɖé sín xósúsú wɛ; ényí fífá sín xósúsú wɛ ǎ.

⁶ Mi yi ba do ná kpɔ́n! Súnnu nɔ́ ji vǐ wɛ a? Étɛ́wú súnnu lɛ́ɛ bǐ ka ɖo alin hɛn wɛ, nyɔ̌nu jɛ flú mɛ ɖɔhun mɔ̌? Étɛ́wú mɛ bǐ ká blá wǔ ɖo nukún mɛ mɔ̌?

⁷ Awě tɛ́ ɖíe! Azǎn baɖabaɖa ɖé wɛ, ayǐ mɔ̌hun ko hɔ́n kpɔ́n ǎ. Aluwɛ zán wɛ é nyí nú Jakɔ́bu ví lɛ́ɛ! Amɔ̌, yě ná tɔ́n sín mɛ, wǔyɛ́yɛ́ afɔyɛ́yɛ́.”

⁸ Mawu Mavɔmavɔ Nǔbǐwúkpétɔ́ ɔ́ ɖɔ: “Gbe énɛ́ gbe su ɔ́, agbanhɛnkpo e ɖo kɔli mɛ nú yě ɔ́, un ná hɛn lɔ́; un ná tún kan nú yě, bɔ toɖévomɛnu lɛ́ɛ sɔ́ ná kpa acɛ nú yě ǎ.

⁹ Yě ná sɛn nyɛ Mawu Mavɔmavɔ, Mawu yětɔn, bɔ un ná lɛ́ sɔ́ mɛ ɖokpó ɖó axɔ́sú yětɔn Davídi sín zinkpo jí, bɔ é ná nyí axɔ́sú yětɔn bɔ yě ná nɔ́ sɛn ɛ.”

¹⁰ Mawu Mavɔmavɔ ɖɔ: “Togun ce Izlayɛ́li, ado ma hu we o! Mi togun ce, mi Jakɔ́bu ví lɛ́ɛ, mi ma ɖi xɛsi ó. Đó, un ná hwlɛ́n mi gán sín to ma yá to énɛ́ mɛ, un ná hwlɛ́n vǐ mitɔn lɛ́ɛ gán sín to e mɛ ahwan wlí yě yi é. Jakɔ́bu ví lɛ́ɛ ná lɛ́ kɔ wá, bó ná gbɔjɛ́, bó ná vo; mɛ ɖěbǔ ná dó tagba nú yě ǎ.

¹¹ Un ɖo kpɔ́ xá yě bó ná hwlɛ́n yě gán. Akɔta e mɛ un gba yě kpé gbɔn lɛ́ɛ ɔ́, un ná sú akɔta énɛ́ lɛ́ɛ sín kún dó. Amɔ̌, yědɛɛ lɛ́ɛ ɔ́, un nǎ dɔn tó nú yě lě e é jɛ xá gbɔn é, un ka ná sú kún yětɔn dó ǎ. Un sixú jó yě dó, xomɛvɔ́ wɛ yě ɖe ɖɔhun ǎ.” Mawu Mavɔmavɔ wɛ ɖɔ mɔ̌.

¹² Mawu Mavɔmavɔ ɖɔ: “Jeluzalɛ́mu, wǔ e a gblě ɔ́ syɛ́n dín; akpa towe ɔ́ jɔmakú wɛ.

¹³ Mɛ ɖé ká ɖe bó ná klɔ́ akpa ɔ́ nú we ǎ. Nǔ e ná hu akpa towe ɔ́ ɖe ǎ.

¹⁴ Mɛ e yí wǎn nú we ɖ'ayǐ lɛ́ɛ bǐ wɔn we; yě mɛ ɖěbǔ sɔ́ nɔ́ kpɔ́n jɛ towe jí ǎ, ɖó un xo we lě e kɛntɔ́ ná xo we gbɔn é; un dɔn tó nú we bɔ é vɛ́ ɖésú. Hwɛ tobutóbú e a hu lɛ́ɛ wú wɛ un ɖo nǔ énɛ́ lɛ́ɛ wa xá we wɛ. Lě e hwɛ towe lɛ́ɛ syɛ́n sɔ́ ɔ́ wú wɛ un ɖo nǔ énɛ́ lɛ́ɛ wa xá we wɛ.

¹⁵ Étɛ́wú a ka ɖo akpa towe sín vo sa wɛ, bó ɖo wǔvɛ́ e mɔ wɛ a ɖe ɔ́ sín xó ɖɔ wɛ? Hwɛ tobutóbú e a hu é wú wɛ un ɖo nǔ énɛ́ lɛ́ɛ wa xá we wɛ, hwɛ baɖabaɖa e a hu lɛ́ɛ wú wɛ un ɖo nǔ énɛ́ lɛ́ɛ wa xá we wɛ.

¹⁶ Amɔ̌, mɛ e nɔ wá bɛ́ dɔkun mitɔn lɛ́ɛ bǐ ɖu lɛ́ɛ ɔ́, è nǎ bɛ́ dɔkun yětɔn lɛ́ɛ bǐ ɖu. Kɛntɔ́ towe lɛ́ɛ ɔ́, ahwan na wlí yě bǐ yi. Mɛ e nɔ fin nǔ towe lɛ́ɛ ɔ́, è nǎ fin nǔ yětɔn lɛ́ɛ. Mɛ e nɔ hɛn nǔ towe gblé lɛ́ɛ ɔ́, è nǎ hɛn nǔ yě lɔmɔ̌ tɔn gblé.

¹⁷ Amɔ̌, un ná klɔ́ akpa towe lɛ́ɛ nú we, un ná hu akpa towe lɛ́ɛ nú we, ɖó yě nɔ́ ylɔ́ we ɖɔ: Mɛ e sín kan mɛ è ɖe alɔ sín é, Sinyɔ́ɔ e jɛ jí mɛɖé má nɔ́ kpɔ́n ǎ é.” Mawu Mavɔmavɔ wɛ ɖɔ mɔ̌.

¹⁸ Mawu Mavɔmavɔ ɖɔ: “Jakɔ́bu ví e ahwan wlí yi to ɖěvo mɛ lɛ́ɛ ɔ́, un ná kplá yě wá xwé. Xwé yětɔn lɛ́ɛ sín nǔ nǎ blá wǔ nú mì. È nǎ vɔ̌ toxo yětɔn e ko gba bǐ ɔ́ bló ɖó. È nǎ vɔ̌ axɔ́sú ɔ́ sín hɔnmɛ bló, ɖó tɛn tɔn xóxó ɔ́ mɛ.

¹⁹ Yě ná nɔ́ ji han dó dó kú, yě ná nɔ́ sú xó kpó awǎjijɛ kpó. Un ná bló bɔ yě ná gba kún, kún yětɔn ná ɖe kpo ǎ. Un ná sɔ́ yě su, mɛɖé sɔ́ ná gbɛ́ wán nú yě ǎ.

²⁰ Nǔ nǎ nyɔ́ nú Jakɔ́bu ví lɛ́ɛ, lě e yě ɖe gbɔn ɖ'ayǐ xóxó é. Yě ná nɔ́ kplé ɖo nukɔn ce káká sɔ́yi, bɔ un ná dɔn tó nú mɛ e ná táfú yě lɛ́ɛ.

²¹ Mɛ e ná nyí gǎn ɖo yě nu ɔ́, un ná sɔ́ ɖo tɛ́ntin yětɔn; mɛ e ná kpa acɛ dó yě nu ɔ́, un ná sɔ́ ɖo yě mɛ. Un ná dɔn ɛ bɔ é ná sɛkpɔ́ mì, ɖó nú un ma ylɔ́ mɛɖé ǎ ɔ́, mɛ ɔ́ sixú syɛ́n ta bó sɛkpɔ́ mì ǎ. Nyɛ Mawu Mavɔmavɔ wɛ ɖɔ mɔ̌.

²² Énɛ́ ɔ́, mi ná nyí togun ce, bɔ un ná nyí Mawu mitɔn.”

²³ Xomɛsin Mawu Mavɔmavɔ tɔn ɖíe sí te jǎwe jɔhɔn ɖaxó ɖé ɖɔhun e. É ɖo nyinyi dó ta nú mɛdídá lɛ́ɛ wɛ.

²⁴ Xomɛsin ɖaxó e jí Mawu Mavɔmavɔ ɖe ɔ́ ɖo nǎ xwɛ wɛ ǎ. É ná xwɛ cóbónú Mawu Mavɔmavɔ ná wa nǔ e é lin lɛ́ɛ bǐ ǎ. Ayǐ ɖo hǐnhɔ́n wɛ ɔ́, mi ná mɔ nǔ jɛ nǔ énɛ́ lɛ́ɛ bǐ mɛ.