Jelemíi 29 - MAWUXÓWÉMA

¹ Gbeyíɖɔ Jelemíi nɔ Jeluzalɛ́mu, bó sɛ́ wěma ɖokpó dó tomɛxó e kpo ɖo gbɛ ɖo Babilɔ́nu lɛ́ɛ, vɔ̌sánú-xwlémawutɔ́ lɛ́ɛ, gbeyíɖɔ lɛ́ɛ kpódó mɛ e Nabukodonɔzɔ́ɔ wlí sín Jeluzalɛ́mu yi Babilɔ́nu lɛ́ɛ bǐ kpó.

² Axɔ́sú Yoyakini kpó nɔ tɔn kpó, gǎn hɔn-yitɔ́ lɛ́ɛ kpó, Judáa gán lɛ́ɛ kpó Jeluzalɛ́mu gán lɛ́ɛ kpó, alɔnuzɔ́watɔ́ lɛ́ɛ, kpódó fletuntɔ́ lɛ́ɛ kpó ɔ́, è ko kplá yě sín Jeluzalɛ́mu có Jelemíi wlán wěma élɔ́.

³ É sɔ́ wěma ɔ́ jó nú Eleasa Cafáni ví ɔ́ kpódó Gemaliya Ilukya ví ɔ́ kpó; yě wɛ Judáa xɔ́sú Sedesíyasi sɛ́ dó Babilɔ́nu xɔ́sú Nabukodonɔzɔ́ɔ gɔ́n, ɖo Babilɔ́nu. Xó e ɖo wěma ɔ́ mɛ ɔ́ ɖíe:

⁴ “Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɔ́ ɖɔ sɛ́ dó mɛ e è kplá sín Jeluzalɛ́mu yi Babilɔ́nu lɛ́ɛ ɔ́ ɖíe:

⁵ É ɖɔ: ‘Mi sá xwé bó nɔ gbe; mi bló jikpá bó ɖu nǔ e ná nyɔ́ ɖ'é mɛ lɛ́ɛ.

⁶ Mi da asú, mi da asi, mi ji vǐ súnnu, bó ji vǐ nyɔ̌nu. Mi da asi nú vǐ mitɔn súnnu lɛ́ɛ, mi sɔ́ vǐ mitɔn nyɔ̌nu lɛ́ɛ ná asú, bónú yě ji vǐ. Mi gba kún ɖo dɔ̌n; mi ma nú kún mitɔn yi gǔdo ó!

⁷ Mi ba lě e toxo e mɛ un sɔ́ ahwan dó wlí mi yi ɖó ɔ́ ná yi nukɔn gbɔn é; mi xo ɖɛ nú Mawu Mavɔmavɔ dó toxo ɔ́ tamɛ, ɖó nyɔ̌ná mitɔn ɖo nukɔn yiyi to ɔ́ tɔn sí.’

⁸ “Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ ɔ́ ɖíe: ‘Mi ma lɔn nú gbeyíɖɔ e ɖo tɛ́ntin mitɔn lɛ́ɛ blɛ́ mi ó; amɔɛkantɔ́ lɛ́ɛ lɔ ma blɛ́ mi ó. Mi ma ɖótó mɛ e nɔ tín dlɔ̌ mɛ nú mi lɛ́ɛ ó.

⁹ Đó adingban wɛ yě nɔ́ zé nyǐkɔ ce ɖó nu, bó nɔ́ wá ɖó nú mi. Un ka sɛ́ yě dó ǎ.’ Xó e Mawu Mavɔmavɔ ɖɔ ɔ́ nɛ́.

¹⁰ “Din ɔ́, Mawu Mavɔmavɔ lɛ́ ɖɔ: ‘Nú acɛkpikpa Babilɔ́nu tɔn bló xwe kanɖé gban (70) wá yi ɔ́, akpá e un dó nú mi ɔ́, un ná ɖe: un ná lɛ́ kɔ nú mi wá Jeluzalɛ́mu fí.

¹¹ Đó nyɛ Mawu Mavɔmavɔ ɔ́, un tunwun tito e un sɔ́ ɖó te nú mi é; fífá wɛ un sɔ́ ɖó te nú mì, ényí nǔ nyanya wɛ un sɔ́ ɖó te nú mi ǎ, bónú sɔ ná nyɔ́ nú mi

¹² Hwenɛ́nu ɔ́, mi ná sú xó ylɔ́ mì, bó ná xwedó mì, lobo ná sa vo nú mì, bɔ un ná ɖótó mi.

¹³ Mi ná ba mì, bó ná mɔ mì, ɖó mi ná ba mì kpó ayi mitɔn bǐ kpó.

¹⁴ Nyɛ Mawu Mavɔmavɔ ɖo ɖiɖɔ nú mi wɛ ɖɔ: Un ná jó nyiɖée dó bɔ mi ná mɔ mì; un ná kplá mɛ mitɔn e ahwan wlí yi to ɖěvo mɛ lɛ́ɛ wá. Un ná xúxú mi kplé gbɔn akɔta e mɛ un gba mi dó gbɔn lɛ́ɛ, fí e un gba mi dó kpé gbɔn lɛ́ɛ bǐ, lobo ná kplá mi wá fí e un ɖe mi sín bó kplá yi to ɖěvo mɛ é.’

¹⁵ “Mawu Mavɔmavɔ ɖɔ xó énɛ́ lɛ́ɛ bǐ nú mi, ɖó mi ɖɔ é sɔ́ gbeyíɖɔ gěgé nú émí ɖo Babilɔ́nu.

¹⁶ “Axɔ́sú e ɖo Davídi zinkpo jí ɔ́ kpó mɛ e ɖo Jeluzalɛ́mu toxo mɛ fí lɛ́ɛ kpó, kpó nɔví mitɔn e ahwan ma wlí yi to ɖěvo mɛ ǎ lɛ́ɛ kpó ɔ́, Mawu Mavɔmavɔ ɖɔ xó ɖé dó yě wú.

¹⁷ Xó e Mawu Mavɔmavɔ Nǔbǐwúkpétɔ́ ɖɔ dó yě wú ɔ́ ɖíe: ‘É ɖíe, un ná sɛ́ ahwan kpó adɔ kpó jɛmɛjí kpó dó yě. Un ná wa nǔ xá yě bɔ yě ná cí fígi e gblé, bó gblé káká bɔ è ma sɔ́ sixú ɖu ǎ ɔ́ ɖɔhun, ɖó é kó gblé dín.

¹⁸ Un ná zé ahwan kpó adɔ kpó jɛmɛjí kpó dó jɛ gǒ mɛ nú yě. Un ná bló mɔ̌ xá yě, bɔ è ja nu dó mɛɖé gbé ɔ́, yě wú wɛ è nǎ nɔ́ jlɛ́ dó; axɔ́súɖuto e ɖo gbɛ ɔ́ mɛ lɛ́ɛ mɔ ɔ́, xɛsi ná jɛ yě jí; è mɔ yě ɔ́, è nǎ nɔ́ sɔ́ alɔ ɖó nu; yě ná húzú nǔkiko; yě ná húzú winnyá ɖo akɔta e mɛ un ná gba yě dó gbɔn lɛ́ɛ,

¹⁹ ɖó yě ɖǒtó xó e ɖɔ nú yě wɛ un ɖe lɛ́ɛ ǎ, có un ka nɔ gɔn mɛsɛntɔ́ ce gbeyíɖɔ lɛ́ɛ sɛ́ dó yě ɖě jɛ ɖě gúdo ǎ; yě ká ɖótó gbeyíɖɔ lɛ́ɛ ǎ. Nyɛ Mawu Mavɔmavɔ wɛ ɖɔ mɔ̌.’

²⁰ “Mi mɛ e Mawu Mavɔmavɔ sɔ́ ahwan dó kplá sín Jeluzalɛ́mu yi Babilɔ́nu lɛ́ɛ e mi! Midɛɛ lɛ́ɛ ɔ́, mi ɖótó Mavɔmavɔ!

²¹ “Din ɔ́, Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ xó dó gbeyíɖɔ Akábu Kolaya ví ɔ́ kpó gbeyíɖɔ Sedesíyasi Maaseya ví ɔ́ kpó wú; gbeyíɖɔnyíjɛtɔ́ wɛ nú yě mɛ we lɛ́ɛ bǐ, yě ká nɔ́ ɖɔ émí ɖo Mawu sín wɛn dó wɛ. Mawu ɖɔ dó yě wǔ ɖɔ: ‘Un na jó yě nú Babilɔ́nu xɔ́sú Nabukodonɔzɔ́ɔ, bɔ é ná hu yě ɖo nukún mitɔn mɛ.

²² Énɛ́ ɔ́, è nǎ nɔ zé yě mɛ we lɛ́ɛ sín nyǐkɔ dó dó nu mɛ, ɖo mi Judáanu e ahwan wlí yi Babilɔ́nu lɛ́ɛ tɛ́ntin. È nǎ nɔ́ ɖɔ: Lě e Babilɔ́nu xɔ́sú ɔ́ mɛ ajotín gbeyíɖɔ Sedesíyasi kpó gbeyíɖɔ Akábu kpó tɔn gbɔn ɔ́, Mawu Mavɔmavɔ ní wa nǔ mitɔn gbɔn mɔ̌.

²³ Nǔ nǎ cí mɔ̌ nú yě, ɖó yě wa hɛ̌nnú ɖo Izlayɛ́li: yě ba nɔzo yětɔn sín asi, nǔ e un ma sɛ́ yě dó ɖɔ yě ní yi ɖɔ ǎ ɔ́, yě nɔ́ yi ɖɔ; adingban ka wɛ. Un mɔ do nú nǔ énɛ́ lɛ́ɛ bǐ, ɖě nyí gúdo ce nú ǎ.’ ” Mawu Mavɔmavɔ wɛ ɖɔ mɔ̌.

Cemaya sɛ́ wěma dó sín Babilɔ́nu

²⁴ Mawu ɖɔ nú Jelemíi ɖɔ: “A nǎ ɖɔ nú Cemaya Nɛxlamíti ɔ́ ɖɔ:

²⁵ ‘Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: A sɛ́ wěma dó Jeluzalɛ́mu togun ɔ́ bǐ, kpó vɔ̌sánú-xwlémawutɔ́ Sefaníyahu Maaseya ví ɔ́ kpó, kpó vɔ̌sánú-xwlémawutɔ́ ɖě lɛ́ɛ bǐ kpó, bó ɖɔ:

²⁶ Mawu Mavɔmavɔ sɔ́ we vɔ̌sánú-xwlémawutɔ́ ɖó vɔ̌sánú-xwlémawutɔ́ Yexoyada tɛn mɛ, bɔ a nǎ cɔ́ mɛ e hun alɛ bó nɔ́ zé yěɖée gbeyíɖɔ ɖo Mawu Mavɔmavɔ xwé gbe lɛ́ɛ; a mɔ mɛ mɔ̌hun ɔ́, a nǎ dó wlɔ ɛ, bó ná sú i dó gankpá mɛ;

²⁷ bɔ étɛ́wú a ma ka gbɛ́ nǔ nú Jelemíi Anatɔ́tinu e ɖo éɖée sɔ́ gbeyíɖɔ wɛ ɖo tɛ́ntin mitɔn ɔ́ ǎ?

²⁸ Ée é ɖo wěma sɛ́ dó mǐ wɛ ɖo Babilɔ́nu fí din ɖɔ Mawu ɖɔ mǐ nǎ lín ɖo to e mɛ ahwan kplá mǐ wá é mɛ ɔ́, hwɛ énɛ́ ɔ́ hwɛ towe wɛ. É glá káká bó wlán dó wěma ɔ́ mɛ ɖɔ mǐ ní sá xwé bó nɔ gbe; ɖɔ mǐ ní bló jikpá bó ɖu nǔ e ná nyɔ́ ɖo jikpá lɛ́ɛ mɛ lɛ́ɛ!’ ”

²⁹ Jelemíi nukún mɛ wɛ vɔ̌sánú-xwlémawutɔ́ Sefaníyahu xa wěma ɔ́ ɖe,

³⁰ bɔ Mawu Mavɔmavɔ ɖɔ nú Jelemíi ɖɔ:

³¹ “Đɔ sɛ́ dó mɛ e ahwan wlí yi Babilɔ́nu lɛ́ɛ bǐ ɖɔ xó e Mawu Mavɔmavɔ ɖɔ dó Cemaya Nɛxlamíti ɔ́ wú é ɖíe: ‘Đó ée un ma sɛ́ Cemaya dó ǎ, bɔ é sɔ́ nyǐkɔ ce ɖó nu, bó dɔn mi, bɔ mi ɖi nǔ nú adingban e é ɖó lɛ́ɛ é ɔ́,

³² un ná dɔn tó nú Cemaya Nɛxlamíti ɔ́, é kpódó vǐ tɔn lɛ́ɛ kpó; mɛ tɔn lɛ́ɛ ɖěbǔ nǎ nɔ togun élɔ́ tɛ́ntin ǎ. Yě mɛ ɖěbǔ ná mɔ nǔ ɖagbe e un ná wa nú togun ce ɔ́ ǎ. Đó é ɖɔ xó bó dɔn togun ɔ́, bɔ togun ɔ́ fɔ́n gǔ dó nyɛ Mawu Mavɔmavɔ jí. Nyɛ Mawu Mavɔmavɔ wɛ ɖɔ mɔ̌.’ ”