Jelemíi 28 - MAWUXÓWÉMA

Jelemíi gbɛ́ nǔ nú gbeyíɖɔ Hananiya

¹ Xwe énɛ́ xwe ɖokpó ɔ́, gbeyíɖɔ Hananiya Azúu ví, Gabawɔ́ɔnnu ɔ́ ɖɔ xó nú mì ɖo Mawu Mavɔmavɔ xwé gbe, ɖo vɔ̌sánú-xwlémawutɔ́ lɛ́ɛ kpó togun ɔ́ bǐ kpó nukɔn. Xwe e xwe Judáa xɔ́sú Sedesíyasi ɖo xwe ɛnɛ bló wɛ ɖo zinkpo jí ɔ́, sun tɔn atɔ́ɔ́ngɔ́ mɛ wɛ é ɖɔ xó nú mì; é ɖɔ nú mì ɖɔ:

² “Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: ‘Acɛ e kpa nú mi wɛ Babilɔ́nu xɔ́sú ɔ́ ɖe, bɔ é cí agbanhɛnkpo ɖɔhun ɖo kɔ nú mi ɔ́, un ná hɛn wɛ́n.

³ Cóbónú é ná su xwe we mɛ lěhwenu ɔ́, nǔ e è nɔ zán ɖo xwé ce gbe, bɔ Babilɔ́nu xɔ́sú Nabukodonɔzɔ́ɔ bɛ́ yi Babilɔ́nu lɛ́ɛ ɔ́, un ná lɛ́ kɔ nú bǐ wá fí.

⁴ Un ná kplá Judáa xɔ́sú Yoyakini Yoyakímu ví ɔ́ kpódó Judáanu e è wlǐ yi Babilɔ́nu lɛ́ɛ é bǐ kpó wá. Nǔgbó wɛ, acɛ e kpa nú mi wɛ Babilɔ́nu xɔ́sú ɔ́ ɖe, bɔ é cí agbanhɛnkpo ɖɔhun ɖo kɔli mɛ nú mi ɔ́, un ná hɛn wɛ́n.’ Xó e Mawu Mavɔmavɔ ɖɔ ɔ́ nɛ́.”

⁵ Gbeyíɖɔ Jelemíi ka yí gbe nú gbeyíɖɔ Hananiya ɖo vɔ̌sánú-xwlémawutɔ́ lɛ́ɛ kpó mɛ e ɖo Mawu Mavɔmavɔ xwé lɛ́ɛ bǐ kpó nukɔn ɖɔ:

⁶ “Amǐ, Mawu Mavɔmavɔ ní bló gbɔn mɔ̌! Mawu Mavɔmavɔ ní bló ɖó xó e a ɖɔ é jí, bónú nǔ e è bɛ̌ ɖo Mawu Mavɔmavɔ xwé gbe lɛ́ɛ kpó mɛ e è wlǐ lɛ́ɛ kpó bǐ ní wá xwé.

⁷ Amɔ̌, wlǐ tó xó e ná ɖɔ dó tó towe mɛ wɛ un ɖe é wú ganjí, togun ɔ́ lɔ ní ɖótó.

⁸ Xóxó hwenu ɔ́, gbeyíɖɔ e jɛ nukɔn nú nyi kpó hwi kpó lɛ́ɛ ɔ́, to ɖaxó ɖaxó lɛ́ɛ kpó axɔ́súɖuto nukúnɖéjí lɛ́ɛ kpó wɛ yě dó wɛn. Ahwanfunfun kpó, awě kpó jɛmɛjí kpó sín wɛn wɛ yě dǒ.

⁹ Lo ɔ́, ényí gbeyíɖɔ ɖé dó fífá sín wɛn ɔ́, nǔ e é ɖɔ ɔ́ wɛ ná jɛ, bɔ è nǎ tunwun ɖɔ Mawu Mavɔmavɔ wɛ sɛ́ ɛ dó nǔgbó.”

¹⁰ Énɛ́ ɔ́ gúdo ɔ́, gbeyíɖɔ Hananiya ɖe agbanhɛnkpo e ɖo kɔli mɛ nú gbeyíɖɔ Jelemíi ɔ́, lobo hɛn wɛ́n,

¹¹ bó ɖɔ ɖo togun ɔ́ bǐ nukɔn ɖɔ: “Mawu Mavɔmavɔ ɖɔ: ‘Cóbónú é ná su xwe we mɛ lěhwenu ɔ́, mɔ̌ wɛ un ná wɛ́n agbanhɛnkpo e Babilɔ́nu xɔ́sú Nabukodonɔzɔ́ɔ sɔ́ ɖó kɔli mɛ nú akɔta lɛ́ɛ bǐ é.’ ” Énɛ́ ɔ́ gúdo ɔ́, gbeyíɖɔ Jelemíi ɖidó.

¹² Ée gbeyíɖɔ Hananiya lɔ́ agbanhɛnkpo e ɖo kɔli mɛ nú gbeyíɖɔ Jelemíi ɔ́, Mawu Mavɔmavɔ ɖɔ nú Jelemíi ɖɔ:

¹³ “Yi ɖɔ nú Hananiya ɖɔ Mawu Mavɔmavɔ ɖɔ: ‘Ée a hɛn kpo ɔ́ lɔ́ din ɔ́, a ɖǒ ná zé gankpo ɖó tɛn tɔn mɛ.’ ”

¹⁴ Bɔ Jelemíi ɖɔ: “Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ é ɖíe, é ɖɔ: ‘Din ɔ́, gankpo wɛ un sɔ́ ɖó kɔli mɛ nú akɔta e ɖo gbě jí fí lɛ́ɛ é bǐ, nǔ e ɖo gbě jí fí é bǐ ná nɔ axɔ́sú Babilɔ́nu tɔn Nabukodonɔzɔ́ɔ sín acɛ mɛ, káká jɛ gběkanlin lɛ́ɛ lɔ jí.’ ”

¹⁵ Énɛ́ ɔ́ gúdo ɔ́, Jelemíi lɛ́ ɖɔ nú gbeyíɖɔ Hananiya ɖɔ: “Hananiya, ɖǒtó mì ganjí, Mawu Mavɔmavɔ sɛ́ we dó ǎ, bɔ a ka ɖo adingban ɖó dó ná gǎnjɛwú togun élɔ́ wɛ kpowun.

¹⁶ Énɛ́ ɔ́ wú wɛ Mawu Mavɔmavɔ ɖɔ: ‘Éɖíe, un ná ɖe we sín ayǐkúngban ɔ́ jí. Cóbónú xwe élɔ́ ná fó ɔ́, a nǎ nyí cyɔ, ɖó a fun togun ɔ́, bɔ yě fɔ́n gǔ dó nyɛ Mawu Mavɔmavɔ jí.’ ”

¹⁷ Gbeyíɖɔ Hananiya kú nǔgbó, ɖo sun tɛ́nwegɔ́ e ɖo xwe ɔ́ mɛ é mɛ.