Jelemíi 27 - MAWUXÓWÉMA

¹ Ée Sedesíyasi Joziyási ví ɔ́ yi axɔ́súzinkpo jí ɖo Judáa, bɔ é nɔ zaan ɔ́, Mawu Mavɔmavɔ ɖɔ xó élɔ́ nú Jelemíi; é ɖɔ n'i ɖɔ:

² “Xó e ɖɔ nú we wɛ nyɛ Mawu Mavɔmavɔ, Mawu Nǔbǐwúkpétɔ́ ɔ́ ɖe ɔ́ ɖíe: Kpa agbanhɛnkpo, bó gbɛ kan. A nǎ bɛ́ kan lɛ́ɛ kpó agbanhɛnkpo lɛ́ɛ kpó ɖó abɔ̌ta,

³ bó ná bɛ́ sɛ́ dó axɔ́sú Edɔ́mu tɔn, bó sɛ́ dó axɔ́sú Mɔwabu tɔn, axɔ́sú Amumɔ́ɔ ví lɛ́ɛ tɔn, axɔ́sú Tíi tɔn kpódó axɔ́sú Sidɔ́ɔn tɔn kpó. A nǎ bɛ̌ kan lɛ́ɛ kpó agbanhɛnkpo lɛ́ɛ kpó nú tofɔzéɖótetɔ́ e wá Judáa xɔ́sú Sedesíyasi gɔ́n ɖo Jeluzalɛ́mu lɛ́ɛ, bónú yě ná bɛ́ yi jó nú axɔ́sú énɛ́ lɛ́ɛ.

⁴ Đɔ nú yě ɖɔ yě ní dó wɛn élɔ́ ɔ́ gǎn yětɔn lɛ́ɛ céɖécéɖé tɔn, ɖɔ nyɛ Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ:

⁵ “Un bló ayǐkúngban, bó bló gbɛtɔ́ lɛ́ɛ, bó bló kanlin e ɖo ayǐkúngban ɔ́ jí lɛ́ɛ bǐ dó ɖe hlɔ̌nhlɔ́n ce kpódó nǔwúkpíkpé ce kpó xlɛ́. Nǔ e un bló lɛ́ɛ ɔ́, un nɔ ná mɛ e jló mì lɛ́ɛ.

⁶ Din ɔ́, un ná jó to élɔ́ lɛ́ɛ bǐ nú mɛsɛntɔ́ ce Nabukodonɔzɔ́ɔ Babilɔ́nu xɔ́sú ɔ́; un ná jó nǔ bǐ n'i káká jɛ gběkanlin lɛ́ɛ bǐ jí bɔ yě ná se tónú n'i.

⁷ Akɔta lɛ́ɛ bǐ ná nɔ acɛ tɔn mɛ, bǐ ná nɔ vǐ tɔn sín acɛ mɛ, bó nɔ vǐvú tɔn lɛ́ɛ sín acɛ mɛ, káká wá jɛ hwenu e to é ɖésúnɔ tɔn ná jɛ akɔta e syɛ́n hú i lɛ́ɛ kpó axɔ́sú e hú gǎn ɛ lɛ́ɛ kpó sín acɛ mɛ dó é.

⁸ “Ényí Akɔta ɖé abǐ axɔ́súɖuto ɖé gbɛ́ ɖɔ émí kún ná se tónú nú Nabukodonɔzɔ́ɔ ó ɔ́, ényí akɔta ɖé gbɛ́ ɖɔ émí kún ná zé Babilɔ́nu xɔ́sú ɔ́ sín agbanhɛnkpo ɖó abɔ̌ta bó nɔ acɛ tɔn mɛ ó ɔ́, un ná sɔ́ ahwanfunfun kpó adɔ kpó jɛmɛjí kpó dó dɔn tó n'i, un ná sɛ́ Nabukodonɔzɔ́ɔ dó e, bó ná hu acɛ tɔn bǐ. Xó e nyɛ Mawu Mavɔmavɔ ɖɔ ɔ́ nɛ́.

⁹ “Din ɔ́, midɛɛ lɛ́ɛ ɔ́, mi ma ɖótó gbeyíɖɔ mitɔn lɛ́ɛ ó, mi ma ɖótó bokɔ́nɔ mitɔn lɛ́ɛ ó, mi ma ɖótó mɛ e nɔ tín dlɔ̌ mɛ nú mi lɛ́ɛ ó, mi ma ɖótó bokantɔ́ mitɔn lɛ́ɛ ó, mi ma ɖótó majíkiblótɔ́ mitɔn lɛ́ɛ ɖěbǔ ó. Yě mɛ énɛ́ lɛ́ɛ bǐ wɛ nɔ ɖɔ mi kún ɖo Babilɔ́nu xɔ́sú ɔ́ sín acɛ mɛ ná nɔ́ wɛ ó.

¹⁰ Nǔ e yě nɔ́ ɖɔ nú mi lɛ́ɛ ɔ́ bǐ wɛ nyí adingban; ényí mi ka ɖótó yě ɔ́, è nǎ kplá mi bɔ mi na nɔ zɔ nú to mitɔn, un ná nya mi, bɔ mi na dɔn.

¹¹ “Lo ɔ́, é ká nyí akɔta ɖé yí gbe, bó sɔ́ axɔ́sú Babilɔ́nu tɔn sín agbanhɛnkpo ɖó abɔ̌ta, bó nɔ acɛ tɔn mɛ ɔ́, un ná jó akɔta énɛ́ ɔ́ dó bɔ é ná nɔ ayǐkúngban tɔn jí, bó lɛ gle ɖo ayǐkúngban tɔn jí. Xó e nyɛ Mawu Mavɔmavɔ ɖɔ ɔ́ nɛ́.”

¹² Xó ɖokpó ɔ́ wɛ un ɖɔ nú Judáa xɔ́sú Sedesíyasi; un ɖɔ n'i ɖɔ: “Hwi kpó togun towe kpó ɖó ná yí gbe nú agbanhɛnkpo e Babilɔ́nu xɔ́sú ɔ́ sɔ́ ɖó abɔ̌ta nú mi é, bó se tónú nú é kpódó togun tɔn kpó, énɛ́ ɔ́ mi ná nɔ gbɛ.

¹³ Mawu Mavɔmavɔ ɖɔ nú mɛɖé má se tónú nú Babilɔ́nu xɔ́sú ɔ́ ǎ ɔ́, émí ná sɛ́ ahwan kpó adɔ kpó jɛmɛjí kpó dó e; bɔ étɛ́wú hwi kpó togun towe kpó ká ná gbɛ́ tónú se nú Babilɔ́nu xɔ́sú ɔ́, bɔ ahwan kpó adɔ kpó jɛmɛjí kpó ná hu mi?

¹⁴ Gbeyíɖɔ ɖé lɛ́ɛ tíin, bó nɔ́ ɖɔ é kún byɔ́ ɖɔ mi ná nɔ Babilɔ́nu xɔ́sú ɔ́ sín acɛ mɛ ó; xó énɛ́ lɛ́ɛ e yě nɔ́ ɖɔ nú mi ɔ́, adingban wɛ, mi ma ɖótó yě ó.

¹⁵ Mawu Mavɔmavɔ ɖɔ: ‘Un sɛ́ yě dó ǎ. Wɛn ce dó mi wɛ yě ɖe bó ɖɔ, lo ɔ́ adingban ɖó wɛ yě ká ɖe. Ényí mi ɖótó yě ɔ́, un ná nya mi sín fí, bɔ mi kpó gbeyíɖɔ e nɔ ɖo xó énɛ́ lɛ́ɛ ɖɔ nú mi wɛ lɛ́ɛ kpó bǐ ná kú.’ ”

¹⁶ Énɛ́ ɔ́ gúdo ɔ́, un ɖɔ xó nú vɔ̌sánú-xwlémawutɔ́ lɛ́ɛ kpódó mɛ e ɖo fínɛ́ lɛ́ɛ bǐ kpó; un ɖɔ nú yě ɖɔ: “Xó e Mawu Mavɔmavɔ ɖɔ ɔ́ ɖíe: ‘Gbeyíɖɔ e nɔ ɖɔ nú mi ɖɔ zaanɖé din ɔ́, è nǎ bɛ́ nǔ e è nɔ zán ɖo xwé ce gbe lɛ́ɛ sín Babilɔ́nu wá lɛ́ɛ ɔ́, mi ma ɖótó yě ó, adingban wɛ yě nɔ́ ɖó nú mi.’

¹⁷ Mi ma ɖótó yě ó; mi se tónú nú Babilɔ́nu xɔ́sú ɔ́, énɛ́ ɔ́ mi ná nɔ gbɛ. Abǐ toxo élɔ́ ɔ́ gba jɛ́n è nǎ gba dandan a?

¹⁸ “Ényí gbeyíɖɔ Mawu tɔn jɛ́n yě nyí nǔgbó hǔn, ényí Mawu Mavɔmavɔ dó wɛn yě nǔgbó hǔn, yě ní bó sa vo nú Mawu Mavɔmavɔ Nǔbǐwúkpétɔ́ ɔ́, ní má lɔ́n nú è bɛ̌ nǔxɔ-akwɛ́ e kpo ɖo Mawu Mavɔmavɔ xwé ɔ́ gbe lɛ́ɛ, éé ɖo axɔ́sú Judáa tɔn sín hɔnmɛ lɛ́ɛ, kpó éé ɖo toxo ɔ́ mɛ lɛ́ɛ kpó yi Babilɔ́nu ó.

¹⁹ Nǔgbó ɔ́, Mawu Mavɔmavɔ Nǔbǐwúkpétɔ́ ɔ́ ɖó xó ɖé, bó ná ɖɔ dó dotín lɛ́ɛ, ganzɛ́n ɖaxó ɔ́, basya e ɖó zɔn lɛ́ɛ, kpódó nǔ ɖěvo ɖěvo e kpo ɖo Jeluzalɛ́mu lɛ́ɛ kpó wú.

²⁰ Đó hwenu e Nabukodonɔzɔ́ɔ Babilɔ́nu xɔ́sú ɔ́ wlí Judáa xɔ́sú Yoyakini, Yoyakímu ví ɔ́, bó wlí tonukún Judáa tɔn lɛ́ɛ kpódó Jeluzalɛ́mu tɔn lɛ́ɛ kpó yi Babilɔ́nu ɔ́, é bɛ́ nǔ énɛ́ lɛ́ɛ sín Jeluzalɛ́mu ǎ.

²¹ Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɔ́, xó e é ɖɔ dó nǔxɔ-akwɛ́ énɛ́ lɛ́ɛ e kpo ɖo Mawu Mavɔmavɔ xwé ɔ́ gbe lɛ́ɛ kpó, éé kpo ɖo axɔ́sú Judáa tɔn sín hɔnmɛ lɛ́ɛ kpó, éé kpo ɖo Jeluzalɛ́mu toxo ɔ́ mɛ lɛ́ɛ kpó ɔ́ wú ɔ́ ɖíe:

²² É ɖɔ: ‘È nǎ bɛ́ nǔ énɛ́ lɛ́ɛ bǐ yi Babilɔ́nu, bɔ yě ná nɔ dɔ̌n káká jɛ gbe e gbe nyi ɖésúnɔ ná ɖɔ bɔ è nǎ bɛ́ yě wá fí é.’ ” Xó e Mawu Mavɔmavɔ ɖɔ é nɛ́.