Jelemíi 26 - MAWUXÓWÉMA

¹ Ée Yoyakímu Joziyási ví ɔ́ yi axɔ́súzinkpo jí ɖo Judáa, bɔ é nɔ zaan é ɔ́, Mawu Mavɔmavɔ ɖɔ xó élɔ́ nú Jelemíi; é ɖɔ n'i ɖɔ:

² “Nyɛ Mawu Mavɔmavɔ wɛ ɖo xó ɖɔ nú we wɛ, yi nɔ te ɖo xwé ce sín kɔ́xota, bó ɖɔ xó nú mɛ e ná gosín Judáa toxo lɛ́ɛ mɛ, bó ná tɔ́n kɔ́ ɖe nú mì gbé lɛ́ɛ bǐ. Wlǐ xó e un ná ɖɔ nú we lɛ́ɛ bǐ ɖɔ nú yě, ma ɖe ɖěbǔ kpo ó.

³ Afɔ nyɔ́ ɔ́, yě ná ɖótó we, bɔ mɛ ɖokpó ɖokpó ná jó gbɛ nyanya e é nɔ́ zán ɔ́ dó. Un ko lin ná sɛ́ awě dó yě, ɖó nǔ nyanya e yě nɔ́ wa é wú; ényí yě ká ɖótó we ɔ́, un ná gbɔ bó jó dó.

⁴ Hǔn a nǎ ɖɔ nú yě ɖɔ Mawu Mavɔmavɔ ɖɔ: ‘Mi ɖótó mì, mi nyi sɛ́n e un ná mi lɛ́ɛ,

⁵ wɛn e gbeyíɖɔ ce, mɛsɛntɔ́ ce lɛ́ɛ dó mi lɛ́ɛ ɔ́, mi sɔ́ ylɔ́ nǔ. Un nɔ sɛ́ mɛsɛntɔ́ ce gbeyíɖɔ lɛ́ɛ dó hwebǐnu, mi ka ɖótó yě ǎ.

⁶ Ényí mi ma ɖótó yě ǎ ɔ́, un ná gba xwé élɔ́ lě e un gba éé ɖo Silóo é gbɔn é. Un ná bló bɔ akɔta e ɖo ayǐkúngban jí lɛ́ɛ é ɖěbǔ ja nu dó mɛɖé gbé ɔ́, é ná ɖɔ: Nǔ e gbo Jeluzalɛ́mu é wɛ ná gbo we.’ ”

⁷ Nǔgbó ɔ́, Jelemíi yi Mawu Mavɔmavɔ xwé ɔ́ sín kɔ́xo ɔ́ ta bó dó wɛn ɔ́, bɔ vɔ̌sánú-xwlémawutɔ́ lɛ́ɛ, gbeyíɖɔ lɛ́ɛ, kpó mɛ e ɖo fínɛ́ lɛ́ɛ bǐ kpó se.

⁸ Ée Jelemíi ɖɔ xó e Mawu Mavɔmavɔ ɖɔ n'i é fó é ɔ́, yě bǐ kplé bó zɔn jǐ tɔn, bó nɔ́ ɖɔ: “Hu jɛ́n è nǎ hu we.

⁹ Étɛ́wú a ka glá káká bó ɖɔ dó Mawu Mavɔmavɔ nyǐkɔ mɛ ɖɔ è na gba xwé élɔ́ Silóo tɔn ɖɔhun, lobɔ toxo élɔ́ ná gba hánnyá, káká bɔ mɛ ɖěbǔ kún sɔ́ ná kpo ɖo toxo ɔ́ mɛ ó? Étɛ́wú a ka ɖɔ mɔ̌?” Énɛ́ ɔ́, mɛ e ɖo Mawu Mavɔmavɔ xwé ɔ́ gbe lɛ́ɛ bǐ xísí dó Jelemíi.

¹⁰ Ée gǎn hɔn-yitɔ́ Judáa tɔn lɛ́ɛ se nǔ e ɖo jijɛ wɛ ɔ́, yě tɔ́n sín hɔn ɔ́ mɛ, bó wá Mawu Mavɔmavɔ xwé ɔ́ gbe, lobo jínjɔ́n xwé ɔ́ sín hɔntogbó Yɔ̌yɔ́ ɔ́ nukɔn, bó ná ɖɔ hwɛ xá Jelemíi.

¹¹ Vɔ̌sánú-xwlémawutɔ́ lɛ́ɛ kpó gbeyíɖɔ lɛ́ɛ kpó ɖɔ nú gǎn hɔn-yitɔ́ lɛ́ɛ kpódó togun ɔ́ bǐ kpó ɖɔ: “Nya élɔ́ ɔ́, hu jɛ́n è nǎ hu i, ɖó é ɖɔ xó dó Jeluzalɛ́mu wú, bɔ mi ɖésú se kpó tó mitɔn kpó.”

¹² Lo ɔ́, Jelemíi ɖɔ nú gǎn hɔn-yitɔ́ lɛ́ɛ bǐ kpó togun ɔ́ kpó ɖɔ: “Xó e un ɖɔ bɔ mi se ɔ́, Mawu Mavɔmavɔ wɛ sɛ́ mì dó ɖɔ nyi ní wá ɖɔ dó xwé élɔ́ kpó toxo élɔ́ kpó wú.

¹³ Din ɔ́, mi bo zán gbɛ mitɔn ganjí; mi wa nǔ ganjí lě e é jɛ xá gbɔn é, mi ɖótó nǔ e Mawu Mavɔmavɔ, Mawu mitɔn ɖɔ é. Énɛ́ ɔ́, é sɔ́ ná sɛ́ awě e xó é ɖɔ nú mi ɔ́ dó ǎ.

¹⁴ Amɔ̌, nyɛ ɔ́, un ɖo alɔ mitɔn mɛ, nǔ e mi mɔ ɖɔ é nyɔ́ bó sɔgbe ɔ́, mi sɔ́ mì dó wa.

¹⁵ Nǔ ɖokpó e ɖ'é mɛ ɔ́, ényí mi hu mì hǔn, mi tunwun ɖɔ émí hu xomɛvɔ́nɔ ɖokpó, bɔ é ká ji nǔɖé ɔ́, mi kpó mɛ e ɖo toxo élɔ́ mɛ lɛ́ɛ bǐ kpó ná sɔ́ kpan. Đó Mawu Mavɔmavɔ wɛ sɛ́ mì dó nǔgbó, bónú mi ní se xó élɔ́ lɛ́ɛ bǐ.”

¹⁶ Énɛ́ gúdo ɔ́, gǎn hɔn-yitɔ́ lɛ́ɛ kpó togun ɔ́ kpó ɖɔ nú vɔ̌sánú-xwlémawutɔ́ lɛ́ɛ kpódó gbeyíɖɔ lɛ́ɛ kpó ɖɔ: “È nǎ hu nya élɔ́ ǎ, ɖó wɛn wɛ é yí ɖo Mawu Mavɔmavɔ, Mawu mǐtɔn sí, bó dó mǐ nǔgbó.”

¹⁷ Mɛ e ɖo tomɛxó lɛ́ɛ sín gbɛ̌ta mɛ lɛ́ɛ ɖěe ɖo fínɛ́, bó sɛ wá agun ɔ́ tɛ́ntin, bó ɖɔ nú kplékplé mɛ ɔ́ bǐ ɖɔ:

¹⁸ “Axɔ́sú Judáa tɔn Ezekiyási hwenu ɖo fí ɔ́, nya gbeyíɖɔ Mawu tɔn ɖé tíin, bɔ è nɔ ylɔ́ ɛ ɖɔ Micée; nya énɛ́ ɔ́ Mɔlɛcɛ́tinu wɛ. É ɖɔ nú Judáa togun ɔ́ bǐ ɖɔ: Mi ɖótó xó e Mawu Mavɔmavɔ Nǔbǐwúkpétɔ́ ɔ́ ɖɔ é, é ɖɔ: ‘Sinyɔ́ɔ ná húzú gle lilɛ, Jeluzalɛ́mu ná húzú dǒglin, bɔ gběhan ná cyɔ́n só é jí Mawu Mavɔmavɔ sín xwé ɔ́ ɖe é.’

¹⁹ Ée gbeyíɖɔ Micée ka ɖɔ mɔ̌ ɔ́, axɔ́sú Ezekiyási kpódó Judáa togun ɔ́ kpó hu i wɛ a? Yě ma hu i nɛ́! É nyɔ́ wá ɔ́, yě ɖǒ sísí nú Mawu Mavɔmavɔ, lobo ba lě e yě ná wa gbɔn bó fá xomɛ n'i é, bɔ Mawu Mavɔmavɔ sɔ́ sɛ́ awě e xó é ɖɔ ɔ́ dó yě ǎ. Amɔ̌, ényí mǐ ɖó hwɛ nú nya élɔ́ din ɔ́, nǔ ɖaxó ɖokpó wɛ ná nyí bɔ mǐ nǎ wa dó mǐɖée.”

Axɔ́sú Yoyakímu ná gbe bɔ è hu gbeyíɖɔ Wuliyahu

²⁰ Ga nɛ́ mɛ ɔ́, gbeyíɖɔ ɖěvo ɖe, bó nɔ́ yí wɛn ɖo Mawu Mavɔmavɔ sí, bó nɔ́ dó. Wuliyahu Cemayahu ví ɔ́ wɛ, Kiliyati-Yealimunu wɛ. Élɔ́ mɔ̌ ɖɔ xó e Mawu ɖɔ n'i dó Jeluzalɛ́mu kpódó Judáa kpó wú é, Jelemíi ɖɔhun.

²¹ Axɔ́sú Yoyakímu, kpódó sɔ́ja e nɔ kplá ɛ lɛ́ɛ kpó, kpódó gǎn hɔn-yitɔ́ tɔn lɛ́ɛ kpó se nǔ e Wuliyahu ɖɔ é. Énɛ́ ɔ́, axɔ́sú ɔ́ jɛ lě e é ná wa gbɔn bó hu i ɔ́ bá jí. Amɔ̌, Wuliyahu se, bɔ xɛsi jɛ jǐ tɔn, bɔ é hɔn ɖidó Ejípu.

²² Ée axɔ́sú Yoyakímu se mɔ̌ ɔ́, é sɛ́ Ɛlunatáni Akubɔ́ɔ ví ɔ́ kpódó mɛ ɖé lɛ́ɛ kpó dó Ejípu,

²³ bɔ yě yi Ejípu, bó yi kplá Wuliyahu, bó sɔ́ ɛ wá jó nú axɔ́sú ɔ́. Axɔ́sú ná gbe, bɔ è hu Wuliyahu, bó yi ɖi i dó do e mɛ è nɔ ɖi toví kpaa lɛ́ɛ dó ɔ́.

²⁴ Amɔ̌, Jelemíi ɔ́, Axikamu Cafáni ví ɔ́ nya xɛ ɖo jǐ tɔn; Axikamu lɔn nú è jǒ Jelemíi nú togun ɔ́ bónú yě hu i ǎ.