Jelemíi 25 - MAWUXÓWÉMA

¹ Hwenu e Yoyakímu Joziyási ví Judáa xɔ́sú ɔ́ ɖo xwe ɛnɛ bló wɛ ɖo zinkpo jí ɔ́, Mawu ɖɔ xó nú Jelemíi dó Judáa togun ɔ́ bǐ wú. Xwe e xwe Nabukodonɔzɔ́ɔ Babilɔ́nu xɔ́sú ɔ́ yi zinkpo jí é wɛ.

² Xó ɔ́ wɛ Jelemíi ɖɔ ɖo Judáa togun ɔ́ bǐ kpó Jeluzalɛ́mu ví lɛ́ɛ bǐ kpó nukɔn; é ɖɔ:

³ “Sín xwe ko-nukún-atɔn ɖíe wɛ Mawu Mavɔmavɔ jɛ xó ɖɔ nú mì jí, bɔ un ɖo ɖiɖɔ nú mi wɛ káká jɛ égbé, mi ka ɖótó mì ǎ. Xwe wǎtɔn bló wɛ Joziyási Amɔ́ni ví ɔ́ ɖe ɖo axɔ́súzinkpo Judáa tɔn jí bɔ Mawu Mavɔmavɔ jɛ xó ɖɔ nú mì jí.

⁴ Mawu Mavɔmavɔ nɔ sɛ́ mɛsɛntɔ́ tɔn gbeyíɖɔ lɛ́ɛ dó hwebǐnu ɖě jɛ ɖě gúdo, mi ka ɖótó yě ǎ; mi wlí tó xó yětɔn wú bó ná se ǎ.

⁵ Mawu Mavɔmavɔ ɖɔ nú mi ɖɔ: ‘Ali nyanya e mi wlí ɔ́, mi lɛ́ kɔ sín jí, mi jó dǎka dó, bó jó nǔ baɖabaɖa e mi nɔ bló lɛ́ɛ dó; énɛ́ ɔ́, mi ná nɔ to e un ná tɔ́gbó mitɔn lɛ́ɛ kpó mi kpó é mɛ káká sɔ́yi.

⁶ Mi ma sɛn vodún ó, mi ma jɛ kpo nú vodún ó. Ényí mi ma sɔ́ nǔ énɛ́ lɛ́ɛ e è nɔ sɔ́ alɔ dó bló lɛ́ɛ dó dó xomɛsin nú mì ǎ ɔ́, un ná wa nǔ nyanya ɖěbǔ nú mi ǎ.’

⁷ Mawu Mavɔmavɔ ɖɔ: ‘Un ɖɔ xó énɛ́ lɛ́ɛ nú mi có, mi ka ɖótó mì ǎ, lobo nɔ sɔ́ nǔ e mi zé alɔ mitɔn dó bló lɛ́ɛ dó dó xomɛsin nú mì. Mi ɖésúnɔ wú wa nǔ dó wɛ mi ɖe.’

⁸ “Xó e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe: ‘Ée mi ma se xó ce ǎ e ɔ́,

⁹ un ná sɛ́ mɛ dó togun e gbɔn totaligbé dɔ̌n lɛ́ɛ bǐ; un ná sɛ́ mɛ dó Nabukodonɔzɔ́ɔ Babilɔ́nu xɔ́sú e nɔ wa azɔ̌ nú mì é, un ná kplá yě wá to mɛ fí, bɔ yě ná wá gba to élɔ́, bó dó ya nú togun élɔ́ kpó togun e lɛ́ lɛ̌ dó e lɛ́ɛ bǐ kpó, bó sú kún yětɔn dó, bó ná gba nǔ e ɖo to ɔ́ mɛ lɛ́ɛ bǐ hánnyá káká yi mavɔ mavɔ. Mɛ ɖé wá mɔ ɔ́, mɛ ɔ́ ná sú alɔ nu; yě ná nyí nǔkiko. Xó e nyɛ Mawu Mavɔmavɔ ɖɔ é nɛ́.

¹⁰ Mɛ ɖé sɔ́ ná se xweɖuɖu, awǎjijɛ, alɔwlíhan ɖě ɖo mi gɔ́n ǎ. È sɔ́ ná se sé sín gbe ɖě ɖo to ɔ́ mɛ ǎ; un ná xo zogbɛ́n e ɖo títá ɔ́ cí.

¹¹ To élɔ́ bǐ ná gba hánnyá bó húzú gbětótló, bɔ akɔta énɛ́ lɛ́ɛ bǐ ná nɔ Babilɔ́nu xɔ́sú ɔ́ sín acɛ mɛ nú xwe kanɖé gban (70).’

¹² “Mawu Mavɔmavɔ ɖɔ: ‘Nú xwe kanɖé gban (70) lɛ́ɛ ka wá yi ɔ́, alɔ ce ná jɛ Babilɔ́nu xɔ́sú wú, bó ná jɛ togun tɔn wú, ɖó dǎka yětɔn lɛ́ɛ wú. Un ná dɔn tó nú Babilɔ́nunu lɛ́ɛ bó ná sɔ́ to yětɔn dó húzú gbětótló káká sɔ́yi. Xó e nyɛ Mawu Mavɔmavɔ ɖɔ ɔ́ nɛ́.

¹³ Nǔ e un ɖɔ un ná wa xá to élɔ́ ɔ́, un ná wa bǐ xá ɛ. Un ná wa nǔ e è wlǎn dó wěma élɔ́ mɛ lɛ́ɛ bǐ xá ɛ; bó wa nǔ e Jelemíi ɖɔ dó nyǐkɔ ce mɛ dó akɔta ɖě lɛ́ɛ bǐ wú ɔ́ bǐ xá ɛ.

¹⁴ Đó yě ná húzú kannumɔ nú akɔta e syɛ́n hú yě lɛ́ɛ kpó axɔ́sú e hú gǎn yě lɛ́ɛ kpó. Lě e yě nɔ́ bló xá mɛ gbɔn é wɛ un ná wa nǔ xá yě gbɔn. Lě e yě sɔ́ alɔ yětɔn dó wa nǔ gbɔn é wɛ un na bló xá yě gbɔn.’ ”

Mawu kpé xomɛsin tɔn nú akɔta lɛ́ɛ

¹⁵ Mawu Mavɔmavɔ, Mawu Izlayɛ́li tɔn ɖɔ nú mì ɖɔ: “Yǐ vɛ̌ɛnkɔ́fu élɔ́ ɖo alɔ ce mɛ. Xomɛsin ce wɛ gɔ́. Nǎ akɔta e gɔ́n un ná sɛ́ we dó lɛ́ɛ bǐ, nú yě nu.

¹⁶ Yě ná nu, bɔ nukún mɛ yětɔn ná lɛ́ lɛ̌, bɔ yě ná hun taɖu ɖó ahwan e un ná sɛ́ dó yě ɔ́ wú.”

¹⁷ Énɛ́ ɔ́, un yí kɔ́fu ɔ́ ɖo Mawu Mavɔmavɔ sín alɔ mɛ, bó ná akɔta e mɛ Mawu Mavɔmavɔ sɛ́ mì dó lɛ́ɛ bǐ, bɔ yě nu.

¹⁸ Un ná mɛ e ɖo Jeluzalɛ́mu lɛ́ɛ, bó ná mɛ e ɖo Judáa toxo ɖě lɛ́ɛ mɛ lɛ́ɛ. Un ná axɔ́sú yětɔn lɛ́ɛ, bó ná gǎn hɔn-yitɔ́ e ɖo to ɔ́ mɛ lɛ́ɛ, bó ná zé to ɔ́ dó húzú to gbigba, nǔkiko, bɔ mɛɖé mɔ ɔ́, é ná sɔ́ alɔ dó nu; è ja nu dó toxo ɖé gbé ɔ́, yě wú wɛ è nǎ nɔ́ jlɛ́ dó, lě e é ɖe gbɔn égbé din é.

¹⁹ Un ná akɔta ɖě lɛ́ɛ lɔ: Ejípu xɔ́sú ɔ́ kpó mɛsɛntɔ́ tɔn lɛ́ɛ kpó, gǎn hɔn-yitɔ́ tɔn lɛ́ɛ, kpó togun tɔn bǐ kpó.

²⁰ Un ná akɔta akɔta e ɖo Ejípu to ɔ́ mɛ lɛ́ɛ bǐ; un ná Wúsi xɔ́sú lɛ́ɛ bǐ; un ná Filisitɛ́ɛn lɛ́ɛ xɔ́sú lɛ́ɛ bǐ: Acikelɔ́ni xɔ́sú ɔ́, Gaza xɔ́sú ɔ́, Eklɔ́ni xɔ́sú ɔ́, bó ná Acidɔ́di xɔ́sú ɔ́, có Acidɔ́di toxo ɔ́ kpɛɖé jɛ́n kpo ɖo te.

²¹ Un ná mɛ e ɖo Edɔ́mu lɛ́ɛ, un ná mɛ e ɖo Mɔwabu lɛ́ɛ, un ná Amumɔ́ɔ ví lɛ́ɛ.

²² Un ná Tíi xɔ́sú lɛ́ɛ bǐ, un ná Sidɔ́ɔn xɔ́sú lɛ́ɛ bǐ, bó ná to e ɖo xu gúdo lɛ́ɛ sín axɔ́sú lɛ́ɛ bǐ.

²³ Un ná mɛ e ɖo Dedáni lɛ́ɛ, mɛ e ɖo Téma lɛ́ɛ, mɛ e ɖo Buzu lɛ́ɛ kpó mɛ e nɔ xwlɛ́ gekplá yětɔn lɛ́ɛ kpó.

²⁴ Un ná Alabíinu xɔ́sú lɛ́ɛ bǐ, bó ná axɔ́sú togun e nɔ nɔ gbětótló mɛ lɛ́ɛ tɔn lɛ́ɛ bǐ.

²⁵ Un ná Zimuli xɔ́sú lɛ́ɛ bǐ, Elámu xɔ́sú lɛ́ɛ bǐ, bó ná Mɛdi xɔ́sú lɛ́ɛ bǐ.

²⁶ Un ná axɔ́sú e ɖo totaligbé lɛ́ɛ, éé ɖo tófí lɛ́ɛ abǐ éé ɖo zɔ lɛ́ɛ. Yě bǐ sésé nu. Axɔ́súɖuto e gbɔn ayǐkúngban ɔ́ jí ɖo gbɛ ɔ́ mɛ lɛ́ɛ bǐ nu. Énɛ́ ɔ́ gúdo ɔ́, Cecáki xɔ́sú ɔ́ wá nu.

²⁷ Mawu Mavɔmavɔ ɖɔ má ɖɔ nú yě bǐ ɖɔ: “Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɔ́ ɖɔ ɔ́ ɖíe: ‘Mi nu káká bó mú; mi nu káká bó slú; mi nu káká bó j'ayǐ nú te sísí gló, ɖó ahwan e un ná sɛ́ dó mi é wú.’

²⁸ Ényí yě gbɛ́ ɖɔ émí kún ná yí kɔ́fu ɔ́ ɖo alɔ towe mɛ, bó nu ó hǔn, ɖɔ nú yě ɖɔ: ‘É gbɔn ɖěbǔ ɔ́ mi ná nu. Nyɛ Mawu Mavɔmavɔ Nǔbǐwúkpétɔ́ ɔ́ wɛ ɖɔ mɔ̌.

²⁹ Đó un jó Jeluzalɛ́mu, toxo e è sɔ́ ɖó vo nú mì ɔ́ dó ǎ, bó sɛ́ awě dó e, bɔ midɛɛ lɛ́ɛ wɛ un ná jó dó, bó gɔn awě sɛ́ dó mi, xomɛ vɔ́ wɛ mi ɖe ɖɔhun a? Gbeɖé kpɔ́n! Un na sɛ́ ahwan dó mɛ e ɖo ayǐkúngban ɔ́ jí lɛ́ɛ bǐ. Nǔ e nyɛ Mawu Mavɔmavɔ Nǔbǐwúkpétɔ́ ɔ́ ɖɔ ɔ́ nɛ́.’ ”

³⁰ Mawu Mavɔmavɔ lɛ́ ɖɔ nú mì ɖɔ: “A nǎ ɖɔ xó énɛ́ lɛ́ɛ bǐ nú yě, bó ná lɛ́ ɖɔ nú yě ɖɔ: ‘Mawu Mavɔmavɔ nɔ jǐ dɔ̌n ɖo xwé tɔn gbe, bó dó gbe. É nɔ nɔtɛn tɔn mímɛ́ ɔ́ dɔ̌n, bó sú xó dó to tɔn jí. É sú xó, mɛ ɖo vǐwun li wɛ ɖo vǐwunto mɛ ɖɔhun, dó mɛ e ɖo ayǐkúngban ɔ́ jí lɛ́ɛ bǐ ta.

³¹ Zǐngídi e jí é ɖe é hun káká yi fí e gbɛ ɔ́ kponu ɖó é, ɖó Mawu Mavɔmavɔ wɛ ɖo hwɛ dó akɔta lɛ́ɛ wɛ. É ɖo hwɛ ɖɔ xá gbɛtɔ́ lɛ́ɛ bǐ wɛ; é jó mɛdídá lɛ́ɛ nú hwǐ, ɖɔ hwǐ ní wa nǔ yětɔn. Xó e Mawu Mavɔmavɔ ɖɔ ɔ́ nɛ́.’ ”

³² Xó e Mawu Mavɔmavɔ Nǔbǐwúkpétɔ́ ɖɔ ɔ́ ɖíe: “Awě xo akɔta ɖě ɔ́, é ná nɔ́ xo ɖě, jɔhɔn nyanya ɖé wɛ sí te sín fí e ayǐkúngban ɔ́ kponu ɖó é wá xweyǐgbe.”

³³ Mɛ e Mawu Mavɔmavɔ ná hu gbe nɛ́ gbe sín fí e ayǐkúngban ɔ́ bɛ́ sín e káká yi fí e é kponu ɖó é lɛ́ɛ ɔ́, mɛɖé ná ɖe, bó ví yě ǎ, mɛɖé ná sɔ́ yě ǎ, mɛɖé ká ná sá xwé gǔdo gúdo tɔn nú yě ǎ. Zunkɔ́ kpowun wɛ yě ná nyí ɖo ayǐkúngban ɔ́ jí.

³⁴ Gbɔ̌nyitɔ́ lɛ́ɛ mi, mi dó gbɛvíhan, mi ya avǐ. Mi mɛ e cí gbɔ̌nyitɔ́ ɖɔhun nú togun lɛ́ɛ e mi, mi blí gbo gbɔn kɔ́ mɛ, ɖó gbe e gbe è nǎ gbo ta mi ɔ́ ja; mi ná j'ayǐ bó gba hánnyá lě e è nɔ gba zɛ̌n xɔ akwɛ́ ɖé é ɖɔhun.

³⁵ Lɛ̌ngbɔ́nyitɔ́ lɛ́ɛ sɔ́ ná mɔ fí ɖé nɔ ǎ. Hwlɛngán ɖě sɔ́ ɖe nú kanlinnyitɔ́ lɛ́ɛ ǎ.

³⁶ È se lɛ̌ngbɔ́nyitɔ́ lɛ́ɛ ɖo xó sú wɛ. Kanlinkplátɔ́ lɛ́ɛ ɖo gbɛvíhan dó wɛ, ɖó Mawu Mavɔmavɔ vívá fí e kanlin yětɔn lɛ́ɛ nɔ yi ɖu ama ɖe é.

³⁷ È gba ayǐkúngban e jí ayi j'ayǐ ɖe lɛ́ɛ bǐ. Xomɛsin Mawu Mavɔmavɔ tɔn wɛ wa mɔ̌ xá yě.

³⁸ É jó xwé tɔn dó, lě e kinnikínní ví nɔ́ jó nɔtɛn tɔn dó é ɖɔhun. Nǔ baɖabaɖa e ahwan dó sin ɔ́ zɔ́n bɔ to yětɔn húzú gbětótló, mɛɖé sɔ́ nɔ gbɔn fínɛ́ ǎ. Xomɛsin Mawu Mavɔmavɔ tɔn wɛ wa mɔ̌ xá yě.