Jelemíi 24 - MAWUXÓWÉMA

¹ Mawu Mavɔmavɔ xlɛ́ mì fígi xasun we, bɔ è fɔ ɖó xwé tɔn sín alihɛ́nnu. Nabukodonɔzɔ́ɔ Babilɔ́nu xɔ́sú ɔ́ kó wlí Jeluzalɛ́munu lɛ́ɛ kpó Yoyakini Yoyakímu ví Judáa xɔ́sú ɔ́ kpó, gǎn hɔn-yitɔ́ tɔn lɛ́ɛ kpó alɔnuzɔ́watɔ́ lɛ́ɛ kpó fletuntɔ́ lɛ́ɛ kpó yi Babilɔ́nu nɛ́.

² Xasun we lɛ́ɛ ɔ́, ɖokpó tíin, bɔ fígi ɖagbe ɖ'é mɛ, bó nyɔ́ káká bó cí fígi nukɔn nukɔntɔn e è nɔ gbɛ ɔ́ ɖɔhun; xasun ɖě ɔ́, fígi e ɖ'é mɛ ɔ́ gblé, bó gblé káká bɔ è sixú ɖu ǎ.

³ Mawu Mavɔmavɔ kanbyɔ́ mì ɖɔ: “Jelemíi, étɛ́ mɔ wɛ a ka ɖe nɛ́?” Bɔ un yí gbe n'i ɖɔ: “Un mɔ fígi do we: do ɖokpó nyí ɖagbe bó nyɔ́ káká. Do wegɔ́ ɔ́ gblé, bó gblé káká bɔ è sixú ɖu ǎ, ɖó é gblé dín.”

⁴ Énɛ́ ɔ́ gúdo ɔ́, Mawu Mavɔmavɔ ɖɔ nú mì ɖɔ:

⁵ “Xó e nyɛ Mawu Mavɔmavɔ, Mawu Izlayɛ́li tɔn ɖɔ ɔ́ ɖíe: lě e fígi ɖagbe lɛ́ɛ nyɔ́ kpɔ́n gbɔn ɔ́, mɔ̌ wɛ nyi lɔ ná sɔ́ nukún ɖagbe dó kpɔ́n mɛ e ahwan wlí sín Judáa lɛ́ɛ, yě mɛ e un nya sín fí káká yi ɖó Babilɔ́nu lɛ́ɛ gbɔn.

⁶ Un ná sɔ́ nukún ɖagbe dó kpɔ́n yě, bó ná kplá yě wá to élɔ́ mɛ fí; un sɔ́ ná gba yě hánnyá xɔ ɖɔhun ǎ; lo ɔ́, un na gbá yě xɔ ɖɔhun; un sɔ́ ná hɔn yě atín ɖɔhun ǎ; lo ɔ́, un na tun yě atín ɖɔhun.

⁷ Un na ná ayixa yě, bɔ yě ná tunwun ɖɔ nyi wɛ nyí Mawu Mavɔmavɔ; yě ná lɛ́ kɔ wá gɔ̌n ce kpó ayi yětɔn bǐ kpó; énɛ́ ɔ́, yě ná nyí togun ce bɔ un ná nyí Mawu yětɔn.

⁸ “Lě e fígi gblé ɔ́, è ma nɔ sixú ɖu ǎ, ɖó é gblé wú ɔ́, mɔ̌ wɛ un ná wa nǔ gbɔn xá Sedesíyasi Judáa xɔ́sú ɔ́ kpó gǎn hɔn-yitɔ́ tɔn lɛ́ɛ kpó, kpó mɛ e cí Jeluzalɛ́mu lɛ́ɛ kpó, kpódó mɛ e yi cí Ejípu lɛ́ɛ kpó.

⁹ Énɛ́ ɔ́, axɔ́súɖuto e ɖo gbɛ ɔ́ mɛ lɛ́ɛ ɖěbǔ mɔ yě ɔ́, xɛsi ɖaxó ɖé ná nɔ́ jɛ yě jí. Fí e un ná gba yě dó gbɔn lɛ́ɛ bǐ ɔ́, è ja mɛ zun gbé oo, è ja mɛ cá ko gbé oo, è ja han kpa dó mɛ gbé oo, è ja nu dó mɛ gbé oo ɔ́, yě wú wɛ è nǎ nɔ́ jlɛ́ dó.

¹⁰ Un ná sɛ́ ahwan dó yě, un ná sɛ́ adɔ dó yě, bó ná sɛ́ jɛmɛjí dó yě, un ná wa nǔ xá yě káká, bɔ yě bǐ nǎ vɔ ɖo to e un ná tɔ́gbó yětɔn lɛ́ɛ kpó yě kpó ɔ́ mɛ!”