Jelemíi 21 - MAWUXÓWÉMA

¹ Mawu Mavɔmavɔ dó wɛn Jelemíi ɖɔ é ní dó axɔ́sú Sedesíyasi. Sedesíyasi ko sɛ́ Pacehúu Malukíya ví ɔ́ kpó vɔ̌sánú-xwlémawutɔ́ Sefaníyahu Maaseya ví ɔ́ kpó dó Jelemíi ɖ'ayǐ; é sɛ́ yě dó ɖɔ yě ní yi ɖɔ n'i ɖɔ:

² “Kan nǔ byɔ́ Mawu Mavɔmavɔ nú mǐ, ɖó Nabukodonɔzɔ́ɔ Babilɔ́nu xɔ́sú ɔ́ ɖo ahwan fun xá mǐ wɛ. Afɔ nyɔ́ ɔ́, Mawu Mavɔmavɔ sixú bló nǔjíwǔ tɔn ɖokpó nú mǐ, bó nya dǎwe énɛ́ dó zɔ nú mǐ.”

³ Jelemíi ka ɖɔ sɛ́ dó e ɖɔ

⁴ Mawu Mavɔmavɔ, Mawu Izlayɛ́li tɔn ɖɔ: “Babilɔ́nu xɔ́sú ɔ́ kpó ahwanfuntɔ́ tɔn lɛ́ɛ kpó xá mi, bɔ mi ɖo ahwan fun xá yě wɛ. Amɔ̌, un na zín mɛ mitɔn e ɖo ahwan fun wɛ ɖo ahohó lɛ́ɛ nukɔn lɛ́ɛ jí, bɔ yě ná hɔn byɔ́ toxo ɔ́ mɛ.

⁵ Énɛ́ ɔ́, nyɛ ɖésúnɔ ná zé hlɔ̌nhlɔ́n ce e nukɔn nǔɖé má nɔ́ nɔ te ɖe ǎ ɔ́ dó fun ahwan xá mi, kpó adǎn kpó, kpó xomɛsin ɖaxó kpó.

⁶ Alɔ ce ná jɛ nǔ e ɖo toxo élɔ́ mɛ lɛ́ɛ bǐ wǔ, gbɛtɔ́ kpó kanlin kpó bǐ ná bɛ́ jɛmɛjí baɖabaɖa ɖé, bó kú.

⁷ Énɛ́ ɔ́ gúdo ɔ́, un ná jó Sedesíyasi Judáa xɔ́sú ɔ́, un ná jó gǎn hɔn-yitɔ́ tɔn lɛ́ɛ, un ná jó togun tɔn bǐ, mɛ e ná gán ɖo jɛmɛjí sí lɛ́ɛ, mɛ e ná gán ɖo ahwan sí lɛ́ɛ kpó mɛ e ná gán ɖo adɔ sí lɛ́ɛ kpó ɔ́, un ná jó yě bǐ nú Nabukodonɔzɔ́ɔ Babilɔ́nu xɔ́sú ɔ́; un ná jó yě nú kɛntɔ́ yětɔn, mɛ e jló ná hu yě lɛ́ɛ. Un ná jó yě, bɔ Nabukodonɔzɔ́ɔ ná hu yě bǐ tɛ́; é ná jó mɛ ɖokpó dó ǎ. É ká ná lɛ́n nǔɖé kpɔ́n ǎ, mɛɖé nǔ ná blá wǔ n'i ǎ. Xó e nyɛ Mawu Mavɔmavɔ ɖɔ ɔ́ nɛ́.”

⁸ Mawu Mavɔmavɔ lɛ́ ɖɔ nú mì ɖɔ, Jelemíi, a nǎ ɖɔ nú togun ɔ́ ɖɔ: “Nyɛ Mawu Mavɔmavɔ sɔ́ gbɛli kpó kúli kpó ɖó nukɔn nú mi. Mi sɔ́ ɖokpó.

⁹ Nú mɛ ɖé nɔ toxo élɔ́ mɛ ɔ́, ahwan ma hu mɛ ɔ́ ǎ ɔ́, adɔ ka ná hu i; é má ka nyí mɔ̌ ǎ ɔ́, é ná bɛ́ jɛmɛjí ɖaxó ɖé, bó kú. Mɛ e ka ná sɔ́ éɖée yi jó nú Babilɔ́nunu e xá toxo ɔ́ lɛ́ɛ ɔ́, mɛ ɔ́ ná gán, bɔ gǎn e é gán ɔ́ wɛ ná nyí le ɖokpó e é ɖu é.

¹⁰ Đó nyɛ Mawu Mavɔmavɔ ɖɔ, un ná húzú kpan nukɔn toxo élɔ́, un ka ɖo nǔ ɖagbe ná wa n'i wɛ ǎ, nǔ ná dó sin xá ɛ wɛ un ɖe, bɔ é ná vɛ́ jlɛ́ ɖésú. Toxo ɔ́ ná jɛ Babilɔ́nu xɔ́sú ɔ́ lɔ mɛ, bɔ é ná dó zo. Xó e nyɛ Mawu Mavɔmavɔ ɖɔ ɔ́ nɛ́.”

Mawu ɖɔ xó dó Judáa xɔ́sú ɔ́ kpó mɛ tɔn lɛ́ɛ kpó wú

¹¹ Mawu Mavɔmavɔ ɖɔ xó dó Judáa xɔ́sú ɔ́ kpó mɛ tɔn lɛ́ɛ kpó wú; é ɖɔ: “Mi ɖótó nyɛ Mawu Mavɔmavɔ sín xó!

¹² Axɔ́sú Davídi ví e mi! Ayǐ hɔ́n lě tlóló hǔn, mi nɔ jɛ hwɛjijɔ dó jí. Mi hwlɛ́n mɛ e dó ya ná wɛ è ɖe é gán ɖo mɛ e ɖo ya dó n'i wɛ é lɔ mɛ. É má nyí mɔ̌ ǎ ɔ́, xomɛsin ce ná xɔ myɔ ɖɔhun, bɔ cící tɔn ná gló, ɖó nǔ e dó sin wɛ mi ɖe lɛ́ɛ wútu.

¹³ Nǔ mitɔn vɛ́ wǔ ce. Mi mɛ e nɔ́ nɔ tɔdo mɛ, ɖo fí wɛnjɛ e ɖo só jí lɛ́ɛ ɔ́, un ɖo mi ba wɛ vɛvɛ. Mi mɛ e nɔ ɖɔ mɛɖé kún sixú wa nǔɖé nú émí ó, mɛɖé kún sixú byɔ́ nɔtɛn émítɔn mɛ ó lɛ́ɛ ɔ́, un ɖo mi ba wɛ vɛvɛ. Xó e nyɛ Mawu Mavɔmavɔ ɖɔ ɔ́ nɛ́.

¹⁴ Nyɛ Mawu Mavɔmavɔ ɔ́, un ná dɔn tó nú mi bɔ é ná sɔgbe xá nǔ e mi dó sin é. Un ná dó zungbó mitɔn zo, bɔ nǔ e lɛ́ lɛ̌ dó mi ɔ́ bǐ ná ji. Xó e nyɛ Mawu Mavɔmavɔ ɖɔ ɔ́ nɛ́.”