Jelemíi 2 - MAWUXÓWÉMA

Izlayɛ́li ví lɛ́ɛ jó Mawu yětɔn dó, bó jɛ vodún sɛn jí

¹ Xó e Mawu Mavɔmavɔ ɖɔ nú mì é ɖíe:

² “Yi, bó ɖɔ dó Jeluzalɛ́munu lɛ́ɛ tó mɛ ɖɔ nyɛ Mawu Mavɔmavɔ ɖɔ: Jeluzalɛ́mu, un nɔ flín wǎn yíyí e a ɖó nú mì hwenu e a ɖo ɖyɔ̌vǐ mɛ é. Un nɔ flín lě e wǎn ce yí we gbɔn hwenu e a nyí yawó é. Hwenɛ́nu ɔ́, a ɖo xwixwedó mì wɛ ɖo gbětótló mɛ, fí e jinukún ɖě má nɔ nyɔ́ ɖe ǎ é.

³ Izlayɛ́li, nyɛ Mawu Mavɔmavɔ ɖokpónɔ tɔn wɛ a nyǐ; jinukún nukɔntɔn e nɔ nyɔ́ ɖo gle mɛ é ɖɔhun wɛ a cí nú mì. Mɛ e wa nǔ xá we lɛ́ɛ bǐ wɛ un dɔn tó ná: Awě xo yě. Xó e nyɛ Mawu Mavɔmavɔ ɖɔ ɔ́ nɛ́.

⁴ Jakɔ́bu ví e mi! Mi ɖótó nyɛ Mawu Mavɔmavɔ! Hɛ̌nnu e ɖo Izlayɛ́li tomɛ lɛ́ɛ mi, mi bǐ ɖótó mì.

⁵ Mi ɖótó xó e ɖɔ wɛ nyɛ Mawu Mavɔmavɔ ɖe ɔ́: Hɛ̌n tɛ́ tɔ́gbó mitɔn lɛ́ɛ ka mɔ ɖo wǔ ce bó hɔn nú mì? Étɛ́wú yě jɛ vodún nǔ ma ɖó ta ɖé lɛ́ɛ xwe dó jí, bɔ yě ɖésúnɔ wá húzú nǔ ma ɖó ta ɖé?

⁶ Yě kanbyɔ́ yěɖée vɔ́vɔ́ ɖɔ fítɛ́ Mawu Mavɔmavɔ e kplá émí sín Ejípu tomɛ ɔ́ ka ɖe é jí ǎ; yě kanbyɔ́ yěɖée ɖɔ Mawu Mavɔmavɔ e kplá émí gbɔn gbětótló mɛ, axéko jí fí e do gbɔn fí bǐ ɖe ɔ́, fí e jǐ ma nɔ ja ɖe gbeɖé ǎ ɔ́, fí e ablu ɖu axɔ́sú ɖe ɔ́, fí e mɛɖé má nɔ gbɔn gbeɖé ǎ ɔ́, fí e mɛɖé ma nɔ nɔ gbeɖé ǎ é ɔ́, yě kanbyɔ́ yěɖée ɖɔ fí e Mawu énɛ́ ɔ́ ka ɖe a jí ǎ.

⁷ To e mɛ un ka kplá mi wá ɔ́, to ɖé wɛ ayǐkúngban tɔn nɔ nyɔ́ jinukún, bónú mi ná nɔ́ ɖu jinukún ɖagbe ɖagbe e ná nɔ nyɔ́ ɖo to ɔ́ mɛ lɛ́ɛ. Lo ɔ́, ée mi wá to ɔ́ mɛ é ɔ́, mi wá hɛn to ɔ́ blí, bɔ to e nyí ce bɔ un sɔ́ ɖó ayǐ nú mi ɔ́, mi wá zé dó húzú suɖunú.

⁸ Vɔ̌sánú-xwlémawutɔ́ lɛ́ɛ kan fí e nyɛ Mawu Mavɔmavɔ ɖe ɔ́ byɔ́ ǎ; sɛ́ngán lɛ́ɛ lɔ ka tunwun mì ǎ; agunnukɔntɔ́ lɛ́ɛ fɔ́n gǔ dó jǐ ce; gbeyíɖɔ lɛ́ɛ nɔ ɖɔ xó dó Baalu nyíkɔ mɛ; yě bǐ nɔ xwedó vodún, vodún ka nɔ kpé nǔ ɖěbǔ wú ǎ.

⁹ Énɛ́ ɔ́ wú wɛ un ɖo hwɛ dó mi wɛ, bó ná lɛ́ dó hwɛ vǐ mitɔn lɛ́ɛ. Xó e nyɛ Mawu Mavɔmavɔ ɖɔ ɔ́ nɛ́.

¹⁰ Mi yi tɔtɛ́ntinto Cíplu tɔn lɛ́ɛ mɛ ɖo gbadahwe jí, bó kpɔ́n nǔ ganjí; mi sɛ́ mɛ dó Kedáa gbé jí, ɖo zǎnzǎnhwe jí, bó kpɔ́n ɖɔ nǔ mɔ̌hunkɔtɔn ɖě jɛ ɖo dɔ̌n kpɔ́n a jí?

¹¹ Akɔta ɖě tíin bó gbɛ́ nǔmɛsɛn tɔn lɛ́ɛ, bó jɛ ɖěvo sɛn jí kpɔ́n a? Có nǔmɛsɛn énɛ́ lɛ́ɛ ká nyí Mawu ǎ. Lo ɔ́, togun ce sɔ́ vodún dó ɖyɔ́ nyɛ mɛ e nyí susu tɔn é ná; vodún ka nɔ kpé nǔ ɖěbǔ wú ǎ.

¹² Nǔ énɛ́ ɔ́ ní hu ado nú jǐxwé, é ní dó xɛsi n'i, é ní kú wǔ n'i. Xó e nyɛ Mawu Mavɔmavɔ ɖɔ ɔ́ nɛ́.

¹³ Hwɛ hǒxo wɛ togun ce hu: yě jǒ nyɛ mɛ e nyí tɔjɔtɛn e mɛ sin e nɔ ná gbɛ mɛ ɔ́ nɔ sa sín ɔ́ dó, bó yi kun sitɛ́nu; sitɛ́nu lɛ́ɛ bǐ ká gba, ɖě nɔ́ hɛn sin ǎ.”

È jǒ Mawu dó ɔ́, gbɛ nɔ vlɛ́ mɛ nu

¹⁴ Mawu ɖɔ: “Izlayɛ́li ɔ́, kannumɔ wɛ é nyí a? Vǐ ɖo mɛ gɔ́n wɛ é nyí a? Étɛ́wú é ká ná húzú alɔnugbɔ́ví nú akɔta ɖě lɛ́ɛ lo?

¹⁵ Akɔta lɛ́ɛ kplɔ́ dó e kinnikínní ví ɖɔhun; yě nɔ́ dó gbe dó jǐ tɔn. Yě vívá to tɔn bɔ é dó xɛsi. Yě dǒ toxo tɔn lɛ́ɛ bǐ zo, mɛ ɖěbǔ sɔ́ nɔ́ nɔ toxo lɛ́ɛ mɛ ǎ.

¹⁶ Mɛfísinu lɛ́ɛ kpó Tapanɛ́sinu lɛ́ɛ kpó ɔ́, yě lɔ wá zɔn Izlayɛ́li jí bó xwlɛ́ ta n'i.

¹⁷ Hwɛ Izlayɛ́li, ée nyɛ Mawu Mavɔmavɔ, Mawu towe ɖo ali ɖagbe jí kplá we gbɔn wɛ, bɔ hwɛ ka jó mì dó ɔ́, nǔ mɔ̌hun ná gɔn gbigbo we wɛ a?

¹⁸ Din ɔ́, nú a yi Ejípu tomɛ, bó ná yi nu Nilu tɔ ɔ́ sín sin ɔ́, ɖagbe tɛ́ wɛ sin ɔ́ ná wa nú we? Nú a yi Asilíi tomɛ, bó ná yi nu Efláti tɔ ɔ́ sín sin ɔ́, ɖagbe tɛ́ wɛ sin ɔ́ ná wa nú we?

¹⁹ Nǔ nyanya wiwa towe ná wa nǔ xá we; gbejí ma nɔ towe ná dɔn tó nú we, bɔ a nǎ mɔ ɖɔ nyɛ Mawu Mavɔmavɔ, Mawu towe e a jǒ dó ɔ́, tɛn ce mɛ e a ma tunwun nú mì ǎ ɔ́ ná vlɛ́ nu nú we; é ná nylá nú we ɖésú. Xó e nyɛ Aklúnɔ Mavɔmavɔ Nǔbǐwúkpétɔ́ ɔ́ ɖɔ ɔ́ nɛ́.”

Jeluzalɛ́mu, nyɔ̌nu nuwenɔ, nyɔ̌nu afɔdógbětɔ́

²⁰ Mawu ɖɔ: “Izlayɛ́li, a ɖo gǔ fɔ́n dó jǐ ce wɛ din ɔ́, é kó lín. A dǒ gúdo mì bǐ, lobo nɔ ɖɔ fí e émí nɔ mɛ kannu jɛ ɔ́ kpé, bó ka nɔ jɛ wɛn gbɔn só bǐ jí; a nɔ ɖo wɛn gbɔn atínmú bǐ sá agalɛtɔ́ ɖɔhun.

²¹ Vǐwuntín ɖagbe ɖagbe ɖé ɖɔhun wɛ a cí, bɔ un tun. Atín ɖagbe ɖé wɛ a nyǐ bɔ un tunwun ɖɔ a na sɛ́n ganjí; nɛ̌ ká gbɔn bɔ a húzú mɔ̌? Nɛ̌ ká gbɔn bɔ a cí vǐwuntín gbě tɔn ɖɔhun mɔ̌?

²² A na bo sɔ́ klé dó lɛ wǔ ná ɔ́, a na bó sɔ́ aɖǐ dó lɛ wǔ ɔ́, hwɛ towe lɛ́ɛ ná súnsún sín nukɔn ce gbeɖé ǎ. Xó e nyɛ Aklúnɔ Mavɔmavɔ ɖɔ ɔ́ nɛ́.

²³ Nɛ̌ a ka na ɖɔ émí kún hɛn émíɖée blí ó gbɔn? Nɛ̌ a ka na ɖɔ émí kún sɛn Baalu lɛ́ɛ ɖě ó gbɔn? Kpɔ́n afɔ e a ɖe ɖo tɔdo mɛ e! Yǐ gbe ɖɔ émí wa nǔ nyi do. A cí lǎkúnmísixwɛ e asú jló bɔ é ɖo biba kpé gbɔn fí bǐ wɛ ɔ́ ɖɔhun.

²⁴ A cí tócí asi gbě tɔn ɖɔhun, axéko jí gbíngbɔ́n kó má hwi lɔ; asú yíyí byɔ́ ta mɛ nú tócí asi gbě tɔn bɔ é má ko mɔ ǎ ɔ́, é nɔ́ ɖo tócí asú sín wǎn dó wɛ. Mɛ̌ ka sixú gbɛ́ n'i ɖɔ é má gbɔ jlǒ tɔn ó? Tócí asú ɖé ɖo biba ɛ wɛ ɔ́, é ɖó tagba ǎ. Asú yíyí byɔ́ ta mɛ n'i ɔ́, asú lɛ́ɛ nɔ mɔ ɛ.

²⁵ Nyɛ ɔ́, un ɖɔ nú we ɖɔ hwi ní bló dɛ̌dɛ̌; un ɖɔ nú we ɖɔ hwi ɖo gblagbla dán wɛ mɔ̌ ɔ́, hwi ná gblé wǔ dó afɔ. A ka ɖɔ: ‘Ma jɛ tagba dó ta ce mɛ ó; un yí wǎn nú vodún bó ná xwedó yě.’

²⁶ È yi gbo ajotɔ́ dó ɔ́, lě e é nɔ́ ɖu winnyá gbɔn ɔ́, mɔ̌ wɛ Izlayɛ́li to ɔ́ ná ɖu winnyá gbɔn: Izlayɛ́li ví lɛ́ɛ, axɔ́sú yětɔn lɛ́ɛ, gǎn hɔn-yitɔ́ yětɔn lɛ́ɛ, vɔ̌sánú-xwlémawutɔ́ yětɔn lɛ́ɛ kpó gbeyíɖɔ yětɔn lɛ́ɛ kpó bǐ na ɖu winnyá.

²⁷ Izlayɛ́li, a nɔ ɖɔ nú bǒcyɔ ɖɔ: ‘Hwi wɛ nyí tɔ́ ce’, bó nɔ́ ɖɔ nú awǐnnya ɖɔ: ‘Hwi wɛ ná gbɛ mì!’ A nɔ jló ná kpɔ́n gɔ̌n ce ǎ; a nɔ dó gǔdo mì. Adǎn ká wá gbo we ɔ́, a nǎ sú xó ylɔ́ mì, bó ná ɖɔ: ‘Sí te, bó hwlɛ́n mì gán.’

²⁸ Lo ɔ́, un ka na kán byɔ́ we ɖɔ: ‘Fítɛ́ vodún e a bló lɛ́ɛ ká yi? Nú yě sixú hwlɛ́n we gán ɖo adǎngbomɛ hwenu hǔn, yě ní wa bló bó! Judáa, vodún nabí e a ɖǒ ɔ́ sɔ toxo nabí e a ɖǒ é.’ ”

²⁹ Mawu Mavɔmavɔ ɖɔ: “Judáa ví e mi, étɛ́wú mi ka ɖo hwɛ dó mì wɛ? Mi bǐ wɛ fɔ́n gǔ dó jǐ ce.

³⁰ Un dɔn tó nú mi, é ká nyí nǔɖé nú mi ǎ. Nǔ e gbɛ́ nú mi wɛ un ɖe ɔ́, mi se ǎ. Mi wa nǔ kinnikínní ɖɔhun; mi sɔ́ hwǐ dó vúnvún gbeyíɖɔ e ɖo mi mɛ lɛ́ɛ.

³¹ Dinví e mi, mi ɖótó xó e ɖɔ wɛ Mawu Mavɔmavɔ ɖe ɔ́ ganjí. Gbětótló wɛ un nyí nú Izlayɛ́li to ɔ́ a? To e dó ablu ɔ́ wɛ un nyí n'i a? Étɛ́wú togun ce ka nɔ ɖɔ: ‘Mǐ ɖo jlokoko, mǐ jló ná lɛ́ kɔ wá gɔ̌n towe ǎ?’

³² Đyɔ̌vǐ nɔ wɔn acɔ́ɖónú tɔn lɛ́ɛ wɛ a? Nyɔ̌nu xwési nɔ́ wɔn aɖɔkɛn tɔn wɛ a? É jɔ kpɔ́n ǎ, amɔ̌ midɛɛ lɛ́ɛ e nyí togun ce ɔ́, mi wɔn mì; mi wɔn mì bɔ azǎn tɔn sɔ́ nyí xixa ǎ.”

³³ “Súnnu jló mi lě ɔ́, ayi wínníwínní ɖo mi sí bɔ mi nɔ dó ba. Nǔ énɛ́ ná wa dandan zɔ́n bɔ mɛhuhu tlɛ má mi.

³⁴ Mi hu mɛ káká bɔ xomɛvɔ́nɔ sín kanjɔ kɔn nyi awu mitɔn sín kɛyɛ lɛ́ɛ mɛ. Yě ká ɖo hɔn mitɔn gba wɛ bɔ mi wá gbo yě dó ǎ. Mi ɖo nǔ wa gbɔn mɔ̌ wɛ,

³⁵ bó nɔ́ ɖɔ xomɛvɔ́nɔ wɛ émí nyí, Mawu kún ɖo xomɛ ɖě ná sin dó émí wɛ ó. Xomɛvɔ́nɔ e mi nɔ ɖɔ émí nyí ɔ́ wú wɛ un ná dɔn mi yi hwɛgun.”

³⁶ “Mi ka nɔ yá wǔ húzú gbe mɛ nya! Lě e mi ɖu winnyá ɖo Asilíi nukɔn gbɔn ɔ́, mɔ̌ wɛ mi ná ɖu gbɔn ɖo Ejípu nukɔn.

³⁷ Mi ná ɖu winnyá, mi ná cyɔ́n alɔ nukún mɛ bó ná lɛ́ kɔ wá xwé. Nǔgbó ɔ́, nyɛ Mawu Mavɔmavɔ ɔ́, un gbɛ́ wǎn nú mɛ e wú mi ɖeji dó lɛ́ɛ. Mi ná mɔ nǔɖé nu ɖo yě gɔ́n ǎ.”