Jelemíi 18 - MAWUXÓWÉMA

¹ Xó e Mawu Mavɔmavɔ ɖɔ nú mì ɔ́ ɖíe:

² “Jelemíi, sɔ́ nǔ bó yi zɛ̌nmɛtɔ́ xwé, nú má ɖɔ xó nú we ɖo fínɛ́.”

³ Ée Mawu ɖɔ mɔ̌ ɔ́, un yi zɛ̌nmɛtɔ́ xwé, bɔ alɔ tɔn ɖo ko mɛ, ɖo zɛ̌nto mɛ.

⁴ Ényí zɛ̌n e mɛ wɛ é ɖe ɔ́ má nyɔ́ ǎ ɔ́, é nɔ́ vɔ́ ko e é dó mɛ zɛ̌n ɔ́ ná ɔ́ nya d'é wú, bó nɔ́ dó bló ɖěvo, bɔ é nɔ́ cí lě e é ba gbɔn é. É nɔ jɛ mɔ̌ tɛgbɛ.

⁵ Énɛ́ ɔ́, Mawu Mavɔmavɔ ɖɔ nú mì ɖɔ:

⁶ “Mi Izlayɛ́li ví lɛ́ɛ ɔ́, lě e zɛ̌nmɛtɔ́ énɛ́ ɔ́ ɖo ko sín nǔ wa gbɔn wɛ ɔ́, nyɛ lɔ sixú wa nǔ mitɔn gbɔn mɔ̌ ǎ cé? Lě e ko nɔ cí gbɔn ɖo zɛ̌nmɛtɔ́ lɔ mɛ ɔ́, mɔ̌ wɛ mi ɖe ɖo alɔ ce mɛ. Xó e nyɛ Mawu Mavɔmavɔ ɖɔ ɔ́ nɛ́.

⁷ É nɔ́ wá su hwe ɖe nú, bɔ un nɔ ɖɔ xó dó akɔta ɖé abǐ axɔ́súɖuto ɖé wú ɖɔ: un ná hɔn ɛ atín ɖɔhun, un ná mu i zin dɛ́ atín ɖɔhun, un ná hɛn ɛ gblé.

⁸ Lo ɔ́, nú akɔta élɔ́ e xó ɖɔ wɛ un ɖe ɔ́ ká jó nyanya wiwa dó, bó lɛ́ kɔ sín hwɛ e hu wɛ é ɖe ɔ́ gúdo ɔ́, un nɔ jó nǔ e un ɖɔ un ná wa xá ɛ ɔ́ dó.

⁹ É ká nɔ́ wá su hwe ɖé nu, bɔ un nɔ ɖɔ xó dó akɔta ɖé abǐ axɔ́súɖuto ɖé wú ɖɔ: un ná gbá we xɔ ɖɔhun, un ná tun we atín ɖɔhun.

¹⁰ Lo ɔ́, nú akɔta énɛ́ bló nǔ e un gbɛ́ wǎn ná ɔ́, bó má ɖótó mì ǎ ɔ́, un ná jó nǔ ɖagbe e un ko ɖɔ un ná bló n'i ɔ́ dó.

¹¹ “Din ɔ́, Jelemíi, ɖɔ nú Judáanu lɛ́ɛ kpó Jeluzalɛ́munu lɛ́ɛ kpó ɖɔ: ‘Nyɛ Mawu Mavɔmavɔ ɖɔ: Un ɖo nǔ nyanya ɖé lin dó mi wú wɛ. Mɛ ɖokpó ɖokpó ní lɛ́ kɔ sín ali nyanya e jí é ɖe é jí, bó mlɛ́ ali ɖagbe, bó húzú walɔ.’ ”

¹² Lo ɔ́, yě ná ɖɔ: “Xó ɖé kpowun wɛ nyí xó énɛ́; nǔ e mǐ xwe ɔ́ wɛ mǐ na wa. Mɛ ɖokpó ɖokpó ná bló nǔ nyanya e ayi tɔn ɖɔ n'i é.”

Izlayɛ́li wɔn Mawu

¹³ Din ɔ́, mi bo ɖótó xó e Mawu Mavɔmavɔ ɖɔ ɔ́, é ɖɔ: “Izlayɛ́li ví e mi, mi kan nǔ byɔ́ gbɔn akɔta ɖě lɛ́ɛ mɛ, bó kpɔ́n ɖɔ mɛɖé se xó mɔ̌hunkɔ gbeɖé ɖo fí ɖé a jí! Nǔ e mi dó sin ɔ́ zɛ kpá.

¹⁴ Laglásilinfín nɔ́ hán ɖo Libáan só lɛ́ɛ jí gbeɖé a? Sin e nɔ sa sín Libáan dɔ̌n ɔ́, sin fífá énɛ́ ɔ́ gɔn sisa kpɔ́n a?

¹⁵ Mi mɛ e nyí togun ce ɔ́, mi ka wɔn mì. Mi wɔn mì, bó nɔ́ xwlé zǎlínkpɔ́n vodún lɛ́ɛ. Vodún énɛ́ lɛ́ɛ nyí afɔklɛ́nnú nú mi ɖo ali e mi mlɛ́ lɛ́ɛ jí. Yě ɖe mi sín ali mitɔn xóxó lɛ́ɛ jí, bɔ mi wlí ali e è ma ɖe ǎ lɛ́ɛ.

¹⁶ Mi sɔ́ to mitɔn dó húzú nǔ vɛ́ mɔ, to mitɔn húzú nǔkiko. Mɛ ɖěbǔ wá mɔ ɔ́, é nɔ́ kpácá mɛ ɔ́, bɔ é nɔ́ húnhún ta.

¹⁷ Lě e jɔhɔn zǎnzǎnhwe jí tɔn nɔ d'alɔ nǔywɛ́ mɛ, bó nɔ́ fúnfún gbɔn ɔ́, mɔ̌ wɛ un ná fúnfún mi gbɔn, ɖo kɛntɔ́ nukɔn. Adǎngbomɛ hwenu ɔ́, un ná dó gúdo mi, un ná kpɔ́n jɛ mitɔn jí ǎ.”

È blǎ Jelemíi gbé

¹⁸ Énɛ́ ɔ́ gúdo ɔ́, mɛ ɖé lɛ́ɛ nɔ ɖɔ ɖo yěɖée tɛ́ntin ɖɔ: “Mi wá mǐ blá Jelemíi gbé. Vɔ̌sánú-xwlémawutɔ́ e ná kplɔ́n sɛ́n ɔ́ mǐ ɔ́ hán ǎ. Nǔnywɛ́tɔ́ e ná kplɔ́n nǔ mǐ ɔ́ hán ǎ. Gbeyíɖɔ e ná ɖɔ Mawuxó nú mǐ ɔ́ hán ǎ. Mi wá mǐ ní kpa xó ɖɔ dó nu tɔn, dó ba xó e. Mǐ nǎ ké ya nú xó e wlí ɖɔ wɛ é nɔ́ ɖe lɛ́ɛ ǎ.”

¹⁹ Jelemíi ɖɔ: “Mawu Mavɔmavɔ, ɖǒtó mì! Se xó e ɖɔ wɛ kɛntɔ́ ce lɛ́ɛ ɖe é.

²⁰ Yě kun do gɔngɔn bɔ un ná jɛ mɛ. È nɔ wa ɖagbe bo nɔ yí alɔgúdokpɛ́ a? Mawu, flín ɖɔ nukɔn towe wɛ un nɔ, bó byɔ́ ɖɔ hwi ní jó xomɛ e a sin dó yě ɔ́ dó.

²¹ Énɛ́ wú ɔ́, jó vǐ yětɔn lɛ́ɛ dó nú adɔ ní hu yě; sɔ́ hwǐ dó hu yě tɛ́. Asi yětɔn lɛ́ɛ ní ba vǐ kpo; yě ní húzú asúkúsi; jɛmɛjí ní hu asú yětɔn lɛ́ɛ. Ahwan ní hu mɛ wínnyáwínnyá yětɔn lɛ́ɛ.

²² Hwenu e a na sɛ́ kɛntɔ́ dó yě ajijimɛ ɔ́, xósúsú ní mlí ɖo xwé yětɔn lɛ́ɛ gbe. Đó yě kun do gɔngɔn bó ná kpé wǔ ce. Yě ɖǒ mɔ nú mì.

²³ Mawu Mavɔmavɔ, hwɛ ka mɔ lě e yě blá gbě ce gbɔn, lobo ná gblé gbɛ dó nú mì é. Ma sɔ́ hwɛ yětɔn lɛ́ɛ kɛ yě ó. Ma wɔn nǔ e yě wa nyi do nú we lɛ́ɛ ɔ́ ó. Yě ní j'ayǐ ɖo nukɔn towe. Nɔ xomɛsin jí, bó wa nǔ xá yě.”