Jelemíi 17 - MAWUXÓWÉMA

Mawu ɖe hwɛ e Judáa togun ɔ́ hu ɔ́ gba

¹ Mawu ɖɔ: “Hwɛ e Judáa togun ɔ́ hu ɔ́ cí nǔwlánwlán e è zě ganswe abǐ diamáaswe dó kun dó nǔ mɛ ɔ́ ɖɔhun. È wlǎn dó ayi yětɔn mɛ; è wlán dó vɔ̌sákpe yětɔn lɛ́ɛ sín zwe lɛ́ɛ mɛ.

² Ayi yětɔn nɔ ɖo vɔ̌sákpe yětɔn lɛ́ɛ, vodún Acela yětɔn lɛ́ɛ, kpódó atínmú e gbɔn só jí só jí lɛ́ɛ kpó jí, lě e ayi yětɔn nɔ ɖo vǐ yětɔn lɛ́ɛ jí é.

³ Judáa togun e, hwi mɛ e nɔ sɛn vodún gbɔn só jí só jí, bó nɔ́ sɛn gbɔn nǔkan mɛ nǔkan mɛ ɔ́, nǔ e nyí towe lɛ́ɛ, dɔkun towe lɛ́ɛ kpó fí e a nɔ yi sɛn vodún gbɔn lɛ́ɛ kpó ɔ́, un jó bǐ nǔ kɛntɔ́, bɔ kɛntɔ́ ná vɔ bǐ, ɖó hwɛ e a hu gbɔn ayǐ towe lɛ́ɛ jí lɛ́ɛ wú.

⁴ To e un ná we, bɔ é nyí towe ɔ́, a nǎ jó. Un na jó we nú kɛntɔ́, bɔ a na yi nɔ kannumɔgbénu, ɖo to e a ma tunwun ǎ é mɛ. Xomɛsin e a dó nú mì ɔ́ cí myɔ ɖɔhun, nǔɖé sixú xo cí ǎ.”

Gǎnjɛwú tófwe kpó gǎnjɛwú titewungbe kpó

⁵ Xó e Mawu Mavɔmavɔ ɖɔ ɔ́ ɖíe: “Mɛ e nɔ ɖeji dó gbɛtɔ́ wú ɔ́, mɛ e nɔ sɔ́ gbɛtɔ́ dó ɖó gǎnjɛwú ɔ́, mɛ e nɔ lɛ́ kɔ sín nyɛ Mawu Mavɔmavɔ gúdo ɔ́, un ná dó nu i.

⁶ Mɛ énɛ́ ɔ́ cí zungodwe ɖo axéko jí ɖɔhun. Nyɔ̌ná já ɔ́, é nɔ tunwun lɔ ǎ. Fí e gběhan bǐ fyɔ́ ɖe ɖo axéko ɔ́ jí ɔ́ wɛ é ɖe. Jɛ wɛ ɖo ayǐkúngban énɛ́ ɔ́ sín lanmɛ, mɛɖé nɔ́ nɔ fínɛ́ ǎ.

⁷ Nǔ nyɔ́ nú mɛ e ɖeji dó nyɛ Mawu Mavɔmavɔ wú é, mɛ e gán jɛ nyɛ Mawu Mavɔmavɔ wú ɔ́, nǔ tɔn nyɔ́.

⁸ É cí atín e è tun ɖó tɔsisa tó, bɔ é nyi ɖɔ dó tɔ ɔ́ mɛ é ɖɔhun. Atín énɛ́ nɔ́ tunwun akú ǎ. Ama tɔn lɛ́ɛ nɔ́ ɖo mǔ tɛgbɛ. Xwe ɖé su bónú jǐ na bó má ja ǎ ɔ́, ado nɔ hu i ǎ. É nɔ gɔn sínsɛ́n gbeɖé ǎ.

⁹ Gbɛtɔ́ sín ayixa hízí; ayixa tɔn dá hú nǔ bǐ. È sixú gbɔ azɔn n'i ǎ; è sixú mɔ nǔ jɛ ayi tɔn mɛ ǎ.

¹⁰ Nyɛ Mawu Mavɔmavɔ ɔ́, un nɔ tunwun nǔ e lin wɛ gbɛtɔ́ ɖe ɖo ayi tɔn mɛ é. Nǔ e ɖo mɛ xomɛ ɔ́, un nɔ mɔ bó nɔ́ da kpɔ́n. Énɛ́ ɔ́, un nɔ wa nǔ nú mɛ lě e walɔ mɛ ɔ́ tɔn byɔ́ gbɔn é; nǔ e mɛɖé wa ɔ́ sín axɔ́ wɛ un nɔ sú mɛ ɔ́.

¹¹ Mɛ e nɔ jɛ dɔkun dó acɛ jí ɔ́ cí asɔklé e fɛ azin e é má ɖó ǎ é ɖɔhun. É ná kpo ɖo gbɛ céɖécéɖé lě bɔ dɔkun tɔn ná jó é dó, gbɛ tɔn sín vivɔnu ɔ́, é ná cí yɛyinɔ ɖé ɖɔhun ɖo gbɛ ɔ́ mɛ.”

Mawu ɖokpó géé wɛ nɔ ná gbɛ mɛ

¹² Axɔ́súzinkpo susunɔ ɖé tíin, sín do ɔ́, susu tɔn zɛ axɔ́súzinkpo e ɖo gbɛ ɔ́ mɛ lɛ́ɛ bǐ tɔn wú, fínɛ́ wɛ mǐ nɔ sɛn Mawu ɖe.

¹³ Mawu Mavɔmavɔ! Hwi wɛ nyí mɛ e Izlayɛ́li ɖo nukún ɖó wɛ é. Mɛ e jó hwɛ Mawu Mavɔmavɔ dó lɛ́ɛ bǐ wɛ ná ɖu winnyá. Mɛ e lɛ́ kɔ sín gúdo towe lɛ́ɛ bǐ ná cí nyǐkɔ e è wlǎn dó kɔ́gúdu mɛ ɔ́ ɖɔhun. Đó yě jó hwi Mawu Mavɔmavɔ e nyí tɔjɔtɛn e mɛ sin e nɔ ná gbɛ mɛ ɔ́ nɔ sa sin é dó.

Jelemíi xo ɖɛ

¹⁴ Mawu Mavɔmavɔ, a gbɔ azɔn nú mì ɔ́, azɔn ce ná gbɔ bǐ; a hwlɛ̌n mì ɔ́, un ná gán, ɖó hwi wɛ un nɔ ɖo mlǎmlá wɛ.

¹⁵ Xó e mɛ lɛ́ɛ nɔ ɖɔ nú mì ɔ́ ɖíe, yě nɔ́ ɖɔ: “Nǔ e a nɔ ɖɔ Mawu Mavɔmavɔ ɖɔ é na jɛ ɔ́, é jɛ din a? É ní jɛ nú mǐ ná kpɔ́n bó!”

¹⁶ Mawu Mavɔmavɔ, nyɛ ɔ́, un gbɛ́ ɖɔ un kún ná nyí lɛ̌ngbɔ́nyitɔ́ bó wa azɔ̌ nú we ó ǎ. A ka tunwun ɖɔ un kún ba nú awě ní xo mǐ ó. Xó e nɔ tɔ́n sín nu ce mɛ lɛ́ɛ ɔ́, nukɔn towe wɛ un ɖɔ bǐ ɖe.

¹⁷ Hwi mɛ e adǎn gbo mì ɔ́, un nɔ hɔn wá su ɔ́, ma wá fyán mì bónú un ɖi xɛsi ó.

¹⁸ Mɛ e ɖo ya dó nú mì wɛ lɛ́ɛ ní ɖu winnyá, nyɛ ní ma ka ɖu ɖě ó. Xɛsi ní jɛ yě jí, nyɛ ní ma ká ɖi xɛsi ɖě ó. Sɛ́ awěxomɛ zán ɔ́ dó yě, alɔ towe ní jɛ yě wǔ, bónú nǔ ní xá yě gbɔn zǔndohlando.

Mawu byɔ́ ɖɔ è nǐ nyi gbɔjɛzánsɛ́n ɔ́

¹⁹ Mawu Mavɔmavɔ ɖɔ nú mì ɖɔ: “Nǔ e a na bló lɛ́ɛ ɖíe: Yi, yi cí toxo ɔ́ sín hɔntogbó e è nɔ ylɔ́ ɖɔ Hɔntogbó toví lɛ́ɛ tɔn ɔ́ jí. Fínɛ́ wɛ Judáa xɔ́sú lɛ́ɛ nɔ gbɔn. A na lɛ́ yi cí hɔntogbó Jeluzalɛ́mu tɔn e kpo lɛ́ɛ ɖokpó ɖokpó jí.

²⁰ A nǎ ɖɔ nú yě ɖɔ: ‘Judáa xɔ́sú e mi! Judáanu e mi! Jeluzalɛ́munu e mi! Mɛ e nɔ gbɔn hɔntogbó élɔ́ lɛ́ɛ nu lɛ́ɛ bǐ ní ɖótó xó e Mawu Mavɔmavɔ ɖɔ é!

²¹ Mawu Mavɔmavɔ ɖɔ: Mi cɔ́ miɖée. Mi ma hɛn agban gbɔjɛzán gbe ó, mi má hɛn agban gbɔn hɔntogbó Jeluzalɛ́mu tɔn lɛ́ɛ ɖě nu gbɔjɛzán gbe ó.

²² Mi ma ka ɖe agban ɖé tɔ́n sín xwé mitɔn gbe gbɔjɛzán gbe ó. Mi ma ka wa azɔ̌ ɖěbǔ azǎn énɛ́ ɔ́ gbe ó. Lo ɔ́, mi sɔ́ gbɔjɛzán ɔ́ ɖó vo nú mì, lě e un ɖɔ gbɔn nú tɔ́gbó mitɔn lɛ́ɛ é.

²³ Un ɖɔ mɔ̌ nú yě, yě ká ɖótó mì ǎ, yě dǒ tókúse mɛ; yě ci tamɛ, ɖó yě jló ná se ǎ, yě jló ná yí kplɔ́n ǎ.’

²⁴ “Amɔ̌, midɛɛ lɛ́ɛ ɔ́, mi ɖótó mì, mi má hɛn agban gbɔn hɔntogbó Jeluzalɛ́mu tɔn lɛ́ɛ nu gbɔjɛzán gbe ó, mi sɔ́ gbɔjɛzán gbe ɔ́ ɖó vo nú mì, mi má nɔ́ wa azɔ̌ ɖěbǔ gbe énɛ́ gbe ó.

²⁵ Mi bló mɔ̌ ɔ́, axɔ́súzinkpo Davídi tɔn ná nɔ vɔ̌ gbeɖé ǎ, axɔ́sú e ɖo zinkpo ɔ́ jí ɔ́ na nɔ zɔn sɔ́ jí, abǐ kɛkɛ́ví mɛ, bó ná nɔ gbɔn hɔntogbó lɛ́ɛ nu. Gǎn Judáa tɔn lɛ́ɛ, Jeluzalɛ́mu tɔn lɛ́ɛ, Judáanu lɛ́ɛ, kpó Jeluzalɛ́munu lɛ́ɛ kpó bǐ na nɔ gbɔn hɔntogbó lɛ́ɛ nu. Gbɛtɔ́ ná hán ɖo toxo ɔ́ mɛ gbeɖé ǎ.

²⁶ Gbɛtɔ́ ná gosín Judáa toxo lɛ́ɛ mɛ, bó gosín fí e sɛkpɔ́ Jeluzalɛ́mu lɛ́ɛ, bó gosín Bɛnjamɛ́ɛ yíkúngban ɔ́ jí, bó gosín tɔdo lɛ́ɛ mɛ; gbɛtɔ́ ná gosín sókan lɛ́ɛ mɛ, yě ná gosín tofɔligbé, bó ná hɛn kanlin e è nɔ dó sá vɔ̌ e è nɔ́ dó zo lɛ́ɛ, vɔ̌ kpaa lɛ́ɛ, zǎlínkpɔ́n núníná lɛ́ɛ kpó kú dó nú mì sín vɔ̌ lɛ́ɛ kpó wá nyɛ Mawu Mavɔmavɔ xwé gbe.

²⁷ Amɔ̌, ényí mi ma se xó e un ɖɔ nú mi ɔ́ ǎ ɔ́, ényí mi ma zé gbɔjɛzán ɔ́ ɖó vo nú mì ǎ ɔ́, ényí mi hɛn agban gbɔn hɔntogbó Jeluzalɛ́mu tɔn lɛ́ɛ nu gbɔjɛzán gbe ɔ́, un ná flɔ́ myɔ ɖokpó ɖó toxo ɔ́ sín hɔntogbó lɛ́ɛ jí, bɔ Jeluzalɛ́mu sín hɔn lɛ́ɛ kpó xwé ɖagbe ɖagbe lɛ́ɛ kpó ná fyɔ́. Myɔ ɔ́ na cí gbeɖé ǎ.”