Jelemíi 16 - MAWUXÓWÉMA

Jelemíi ná nɔ é ɖokpónɔ

¹ Xó e Mawu Mavɔmavɔ ɖɔ nú mì é ɖíe:

² “Jelemíi, a nǎ da asi ǎ, a ka ná ɖó vǐ súnnu abǐ nyɔ̌nu ɖo to mɛ fí ǎ.

³ Xó e nyɛ Mawu Mavɔmavɔ ɖɔ dó vǐ súnnu kpó vǐ nyɔ̌nu kpó e è nǎ ji ɖo to mɛ fí lɛ́ɛ wú ɔ́ ɖíe; ée un ɖɔ dó nyɔ̌nu kpó súnnu kpó e ná ji yě lɛ́ɛ wú ɔ́ ɖíe:

⁴ yě ná jɛ azɔn bó ná kú; mɛɖé ná ví yě ǎ; mɛɖé ká ná ɖi yě ǎ. Zunkɔ́ kpowun wɛ yě ná nyí ɖo ayǐkúngban ɔ́ jí. Adɔ ná hu yě; ahwan ná hu yě. Cyɔ yětɔn lɛ́ɛ ná húzú nǔɖuɖu nú aklasú lɛ́ɛ kpó ayǐsájɛ lɛ́ɛ kpó.”

⁵ Mawu Mavɔmavɔ lɛ́ ɖɔ nú mì ɖɔ: “Jelemíi, ma yi xwé e gbe cyɔ kú ɖe ɔ́ ó. Ma yi cyɔnu ó, ma yi ya avǐ xá yě ó. Đó un ɖe fífá ce sín togun élɔ́ mɛ. Un ɖe xomɛnyínyɔ́ ce kpó nǔbláwǔ kú nú mɛ ce kpó sín to ɔ́ mɛ. Xó e nyɛ Mawu Mavɔmavɔ ɖɔ ɔ́ nɛ́.

⁶ Mɛ kpaa lɛ́ɛ kpó gbɛtɔ́ nukúnɖéjí lɛ́ɛ kpó bǐ ná kú ɖo to ɔ́ mɛ. Mɛ ɖé ná ɖe bó ná zé yě dó do ǎ. Mɛ ɖé ka ná ví yě ǎ. Mɛ ɖé ná já wǔtu dó yě ta mɛ ǎ. Mɛ ɖé ka ná xwlɛ́ ta ɖó yě wú ǎ.

⁷ Mɛ ɖé ná yi cyɔ yětɔn nu, bó ná yi ɖu nǔ, bó ná dó xo hwihwɛ́ mɛ e nǔ wa lɛ́ɛ e ǎ. Mɛ ɖé ka ná ba ahan nú mɛ e tɔ́ kú ná é, abǐ nɔ kú ná é dó dó gbɔ n'i ǎ.

⁸ “Ma ka yi xwé e gbe è ɖo agɔ̌ ɖu ɖe wɛ ɔ́ ó. Ma yi dɔ̌n bó yi jínjɔ́n ayǐ bó ɖu nǔ bó nu ahan xá yě ó.

⁹ Nyɛ Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɔ́, xó e un ɖɔ ɔ́ ɖíe: ‘Mɛ ɖé sɔ́ ná se xweɖuɖu, awǎjijɛ, alɔwlíhan ɖě ɖo fí ǎ. Un ná ɖó bǐ te ɖo hwe mitɔn nu, ɖo nukún mitɔn mɛ.’

¹⁰ “Hwenu e a nǎ ɖɔ xó énɛ́ lɛ́ɛ bǐ nú togun ɔ́ é ɔ́, yě ná kanbyɔ́ we ɖɔ: ‘Étɛ́wú Mawu Mavɔmavɔ ka ɖo adǎn tobutóbú énɛ́ lɛ́ɛ gblɔ́n nú mǐ wɛ? Hwɛ tɛ́ mǐ ka hu? Étɛ́ mǐ ká wa nyi do nú Mawu Mavɔmavɔ, Mawu mǐtɔn?’

¹¹ Yě kan mɔ̌ byɔ́ ɔ́, a nǎ yí gbe nú yě ɖɔ: ‘Mawu Mavɔmavɔ ɖɔ: Tɔ́gbó mitɔn lɛ́ɛ wɛ jó mì dó bó sɛn nǔmɛsɛn ɖěvo lɛ́ɛ. Yě nɔ́ sɛn yě, bó nɔ́ ɖe kɔ́ nú yě. Yě jǒ mì dó, yě xwe dó sɛ́n ce ǎ.

¹² Amɔ̌, midɛɛ lɛ́ɛ ɔ́, nǔ e mi dó sin lɛ́ɛ hú ée tɔ́gbó mitɔn lɛ́ɛ dó sin é. Nǔ e mi xwe ɔ́ wɛ mi nɔ wa, mi jló ná ɖótó mì ǎ.

¹³ Un ná nya mi sín to mɛ fí yi to e mi ma tunwun kpɔ́n gbeɖé ǎ é mɛ. To énɛ́ ɔ́, mi tunwun ǎ, tɔ́gbó mitɔn lɛ́ɛ lɔ ka tunwun ǎ; mi ná sɛn nǔmɛsɛn ɖěvo lɛ́ɛ ɖo fínɛ́ zǎn kéze. Đó nǔ mitɔn sɔ́ ná blá wǔ nú mi ǎ.’ ”

Izlayɛ́li ví lɛ́ɛ ná lɛ́ kɔ wá

¹⁴ Mawu Mavɔmavɔ ɖɔ: “Gbe ɖokpó ná wá su, bɔ mɛɖé sɔ́ ná xwlé nǔ dó nyǐkɔ ce mɛ ɖɔ: ‘Un xwlé Mawu Mavɔmavɔ nú we, é wɛ ɖe Izlayɛ́li ví lɛ́ɛ tɔ́n sín Ejípu’ ǎ.

¹⁵ Lo ɔ́, è nǎ ɖɔ: ‘Un xwlé Mawu Mavɔmavɔ nú we, é wɛ ɖe Izlayɛ́li ví lɛ́ɛ tɔ́n sín to e ɖo taligbé ɔ́ mɛ, bó ɖe yě tɔ́n sín to ɖěvo e mɛ é gba yě dó gbɔn lɛ́ɛ bǐ mɛ.’ Yě ná xwlé nǔ mɔ̌, ɖó un ná kplá yě wá to e un ko ná tɔ́gbó yětɔn lɛ́ɛ ɔ́ mɛ.”

Alɔ ná jɛ hwɛhutɔ́ lɛ́ɛ bǐ wú

¹⁶ Mawu Mavɔmavɔ ɖɔ: “Un ná sɛ́ ɖɔnyitɔ́ gěgé dó Izlayɛ́li ví lɛ́ɛ gbé mɛ, bɔ yě ná yi wlí yě wá hweví ɖɔhun. Énɛ́ ɔ́ gúdo ɔ́, un ná sɛ́ gbětɔ́ gěgé dó gbě yětɔn mɛ, bɔ yě ná yi nya gbě yětɔn gbɔn só ta só ta, sókan mɛ sókan mɛ, sónu mɛ sónu mɛ, bó ná wlí yě.

¹⁷ Đó nǔ e wa wɛ yě ɖe lɛ́ɛ bǐ mɔ wɛ un ɖe, ɖě ɖo nǔglɔ́ nú mì ǎ; hwɛ e hu wɛ yě ɖe lɛ́ɛ bǐ mɔ wɛ un ɖe.

¹⁸ Hwɛ e hu wɛ yě ɖe lɛ́ɛ kpó nǔ e wa nyi do wɛ yě ɖe lɛ́ɛ kpó ɔ́, un ná dɔn bǐ sín tó nú yě hwɛ̌ ɖó azɔn we jí. Đó yě ɖu su nú to ce; to e nyí ce ɔ́, nǔmɛsɛn yětɔn lɛ́ɛ wɛ yě bɛ̌ d'é mɛ bɔ é gɔ́; nǔmɛsɛn yětɔn énɛ́ lɛ́ɛ ɔ́, cyɔ wɛ nú yě, nǔvɛ́mɔ yětɔn lɛ́ɛ wɛ yě bɛ́ gɔ́ to ce.”

Mɛ bǐ tunwun Mawu nǔgbó ɔ́ lo

¹⁹ Mawu Mavɔmavɔ wɛ nyí gǎnjɛwú ce, é wɛ nyí sósyɛ́n ce. Adǎngbomɛ hwenu ɔ́, é wɛ nɔ́ nyí bibɛtɛn ce. Akɔta akɔta lɛ́ɛ ná gosín wɛ̌kɛ́zo ɛnɛ lɛ́ɛ bǐ jí wá mɔ we, bó ná ɖɔ nú we ɖɔ: “Nǔ e tɔ́gbó mǐtɔn lɛ́ɛ nɔ́ sɛn lɛ́ɛ bǐ wɛ nyí awo, nǔ yǎyá wɛ, yě kpé nǔɖé wú ǎ.

²⁰ Gbɛtɔ́ ɖó ná bló nǔmɛsɛn ǎ. Nǔ e é bló lɛ́ɛ nyí Mawu ǎ.”

²¹ Mawu ɖɔ: “Din tɔn ɔ́, un ná ɖe nǔwúkpíkpé ce kpó acɛkpikpa ce kpó xlɛ́ yě, bɔ yě ná tunwun ganjí; énɛ́ ɔ́, yě ná mɔ nukún jɛ wú ɖɔ Mawu Mavɔmavɔ wɛ un nyí.”