Jelemíi 12 - MAWUXÓWÉMA

¹ Mawu Mavɔmavɔ, a nyǐ hwɛjijɔnɔ sɔ mɔ̌ bɔ un sixú mɔ nǔ jɛ do ɖěbǔ ɖo nǔ e a wa lɛ́ɛ wú ǎ. É ká ɖo mɔ̌ có, un jló ná ɖɔ xó xá we dó hwɛjijɔ wú: Étɛ́wú mɛ e ka nyí mɛdídá lɛ́ɛ ɔ́ nǔ ka nɔ́ nyɔ́ nú yě? Étɛ́wú gbɛtɔ́ e nyí nuwenɔ lɛ́ɛ bǐ ká nɔ́ vo?

² A tun yě atín ɖɔhun, yě dó ɖɔ do, yě su bó sɛ́n. Nyǐkɔ towe ɖo nu yětɔn, ayi yětɔn ka lín dó we.

³ Amɔ̌, hwɛ Mawu Mavɔmavɔ ɔ́, a ka tunwun mì. A ɖo mimɔ mì wɛ, ayi ce ɖó kpɔ́ xá we, bɔ a mɔ nǔ jɛ mɛ. Amɔ̌, yědɛɛ lɛ́ɛ ɔ́, è zé yě ɖó vo, lě e è nɔ zé lɛ̌ngbɔ́ ɖó vo bó nɔ́ kplá yi lanhutɛn é; zě yě ɖó vó nú gbe e gbe è nǎ vɔ kún yětɔn é.

⁴ Káká jɛ hwetɛ́nu to ɔ́ ká ná nɔ aluwɛ mɛ yi jɛ? Káká jɛ hwetɛ́nu gběhan ká ná nɔ xúxú ɖo gle mɛ yi jɛ? Mɛ e ɖo to ɔ́ mɛ lɛ́ɛ ɔ́, dídá yětɔn zɔ́n bɔ kanlin kpó xɛ kpó bǐ ɖo kúkú wɛ. Yě nɔ́ ɖɔ: “Mawu nǎ mɔ fí e mǐ na yi vɔ dó ɔ́ ǎ.”

⁵ Mawu ɖɔ nú mì ɖɔ: “Ée hwi kpó gbɛtɔ́ kpó ɖo wezun nu, bɔ nǔ ko cikɔ nú we sɔ lě din ɔ́, a nǎ sixú wá dó wezun xá sɔ́ a? Bɔ é ka nyí fí e fífá ɖe ɔ́ kɛ́ɖɛ́ jɛ́n a nɔ mɔ ɖɔ émí ɖó vivo ɖe ɔ́, nɛ̌ a ka ná wa nǔ gbɔn ɖo Judɛ́ɛn tɔ ɔ́ tó, fí e zunkan ɖe é?

⁶ “Đó nɔví towe lɛ́ɛ ɖésúnɔ kpó mɛ e ɖo xwé towe gbe lɛ́ɛ kpó nɔ sa we. Yě ɖésúnɔ nɔ ɖo vɛ̌gokan vlɔ́n wɛ, bó nɔ́ ɖo xó sú wɛ ɖo gǔdo towe. Yě wá gɔ̌n towe bó wá ɖo xó víví ɖɔ nú we wɛ hǔn, ma ɖi ó.”

Mawu jó xwé tɔn kpó togun tɔn kpó dó

⁷ Mawu ɖɔ nú mì ɖɔ: “Un jó xwé ce dó, un jó togun e nyí ce ɔ́ dó. Togun e un yí wǎn ná ɔ́, un jó e dó nú kɛntɔ́ tɔn lɛ́ɛ.

⁸ Togun e nyí ce ɔ́ wá cí kinnikínní ɖɔhun nú mì ɖo zungbó mɛ, bó nɔ́ dó gbe dó jǐ ce. Énɛ́ wɛ zɔ́n bɔ un gbɛ́ wǎn n'i.

⁹ Togun e nyí ce ɔ́ wa cí xɛ e ɖó sin tɛnmɛ tɛnmɛ é ɖɔhun, bɔ aklasú gosín ɖisí amyɔ bó wá zɔn jǐ tɔn. Mi yi kplé gběkanlin lɛ́ɛ bǐ! Mi kplá yě wá, bónú yě ná vúnvún i!

¹⁰ Lɛ̌ngbɔ́nyitɔ́ lɛ́ɛ dó ahwan gbě bó ɖo vǐwungbo ce vɔ wɛ. Yě ɖo gle ce gbídí ɖó afɔ wú wɛ. Gle ce ɖagbe ɖagbe ɔ́, yě zě dó húzú gbětótló, fí e mɛɖé ma nɔ́ gbɔn ǎ é.

¹¹ Gle ce ɖíe ɖo aluwɛ mɛ bó ɖo nǔbláwǔ wa wɛ ɖo nukɔn ce e. To ɔ́ bǐ wɛ jɛ vɔ̌, bɔ mɛɖé sɔ́ nɔ ké ya ná ǎ.

¹² Nǔhɛngblétɔ́ lɛ́ɛ nyi ahwan sín só e ɖo gbětótló mɛ lɛ́ɛ bǐ jí, bó jǎwe. Hwǐ nyɛ Mawu Mavɔmavɔ tɔn ɔ́ ɖo to ɔ́ bǐ vúnvún wɛ, sín fí e to ɔ́ bɛ́ sín ɔ́ káká yi fí e é fó dó é. Mɛ ɖokpó ná mɔ agbɔ̌n ǎ.

¹³ Blěe wɛ mi dó, wunkan wɛ mi ka ya. Mi jɛ tagba, mi ka mɔ le ɖě ɖ'é mɛ ǎ. Nǔ énɛ́ e mi ya ɔ́, winnyá wɛ. Xomɛ ɖaxó ɖé wɛ nyɛ Mawu Mavɔmavɔ sin bó sɛ́ dó mi.”

Mawu kpó to e lɛ́ dó Izlayɛ́li lɛ́ɛ kpó

¹⁴ Xó e Mawu Mavɔmavɔ ɖɔ dó togun dídá e lɛ́ lɛ̌ dó Izlayɛ́li to ɔ́ wú lɛ́ɛ ɖíe: “Yě klá jɛ nǔ e nyí ce ɔ́ nu, yě klá jɛ ayǐkúngban e un ná Izlayɛ́li togun ce ɔ́ nu. Éɖíe, un ná ɖe togun dídá énɛ́ lɛ́ɛ tɔ́n sín to yětɔn mɛ. Un ná ɖe Judáa sín fɛn yětɔn mɛ.

¹⁵ Un ɖe togun énɛ́ lɛ́ɛ tɔ́n sín to yětɔn mɛ gúdo ɔ́, un ná lɛ́ wá kú nǔ blá wǔ nú yě, bó ná kplá mɛ ɖokpó ɖokpó wá ayǐkúngban tɔn jí, ɖo to tɔn mɛ.

¹⁶ Togun dídá énɛ́ lɛ́ɛ kplɔ́n nǔ togun ce bɔ é nɔ xwlé nǔ dó vodún Baalu nyíkɔ mɛ. Amɔ̌, nú yědɛɛ lɛ́ɛ zán gbɛ yětɔn ganjí lě e togun ce ɖó ná bló gbɔn ɔ́, nú yě nɔ́ xwlé nǔ dó nyǐkɔ ce mɛ bó nɔ ɖɔ ‘Mawu Mavɔmavɔ ɖo gbɛ’ ɔ́, yě ná mɔ tɛn ɖo togun ce tɛ́ntin.

¹⁷ Nǔ ɖo mɔ̌ có, nú togun énɛ́ lɛ́ɛ ɖě gbɛ́ tó ɖó mì ɔ́, un ná ɖe e sín to tɔn mɛ bǐ, bó ná jó e nú kú.” Xó e Mawu Mavɔmavɔ ɖɔ ɔ́ nɛ́.