Jelemíi 11 - MAWUXÓWÉMA

Izlayɛ́li nɔ gbejí nú akɔ e é jɛ ɔ́ ǎ

¹ Xó e Mawu Mavɔmavɔ ɖɔ nú nyɛ Jelemíi ɖɔ má yi ɖɔ nú togun ɔ́ é ɖíe, é ɖɔ:

² “Xó e un ɖɔ bó dó jɛ akɔ xá mi lɛ́ɛ ɔ́, mi xwédo.” Mawu lɛ́ ɖɔ: “Jelemíi, ɖɔ xó énɛ́ lɛ́ɛ nú Judáa ví lɛ́ɛ kpó Jeluzalɛ́munu lɛ́ɛ kpó.

³ Đɔ nú yě ɖɔ Mawu Mavɔmavɔ, Mawu Izlayɛ́li tɔn ɖɔ: Akɔjijɛ xó élɔ́ ɔ́, mɛ e ma na ɖótó ǎ ɔ́, heelú i.

⁴ Đ'ayǐ ɔ́, un ɖe tɔ́gbó mitɔn lɛ́ɛ sín Ejípu, zo hɛhɛ mɛ. Hwenɛ́nu wɛ un ko ɖɔ akɔjijɛ énɛ́ ɔ́ sín xó nú yě. Un ɖɔ nú yě ɖɔ: ‘Mi ɖótó xó ce lɛ́ɛ, mi bló nǔ e un ná ɖɔ nú mi lɛ́ɛ. Ényí mi bló ɔ́, mi ná nyí togun ce, bɔ un ná nyí Mawu mitɔn.

⁵ Énɛ́ ɔ́, un ná ɖe akpá e un dó nú tɔ́gbó mitɔn lɛ́ɛ é. Akpá e un dó nú yě ɖɔ un ná ná yě to e mɛ wǐin kpó nyibúnɔ́sin kpó nɔ́ sa tɔ ɖe é. To ɔ́ mɛ ɖíe mi ɖe din e.’ ” Ée Mawu ɖɔ mɔ̌ ɔ́, un ɖɔ: “Mawu Mavɔmavɔ, nǔgbó wɛ a ɖɔ.”

⁶ Mawu Mavɔmavɔ ɖɔ nú mì ɖɔ: “Jlǎ xó énɛ́ lɛ́ɛ bǐ gbɔn Judáa toxo lɛ́ɛ bǐ mɛ, gbɔn Jeluzalɛ́mu li lɛ́ɛ bǐ jí, bó ɖɔ: ‘Xó e un ɖɔ bó dó nu alɛ xá mi lɛ́ɛ ɔ́, mi xwédo, bó bló bǐ ɖ'é jí.

⁷ Đó un kó ɖɔ bó tɛ ɖɛ̌ jí ɖésú nú tɔ́gbó mitɔn lɛ́ɛ, sín gbe e gbe un kplá yě sín Ejípu, bó fɔ́n bó lɛ́ ɖo ɖiɖɔ nú mi lɔmɔ̌ wɛ káká wá jɛ égbé ɖɔ: Mi ɖótó xó ce lɛ́ɛ.

⁸ Yě ká se ǎ, yě ɖótó xó ce lɛ́ɛ ǎ. Nǔ e yě xwe ɔ́ wɛ yě wa; linlin nyanya yětɔn lɛ́ɛ wɛ yě xwedó. Énɛ́ ɔ́, tódɔnnúmɛ e ɖo alɛnunu énɛ́ ɔ́ mɛ bɔ è wlǎn ɔ́, un dɔn nú yě, ɖó xó e un ɖɔ bó dó nu alɛ énɛ́ ɔ́ xá yě, bó ɖɔ yě ní xwedó, bɔ yě ma xwedó ǎ ɔ́ wú.’ ”

⁹ Mawu Mavɔmavɔ ɖɔ nú mì ɖɔ: “Judáa ví lɛ́ɛ kpó Jeluzalɛ́munu lɛ́ɛ kpó blá sé ɖé.

¹⁰ Yě blá sé bɔ hwɛ e tɔ́gbó yětɔn lɛ́ɛ gbɛ́ ɖɔ émí kún ná se xó ce ó lobo hu ɖ'ayǐ lɛ́ɛ ɔ́, yě lɔ jɛ huhu jí. Yě lɛ́ kɔ yi nǔmɛsɛn ɖěvo lɛ́ɛ kɔn. Izlayɛ́li ví lɛ́ɛ kpó Judáa ví lɛ́ɛ kpó da alɛ wǔ ce; yě nɔ́ gbejí nú alɛ e un nu xá tɔ́gbó yětɔn lɛ́ɛ ɔ́ ǎ.

¹¹ “Énɛ́ ɔ́ wú wɛ Mawu Mavɔmavɔ ɖɔ: ‘Un na dó nǔ sin xá yě, bɔ yě ná sixú ɖe ta sín mɛ ǎ. Yě ná sú xó ylɔ́ mì, un ka ná se xó yětɔn ǎ.

¹² Hwenɛ́nu ɔ́, Jeluzalɛ́munu lɛ́ɛ kpó mɛ e ɖo Judáa toxo ɖě lɛ́ɛ mɛ lɛ́ɛ kpó ná sú xó ylɔ́ nǔmɛsɛn e yě nɔ́ xwlé zǎlínkpɔ́n lɛ́ɛ, ɖɔ yě ní wá gɔ́ alɔ nú émí. Un dó nǔ sin xá yě ɔ́, nǔmɛsɛn énɛ́ lɛ́ɛ ná sixú hwlɛ́n yě gán ǎ.

¹³ Judáa e, vodún nabí e a ɖǒ ɔ́, sɔ toxo nabí e a ɖǒ é. Jeluzalɛ́mu li lɛ́ɛ bǐ jí wɛ è mɛ vɔ̌sákpe nú vodún Baalu gbɔn, lobo nɔ sá vɔ̌ n'i. Vodún Baalu ɔ́, winnyá dó mɛ tɔ́ wɛ.’

¹⁴ Amɔ̌, Jelemíi, hwɛ ɔ́, ma xo ɖɛ dó togun élɔ́ ta mɛ ó. Ma xo ɖɛ ó, ma ka sa vo nú mì dó togun élɔ́ ta mɛ ó. Đó hwenu e yě ná ɖo xó sú ylɔ́ mì wɛ, ɖó adǎn e ná ɖo yě gbo wɛ lɛ́ɛ wú ɔ́, un ná se ǎ.”

È jlɛ̌ Izlayɛ́li dó olívutín e fyɔ́ ɔ́ wú

¹⁵ Mawu ɖɔ: “Izlayɛ́li togun e, hwi mɛ e un yí wǎn na ɔ́, a ɖo nǔ ma sɔgbe wa wɛ. Étɛ́ a wǎ ba ɖo xwé ce gbe? A vɛdó ɖɔ akpá e a dǒ lɛ́ɛ, abǐ vɔ̌ e a nɔ sá lɛ́ɛ ná zɔ́n bɔ awě kún ná xó we ó wɛ sín a? A nǎ gán ɖ'é mɛ wɛ a vɛdó a?

¹⁶ Izlayɛ́li togun, ‘Olívutín amanɔ’, sínsɛ́n towe nyɔ́; é wɛ è nɔ dó dó we gesí. Nyǐkɔ e nyɛ Mawu Mavɔmavɔ ná, bɔ è nɔ dó mlá we ɖ'ayǐ ɔ́ nɛ́. Zǐngídi ɖaxó ɖokpó jɛ́n un sɛ́ dó, bɔ a fyɔ́, bɔ ala towe bǐ gblé.”

¹⁷ Olívutín, nyɛ Mawu Mavɔmavɔ Nǔbǐwúkpétɔ́ e tun we ɔ́, un ɖɔ nǔ baɖabaɖa e ɖo nǎ jɛ wɛ ɔ́ nú we. Un ɖɔ nú we, ɖó nǔ nyanya e mi Izlayɛ́li ví lɛ́ɛ kpó Judáa ví lɛ́ɛ kpó wa lɛ́ɛ wú. Un ɖɔ nú we, ɖó zǎlínkpɔ́n e a nɔ dó zo nú vodún Baalu dó dó xomɛ sin nú mì ɔ́ wú.

Jelemíi toxo mɛ nu lɛ́ɛ ɖésú ɖo gbě tɔn nya wɛ

¹⁸ Mawu Mavɔmavɔ gba nǔ e lin wɛ mɛ ce lɛ́ɛ ɖe ɔ́ sín akpá nú mì. É ɖe nǔ e wa wɛ yě ɖe ɖo nǔglɔ́ ɔ́ xlɛ́ mì.

¹⁹ Lɛ̌ngbɔ́ví ɖɔhun wɛ un cí bɔ yě kplá mì xwe akpákpó jí; un tunwun nǔ nyanya e lin dó wǔ ce wɛ yě ɖe lɛ́ɛ ǎ. Yě nɔ́ ɖɔ dó gúdo ce ɖɔ: “Mi wá mǐ gblé gbɛ dó nú atín kpó sínsɛ́n tɔn kpó. Mi wǎ mǐ ɖe e sín gbɛ élɔ́ mɛ fí. Mɛ ɖé má sɔ́ flín nyǐkɔ tɔn gbeɖé ó.”

²⁰ Amɔ̌, Mawu Mavɔmavɔ Nǔbǐwúkpétɔ́, hwɛ ɔ́, hwɛjlɔ́jlɔ́ wɛ a nɔ ɖɔ. A nɔ mɔ nǔ jɛ mɛ xomɛ; a nɔ tunwun nǔ e lin wɛ gbɛtɔ́ ɖe ɖo ayi tɔn mɛ é. Mawu Mavɔmavɔ, un ná kpɔ́n lě e a nǎ ba hlɔn nú mì gbɔn ɔ́, ɖó hwi wɛ nɔ jɛ hǔn dó jǐ ce.

²¹ Anatɔ́tinu lɛ́ɛ ɖo kú ce ba wɛ bó nɔ́ ɖɔ: “Ma ɖɔ xó ɖé nú mǐ bó ɖɔ Mawu Mavɔmavɔ wɛ ɖɔ ó, é má nyí mɔ̌ ǎ ɔ́, a nǎ kú ɖo alɔ mǐtɔn mɛ.” Énɛ́ ɔ́ wú wɛ Mawu Mavɔmavɔ ɖɔ xó dó yě wú.

²² Mawu Mavɔmavɔ Nǔbǐwúkpétɔ́ ɔ́ ɖɔ: “Éɖíe, un ná dɔn tó nú Anatɔ́tinu nɛ́ lɛ́ɛ; dɔ̌nkpɛvú yětɔn lɛ́ɛ ná kú ɖo ahwangbénu; vǐ yětɔn súnnu kpó nyɔ̌nu kpó bǐ nǎ kú adɔ.

²³ Yě mɛ ɖěbǔ ná gló ǎ. Un ná sɛ́ awě ɖaxó ɖokpó dó Anatɔ́tinu lɛ́ɛ xwe e xwe un ná dɔn tó nú yě é.”