Jelemíi 10 - MAWUXÓWÉMA

¹ Izlayɛ́li togun e mi, mi ɖótó xó e ɖɔ nú mi wɛ Mawu Mavɔmavɔ ɖe ɔ́!

² Xó e é ɖɔ ɔ́ ɖíe: “Mi ma xwedó walɔ akɔta ɖě lɛ́ɛ tɔn ó; mi ma ɖi xɛsi nú wuntun e è nɔ mɔ ɖo jǐxwé lɛ́ɛ ó; akɔta énɛ́ lɛ́ɛ wɛ nɔ ɖi xɛsi nú wuntun jǐxwé tɔn lɛ́ɛ.

³ Sinsɛn akɔta ɖě lɛ́ɛ tɔn ɔ́, nǔ yǎyá wɛ, jɔhɔn kpowun wɛ, é hú mɔ̌ ǎ. È nɔ yi zunkan mɛ bó nɔ́ yi gbo atín bɔ alɔnuzɔ́watɔ́ nɔ́ bɔ asyɔ́ nyi wú.

⁴ È nɔ kɔn kpatágan kpó siká kpó dó atín. È nɔ sɔ́ zǔnkpé bó nɔ xwe hǔnjɛ́n d'é mɛ, bónú é má dán ó.

⁵ Nǔmɛsɛn énɛ́ lɛ́ɛ cí xɛblɛ́nú e ɖo kákan mɛ ɔ́ ɖɔhun; yě nɔ́ ɖɔ xó ǎ; mɛ wɛ nɔ sɔ́ nǔmɛsɛn énɛ́ lɛ́ɛ, ɖó yě sixú ɖi zɔnlin ǎ. Mi ma ɖi xɛsi nú yě ó; yě sixú wa ɖagbe ǎ, yě ká sixú wa nyanya ǎ.”

⁶ Mawu Mavɔmavɔ, mɛ ɖé ka sixú cí hwɛ ɖɔhun a? A d'agba bɔ nyǐkɔ towe yi jǐ tawun ɖó hlɔ̌nhlɔ́n towe wú.

⁷ Akɔta lɛ́ɛ bǐ xɔ́sú, mɛ̌ ma ká ná ɖó sísí nú we ǎ? Hwi wɛ è ɖǒ ná ɖó sísí ná, ɖó nǔnywɛ́tɔ́ e ɖo axɔ́súɖuto lɛ́ɛ bǐ mɛ, gbɔn akɔta lɛ́ɛ bǐ mɛ ɔ́, è sixú jlɛ́ ɖě dó wǔ we ǎ.

⁸ Yě bǐ wɛ jɔ xlo, bó jɔ yɛyi. Vodún sinsɛn ɔ́, nǔ yǎyá kpowun wɛ.

⁹ Nǔmɛsɛn énɛ́ lɛ́ɛ ɔ́, kpatágan gbajagbaja e è hɛn sín Taasísi, abǐ siká e è hɛn sín Wufázi ɔ́ wɛ è nɔ dó ba acɔ́ ná. Alɔnuzɔ́watɔ́ ɖé wɛ nɔ́ tun yě, nǔtuntɔ́ ɖé wɛ nɔ wa azɔ̌ yětɔn. È nɔ zé avɔ vɔvɔ abǐ fɛ́sinnɔ dó ba acɔ́ nú yě. Nǔmɛsɛn énɛ́ lɛ́ɛ ɔ́, gbɛtɔ́ sín alɔ wɛ bló bǐ.

¹⁰ Lo ɔ́, Mawu Mavɔmavɔ wɛ nyí Mawu ɖokpó e tíin é; é wɛ nyí Mawu, bó nyí axɔ́sú káká yi káká sá. È sin xomɛ ɔ́ ayǐkúngban nɔ dán wǔ, akɔta lɛ́ɛ nɔ́ sixú nɔ te xomɛsin tɔn nukɔn ǎ.

¹¹ Xó e mi ná ɖɔ nú akɔta lɛ́ɛ ɔ́ ɖíe, mi ná ɖɔ: Nǔmɛsɛn e é má nyí yě wɛ ɖó jǐnukúnsin ɔ́ ǎ, é má ká nyí yě wɛ ɖó ayǐkúngban ɔ́ ǎ lɛ́ɛ ɔ́, yě bǐ wɛ ná bú sín ayǐkúngban ɔ́ jí; yě bí wɛ ná bú sín hwe glɔ́ fí.

¹² Mawu ɔ́, hlɔ̌nhlɔ́n tɔn wɛ é dó ɖó ayǐkúngban ɔ́, nǔwúkpíkpé tɔn wɛ é dó ɖó gbɛ ɔ́, nǔnywɛ́ tɔn wɛ é dó ɖó jǐnukúnsin ɔ́.

¹³ Mawu kɛ nu ɔ́, sin nɔ sɛ kplé ɖo jǐxwé, akpɔ́kpɔ́ lɛ́ɛ nɔ sí te sín fí e jǐnukúnsin kpó ayǐkúngban kpó kplé ɖe é, jǐ nɔ kɛwun bo nɔ ja; jɔhɔn nɔ sí te sín fí e é ɖó tɛnmɛ n'i ɖó é.

¹⁴ Gbɛtɔ́ lɛ́ɛ mɔ mɔ̌ ɔ́, yě bǐ nɔ́ jɔ yɛyi dó te, yě sɔ́ nɔ́ tunwun nǔ e yě ná ɖɔ é ǎ. Énɛ́ ɔ́, nǔtuntɔ́ e tun nǔmɛsɛn yětɔn nú yě lɛ́ɛ ɔ́, winnyá nɔ́ hu yě, ɖó bǒcyɔ énɛ́ lɛ́ɛ bǐ wɛ nyí xɛblɛ́nú; gbɛ ɖě ɖo yě mɛ ǎ.

¹⁵ Nǔ yǎyá wɛ yě nyí, yě hwɛ̌n. Hwenu e Mawu ná dɔn tó nú mɛ ɔ́, yě bǐ wɛ è nǎ vívá kún ná.

¹⁶ Amɔ̌, Mawu Jakɔ́bu ví lɛ́ɛ tɔn ɔ́, è sixú jlɛ́ ɛ dó nǔmɛsɛn yětɔn énɛ́ lɛ́ɛ wú ǎ, ɖó é wɛ ɖó nǔ bǐ; togun Izlayɛ́li tɔn wɛ ka nyí togun e é sɔ́ bɔ é nyí étɔn é. Nyǐkɔ tɔn nyí Mawu Mavɔmavɔ Nǔbǐwúkpétɔ́.

Awě ɖaxó ɖé ja sín totaligbé

¹⁷ Jelemíi ɖɔ: “Jeluzalɛ́mu toxo, hwi ɖíe è ko xá bǐ e; din ɔ́, dó agban towe,

¹⁸ ɖó xó e Mawu Mavɔmavɔ ɖɔ ɔ́ ɖíe: ‘Din yɛ tɔn ɔ́, un ná dó ya nú we káká bɔ a nǎ mɔ nǔ e ɖ'é mɛ ɔ́.’ ”

¹⁹ Jeluzalɛ́mu ɖɔ: “Heelú! Étɛ́ ɖíe ká gbo mì e? È gba mì hánnyá bǐ. Akpa e ɖo wǔ ce ɔ́ dó kpan, bɔ un nɔ ɖɔ dó ayi mɛ ɖɔ: Wǔvɛ́ e mɔ wɛ un ɖe ɔ́ syɛ́n ǎ, un hɛn ɔ́, un ná nɔ nu.

²⁰ Goxɔ ce vún, kan e hɛn goxɔ ce ɖó te lɛ́ɛ wɛ́n, vǐ ce lɛ́ɛ jó mì dó, yě sɔ́ ɖe ǎ. Un sɔ́ ɖó mɛɖé bɔ é ná gbá goxɔ ɖěvo nú mì, bó sɔ́ xwé ce sí te ǎ.”

²¹ Jelemíi ɖɔ: “Xlonɔzɔ́ wɛ gǎn lɛ́ɛ wa; yě ba Mawu Mavɔmavɔ ɔ́ ǎ. Énɛ́ ɔ́ wú wɛ nǔ e wa wɛ yě ɖe lɛ́ɛ ɖě ma yi nukɔn ǎ. Bɔ mɛ e nu yě ɖe lɛ́ɛ bǐ gbadó.

²² É ɖíe: è ɖo xó ɖé se wɛ. Zǐngídi ɖaxó ɖé wɛ bó gosín to e ɖo taligbé ɔ́ mɛ bó ná gba Judáa to ɔ́ bǐ hánnyá, bɔ è sɔ́ ná mɔ mɛɖé ɖo fínɛ́ ǎ. É ná húzú cukú gbě tɔn lɛ́ɛ sín xwé.”

Jelemíi xo ɖɛ ɖó togun tɔn tɛnmɛ

²³ Mawu Mavɔmavɔ, un tunwun ɖɔ ali e jí gbɛtɔ́ nɔ́ gbɔn ɖo gbɛmɛ fí ɔ́, é kún nyí é ɖésú wɛ nɔ́ ɖe ó. Gbɛtɔ́ ɖésú sixú xlɛ́ ali e é ná gbɔn é éɖée ǎ.

²⁴ Dɔn tó nú mì Mawu Mavɔmavɔ, dɔn tó nú mì ɖó jlɛ̌ jí, ma ɖo xomɛsin jí bó dɔn tó nú mì ó, a blǒ mɔ̌ hǔn gbɛ ce vɔ.

²⁵ Amɔ̌, ɖe xomɛsin towe xlɛ́ akɔta e ma tunwun we ǎ lɛ́ɛ; ɖe xlɛ́ togun e ma nɔ́ xo mlá nyǐkɔ towe ǎ lɛ́ɛ, ɖó yě gba Jakɔ́bu to ɔ́, yě gba to ɔ́ bǐ hánnyá, yě bɛ́ nǔ e ɖo to ɔ́ mɛ lɛ́ɛ bǐ; to ɔ́ jɛ vɔ̌.