Hwɛɖɔtɔ́ 6 - MAWUXÓWÉMA

Madiáani ví lɛ́ɛ dó ya nú Izlayɛ́li ví lɛ́ɛ

¹ Izlayɛ́li ví lɛ́ɛ lɛ́ wa nǔ e má nyɔ́ Mawu Mavɔmavɔ nukún mɛ ǎ é. Énɛ́ ɔ́ wú wɛ Mawu Mavɔmavɔ jó yě nú Madiáani ví lɛ́ɛ xɔ xwe tɛ́nwe.

² Madiáani ví lɛ́ɛ dó ya nú Izlayɛ́li ví lɛ́ɛ ɖésú. Izlayɛ́li ví lɛ́ɛ nɔ́ hɔn hwlá cí do lɛ́ɛ mɛ, sónu lɛ́ɛ mɛ kpó fí e gɛ́dɛ́ ɖo só lɛ́ɛ ta lɛ́ɛ kpó, bó ná dó gló yě.

³ Izlayɛ́li ví lɛ́ɛ dó jinukún yětɔn lɛ́ɛ hweɖěbǔnu ɔ́, Madiáani ví lɛ́ɛ kpó Amalɛ́ki ví lɛ́ɛ kpó, kpódó yě mɛ e gosín zǎnzǎnhwe jí lɛ́ɛ kpó nɔ wá tɔ́n ahwan yě.

⁴ Yě nɔ́ jɛ agban ɖó ayǐkúngban Izlayɛ́li tɔn jí, bó nɔ́ vívá kún nú nǔkún yětɔn lɛ́ɛ káká yi Gaza kpá. Yě nɔ́ jó nǔɖuɖu ɖěbǔ dó nú Izlayɛ́li ví lɛ́ɛ ǎ; yě nɔ́ jó nǔ ɖěbǔ dó ǎ: gbɔ̌ oo, nyibú oo, tócí oo, yě nɔ́ jó ɖěbǔ dó ǎ.

⁵ Đó yě nɔ́ ɖo yiyi wɛ kpó kanlinhwan yětɔn lɛ́ɛ kpó, kpó avɔgoxɔ yětɔn lɛ́ɛ kpó; yě nɔ́ sukpɔ́ wɛn ɖɔhun. Yě kpó lǎkúnmí yětɔn lɛ́ɛ kpó sukpɔ́ káká bɔ è sixú xa yě ǎ. Yě nɔ́ wá vun gba to ɔ́, bó nɔ́ vívá kún n'i.

⁶ Énɛ́ ɔ́, Madiáani ví lɛ́ɛ dɔn Izlayɛ́li ví lɛ́ɛ dó ya mɛ káká, bɔ yě sú xó ylɔ́ Mawu Mavɔmavɔ ɖɔ é ní wá gɔ́ alɔ nú émí.

⁷ Ée Izlayɛ́li ví lɛ́ɛ byɔ́ Mawu Mavɔmavɔ ɖɔ é ní hwlɛ́n émí sín Madiáani ví lɛ́ɛ sí ɔ́,

⁸ Mawu Mavɔmavɔ sɛ́ gbeyíɖɔ ɖokpó dó yě, bɔ é ɖɔ nú yě ɖɔ: “Mawu Mavɔmavɔ, Mawu Izlayɛ́li tɔn ɔ́ ɖɔ: ‘Un ɖe mi tɔ́n sín Ejípu, un ɖe mi tɔ́n sín kannumɔgbénu.

⁹ Un hwlɛ́n mi sín Ejípunu lɛ́ɛ sí, bó hwlɛ́n mi sín mɛ e ɖo ya dó nú mi wɛ lɛ́ɛ bǐ sí; un nya yě sín nukɔn mitɔn, bo sɔ́ to yětɔn ná mi.

¹⁰ Un ɖɔ nú mi ɖɔ nyɛ wɛ nyí Mawu Mavɔmavɔ, Mawu mitɔn; mi kún ɖó ná sɛn vodún Amɔliti e tɛ́ntin mi ɖe lɛ́ɛ tɔn lɛ́ɛ ó. Lo ɔ́, mi se tónú nú mì ǎ.’ ”

Mawu zɔ́n Jedenyɔ́ɔ ɖɔ ní hwlɛ́n Izlayɛ́li gán

¹¹ Wɛnsagun Mawu Mavɔmavɔ tɔn wá gletoxo e è nɔ ylɔ́ ɖɔ Ɔfla ɔ́ mɛ. É jínjɔ́n cɛ́nitín ɖé sá; atín énɛ́ ɔ́ ɖo Yoaci e ɖo Aviɛzɛ́ɛ hɛ́nnu mɛ ɔ́ sín ayǐkúngban jí. Jedenyɔ́ɔ Yoaci ví ɔ́, ɖo jinukún só wɛ ɖo to e mɛ è nɔ li vǐwun ɖe ɔ́ mɛ, bónú Madiáani ví lɛ́ɛ ní má mɔ ɛ ó.

¹² Wɛnsagun Mawu Mavɔmavɔ tɔn wá tɔ́n dó jǐ tɔn, bó ɖɔ n'i ɖɔ: “Ahwanfuntɔ́ akowunká, Mawu Mavɔmavɔ ɖo kpɔ́ xá we!”

¹³ Jedenyɔ́ɔ ɖɔ n'i ɖɔ: “Aklúnɔ ce! Ényí Mawu Mavɔmavɔ ɖo kpɔ́ xá mǐ ɔ́, nɛ̌ ká gbɔn bɔ nǔ énɛ́ lɛ́ɛ bǐ jɛ dó mǐ jí? Azɔ̌jíwǔ e sín xó tɔ́ mǐtɔn lɛ́ɛ nɔ́ ɖɔ nú mǐ, bó nɔ́ ɖɔ Mawu Mavɔmavɔ ɖe émí tɔ́n sín Ejípu ɔ́, fítɛ́ nǔ énɛ́ lɛ́ɛ bǐ ká ɖe? È nǎ ɖɔ nǔgbó ɔ́, Mawu Mavɔmavɔ jó mǐ dó; é jó mǐ nú Madiáani ví lɛ́ɛ.”

¹⁴ Mawu Mavɔmavɔ ka lílɛ́ kpan nukɔn Jedenyɔ́ɔ bó ɖɔ n'i ɖɔ: “Yi hwlɛ́n Izlayɛ́li ví lɛ́ɛ sín Madiáani ví lɛ́ɛ sí kpó hlɔ̌nhlɔ́n e a ɖǒ ɔ́ kpó; nyɛ wɛ sɛ́ we dó.”

¹⁵ Jedenyɔ́ɔ ka ɖɔ n'i ɖɔ: “Aklúnɔ ce, kɛnklɛ́n! Nɛ̌ un ná sixú hwlɛ́n Izlayɛ́li ví lɛ́ɛ gbɔn? Hɛ̌nnu ce wɛ nyí hɛ̌nnu e ɖo gǔdo bǐ ɖo akɔta Manasée tɔn ɔ́ mɛ é; nyɛ wɛ ka nyí yɔkpɔ́vú bǐ ɖo xwédo ce mɛ.”

¹⁶ Énɛ́ ɔ́, Mawu Mavɔmavɔ ɖɔ n'i ɖɔ: “Un ná ɖo kpɔ́ xá we, énɛ́ ɔ́, a nǎ ɖu ɖo Madiáani ví lɛ́ɛ jí gbɛtɔ́ ɖokpó géé wɛ yě nyǐ ɖɔhun.”

¹⁷ Jedenyɔ́ɔ ɖɔ n'i ɖɔ: “Ényí nǔ ce nyɔ́ nukún towe mɛ nǔgbó hǔn, nǎ xlɛ́ ɖé mì nú má dó tunwun ɖɔ hwi Mawu Mavɔmavɔ ɔ́ wɛ ɖo xó ɖɔ nú mì wɛ;

¹⁸ ma yi cóbónú má lɛ́ kɔ wá kpó nǔníná e un jló ná zé nú we ɔ́ kpó ó.” Mawu Mavɔmavɔ ka ɖɔ n'i ɖɔ: “Un ná nɔ fí káká bɔ a nǎ lɛ́ kɔ wá.”

¹⁹ Jedenyɔ́ɔ ka yi ɖa gbɔ̌ví ɖokpó kpó wɔ̌xúxú e mɛ è ma dó tɔ́n ǎ é kpó; linfín kilóo gban wɛ é sɔ́ dó ɖa wɔ̌xúxú ɔ́ ná. É zé lan ɔ́ dó xasun ɖokpó mɛ, bó kɔn nǔsúnnú ɔ́ dó zɛ̌n ɖokpó mɛ; é zé bǐ wá cɛ́nitín ɖé sá, bó sɔ́ nú wɛnsagun Mawu tɔn ɔ́.

²⁰ Wɛnsagun ɔ́ ɖɔ n'i ɖɔ: “Yi zé lan ɔ́ kpó wɔ̌xúxú lɛ́ɛ kpó ɖó awǐnnya énɛ́ ɔ́ jí, bó kɔn nǔsúnnú ɔ́ dó ta ná.” Jedenyɔ́ɔ bló nǔ e wɛnsagun ɔ́ ɖɔ ɔ́.

²¹ Énɛ́ ɔ́, wɛnsagun Mawu Mavɔmavɔ tɔn ɔ́ dlɛ́n alɔ, bɔ kpo e ɖo alɔ tɔn mɛ ɔ́, é zé nuvínu tɔn ɖó lan ɔ́ kpó wɔ̌xúxú lɛ́ɛ kpó wú. Ée é bló mɔ̌ ɔ́, myɔ tɔ́n sín awǐnnya ɔ́ mɛ, bó dó lan ɔ́ kpó wɔ̌xúxú lɛ́ɛ kpó zo. Énɛ́ ɔ́ gúdo ɔ́, wɛnsagun ɔ́ bú.

²² Jedenyɔ́ɔ mɔ ɖɔ wɛnsagun Mawu Mavɔmavɔ tɔn wɛ, bó sú xó ɖɔ: “Aklúnɔ, Mawu Mavɔmavɔ! Heelú mì. Un mɔ wɛnsagun towe gannaganna!”

²³ Lo ɔ́, Mawu Mavɔmavɔ ɖɔ n'i ɖɔ: “Fífá ní nɔ kpɔ́ xá we; ma ɖi xɛsi ó; a nǎ kú ǎ.”

²⁴ Énɛ́ ɔ́, Jedenyɔ́ɔ bló vɔ̌sákpe ɖokpó ɖó fínɛ́ nú Mawu Mavɔmavɔ, bó ylɔ́ fí énɛ́ ɔ́ ɖɔ: “Mawu Mavɔmavɔ nɔ ná fífá mɛ.” Vɔ̌sákpe énɛ́ ɔ́ kpo ɖo fínɛ́ káká jɛ din ɖo Ɔfla, gletoxo hɛ̌nnu Aviɛzɛ́ɛ tɔn ɔ́ tɔn mɛ.

Jedenyɔ́ɔ gba vɔ̌sákpe vodún Baalu tɔn

²⁵ Zǎn énɛ́ ɔ́ mɛ ɔ́, Mawu Mavɔmavɔ ɖe gbe nú Jedenyɔ́ɔ ɖɔ: “Zě nyibúsú tɔ́ towe tɔn ɔ́, nyibúsú wegɔ́ ɔ́ e ɖó xwe tɛ́nwe é; gba vɔ̌sákpe Baalu tɔn e tɔ́ towe ɖó ɔ́, bó sɛ́n vodún Acela bócyɔ e ɖo vɔ̌sákpe ɔ́ kpá ɔ́ síin.

²⁶ Énɛ́ ɔ́ gúdo ɔ́, a nǎ bló vɔ̌sákpe ɖagbe ɖagbe ɖokpó ɖó só kpɛví élɔ́ jí nú Mawu Mavɔmavɔ, Mawu towe. A nǎ zé nyibúsú ɔ́ dó sá vɔ̌ e è nɔ dó zo ɔ́ ná; bǒcyɔ e a sɛ́n ɔ́ wɛ a nǎ dó flɔ́ myɔ ɔ́ ná.”

²⁷ Jedenyɔ́ɔ cyán mɛ wǒ ɖo mɛsɛntɔ́ tɔn lɛ́ɛ mɛ, bó yi bló nǔ e Mawu Mavɔmavɔ ɖɔ n'i é. Lo ɔ́, zǎn mɛ wɛ é bló nǔ énɛ́ lɛ́ɛ; é glá bó bló ɖo kéze ǎ, ɖó é ɖo xɛsi ɖi nú hɛ̌nnu tɔn kpó mɛ e ɖo toxo ɔ́ mɛ lɛ́ɛ kpó wɛ.

²⁸ Ée mɛ e ɖo toxo ɔ́ mɛ lɛ́ɛ fɔ́n zǎnzǎn ɔ́, yě mɔ ɖɔ è gba vɔ̌sákpe Baalu tɔn ɔ́, bó sɛ́n vodún Acela bócyɔ e ɖo akpá tɔn ɔ́ síin, lobo zé nyibúsú ɖokpó dó sá vɔ̌ e è nɔ dó zo ɔ́ ná ɖo vɔ̌sákpe yɔ̌yɔ́ ɔ́ jí.

²⁹ Yě nɔ́ kanbyɔ́ yěɖée ɖɔ: “Mɛ̌ wɛ bló mɔ̌?” Yě hwlɛ́n awɔntín ayǐ, yě ba do ná bó mɔ ɖɔ Jedenyɔ́ɔ, Yoaci ví ɔ́ wɛ.

³⁰ Énɛ́ ɔ́, yě ɖɔ nú Yoaci ɖɔ: “Kplá vǐ towe wá nú mǐ bónú mǐ ná hu i, ɖó é gba vɔ̌sákpe Baalu tɔn, bó sɛ́n vodún Acela bócyɔ e ɖo akpá tɔn é.”

³¹ Yoaci ɖɔ nú mɛ e fɔ́n gǔ dó jǐ tɔn lɛ́ɛ bǐ ɖɔ: “Midɛɛ lɛ́ɛ wɛ ná jɛ ahwan Baalu jí a? Midɛɛ lɛ́ɛ wɛ ná hwlɛ́n ɛ gán a? Mɛ ɖěbǔ jɛ ahwan jǐ tɔn ɔ́, è nǎ hu mɛ ɔ́ sɔ zǎnzǎn. Ényí Baalu ɔ́ hú gǎn nǔ bǐ nǔgbó hǔn, ní hwlɛ́n éɖée, ɖó vɔ̌sákpe tɔn wɛ è gba.”

³² Bɛ́ sín hwenɛ́nu ɔ́, è nɔ ylɔ́ Jedenyɔ́ɔ ɖɔ Yelubáalu; tínmɛ tɔn wɛ nyí Baalu ní hwlɛ́n éɖée; xó e Yoaci ɖɔ bó ɖɔ Baalu ní hwlɛ́n éɖée, ɖó vɔ̌sákpe tɔn wɛ è gba ɔ́ wú wɛ è nɔ ylɔ́ ɛ ɖɔ mɔ̌.

Jedenyɔ́ɔ byɔ́ xlɛ́ ɖokpó Mawu

³³ Madiáani ví lɛ́ɛ, Amalɛ́ki ví lɛ́ɛ kpó yě mɛ e nɔ gosín zǎnzǎnhwe jí lɛ́ɛ kpó sɛ yěɖée kplé; yě dó asá Judɛ́ɛn tɔ ɔ́, bó jɛ agban ɖó ayǐkúngban wɛnjɛ e ɖo Izleyɛ́li ɔ́ jí.

³⁴ Lo ɔ́, Yɛ Mawu Mavɔmavɔ tɔn wá ta nú Jedenyɔ́ɔ, bɔ é kún lanzo bó ylɔ́ mɛ e ɖo hɛ̌nnu Aviɛzɛ́ɛ tɔn mɛ lɛ́ɛ, nú yě ná xwedó e.

³⁵ É sɛ́ mɛ dó Manasée yíkúngban ɔ́ bǐ jí, bónú yě ná yi ylɔ́ mɛ e ɖo akɔta ɔ́ mɛ lɛ́ɛ nú yě lɔ ná xwedó e. É lɛ́ sɛ́ mɛ dó akɔta Acɛ́ɛ tɔn mɛ, Zabulɔ́ɔn tɔn mɛ kpó Nɛfutali tɔn kpó mɛ, bɔ súnnu e ɖo akɔta énɛ́ lɛ́ɛ mɛ lɛ́ɛ wá gɔ́ n'i.

³⁶ Jedenyɔ́ɔ ɖɔ nú Mawu ɖɔ: “A ɖɔ émí ná gbɔn nyɛ jí, bó hwlɛ́n Izlayɛ́li gán.

³⁷ É nyɔ́! Din ɔ́, un ná tɛ́ gbɔ̌fún ɖó fí e è nɔ só jinukún ɖe ɔ́. Ényí é jɛ zǎn mɛ, bónú ahǔn ja kɔn nyi gbɔ̌fún ɔ́ kɛ́ɖɛ́ jí, bónú fí e lɛ́dó gbɔ̌fún ɔ́ bǐ ɖo xúxú jí ɔ́, é ná nyí xlɛ̌ nú mì ɖɔ a nǎ gbɔn jǐ ce dó hwlɛ́n Izlayɛ́li, lě e a ɖɔ gbɔn é.”

³⁸ Bɔ nǔ ká nyí mɔ̌ nǔgbó. Ayǐhɔ́ngbe zǎnzǎn ɔ́, Jedenyɔ́ɔ yi zé gbɔ̌fún ɔ́ bó fyɔ́n, bɔ sin e gosín mɛ ɔ́ gɔ́ sinnugannú ɖokpó.

³⁹ Énɛ́ ɔ́, é ɖɔ nú Mawu ɖɔ: “Ma sin xomɛ dó mì ó; un ná lɛ́ byɔ́ nǔ ɖokpó we; un jló ná lɛ́ mɔ xlɛ̌ ɖěvo gbɔn gbɔ̌fún ɔ́ jí; din tɔn ɔ́, gbɔ̌fún ɔ́ kɛ́ɖɛ́ ní ɖo xúxú jí, bónú ahǔn ní ja gbɔn fí e lɛ́dó e lɛ́ɛ bǐ.”

⁴⁰ Zǎn énɛ́ ɔ́ mɛ ɔ́, Mawu bló nǔ e Jedenyɔ́ɔ byɔ́ ɛ é: gbɔ̌fún ɔ́ kɛ́ɖɛ́ ɖo xúxú jí, bɔ fí e lɛ́dó gbɔ̌fún ɔ́ bǐ nyǐ ahǔn.