Hwɛɖɔtɔ́ 21 - MAWUXÓWÉMA

Akɔta Bɛnjamɛ́ɛ tɔn ɔ́ vɔ́ jɔ

¹ Ée súnnu e ɖo togun Izlayɛ́li tɔn mɛ lɛ́ɛ sɛ ta kplé ɖo Misipa ɔ́, yě ɖɔ bó xwlé nǔ d'é jí ɖɔ émí mɛ ɖěbǔ kún ná sɔ́ vǐ émítɔn da nú súnnu e ɖo akɔta Bɛnjamɛ́ɛ tɔn mɛ lɛ́ɛ ɖě ó.

² Izlayɛ́li togun ɔ́ wá Betɛ́li, bɔ mɛ lɛ́ɛ jínjɔ́n Mavɔmavɔ nukɔn ɖo fínɛ́ káká yi jɛ gbadanu. Yě ji gbɛvíhan bɔ ɖasin wá yi dó yě ɖésú.

³ Bɔ yě ɖɔ: “Áo! Mawu Mavɔmavɔ, Mawu Izlayɛ́li tɔn! Nɛ̌ nǔ ká nyí gbɔn ɖo Izlayɛ́li, bɔ égbé din ɔ́, akɔta tɔn ɖokpó hwe sín mɛ?”

⁴ Ayǐhɔ́ngbe tɔn zǎnzǎn tɛɛn ɔ́, togun ɔ́ bló vɔ̌sákpe ɖokpó nyi tɛn énɛ́ ɔ́ mɛ, bó sá vɔ̌ e è nɔ dó zɔ ɔ́ kpó kɔnɖókpɔ́vɔ́ kpó nú Mawu Mavɔmavɔ.

⁵ Énɛ́ ɔ́ gúdo ɔ́, Izlayɛ́li ví lɛ́ɛ kanbyɔ́ yěɖée ɖɔ: “Đo Izlayɛ́li sín akɔta lɛ́ɛ bǐ mɛ ɔ́, gbɛ̌ta ɖé ɖe, bó má wá kplé e è blǒ ɖo Mawu Mavɔmavɔ nukɔn ɖo Misipa ɔ́ a?” Đó yě kó ɖɔ bó xwlé nǔ d'é jí ɖɔ mɛ ɖěbǔ gɔn Misipa ɔ́, è nǎ hu i.

⁶ Amɔ̌, din ɔ́, nǔ e gbo nɔví yětɔn Bɛnjamɛ́ɛ sín mɛ lɛ́ɛ ɔ́ nyí nǔɖé bó blá wǔ nú yě ɖɔ: “Akɔta Izlayɛ́li tɔn ɖokpó ɖo kún sú dó wɛ ɖo égbé.

⁷ Ani wɛ mǐ nǎ wa bó ná mɔ nyɔ̌nu nú súnnu e ɖo akɔta Bɛnjamɛ́ɛ tɔn ɔ́ mɛ bó gán lɛ́ɛ? Đó mǐ kó dó akpá bó xwlé nǔ d'é jí ɖo Mawu Mavɔmavɔ nukɔn ɖɔ mǐ kún ná sɔ́ vǐ mǐtɔn lɛ́ɛ da nú yě ó.”

⁸ Énɛ́ ɔ́, yě ba do ná bó ná kpɔ́n ɖɔ gbɛ̌ta ɖé ɖo akɔta Izlayɛ́li tɔn lɛ́ɛ mɛ, bó má wá Mawu Mavɔmavɔ nukɔn ɖo Misipa a jí. Bɔ è mɔ ɖɔ mɛ ɖěbǔ kún gosín Yavɛ́ci ɖo Galadi yíkúngban jí, bó wá fí e è blǒ kplé ɔ́ ɖe ɔ́ ó.

⁹ Nǔgbó, ée è sɔ́ mɛ e wá kplé ɔ́ tɛnmɛ lɛ́ɛ sín kɛ́n ɔ́, è mɔ ɖɔ Yavɛ́cinu ɖěbǔ kún wá ó.

¹⁰ Énɛ́ ɔ́, mɛ e ɖo kplé ɔ́ tɛn mɛ lɛ́ɛ sɛ́ súnnu glegbenu děgba atɔn (12.000) dó Yavɛ́ci, bó ná gbe yě ɖɔ: “Mi yi Yavɛ́ci ɖo Galadi yíkúngban jí, bó hu to énɛ́ ɔ́ mɛ nu lɛ́ɛ; mi ná hu nyɔ̌nu lɛ́ɛ kpó yɔkpɔ́vú lɛ́ɛ lɔmɔ̌ kpó.

¹¹ Mi ná hu súnnu lɛ́ɛ bǐ sésé kpó nyɔ̌nu e kó tunwun súnnu kpɔ́n lɛ́ɛ kpó. Nǔ e mi ná wa ɔ́ nɛ́.”

¹² Ée yě yi Yavɛ́ci ɔ́, yě mɔ ɖyɔ̌vǐ afɔwe (400) ɖo mɛ e ɖo to ɔ́ mɛ lɛ́ɛ mɛ bɔ yě kpo ɖo alɔ jí. Yě kplá yě wá ahwankpá Silóo tɔn ɔ́ mɛ ɖo Kanáa yíkúngban jí.

¹³ Énɛ́ ɔ́ gúdo ɔ́, mɛ e ɖo kplé ɔ́ tɛn mɛ lɛ́ɛ sɛ́ mɛ dó Bɛnjamɛ́ɛ sín mɛ e hɔn yi cí awǐnnya Hlimumɔ́ni tɔn jí lɛ́ɛ, nú yě ná yi ɖɔ nú yě ɖɔ xó ɔ́ kó gbo.

¹⁴ Bɔ Bɛnjamɛ́ɛ sín mɛ lɛ́ɛ lɛ́ kɔ yi xwé azɔn ɖokpó tlóló; énɛ́ ɔ́, è sɔ́ nyɔ̌nu e è ma hu ɖo Yavɛ́ci ǎ lɛ́ɛ ná yě; lo ɔ́, é kpé yě bǐ nu ǎ.

¹⁵ Bɛnjamɛ́ɛ sín mɛ lɛ́ɛ sín nǔ blá wǔ nǔ Izlayɛ́li ví lɛ́ɛ, ɖó Mawu Mavɔmavɔ ɖó do wǔ nú akɔta Izlayɛ́li tɔn lɛ́ɛ.

¹⁶ Gǎn e ɖo kplé ɔ́ nu lɛ́ɛ ɖɔ: “Nyɔ̌nu ɖě sɔ́ ɖo akɔta Bɛnjamɛ́ɛ tɔn ɔ́ mɛ ǎ. Nɛ̌ wɛ mǐ nǎ wa gbɔn bó ná mɔ nyɔ̌nu nú súnnu e gán lɛ́ɛ?

¹⁷ Yě mɛ e gán ɖo akɔta Bɛnjamɛ́ɛ tɔn ɔ́ mɛ lɛ́ɛ ɔ́, è ɖǒ ná bló nǔɖé bó ɖó donu nú yě, bó má lɔn nú akɔta Izlayɛ́li tɔn lɛ́ɛ ɖokpó ní hwe ó.

¹⁸ Amɔ̌, mǐ sixú ná gbe yě ɖɔ yě nǐ da vǐ mǐtɔn lɛ́ɛ ǎ, ɖó mǐ ko ɖɔ bó xwlé nǔ d'é jí ɖɔ Izlayɛ́li ví ɖěbǔ sɔ́ vǐ tɔn da nú Bɛnjamɛ́ɛ ví ɖé ɔ́, è nǎ dó nu i.”

¹⁹ Énɛ́ ɔ́, yě wá flín ɖɔ è nǎ ɖu Mawu Mavɔmavɔ sín xwe e è nɔ ɖu xwewú xwewú ɔ́ ɖo malín málín mɛ ɖo Silóo; Silóo ɔ́, gletoxo ɖé wɛ, bó ɖo Betɛ́li sín taligbé, lobo ɖo Levona sín afɔligbé, bó ká ɖo ali e gosín Betɛ́li bó wá yi Sikɛ́mu ɔ́ sín zǎnzǎnhwe jí.

²⁰ Yě kplɔ́n nǔ Bɛnjamɛ́ɛ sín súnnu lɛ́ɛ ɖɔ: “Mi yi sɔ́ miɖée hwlá dó vǐwungbo lɛ́ɛ mɛ,

²¹ bó tɔ wu ɖo fínɛ́. Hwenu e ɖyɔ̌vǐ Silóo tɔn lɛ́ɛ ná tɔ́n wá xwe ɖu gbé ɔ́, mi na tɔ́n ajijimɛ sín vǐwungbo lɛ́ɛ mɛ; mɛ ɖokpó ɖokpó ná wlí ɖyɔ̌vǐ lɛ́ɛ ɖokpó ɖokpó, bó ná kplá ɛ yi Bɛnjamɛ́ɛ yíkúngban jí bɔ é ná húzú mɛ énɛ́ ɔ́ sín asi.

²² Ényí tɔ́ yětɔn lɛ́ɛ abǐ nɔví yětɔn súnnu lɛ́ɛ wá jɛ hwɛ nú mǐ ɔ́, mǐ ná ɖɔ nú yě ɖɔ: ‘Mi kɛnklɛ́n bó jɔwǔ Bɛnjamɛ́ɛ sín súnnu lɛ́ɛ, ɖó mǐ kpé wú bó mɔ nyɔ̌nu nú yě mɛ ɖokpó ɖokpó ɖo hwenu e mǐ ɖo ahwan fun wɛ ɖo Yavɛ́ci é ǎ. Ée é má kó nyí ɖɔ midɛɛ lɛ́ɛ ɖésú wɛ sɔ́ vǐ mitɔn lɛ́ɛ da nú yě ǎ nɛ́ ɔ́, è sixú dó hwɛ mi ɖɔ mi gba akpá e mi dó é ǎ.’ ”

²³ Bɛnjamɛ́ɛ sín súnnu lɛ́ɛ ka xwedó nǔ énɛ́ ɔ́ e è kplɔ́n yě ɔ́; yě wlí nyɔ̌nu nabí e hu dó yě lɛ́ɛ ɖo ɖyɔ̌vǐ e ɖo we ɖú wɛ ɖo Silóo lɛ́ɛ mɛ, lobo kplá yě yi. Énɛ́ ɔ́, yě lɛ́ kɔ yi to yětɔn mɛ, bó vɔ́ toxo yětɔn lɛ́ɛ gbá, lobo jɛ mɛ.

²⁴ Izlayɛ́li ví ɖě lɛ́ɛ gosín fí e è blǒ kplé ɔ́ ɖe é. Mɛ ɖokpó ɖokpó yi akɔta tɔn mɛ ɖo xwédo tɔn mɛ, lobo yi jɛ ayǐkúngban e nyí étɔn ɔ́ jí.

²⁵ Hwe énɛ́ ɔ́ nu ɔ́, axɔ́sú ɖě ɖo Izlayɛ́li ǎ, bɔ mɛ ɖokpó ɖokpó nɔ́ wa nǔ e jló e ɔ́.